Coronica Ma̧ȩ 2 2
2
Charomo̧ judi taruparëremȩde Ütë tjamo̧ ja̧ bë oa cji̧däpea̧ ji̧
1Ado Charomo̧ judi ütëpea̧rä, 'Aja̧, Ütë tjamo̧ ja̧ bë oa cji̧dätäremȩcuni̧da, a̧ro̧rȩ ütëborë Jeova pio ju̧i̧iäpȩmo̧ chjacjiamȩri̧ jo̧rȩtapea̧ bë oa cji̧dätäremȩcuni̧da, ado cüdë cjo̧ro̧pea̧ bëbo japatäremȩcuni̧da, yo̧a̧ri̧ bë japatäremȩquëda' quëna̧ jo̧rȩtamȩpea̧de. 2Pio ju̧i̧iä pumȩ no̧i̧dë tjamo̧ oa ja̧bepa tänȩrëremȩdejȩrȩ. Aja̧, 70 mil pumȩ ji̧ri̧ mitërëremȩdejȩrȩ dami̧ti̧ oa chia baä tänȩpea̧ oa, ara baä tänȩpea̧ oa. Ado pio ji̧ri̧ uëri 80 mil pumȩ ji̧ri̧ a̧de mitërëremȩdejȩrȩ ta̧dë oa chjuro tänȩpea̧ oa. Ado pio ji̧ri̧ uëri 3 mil pumȩ a̧de mitërëremȩdejȩrȩ, 600 pumȩra̧ a̧de. Aja̧, tjamo̧ yo̧ji̧ri̧rȩ ja̧bepapea̧ oa, o ji̧ri̧ chjadëri̧ ja̧bepa tänȩpea̧ oa, o ji̧ri̧ ütara̧mi̧ ja̧bepa tänȩpea̧ oa a̧de mitëa̧dejȩrȩ.
3Ado Charomo̧ judi ma̧ȩ chjadürëremȩdejȩ Tiro quȩmȩräpȩ cjo̧ro̧mȩ ütë pio ju̧i̧iäpȩmo̧, Ira quȩmȩ pio ju̧i̧iäpȩmo̧. Ja̧di ta̧rëri̧ yo̧mȩrȩ ma̧ȩ chjadüa̧dejȩ: “Danȩ, ca̧ ama̧i̧ judi, Davi quȩmȩrea̧ pio judi jibëa̧ cjo̧ro̧rea̧ bë oa cji̧därërea̧ ji̧, chjadëri̧ gatë tänȩrëremȩrenȩjo̧ȩ chedoro quȩmȩ to oa. Ado danȩ, mȩnȩ pio ju̧i̧ chjadëri̧ gatë tänȩrërea̧mi̧ gatë tänȩtäremȩrenȩque pio coaiäpȩmo̧ peaja̧di. 4Danȩ, Ütë tjamo̧ ja̧ bë oa cji̧däparequede. Jeova pio ju̧i̧iäpȩmo̧ chjacjiamȩri̧ jo̧rȩtapea̧ bë oa, ca̧ Ütë pio ju̧i̧iäpȩmo̧ ba chiari̧ jo̧rȩtapea̧ bë oa cji̧däparequede. Ado pio jiro bë üdë china̧chjari̧ tutia̧ oa cjiapade. Jabechji̧ pio ju̧ri̧pȩ goaeri̧ pjȩa̧mȩ mirerea̧ oa cäë yürüparea̧ro̧jo̧ȩ Ütë pio ju̧i̧, pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ. Ado a̧ro̧rȩ Ütë tjamo̧ ja̧ oa ji̧dë ma chja̧pe oa yürüa̧ oaiä, jabechji̧ pio jiro bërämȩ mechja üdë ji̧dë ma chiapade chja̧pe oa. Ado pio jiro bërä doti̧mi̧ goe gu̧rori̧ cäë yürüparea̧ro̧jo̧ȩ peadai̧rä, ji̧tärä jadü. Ado chabado dorobo cäë yürüparea̧ro̧jo̧ȩ, järätä chjaparea̧ doro. Ado gupënȩrȩ pea a̧rȩdiäa̧ do nö̧ta, goe gu̧rori̧ cäë yürüparea̧ro̧jo̧ȩ peaja̧di. Ado eami̧ doro a̧ro̧rȩ ëba jurapea̧ do chjätäpea̧ doro, peaja̧di goe gu̧rori̧ yürüparea̧ro̧jo̧ȩ. Aja̧, ja̧di dari̧ ji̧dë ma japaparea̧rȩ ibëa̧ Ütë Jeova pio ju̧i̧ ba chia jo̧rȩtapea̧ oa. Jabechji̧ pio judi yo̧rërea̧mi̧ ji̧dë ma japaparea̧rȩ Icharai pio judiri ja̧ji̧ri̧ judiro̧. 5Ado cüdë ibëa̧ Ütë ja̧ oa cji̧de yürüpea̧ bë üdë, jabechji̧ ba chia tjamo̧mȩrȩ cjiapade. Jabechji̧ ibëa̧ Ütë judi Ütë tjamo̧ pio judide. Ado judi Ütë tjamo̧ tara, o ji̧ri̧ ja̧ ütë pio ji̧ri̧ u̧i̧ jauëchja tara, jabechji̧ jibëa̧ bë üdë ji̧dë u̧i̧ ba chiapade. Pio ju̧i̧iä jabechji̧ chjadëri̧ a̧docoe” yo̧mȩrȩ ma̧ȩ chjadürëremȩdejȩ Tiro quȩmȩräpȩ cjo̧ro̧mȩ ütë pio ju̧i̧iäpȩmo̧ Charomo̧ judi.
Currently Selected:
Coronica Ma̧ȩ 2 2: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
