Techaronichȩche Ma̧ȩ 5
5
Ano̧mȩ pio judi jana̧pea̧ pio ju̧i̧ jidata nö̧ta järi tjamo̧pea̧de
1Danȩrȩ ca̧ oti̧, pio ju̧i̧ chjiari tjamo̧ri̧ go̧ȩparea̧mi̧dëde. 'Jabechji̧ pio jiro doro ibëa̧ Ano̧mȩ judi jana̧padiibëda, pio jiro japamitërä jana̧padiibëda' quëna̧ go̧ȩparea̧mi̧dërequededibe. 2Jabechji̧ chjadëri̧ dabanȩrȩ judi jana̧pea̧ pio ju̧i̧ chjiari. Jabechji̧ garümȩ pio judi gȩnȩrä acji tai̧rëmi̧ cjiari̧ jana̧pade ibëa̧ Ano̧mȩ judi, pumȩ judiro̧ daba quëna̧dërä. 3Jabechji̧ pumȩ judiro̧ yo̧ro, "Aja̧, chjadëri̧ cjo̧ro̧ baärea̧rȩ. Uapaji̧ri̧rȩ cjo̧ro̧dërea̧rȩ jabo chjadëri̧ jida̧ oa cjo̧ro̧rea̧rȩ, goaeri̧ cjo̧ro̧ji̧ri̧rȩ" yo̧ro, cjäri̧ madejȩrȩ, chjaodëri̧ acji jana̧padejȩrȩ ma̧i̧ dari̧ bape chjaorea̧ üdë pumȩ taradai̧ tarari̧. Danȩrȩ, bo maiyi̧ pio jini̧ arabëmi̧ chjaodëri̧ tarape jänȩ. Peaja̧dimi̧ dari̧ cjiadiäpadirȩ pumȩ judiro̧ pio jiro domȩ ju̧i̧iä. Jabechji̧ chjätärea̧mi̧dëri̧ a̧dë chjäte ana̧ri̧ tarapadirȩ judiro̧. 4Jaboti̧ri̧ cjiadiädënȩrȩ ca̧ oti̧. Jabechji̧ bagönȩräpȩdënȩrȩ. Ado garümȩ judi daba quëna̧dëmȩ oa acji tai̧rëmi̧ cjiari̧ acji jana̧dëpadidibe pio jiro do üdë. 5Jabechji̧ tata u̧ri̧ marea̧rȩ. Doro ja̧ji̧ri̧ maearea̧rȩ. Ado tatarä jämi̧ dari̧ cjo̧ro̧rea̧rȩ, Ütë tjamo̧ ja̧ ma̧ȩ oa dabaji̧ri̧rȩ. Tjamo̧ davä. Bagönȩ u̧ri̧dërea̧rȩ. Gȩnȩrä jämi̧ dari̧ cjo̧ro̧dë marea̧rȩ, jabo chjadëri̧ damirerea̧mi̧ daräpȩ cjo̧ro̧rea̧rȩ, coëma cjiari̧ dabarea̧räpȩ. 6Ja̧di tara o judiro̧ mo̧a̧mi̧ dari̧ cjo̧ro̧mi̧ cjo̧ro̧dë matäreji̧ri̧rea̧rȩ, jabo na̧e chia na̧e chia cjo̧ro̧ matäreji̧ri̧rea̧rȩ a̧ro̧rȩ dadiä dadiä cjiami̧ dari̧ cjo̧ro̧pea̧ oa, a̧ro̧rȩ chjai̧dë oa aja̧parea̧ decjiari̧ cjo̧ro̧pea̧ oa.#5:6 Jabechji̧ mo̧a̧mi̧ dari̧ cjo̧ro̧ji̧ri̧ pio judiro̧ na̧e chiadë madirȩ. Järidë madirȩ. Ado uapai̧ da pio ju̧i̧ a̧dë jo̧rȩtami̧ dari̧ cjo̧ro̧dirȩ. Jabechji̧ mo̧a̧mi̧ dari̧ cjo̧ro̧ji̧ri̧ pio judiro̧ bagönȩrä jo̧rȩtami̧ dari̧ cjo̧ro̧dirȩ, na̧e chiadë maearë. Ado ja̧di dari̧ cjo̧ro̧dëtäreji̧ri̧rea̧rȩ. 7Jabechji̧ gȩnȩrä mo̧a̧dirȩ pumȩ judiro̧. Ado mo̧a̧ji̧ri̧ pio judiro̧, jabechji̧ na̧e chiadë madirȩ. Ado ërü oaiä yu̧i̧pe jäji̧ri̧ pio judiro̧ peaja̧di gȩnȩrä japadirȩ, na̧e chiadëji̧ri̧rȩ. 8Jabo danȩrȩ ibëa̧ oti̧, doro ja̧ji̧ri̧rea̧rȩ. Tatami̧ daräpȩ cjo̧ro̧rea̧rȩ. Ja̧di tara chjadëri̧ jo̧rȩta matäreji̧ri̧rea̧rȩ tüdüa̧mi̧ darä cjo̧ro̧rea̧mi̧ dari̧, chjai̧dë oa aja̧parea̧ decjiari̧. Ado chjuari̧ quëna̧täreji̧ri̧rea̧ro̧jo̧ȩ Ütë tjamo̧ ju̧i̧, ibëa̧ oti̧ pio ji̧ri̧ ea tjamo̧ji̧ri̧rȩ. Jabechji̧ a̧ro̧rȩ quëna̧ji̧ri̧pea̧ tara, domano guadiami̧ darea̧rȩ, ibë jidamȩ ina̧rea̧mi̧ da oa chiaji̧ri̧rȩ. Jabechji̧ ibëa̧ tjübë oa jidapea̧ oa, ibëa̧ maito oa jidapea̧ oa goami̧ darea̧rȩ. Jabechji̧ a̧ro̧rȩ Ütë tjamo̧ ju̧i̧iäpȩmo̧ chjuari̧ quëna̧ üdë, a̧ro̧rȩ ibëa̧ oti̧ pio ji̧ri̧iäpȩmo̧ ea̧ üdë, jabechji̧ ibëa̧ maito oa jidapea̧ oa ina̧rea̧mi̧ dade, chjiparari chiamȩ ina̧rea̧mi̧ dade. Ado a̧ro̧rȩ chjadëri̧ chjätäpea̧ ji̧ chjuari̧ jidata̧ üdë, jabechji̧ ibëa̧ tjübë oa jidapea̧ oa yoarea̧mi̧ dade, chjiparari chiamȩ pachochorea̧mi̧ dade. Ado Ichiae judi ibë eami̧ oa japarea̧ dachea oa, jabechji̧ ja̧di dari̧ japatäreji̧ri̧rea̧rȩ chjadëri̧ jida̧ oa cjiapea̧ oa, chjadëri̧ ina̧ oa cjiami̧ dari̧ cjiapea̧ oa. 9Jabechji̧ Ütë tjamo̧ judi ibë mitërërea̧ ji̧, ju̧i̧ ja̧ ërecjia̧ pio ju̧i̧ ana̧ri̧ tarapea̧ oa mitëdërëremȩdiibe jabo jabechji̧ chjätärea̧ dapea̧ oa mitërëremȩdiibe. Tjamo̧ davä. Ano̧mȩ Jechu Quiricho pio ju̧i̧iä chjätärea̧ dapea̧ oa mitërëremȩdiibe. 10Jabechji̧ pio judide pio ibë chjiari ano̧ mire ja̧borëremȩ judi a̧ro̧rȩ pio ju̧i̧ nö̧ta cjo̧ro̧rea̧ dapea̧ oa. Jabechji̧ pio judi jana̧rä, jabë ja̧bodëa̧ pio ji̧ri̧ mitëpadiibe, ja̧boa̧ji̧ri̧ pio ji̧ri̧bo. 11Ja̧di tara ji̧dë ma a̧do chjaochji̧vä dibëa̧ dëbëti̧ra̧ chia mȩnȩro̧ a̧doa̧mi̧. Aja̧, odai̧ tarari̧ jo̧rȩtarea̧ decjiari̧ a̧do chjaochji̧vä mȩnȩro̧ ju chiape järea̧mi̧ dari̧.
Tjamo̧ jidaji̧ri̧ pio ji̧ri̧ ba chia datä chi̧dëearëremȩdejȩrȩ Pablo judi
12Danȩrȩ ca̧ oti̧, ba chia datä earea̧ro̧dibe dibëa̧ chjarerä ja̧bepaji̧ri̧ pio ji̧ri̧, tjamo̧ jidaji̧ri̧ pio ji̧ri̧. Jabechji̧ Ano̧mȩ pio judi tänȩa̧ oa ja̧bepadirȩ dibë chjadëri̧ jidapea̧ oa, dibë chi̧dëeapea̧ oa. Jabechji̧ pio ji̧ri̧ ja̧ chja̧oerä cjiaji̧ri̧ oa yabo ëba baämi̧ dari̧ japadiro̧dibe, tjamo̧ yo̧ji̧ri̧mi̧ dari̧ ja̧bepaji̧ri̧rȩ. 13Pio ju̧i̧iä yo̧rea̧ro̧dibe mȩnȩro̧ pio ji̧ri̧iäpȩmo̧ tjamo̧ri̧ ba chia datä, pio ji̧ri̧iäpȩmo̧ tjamo̧ri̧ eatä. Jabechji̧ pio dibë chjiari chjadëri̧ ja̧bepadirȩ. Ado mȩnȩro̧ ütëbodärärë, jabechji̧ cja̧rȩmȩ chji̧ chiami̧ dari̧ jo̧rȩta matäreji̧ri̧nȩrȩ dibëa̧ dëbëti̧ra̧ chia ba chia darea̧mi̧ dari̧.
Quëna̧ji̧ri̧ ütëbodärä oa chjadëri̧ a̧dopea̧de
14Ado yo̧tarea̧ro̧dibe ibëa̧ oti̧. Jabechji̧ to̧bari̧ chi̧dëeajȩrȩ ja̧bepadëri̧ cjiaji̧ri̧ pio ji̧ri̧. Aja̧, judiro̧ chumi̧dëri̧ cjiachea oa, to̧bari̧ chi̧dëeajȩrȩ. Ado järidëpea̧ pio ji̧ri̧bo chjadëri̧ a̧dochji̧jȩrȩ. Ado oëra̧diäpai̧ daji̧ri̧ pio ji̧ri̧bo chjadëri̧ a̧dochji̧jȩrȩ. Jabechji̧ ma̧ chjua jo̧rȩtaji̧ri̧rȩ da machji̧jȩrȩ pumȩ ütëbodärä oa, bücjüri̧ cjiaji̧ri̧rȩ. 15Ado eami̧rȩ dibë chjai̧dëri̧ japarä judi, jabechji̧ bapë japadë machji̧vä. Bapë ërecjiadë machji̧jo̧ȩ jabo jabechji̧, ji̧dë ma järichji̧vä pio ju̧i̧iäpȩmo̧ chjadëri̧ japapea̧ ji̧. Ji̧dë ma järichji̧vä pumȩ ütëbodärä oa chjadëri̧ japapea̧ ji̧.
Ja̧di dari̧ cjo̧ro̧täreji̧ri̧dirȩ quëna̧ji̧ri̧ judiro̧
16Ado danȩrȩ, ji̧dë ma ma̧ chiadëri̧ cjiachji̧vä. 17Ji̧dë ma ni̧bächji̧vä dibëa̧ Ama̧i̧ ju̧i̧. 18Ado mȩnȩro̧ eami̧ oa chjätärä, jabechji̧ Ütë tjamo̧ judi chjadëri̧ japadiibëda' quëna̧ jo̧rȩtatäreji̧ri̧nȩrȩ. Tjamo̧ davä. Mȩnȩro̧ eami̧ chjadë oa chjätärä, mȩnȩro̧ eami̧ chjai̧dë oa chjätärä, 'jabechji̧ Ütë tjamo̧ judi chjadëdiibëda, jënȩ dabami̧ japadida, pio judi ütarë jo̧rȩtami̧ chjätäa̧ro̧da, jabechji̧ Jechu Quiricho pio judiri ja̧ mapea̧ tara, ja̧di dari̧ chjätätä eadiibëda' quëna̧ jo̧rȩtaji̧ri̧rȩ cjo̧ro̧täreji̧ri̧nȩrȩ, 'chjadëri̧ japadiibëda' quëna̧ jo̧rȩtaji̧ri̧rȩ.
19Ado dibë chi̧dëeamȩ ju̧i̧, Tjo tjamo̧ pio ju̧i̧ tuti jiadadëchji̧jo̧ȩ. Jabechji̧ dibëa̧ icjararä bëpera̧pea̧mȩ pio ju̧i̧ cjo̧dë oa chöröpami̧ dari̧ jiadadëchji̧jo̧ȩ. 20Ado Ütërë daba tänȩa̧ ni̧bämȩ pio ju̧i̧ badë dadëchji̧jo̧ȩ jabo ta̧rë ja̧bochji̧jo̧ȩ bücjü darea̧ decjiari̧. 21Jabo dëdë, ütarë ta̧rëpea̧ maeade jabo. Ado tjamo̧i̧ cjiari̧ baämȩ ma̧ȩ pio ju̧i̧mo̧i̧ acji mitëmi̧ dari̧ quëna̧chji̧jo̧ȩ, chjuari̧ quëna̧ji̧ri̧rȩ. 22Ado danȩrȩ, eami̧ti̧ chjai̧dë pio ju̧i̧ a̧dë jachipadärämi̧ dari̧ cjo̧ro̧chji̧vä a̧dë bagurami̧ dari̧. Jabechji̧ chjai̧dë ja̧ queri̧mi̧ daräpȩ cjiadëchji̧vä, jabo chjai̧dë oa a̧dë bagurami̧ dari̧ japachji̧vä.
Cjiadiärea̧ Ma̧ȩ
23Ado yaba̧ cüdë ji̧dë u̧i̧ go̧ȩpabea yaboi̧, jabechji̧ Ütë tjamo̧ pio ju̧i̧iä goë cjo̧dë yürümȩmi̧ dari̧ ni̧bätämi̧ cjiarequededibe. Jabechji̧ Ütë tjamo̧ judi ibë ma̧ chjupi̧ cjiari̧ jo̧rȩtarea̧ yürümȩ pio judi china̧chjari̧ tutitädidibe codë oa mȩnȩro̧ coëma cjiari̧ cjo̧ro̧pea̧ oa. Codë oa chjadëri̧ jidatädidibe o judiro̧ dibë aechide yo̧rea̧mi̧dëri̧ ibëa̧ Ano̧mȩ Jechu Quiricho pio judi jana̧rä yuro. Aja̧, dibëa̧ tjo pio ju̧i̧, dibëa̧ chji̧ pio ju̧i̧, dibëa̧ icjara pio ju̧i̧ chjadëri̧ jidatädidibe co chjami̧ da oa Jechu judi jana̧rä yuro. 24Jabechji̧ pio dibë mitëpea̧ oa ëna̧diärëremȩ pio judi jidapadidibe davä, jënȩ yo̧a̧mi̧ ma̧diä cjia tänȩrea̧ decjiari̧, ji̧dëdiä ni̧bärea̧ decjiari̧.
25Ca̧ oti̧, pio ibë chjiari ji̧dë ma goë cjo̧dëchji̧vä Ütë tjamo̧ pio ju̧i̧iä. 26Ado danȩrȩ, cjäri̧ri̧ cjia jo̧rȩtaji̧ri̧rȩ jearea̧ chjadürea̧ro̧jȩrȩ pio idëpȩ quëna̧ji̧ri̧ ütëbo oa. Aja̧, chjadëri̧ jeachji̧jȩrȩ ibëa̧ oti̧ ji̧ri̧ ju̧ri̧pȩ.
27Ado danȩrȩ, Ano̧mȩ pio ju̧i̧ ja̧ ma̧ȩrä yo̧tarea̧ro̧dibe mȩnȩro̧ pio yoa ma̧ȩ oa go̧ȩ ni̧bätä ibëa̧ oti̧ ütëbodärärë ta̧rërea̧mi̧ dari̧.
28Aja̧, ibëa̧ Ano̧mȩ Jechu Quiricho pio judi cjäri̧ri̧ cjia jo̧rȩtatädidibe, dibë ana̧ri̧ a̧dorea̧mi̧ dari̧. Aja̧ ca̧ oti̧, pio ju̧i̧mo̧ go̧ȩparequededibe. Chjadëri̧ cjo̧ro̧ cjiaibe. Pablo
©2021 Global Partners, All Rights Reserved