Cori̧tio Ma̧ȩ 1 15
15
Quiricho judi bëdüa̧ duri oa, pumȩ ji̧ra̧ oa na̧rȩrëremȩdejȩrȩ.
1Ado yaba̧ ca̧ oti̧, cüdë dibë no̧mȩ tjamo̧ri ja̧ a̧ra̧ano̧rërea̧ ma̧ȩ pio ju̧i̧ chjiari jo̧rȩta tänȩtämi̧ cjiarequededibe, Quiricho pio ju̧i̧ chjiari ma̧ȩ chjadëi̧ pio ju̧i̧ chjiari. Jabechji̧ pio ju̧i̧ ta̧rë ja̧boji̧ri̧pea̧renȩro̧jo̧ȩ. Pio ju̧i̧ chjuari̧ quëna̧ji̧ri̧pea̧renȩro̧jo̧ȩ. 2Jabechji̧ pio jiro ma̧ȩ oa dibëa̧ chji̧ra̧ quëna̧ oaiä, chjätärea̧ darëreji̧ri̧nȩrȩ. Jabo dëdë, mȩnȩro̧ orë jabomo̧ quëna̧cji̧ quëna̧ japea̧rä judi, jabo ya maeara̧ quëna̧rä judi, cjäri̧ manȩrȩ, tjamo̧ri̧ chjätärea̧ dadëa̧nȩrȩ. Ado pio ju̧i̧iä ado chjereno̧ jo̧rȩta tänȩtämi̧ cjiarequededibe cüdë dibë no̧mȩ tjamo̧ri ja̧ a̧ra̧ano̧rërea̧ pio ju̧i̧ chjiari.
3Cüdë dabapea̧ ma̧ȩ pio ju̧i̧ a̧ra̧ano̧rëremȩrequededibe a̧dë chjäte ba chiamȩ ma̧ȩ pio ju̧i̧. Jabechji̧ Quiricho pio ju̧i̧ chjiari ma̧ȩ oa, a̧ro̧rȩ chjai̧dëri̧ japea̧ ba oa ano̧ mire ja̧borëremȩ pio ju̧i̧ chjiari ma̧ȩ oa yürürëremȩrequededibe, no̧mȩ tjamo̧ri̧ ja̧ go̧ȩparëreji̧ri̧ pio judiro̧ go̧ȩparërea̧mi̧. 4Tjamo̧ davä. Quiricho ju̧i̧ na̧ra̧ pio ju̧i̧ chjiari ma̧ȩ oa, ado tjarari̧ do chjätä ëte bëdüa̧ pio ju̧i̧ chjiari ma̧ȩ oa yürürëremȩrequededibe, no̧mȩ tjamo̧ri̧ ja̧ go̧ȩparëreji̧ri̧ pio judiro̧ go̧ȩparërea̧mi̧. 5Ado Quiricho judi ja̧borëremȩrȩ bëdüa̧rä, jabechji̧ pio jȩaiäpȩmo̧ irä darea̧mi̧ dari̧ na̧rȩrëremȩdejȩ Pedro pio ju̧i̧. Ado pio ju̧i̧ na̧rȩa̧ duri oa, jibëa̧ jadü cja̧rȩmȩ maea oa na̧rȩrërea̧ ji̧, jabechji̧ jibëa̧ jadü ütëbo oa na̧rȩrëremȩdejȩrȩ 11 oa, ji̧mo̧ cjiaji̧ri̧ oa. 6Ado ji̧dë duri oa no̧i̧dërë irä darëreji̧ri̧diro̧jo̧ȩ peaja̧di. Tjamo̧ davä. No̧i̧dërë, 500dërë, jabo ji̧dë u̧i̧ ji̧ra̧rȩ, oti̧ maearë ji̧mo̧ darëreji̧ri̧diro̧jo̧ȩ, irä daji̧ri̧rȩ. Ado irä darëreji̧ri̧ pio judiro̧ no̧i̧dërë jabëti̧ cjiadirȩ. Jabë cjo̧ro̧ baädirȩ. Jabo orë ji̧ra̧dërë, dëdë, ja̧borëreji̧ri̧dirȩ judiro̧. 7Aja̧, ado ji̧dë duri oa, Santiago pio ju̧i̧ irä darea̧mi̧ dari̧ na̧rȩrëremȩdejȩ peaja̧di. Ado pio ju̧i̧ na̧rȩa̧ duri oa, na̧rȩrëremȩdejȩrȩ jënȩ chjadüa̧ ütëbo oa. 8Ja̧dëa ji̧ cjiadiäa̧mȩ pio ju̧i̧ na̧rȩrëremȩdique pio coabo. Jabechji̧ ütara̧ doro ara̧ oa cjiadëri̧ cjiamȩ boi̧chji̧mi̧ da oa, acäri pio judiri go̧düdëri̧ cjiamȩ boi̧chji̧mi̧ da oa na̧rȩrëremȩdique, Jechu pio ju̧i̧iäpȩmo̧ quëna̧dëri̧ cjiamȩ ju̧i̧. 9Jabechji̧ nö̧tadërequedejȩrȩ Jechurë chjadüa̧ pio ji̧ri̧. Jabechji̧ cüdë ma̧i̧ dari̧ japea̧ oaiä, cüdë Ütë tjamo̧ ja̧ pumȩ pio ji̧ri̧ conȩda̧ oaiä, cjäri̧ marequede, pumȩ chjadëdë tjamo̧requede cüdë. Ado pio ju̧i̧iä jabechji̧, Jechurë chjadüa̧ oa ja̧bepapea̧ ji̧ tjamo̧ri̧ nö̧tadërequede. 10Jaboti̧ri̧ mitërëremȩdique Ütë tjamo̧ judi. Jabechji̧ a̧dë chjäte cjäri̧ri̧ cjia damȩrȩ mitërëremȩdique Jechurë chjadüa̧ oa ja̧bepapea̧ oa. Ado pio coa mitëa̧rä, ma̧diä tänȩdëa̧reconȩ jabo pio ju̧i̧ ja̧ oa ana̧ tjamo̧ri̧ ja̧beparëremȩrequede ji̧dëri̧. Jabechji̧ Jechurë chjadüa̧ pio judiro̧ ana̧ri̧ ja̧bepea̧räbo, jabechji̧ pio ji̧ri̧iä ji̧dë u̧i̧ ana̧ri̧ ja̧beparëremȩrequede. Jabo cjäri̧ marequede jabo. Ca̧ea̧ ma̧na̧ri̧ ja̧bepadëa̧requede. Ca̧ ju chiarea̧ra̧ pio ju̧ri̧ra̧ ja̧bepadëa̧requede jabo Ütë tjamo̧ pio judiri ma̧na̧mȩ ju chiarea̧ra̧ pio ju̧ri̧ra̧ ja̧beparëremȩrequede. 11Ado ja̧di tara a̧ro̧rȩ, Jechurë chjadüa̧ pio judiro̧ ütëborë, jabechji̧ cja̧rȩmȩ coëma cjiadiäa̧ ma̧ȩ maea oa a̧ra̧ano̧rea̧ro̧dibe. Jabechji̧ mȩnȩro̧ peadëri ja̧ quëna̧rërea̧ ma̧ȩ pio ju̧i̧mo̧i̧ a̧ra̧ano̧rea̧ro̧dibe, ado cja̧rȩmo̧ ma̧ȩdë oa.
Ja̧boa̧ji̧ri̧ pio judiro̧ bëdüpea̧ pio ju̧i̧ chjiari go̧ȩparëremȩde Pablo judi.
12A̧ro̧rȩ dibë a̧ra̧ano̧rërea̧ ji̧, jabechji̧ Quiricho judi ja̧borëremȩrȩ bëdüa̧ pio ju̧i̧ chjiari a̧ra̧ano̧rëreji̧ri̧rea̧ro̧dibe. Tjamo̧ davä. Ütë tjamo̧ judi Jechu pio ju̧i̧ bëdü tänȩpea̧ pio ju̧i̧ chjiari a̧ra̧ano̧rëreji̧ri̧rea̧ro̧dibe. Jabo pio jiro ma̧ȩ oa ta̧rëa̧ji̧ri̧borë, ¿tjana̧ ju̧i̧iä oëra̧ yo̧nȩrȩ mȩnȩro̧ orë? “Jabechji̧ ja̧boa̧ji̧ri̧ pio ji̧ri̧ ja̧ icjara üdë ado chjereno̧ bëdüa̧ oa cjiadëpade” yo̧a̧bea oa goë ta̧rëa̧requededibe. ‘¿Tjana̧pea̧ ji̧ ja̧di ta̧rëri̧ yo̧cjivadiro̧?’ quëna̧ jo̧rȩtarequededibe. 13Jabechji̧ ja̧boa̧ji̧ri̧ pio judiro̧ ado chjereno̧ tjamo̧ri̧ bëdürea̧ dadë marä judi, peaja̧di dari̧ bëdürea̧ dadëa̧täremȩde Quiricho judi. 14Ado Quiricho judi tjamo̧ri̧ bëdürea̧ dadëa̧rä judi teracaba ma̧ȩ maea oa a̧ra̧ano̧a̧täreji̧ri̧rea̧ro̧dibe, badëri̧ järätäji̧ri̧rȩ. Ado a̧ro̧rȩ dibë teracaba ma̧ȩ maea oa a̧ra̧ano̧a̧rä judi, peaja̧di teracaba ma̧ȩ maea oa quëna̧ji̧ri̧pe baga̧täreji̧ri̧nȩrȩ mȩnȩro̧. 15Tjamo̧ davä ca̧ oti̧, Quiricho judi tjamo̧ri̧ bëdüdëa̧rä judi, ado ja̧boa̧ji̧ri̧ pio judiro̧ tjamo̧ri̧ bëdürea̧ dadëparä judi, cjäri̧ marea̧rȩ, a̧ro̧rȩ, Jechurë chjadüa̧ pio judiro̧ ma̧ȩ chjádë yürüa̧täreji̧ri̧rea̧ro̧dibe Ütë tjamo̧ pio ju̧i̧ chjiari. Jabechji̧ Ütë tjamo̧ judi Quiricho pio ju̧i̧ bëdü tänȩa̧ pio ju̧i̧ chjiari a̧ra̧ano̧a̧ oaiä, ma̧ȩ chjádë yürüa̧täreji̧ri̧rea̧ro̧dibe. Jabechji̧ ja̧boa̧ji̧ri̧ pio judiro̧ ütëborë tjamo̧ri̧ bëdürea̧ dadëparä judi, peaja̧di dari̧ bëdü tänȩdëa̧täremȩdejȩ Quiricho ju̧i̧ Ütë tjamo̧ judi. 16Jabechji̧ ja̧boa̧ji̧ri̧ pio judiro̧ tjamo̧ri̧ bëdürea̧ dadëparä judi, peaja̧di dari̧ bëdürea̧ dadëa̧täremȩde Quiricho pio judi. 17Ado Quiricho judi tjamo̧ri̧ bëdüdëa̧rä judi, teracabari̧ quëna̧ji̧ri̧pe baga̧täreji̧ri̧nȩrȩ. Ado teracabari̧ quëna̧ji̧ri̧pea̧rä judi, jabechji̧ mȩnȩro̧ chjai̧dëri̧ japea̧ üdë tjamo̧ri̧ duridëparȩa̧ oa cjiadë matäremȩde. 18Tjamo̧ davä. Quiricho judi tjamo̧ri̧ bëdüa̧ oa cjiadërä judi, jabechji̧ dabadëpea̧ oa cjiami̧ dari̧ aeno̧a̧ oa cjiadiäa̧täreji̧ri̧dirȩ Quiricho ju̧i̧ quëna̧reji̧ri̧ pio judiro̧, ja̧boa̧ji̧ri̧ pio judiro̧. Jabechji̧ judiro̧ chjätärea̧ datärea̧ ji̧, chjätärea̧ dadëa̧täreji̧ri̧dirȩ. 19Ado a̧ro̧rȩ, jabë ja̧bodëa̧ pio judiro̧ tjamo̧ri̧ bëdüdëmȩ pio ju̧i̧iäpȩmo̧ quëna̧ji̧ri̧rȩ cjo̧ro̧rä judi, cjäri̧ marea̧rȩ, a̧dë chjäte ma̧diä ma̧diä cjiaji̧ri̧rȩ cjo̧ro̧täreji̧ri̧rea̧rȩ. Jabechji̧ a̧dë chjäte mö̧na̧mi̧ dari̧ cjiadiätäreji̧ri̧rea̧rȩ. Tjamo̧ davä. A̧ro̧rȩ ja̧boa̧rä Ütë tjamo̧ pio ju̧i̧iäpȩ tjamo̧ri̧ go̧düdärärea̧ dadërä judi, a̧ro̧rȩ tjamo̧ri̧ jidatarea̧ chiadë maearë cjo̧ro̧rä judi, cjäri̧ marea̧rȩ ca̧ oti̧, o ji̧ri̧iä, quena̧dëji̧ri̧ pio ji̧ri̧iä ji̧dë u̧i̧ mö̧na̧mi̧ dari̧ cjiadiätäreji̧ri̧rea̧rȩ, a̧dë chjäte goae tjamo̧dëri̧ cjo̧ro̧ji̧ri̧rȩ. Tjamo̧ davä, a̧ro̧rȩ ma̧i̧ dari̧ u̧i̧pea̧ oa cjiarërea̧ oaiä, a̧ro̧rȩ jidataji̧ri̧rȩ cjo̧ro̧rërea̧ oaiä, jabechji̧ quëna̧dëji̧ri̧ pio ji̧ri̧iä ji̧dë u̧i̧ badëri̧ cjiadiätäreji̧ri̧rea̧rȩ.
20Jabo ta̧rëchji̧coe ca̧ oti̧. Tjamo̧i̧ cjiari̧ yo̧requededibe. Quiricho judi ja̧borëremȩrȩ tjamo̧ri̧ bëdüa̧de. Jabechji̧ tjamo̧ bëdümȩ pio judide. O ji̧ri̧ ja̧ yaboi̧ bëdümȩde. Jabechji̧ ji̧dë duri oa ütara̧ doro, ja̧borëreji̧ri̧ pio judiro̧ cho̧rë bëdü mapadiro̧jo̧ȩ yabo bëdürëremȩ ju̧i̧, pjäë chorë japarëmi̧ cjiari̧. Danȩrȩ, pjäë cho üdë cja̧rȩmȩrȩ joe chjapa ëte, cjiadiämȩ pio judi cho̧rëdiäpadejȩ joechjape järi̧. Ado peaja̧dimi̧ dari̧ cho̧rë bëdüpadiro̧jo̧ȩ yabo bëdürëremȩ pio ju̧i̧, ja̧boa̧ji̧ri̧ judiro̧. 21,22Jabechji̧ cja̧rȩmȩ üi̧ pio ju̧i̧iiä, Ada̧ pio ju̧i̧iä taruparëremȩde ja̧bopea̧ üdë. Ado pio ju̧i̧iä pio judiri ja̧ji̧ri̧ pio judiro̧ ütëborë pio ju̧i̧ cho̧rë ja̧bo ga̧re baä maeadiro̧jo̧ȩ. Jabo danȩrȩ, ado cja̧rȩmo̧ üi̧ pio ju̧i̧iä, Jechu pio ju̧i̧iä taruparëremȩde bëdürea̧ üdë. Ado pio ju̧i̧ nö̧ta cja̧rȩmȩpe baga̧ji̧ri̧ pio judiro̧ cho̧rë bëdü mapadiro̧jo̧ȩ. Tjamo̧ davä. Ütara̧ doro, Jechu pio ju̧i̧ nö̧ta cja̧rȩmȩpe baga̧ji̧ri̧ pio ji̧ri̧ ja̧ icjara oa bëdü tänȩpadejȩ Ütë tjamo̧ judi, Jechu pio ju̧i̧ bëdü tänȩrëremȩ pio judi.
23Jabo pio jiro doro bëdüa̧ oa cjiapaji̧ri̧ pio judiro̧, jabechji̧ ütara̧mi̧ bëdüpadirȩ. Jabechji̧ Quiricho pio judi o ji̧ri̧ ja̧ yaboi̧ bëdürëremȩde pjäë üdë yabochjarë go̧düa̧mi̧ dari̧. Ado ja̧dëa ji̧ ji̧dë duri oa Quiricho pio judi ado jana̧rä, jabechji̧ pio ju̧i̧ ja̧ maearë bëdüpaji̧ri̧rȩ cho̧rë bëdüpadiro̧jo̧ȩ yabocharë buiumi̧ damȩ pio ju̧i̧, pjäërë japarëmi̧ cjiari̧. 24Ado judirä tarupapade cjiadiärea̧ japamitë üdë. Ado pio jiro japamitërä Quiricho judi pio jȩa dëbëpe chjaoji̧ri̧ chjö̧na̧i̧därä oa acji tai̧mȩmi̧ dari̧ boadäräpadejȩrȩ dëbëparea̧ decjiari̧. Tjamo̧ davä. Dai chirirä cjo̧ro̧ji̧ri̧ ütëti̧ pio ji̧ri̧, tjamo̧ yo̧ji̧ri̧ pio ji̧ri̧, ado eami̧rȩ jauëchjarea̧ chiaji̧ri̧ pio ji̧ri̧ boadäräpadejȩrȩ. Ado pio ji̧ri̧ boadärä ëte, jabechji̧ jënȩ tjamo̧ yo̧rea̧ pio ju̧i̧ ano̧ mire yürüpadejȩ jibëa̧ Ama̧i̧ Ütë pio ju̧i̧. Jabechji̧ pio ju̧i̧ ja̧ chja̧oerä ma cjiarërea̧ ji̧, ano̧ mire yürüpadejȩ jibëa̧ Amai̧ pio ju̧i̧iäpȩmo̧, pio judi tjamo̧ yo̧mȩrȩ ano̧ mire cjiapea̧ oa, pio ju̧i̧ ja̧ chja̧oerä ano̧ mire cjiapea̧ oa. 25Jabechji̧ Quiricho pio judi tjamo̧ yo̧mȩrȩ acji tai̧mȩmi̧ dari̧ japapadejȩrȩ jȩa eadëji̧ri̧ pio ji̧ri̧. Tjamo̧ davä. Pio jȩa eadëji̧ri̧ pio ji̧ri̧ acji tai̧mȩmi̧ dari̧ japapadejȩrȩ pio judiro̧ ütëbodärärë chjadëri̧ boadäräa̧ oa cjiarä yuro, pio ju̧i̧ ja̧ chjo̧aerämo̧ cjo̧ro̧ji̧ri̧pea̧rä yuro. 26Ado pio judiro̧ ütëborë boadäräa̧ oa cjiarä, cjiadiäa̧mȩ pio ju̧i̧bo boadärämi̧ dari̧ japapadejȩ ja̧borea̧ pio ju̧i̧. Jabechji̧ jiro decjiaparȩpadejȩ. Tjamo̧ davä. Ja̧borea̧ decjiari̧ japajade Quiricho judi. 27Jabechji̧ ja̧borea̧ pio ju̧i̧bo boadärämi̧ dari̧ japapadejȩ. Ado peaja̧di ta̧rëri̧ go̧ȩpa tänȩrëremȩde Ütë tjamo̧ judi Quiricho pio ju̧i̧ chjiari. Ta̧rëchji̧vä:
“Aja̧, Ütë tjamo̧ pio judi yo̧rërea̧ oaiä, jabechji̧ tjamo̧ yo̧mȩrȩ cjiade chjö̧na̧i̧därärë pio ju̧i̧ ja̧ chja̧oerämo̧ cjiapea̧ oa, ütëbodärärë pio ju̧i̧ ja̧ ma̧ȩrämo̧ cjo̧ro̧pea̧ oa.”
Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë, Ütë tjamo̧ judi Joja pio ju̧i̧ chjiari yo̧rërea̧ üdë. Jabechji̧ cjiadiärea̧ japamitërä Quiricho pio ju̧i̧ ja̧ chja̧oerämo̧ cjiadiäpade chjö̧na̧i̧därärë. Aja̧, ütëbodärärë pio ju̧i̧ ja̧ chja̧oerä cjiadiäpadirȩ. Jabo danȩrȩ, pio judimo̧rȩ cjiadiädëpade. Quiricho pio ju̧i̧iäpȩmo̧ tjamo̧ yo̧rea̧ yürürëremȩ pio judimo̧rȩ jibëa̧ Ja pio ju̧i̧ ja̧ chja̧oerä cjiadiädëpade. Tjamo̧ davä. Jäja pio judi joja ja̧ chja̧oerä cjiadiädëpade, jabo joja pio judi jäja ja̧ chja̧oerä ano̧ mire cjiadiäpade. 28Ado ja̧dëa ji̧ cjiadiäa̧ japamitërä, Ütë tjamo̧ judi pareaparërea̧ chjö̧na̧i̧därärë Quiricho pio ju̧i̧ ja̧ chja̧oerämo̧ cjiadiäa̧rä, ütëbodärärë pio ju̧i̧ ja̧ ma̧ȩrämo̧ cjo̧ro̧rä, jabechji̧ Ja tjamo̧ pio judi jibëa̧ ma̧na̧ri̧ jo̧rȩtamȩrȩ, jibëa̧ Ama̧i̧ Ütë pio ju̧i̧ ja̧ chja̧oerä ano̧ mire cjiadiäpade. Jabechji̧ Ütë tjamo̧ pio judi a̧dë chjäte tjamo̧ yo̧mȩrȩ cjiapea̧ oa, pio judimo̧rȩ ji̧dë u̧i̧ a̧dë chjäte tjamo̧ yo̧mȩrȩ ano̧ mire cjiadiäpea̧ oa, jabechji̧ ütëbodärärë pio ju̧i̧ ja̧ chja̧oerämo̧ ano̧ mire cjiadiäpadirȩ cja̧rȩmȩ a̧dë cjiadiärea̧mi̧dëri̧. Tjamo̧ davä. Ütëbodärärë pio ju̧i̧ ja̧ ma̧ȩrämo̧ ano̧ mire cjo̧ro̧padirȩ, Ütë tjamo̧ pio ju̧i̧ chjiari coëma cjiari̧ jo̧rȩtaji̧ri̧rȩ, ‘Aja̧, Ütë tjamo̧ pio judimo̧dida, ado cja̧rȩmo̧rȩ nö̧tadë madiji̧da’ quëna̧ jo̧rȩtaji̧ri̧rȩ.
29Jabo danȩrȩ, dibëa̧ chjarerä oëra̧ quëna̧ji̧ri̧ pio judiro̧borë quëna̧dirȩ bëdürea̧ pio ju̧i̧ chjiari̧. Jabechji̧ jibëa̧ pumȩrea̧ pio judiro̧ ja̧boa̧räbo, pio ji̧ri̧ chjiari ano̧ mire go̧ȩ cjaeä chuda̧ oa cjiadirȩ. 'Aja, pio a̧ro̧rȩ pio ji̧ri̧ chjiari ano̧ mire chuda̧ oa cjiarä judi, ja̧boa̧ji̧ri̧ pio ji̧ri̧ chjiari ano̧ mire go̧ȩ cjaeä chuda̧ oa cjiarä judi, jabechji̧ bëdürea̧ dapadiro̧da' quëna̧ jo̧rȩtadirȩ ano̧ mire go̧ȩ cjaeä chuda̧ oa cjiadirȩ ja̧boa̧ji̧ri̧ pio ji̧ri̧ chjiari. Jabechji̧ teracabari̧ jo̧rȩtaji̧ri̧borë ja̧di dari̧ japadirȩ. Jabo danȩrȩ, bëdürea̧ decjia tjamo̧rä judi, ¿tjana̧ ju̧i̧iä ja̧di dari̧ japatäreji̧ri̧dirȩ?
30Ado danȩrȩ ca̧ pumȩ, bëdürea̧ decjiarä judi, ¿tjana̧ ju̧i̧iä ji̧dë ma cjo̧ro̧täreji̧ri̧rea̧rȩ uapai̧ da tjamo̧räpȩ? Ja̧boa̧ji̧ri̧ pio judiro̧ ado chjereno̧ tjamo̧ri̧ bëdürea̧ dadëparä judi, ¿tjana̧ ju̧i̧iä ji̧dë ma uapai̧ dari̧ ja̧bepatäreji̧ri̧rea̧rȩ pio a̧ro̧rȩ ibëa̧ Ano̧mȩ ja̧ oa? Jabechji̧ bëdürea̧ decjia tjamo̧rä judi, ¿tjana̧ ju̧i̧iä ji̧dë ma a̧ra̧ano̧täreji̧ri̧rea̧rȩ a̧ro̧rȩ ja̧bopai̧ daräpȩ ju̧ri̧? 31Danȩrȩ, doti̧mi̧ ja̧bo tänȩtadiro̧coe. Doti̧mi̧ acji jana̧mi̧ dari̧ japadiro̧coe. Tjamo̧dë yo̧dërequededibe jabo tjamo̧i̧ cjiari̧ yo̧requededibe ca̧ oti̧. Jabo danȩrȩ, mȩnȩro̧ ibëa̧ Ano̧mȩ Jechu Quiricho pio ju̧i̧ nö̧ta cja̧rȩmȩpe bagami̧ dari̧ cjiadiäa̧ tara, pio mȩnȩro̧ tjamo̧ri̧ bëdürea̧ dapa tara, jabechji̧ ma̧ chiadëri̧ cjiamȩrȩ goaeri̧ ni̧bärequede pio dibë chjiari, doti̧mi̧ ja̧bopai̧ damȩborë. 32Jabo danȩrȩ ca̧ oti̧, tjamo̧ri̧ bëdürea̧ decjiarä judi, ¿tjana̧ ju̧i̧iä ji̧dë ma cjiadiä cjiadiä cjiamȩrȩ cjo̧ro̧täreremȩrequede pio yi Epjechoräpȩ, Ütë tjamo̧ ja̧ ma̧ȩ oa a̧ra̧ano̧pea̧ oa? Danȩrȩ, ma̧i̧ dari̧ japadiro̧coe. Ma̧i̧ da chjuaji̧ri̧mi̧ darë japadiro̧coe. Chirirä cjo̧ro̧ji̧ri̧ pio judiro̧mi̧ darë ërecjiaji̧ri̧rȩ acji jana̧ chjaodiro̧coe. Conȩda̧diro̧coe. Ado pio ju̧i̧iä iëno̧ë ta̧rërequededibe. Danȩrȩ, bëdürea̧ decjiarä judi, ja̧boa̧ji̧ri̧ pio judiro̧ tjamo̧ri̧ bëdürea̧ dadëparä judi, ¿tjana̧ ju̧i̧iä ji̧dë ma cjiadiätäremȩrequede pio yi? Cjäri̧ marequede ca̧ oti̧, bëdürea̧ decjiarä judi, tjamo̧ri̧ cjiadiädëtäremȩrequede, jabo chjaodëri̧ baätäremȩrequede ca̧ bëräpȩ. Jabechji̧ tjamo̧ri̧ bëdürea̧ decjiarä judi, a̧ro̧rȩ tjamo̧ri̧ jidatarea̧ chiadërä judi, jabechji̧ airi̧ cjia airi̧ cjia a̧dope chjaotäreji̧ri̧rea̧rȩ. Tjamo̧ davä ca̧ oti̧. Bëdürea̧ decjiarä judi, jabechji̧ a̧ro̧rȩ pio yoa chirirä jabë cjo̧ro̧a̧ nö̧ta, jabechji̧ babui̧ra̧ airi̧ cjia airi̧ cjia a̧dopatäreji̧ri̧rea̧rȩ goaeri̧ jarapea̧ oa, mairi̧ jurapea̧ oa. Aja̧ ca̧ oti̧, a̧ro̧rȩ ja̧boa̧ duri oa tjamo̧ri̧ cjo̧ro̧rea̧ chiadërä judi, jabechji̧ pumȩrȩ no̧mȩ tjamo̧ri ja̧ yo̧rërea̧bea oa ji̧dë ma airi̧ cjia airi̧ cjia a̧dopatäreji̧ri̧rea̧rȩ, goaeri̧ cjo̧ro̧rea̧ pio ju̧i̧mo̧i̧ jo̧rȩtaji̧ri̧rȩ. 33Jabo cjäri̧ manȩrȩ ca̧ oti̧. Ja̧di ta̧rëri̧ yo̧ji̧ri̧ pio ji̧ri̧iä u̧i̧pea̧ oa cjiadëtäreji̧ri̧nȩrȩ. “Bëdürea̧ decjiade” yo̧ji̧ri̧ pio ji̧ri̧iä u̧i̧pea̧ oa cjiadëtäreji̧ri̧nȩrȩ, jabo järi tjamo̧täreji̧ri̧nȩrȩ pio jiro pumȩ pio ji̧ri̧ a̧dë jachipadärämi̧ dari̧ cjiapea̧ oa. Jabechji̧ mȩnȩro̧ oëra̧ jo̧rȩtaji̧ri̧ pio ji̧ri̧ nö̧ta jadü cjiarä judi, pio ji̧ri̧ cho̧rë jo̧rȩtape jäpai̧ darenȩro̧jȩrȩ, oëra̧ jo̧rȩtaji̧ri̧pe bagari̧. Ado mȩnȩro̧ coëma cjiari̧ cjo̧ro̧rërea̧ ji̧, cjäri̧ madiro̧dibe, chjadëdëparȩpai̧ dadiro̧dibe, mȩnȩro̧ chjadëri̧ jo̧rȩtarea̧ decjiape bagari̧. Jabechji̧ na̧e chjiavä. 34Ado pio ju̧i̧iä yo̧requededibe ca̧ oti̧. Poë cürë jo̧rȩtachji̧vä bëdü järi̧ jo̧rȩtarea̧mi̧ dari̧. Jabechji̧ chjai̧dë pio ju̧i̧ japë ano̧chji̧vä. Chia chia, pio mȩnȩro̧ orë Ütë tjamo̧ pio ju̧i̧ ji̧dë u̧i̧ dabatärea̧ ji̧, cjäri̧ marenȩro̧jo̧ȩ, jabë tjamo̧ri̧ dabadërenȩro̧jo̧ȩ. Ado pio ju̧i̧iä idëri̧ cjia tjamo̧täreji̧ri̧nȩrȩ.
A̧ro̧rȩ ja̧borëreji̧ri̧ pio judiro̧ bëdüa̧rä, jabechji̧ ado cja̧rȩmo̧ icjara oa chiaji̧ri̧rȩ bëdüparea̧rȩ.
35Jabo eami̧ pumȩ üdë, iëno̧ë ta̧rërea̧ taramȩ pio judi iëno̧ë ta̧rëpai̧ dade. "Aja̧, ja̧boa̧ji̧ri̧ pio judiro̧ bëdürä, ¿tjana̧ icjarara̧ bëdüpai̧ dadirȩ?” yo̧mȩrȩ iëno̧ë ta̧rëpai̧ dade. 36Jabo cjäri̧ madique ca̧ oti̧, ¿tjana̧ ju̧i̧iä ja̧di ta̧rëri̧ iëno̧ë ta̧rëcjivadi? quëna̧ jo̧rȩtatäremȩreconȩ. ‘Jabechji̧ urëdi oa jo̧rȩtadëmȩmi̧ dari̧ jo̧rȩtamȩdida’ quëna̧ jo̧rȩtatäremȩreconȩ. Danȩrȩ, mȩnȩro̧ dibëa̧ tjadoräpȩ eami̧ cho oa ponȩrä, cho iremȩ üdë popë chiapade. Jabechji̧ cho iremȩ üdë popë chiadërä judi, cho tjoremȩ üdë buiudëpade. Tjamo̧ davä ca̧ oti̧. Cho iremȩ üdë popë chiadërä judi, ja̧bomi̧ dari̧ popë chiadërä judi, jabechji̧ cho tjoremȩ üdë buiudëpade. Jabechji̧ cho iremȩ üdë ja̧boa̧mi̧ dari̧ popë chia̧rämo̧ buiupade cho tjoremȩ üdë. 37Ado danȩrȩ, pjäë cho ponȩmȩ pio judi, jabechji̧ cho pio ju̧i̧mo̧i̧ ponȩpea̧de. To pio ju̧i̧ ponȩrea̧mi̧dëde. Pjäë go ponȩrea̧mi̧dëde. Pjäë to ponȩrea̧mi̧dëde. Cho pio ju̧i̧mo̧i̧ ponȩpea̧de. Ado danȩrȩ, cho tjoremȩ üdë buiurä, cjäri̧ made, choremȩ pio judimi̧ dari̧ cjitëdëde, jabo jabechji̧ tjaoëpai̧ dari̧ cjitëde. Tjamo̧ davä. Choremȩmi̧ dadëri̧ cjitëde tjaoëpai̧ darë. 38Jabechji̧ cho tjoremȩ üdë peaja̧ mape bagari̧ ano̧ mi̧rȩ cjitëde icjara peaja̧ra̧, tjaoëpai̧ da maeara̧. Jabechji̧ icjara peaja̧mi̧ dari̧ na̧rȩdiibe choremȩ üdë. Tjaoëpai̧ dari̧ na̧rȩdiibe. Jabechji̧ Ütërë ütarë yo̧rërea̧mi̧ ano̧ mire cjitëde. Jabechji̧ cho nö̧tai̧rȩ ponȩa̧ oa cjiarä, jabechji̧ tjaoëpe järi̧ buiude, chorëremȩmi̧ dadëri̧.
39Ado danȩrȩ, dai chirirä cjo̧ro̧ji̧ri̧ pio judiro̧ ütëborë, jabechji̧ cja̧rȩmȩ icjara maea oa chiadëdirȩ jabo tjaoëpai̧ dari̧ cjia maeadirȩ. Jabechji̧ cja̧rȩmȩ icjara ma ja̧didë jabo icjara ji̧ra̧ tjamo̧de. Danȩrȩ, ibëa̧ icjara üdë tjaoëde. Jabechji̧ cho̧ pio ju̧i̧ ja̧ icjarami̧ dadëde. Ado pua icjara üdë peaja̧di tjaoëde. Baca pio ju̧i̧ ja̧ icjarami̧ dadëde. Tjaoë maeade. 40Ado danȩrȩ, a̧dëräpȩ cji̧däa̧ üdë peaja̧di jibëa̧ icjarami̧ da oa goade. Tjamo̧ davä. Büë üdë, gupënȩ üdë, do üdë peaja̧di jibëa̧ icjarami̧ da oa goade. Ado Ütë tjamo̧ judi dai chirirä cjo̧ro̧ tänȩrërea̧ üdë, peaja̧di tjaoëde. Ado peaja̧di jibëa̧ icjarami̧ da maea oa chiade. Jabo danȩrȩ, a̧dëräpȩ cjiamȩ üdë dai chirirämȩ ja̧ pio judimi̧ dadëde. Jabechji̧ tjaoëde. A̧dëräpȩ cji̧däa̧ oa cjiamȩ üdë chjacjiamȩde, jabo dai chirirämȩ ja̧ pio judimi̧ dadëde. Ado dai chirirämȩ üdë peaja̧di chjacjiamȩde, jabo a̧dëräpȩ cji̧däa̧ oa cjiamȩ pio judimi̧ dadëde. Jabechji̧ a̧dëräpȩ cji̧däa̧ üdë ado cja̧rȩmo̧ chjacjiamȩde. Ado dai chirirä ja̧mȩ icjara üdë, ado cja̧rȩmo̧ chjacjiamȩde. 41Ado a̧dëräpȩ cji̧däa̧ oa cjiamȩ üdë, jabechji̧ chjacjiamȩ maeade chjö̧na̧i̧rȩ. Danȩrȩ, do üdë goae tarari̧ mo̧ëdiibe. Ado gupënȩ üdë peaja̧di chjacjiamȩri̧ tatadiibe. Ado büë üdë tata bara baämi̧ dari̧ cjiade. Ado orë ji̧dë u̧i̧ tatade doparä go̧dümȩ büëmi̧ darë. Tjamo̧ davä. Chjacjiamȩ tjamo̧ri̧ baradiibe a̧dëräpȩ cji̧däa̧ üdë chjö̧na̧i̧rȩ. Do üdë ado cja̧rȩmo̧ chjacjiamȩ tjamo̧de. Ado gupënȩ üdë ado cja̧rȩmo̧ chjacjiamȩ tjamo̧de. Ado büë üdë peaja̧di ado cja̧rȩmo̧ chjacjiamȩ tjamo̧de. Ado büë nö̧tai̧rȩ jibëa̧ chjacjiamȩ tjamo̧ oa chia maeade.
42Ado danȩrȩ ca̧ oti̧, peaja̧di dari̧ cjiadiä mapadirȩ bëdüa̧ oa cjiapaji̧ri̧ pio judiro̧. Jabechji̧ Ütë tjamo̧ judi ja̧boa̧ji̧ri̧ pio ji̧ri̧ bëdü tänȩrä, tjaoëpai̧ da maea oa bëdü tänȩpadejȩrȩ. Danȩrȩ, pumȩ judiro̧ pumȩ ja̧ icjararemȩ oa na̧ra̧rä, jabechji̧ ja̧borea̧ chia maea oa, daburi ja̧ maea oa, chjuadëpe bagarea̧ chiamȩ maea oa na̧ra̧diro̧jo̧ȩ. Jabo Ütë tjamo̧ judi pumȩ icjara oa bëdü tänȩrä, jabechji̧ bucho ana̧ cjo̧ro̧rea̧ chiamȩ icjara oa bëdü tänȩpadejȩ, ja̧borea̧ chiadëmȩ icjara oa. 43Danȩrȩ, pumȩ judiro̧ ja̧boa̧mȩ ja̧ icjararemȩ oa na̧ra̧rä, pumȩmi̧ dadëpea̧mȩ oa na̧ra̧diro̧jo̧ȩ cjari̧dami̧ dapea̧mȩ oa, ju chiadë oa, eami̧ japarea̧ chiadëpea̧mȩ oa. Jabo Ütë tjamo̧ judi pio jiro icjara oa bëdü tänȩrä, ju chia tjamo̧pea̧mȩ oa bëdü tänȩpadejȩ, chjacjiamȩ tjamo̧ oa. 44Jabechji̧ pumȩ judiro̧ ja̧boa̧mȩ ja̧ icjararemȩ oa na̧ra̧rä, jabechji̧ daburi ja̧mȩ maea oa na̧ra̧diro̧jo̧ȩ, pio yoa chirirämo̧ cjo̧ro̧pea̧ icjara oa. Jabo Ütë tjamo̧ pio judi bëdü tänȩrä, jabechji̧ a̧dërimȩ icjara pio ju̧i̧ bëdü tänȩpadejȩ, tjaoëpai̧ da tjamo̧pea̧mȩ oa, a̧dëräpȩ cjo̧ro̧pamȩ icjara oa. Jabechji̧ a̧dëräpȩ yu̧a̧därärea̧mi̧ dari̧ bëdü tänȩpadejȩ bucho ana̧ cjo̧ro̧rea̧ chiamȩ icjara oa. 45Danȩrȩ ca̧ oti̧, ¿tjana̧ yo̧diibe ma̧ȩ üdë pearämȩ üi̧ pio ju̧i̧ chjiari? Tjana̧dë, ta̧rëchji̧vä Ütë tjamo̧ judi go̧ȩpa tänȩrërea̧ ma̧ȩ pio ju̧i̧:
"Pearärëremȩ üi̧ pio judi, Ada̧ pio judi, jabechji̧ Ütërë pareapea̧ oaiä pumȩpea̧de.”
Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ada̧ judi pearärëremȩ üi̧ pio judide, jabo ji̧dë duri oamȩ üi̧ üdë Quiricho pio judide. Ado Quiricho pio judi jabechji̧ pearärëremȩ üi̧ pio judi japarea̧mi̧dë pio ju̧i̧ japarëremȩde. Tjamo̧ davä. Duri oamȩ üi̧ pio judi bucho ana̧ cjo̧ro̧rea̧ yürürëremȩde. Ja̧boa̧mi̧ dari̧ cjiaji̧ri̧ pio ji̧ri̧ bucho ana̧ cjo̧ro̧rea̧ yürürëremȩde. Jabechji̧ bucho ana̧ cjo̧ro̧rea̧ yürümȩ tjo pio judide.
46Jabo danȩrȩ ca̧ oti̧, a̧ro̧rȩ a̧dëräpȩ ju̧ri̧ cjo̧ro̧pea̧ icjara pio ju̧i̧ mitërea̧ dabea yaboi̧, jabechji̧ pio yoa chirirä cjo̧ro̧pea̧ icjara pio ju̧i̧ yabochja mitërea̧ darea̧rȩ. Jabo ji̧dë duri oa japamitë chjätä ëte, dëdë, a̧dëräpȩ ju̧ri̧ bucho ana̧ cjo̧ro̧pea̧ icjara pio ju̧i̧ ano̧ mire mitërea̧ daparea̧rȩ. Jabechji̧ pio yoa chirirämo̧ cjo̧ro̧pea̧ pio ju̧i̧mo̧ taruparëremȩde ibëa̧ icjara üdë. 47Danȩrȩ, pearärëremȩ üi̧ pio judi, Ada̧ pio judi, jabechji̧ daburi pio judiri ja̧rëremȩde. Jabechji̧ dabu pjo̧no̧i̧ra̧ pio ju̧ri̧ra̧ chopea̧ oa cjiarëremȩde. Jabo danȩrȩ ca̧ oti̧, duri oamȩ üi̧ judi, Jechu pio judi, a̧dërimȩde. 48Danȩrȩ, daburimȩ pio judi cjiarërea̧mi̧ cjia maeadirȩ daburimȩ pio judiri ja̧ji̧ri̧ judiro̧. Ado a̧dërimȩ pio judi cjiami̧ cjia maeapadirȩ a̧dërimȩ pio judiri ja̧ji̧ri̧ judiro̧. 49Jabechji̧ a̧ro̧rȩ dabu pjo̧no̧rëremȩ üi̧ pio ju̧i̧ cho̧rëdiärërea̧mi̧ ano̧ mire cho̧rëdiäparea̧ro̧jo̧ȩ a̧dërimȩ üi̧ pio ju̧i̧ peaja̧di. Danȩrȩ, daburimȩ pio judi cjiarërea̧mi̧ cjia maearea̧rȩ. Ado a̧dërimȩ pio judi cjiami̧ cjia maeaparea̧rȩ peaja̧di.
50Jabo ‘tjana̧ yo̧cjivadi’ quëna̧ jo̧rȩtadëchji̧vä jabo chjadëri̧ ta̧rëchji̧coe ca̧ oti̧. Danȩrȩ, ibëa̧ icjara üdë ja̧bopea̧ maeade. Jabechji̧ Ütërë yo̧a̧ chja̧oeräpȩ yu̧a̧rea̧mi̧dëde. A̧dëräpȩ ju̧ri̧ yu̧a̧rea̧mi̧dëde. Jabechji̧ ja̧borea̧ chiamȩ icjara üdë bucho ana̧ cjo̧ro̧rea̧mi̧dëde. Ja̧borea̧ chiamȩ icjara üdë ja̧borea̧ chiadë maearë cjo̧ro̧mȩräpȩ yu̧a̧rea̧mi̧dëde. Ado pio ju̧i̧iä Ütë tjamo̧ judi icjara peaja̧ maea oa yürüpadiibe, a̧ro̧rȩ pio ju̧i̧ nö̧ta bucho ana̧ ëba cjiapea̧ oa, a̧ro̧rȩ bucho ana̧ cjo̧ro̧rea̧ chiamȩ icjarara̧ cjo̧ro̧pea̧ oa.
Ütara̧ doro icjara pea chja mape bagapadirȩ quëna̧ji̧ri̧ judiro̧.
51Danȩrȩ, chjadëri̧ ta̧rëchji̧coe ca̧ oti̧. Pearä goadia̧ oa cjiarërea̧ ma̧ȩ pio ju̧i̧ ta̧rë tänȩtämi̧ cjiarequededibe. Jabechji̧ a̧ro̧rȩ quëna̧ji̧ri̧ pio judiro̧ ütëborë ja̧botärea̧ ji̧, a̧ro̧rȩ ütëborë ja̧boa̧mi̧ ja̧botärea̧ ji̧, jabechji̧ a̧ro̧rȩ orë chjaodëri̧ tjaoëdiä tjaoëdiä cjiape jäparea̧rȩ. 52Jabechji̧ ütara̧ japamitërä, a̧ro̧rȩ daba quëna̧dërä, pjurarea̧ üdë ea cjia tänȩrä, jabechji̧ ja̧boa̧ji̧ri̧ pio judiro̧ yabochjarë bëdüpadirȩ icjara peaja̧ maearë, bucho ana̧ cjo̧ro̧pea̧ maearë. Tjamo̧ davä. Pjurarea̧ üdë ea cjia tänȩrä, cjiadiämȩ pjurarea̧ üdë ea cjia tänȩrä, jabechji̧ ja̧boa̧ji̧ri̧ pio judiro̧ yabochjarë bëdüpadirȩ icjara peaja̧ maearë. Ado judiro̧ bëdüa̧ duri oa, jabë ja̧bodëa̧ji̧ri̧ pio judiro̧borë tjaoëpai̧ dape jäparea̧rȩ. Icjara peaja̧ maearë, bucho ana̧ cjo̧ro̧rea̧ chia maearë tjaoëpe bagaji̧ri̧rȩ cjitëparea̧rȩ peaja̧di a̧dë chjäte chjaodëri̧. 53Jabechji̧ ibëa̧ icjara üdë, ja̧borea̧ chiamȩ icjara pio judi tjaoëdiäpe bagapea̧ chiade icjara peaja̧ mape bagari̧, bucho ana̧ cjo̧ro̧rea̧ chiamȩ icjarape bagari̧.
54Ado ja̧dëa ji̧ ibëa̧ icjara üdë, ja̧borea̧ chiamȩ icjara üdë bucho ana̧ cjo̧ro̧rea̧ chiamȩ icjarape baga̧rä, tapuchjape bagamȩ icjara üdë tapuchjape bagadëmȩ icjarape baga̧rä, jabechji̧ tjamo̧i̧ cjiari̧ cjiadiäpade Ütë tjamo̧ judi jabërä go̧ȩpa tänȩrërea̧ ma̧ȩ üdë. Ta̧rëchji̧vä:
"Ja̧borea̧ decjiapea̧de. Jabechji̧ bucho ana̧ boadäräa̧ oa cjiami̧ dari̧ cjiade jabo̧rea̧ üdë, pumȩ pio ji̧ri̧ ado chjereno̧ ja̧bo tänȩrea̧mi̧dëri̧. 55Jabechji̧ ja̧borea̧ üdë pumȩ pio ji̧ri̧ ja̧bo tänȩmi̧ dari̧ acji tai̧mi̧ dari̧ japarërea̧ ji̧, cjäri̧ madejȩrȩ, ja̧di dari̧ japarea̧ dadë madejȩrȩ yaba̧. Ado ja̧borea̧ üdë pumȩ ji̧ri̧ ë chiamȩmi̧ dara̧ pio ju̧ri̧ra̧ guë ja̧bo tänȩmi̧ dari̧ japarërea̧ ji̧, cjäri̧ madejȩrȩ, ja̧di dari̧ japarea̧ dadë madejȩrȩ yaba̧. Jabechji̧ ja̧borea̧ üdë boadäräa̧ oa cjiami̧ dari̧ cjiade pumȩ pio ji̧ri̧ ado chjereno̧ ja̧bo tänȩrea̧mi̧dëri̧."
Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë ja̧borea̧ pio ju̧i̧ chjiari, ja̧borea̧ üdë boadäräa̧ oa cjiami̧ dari̧ cjia̧ pio ju̧i̧ chjiari. 56Jabo ¿tjana̧de ja̧bo tänȩrea̧ chiamȩ ëmi̧ da üdë? Tjana̧dë, jabechji̧ pumȩ judiro̧ chjai̧dëri̧ japea̧ pio judide. Jabechji̧ chjai̧dë oa japea̧ üdë ja̧bopea̧ maeade. Ado judiro̧ chjai̧dëri̧ japea̧ üdë, jabechji̧ chjadë maearä cjiami̧ dari̧ cjiade Moicherë ichi chjö̧na̧i̧ ma̧ȩ oa go̧ȩparërea̧ pio ju̧i̧iä. 57Jabo ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ pio ju̧i̧iäpȩmo̧, ‘chjadëri̧ japea̧diibëda’ quëna̧ jo̧rȩtaji̧ri̧rȩ. Jabechji̧ ibëa̧ Ano̧mȩ Jechu Quiricho pio ju̧i̧iä, jabechji̧ ja̧borea̧ pio ju̧i̧ goae tarari̧ boadärärea̧ yürürëremȩdiibe.
58Ja̧di tara ca̧ oti̧, ji̧dë ma chjuari̧ cjiami̧ dari̧ quëna̧chji̧vä Ütë tjamo̧ pio ju̧i̧, jaejaeami̧ dape järea̧ decjiari̧. Jabechji̧ Ütë tjamo̧ ja̧ ma̧ȩ pio ju̧i̧iä to̧bari̧ cjiami̧ dari̧ cjiachji̧vä, ju baebaeami̧ dari̧ jo̧rȩtarea̧ decjiari̧. Jabechji̧ chumi̧dëri̧ cjiadë machji̧vä, jabo ji̧dë ma järichji̧vä ibëa̧ Ano̧mȩ ja̧ oa chjadëri̧ ja̧bepapea̧ oa. Jabechji̧ chjadëri̧ dabanȩrȩ ca̧ oti̧. Danȩrȩ, mȩnȩro̧ eami̧ oa ibëa̧ Ano̧mȩ ja̧ oa ja̧beparä badëri̧ cjiadiädëpanȩrȩ, jabo chjadëri̧ ba ano̧a̧ oa cjiapanȩrȩ. Tjamo̧ davä. Mȩnȩro̧ pio ju̧i̧ ja̧ oa eami̧ oa ja̧bepea̧ oaiä mö̧na̧mi̧ dari̧ cjiadiädëpanȩrȩ, jabo chjadëri̧ ba ano̧a̧ oa cjiadiäpanȩrȩ ‘chjadëri̧ ba ano̧dëdicoada’ quëna̧rea̧ decjiari̧. Ado pio ju̧i̧iä jabechji̧ järi tjamo̧chji̧vä. Aja̧ ca̧ oti̧, ja̧di ta̧rëri̧ yo̧requededibe. Dibë ea tjamo̧ tara, ja̧di ta̧rëri̧ yo̧requededibe.
Currently Selected:
Cori̧tio Ma̧ȩ 1 15: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
