Cori̧tio Ma̧ȩ 1 14
14
Ütë tjamo̧ ja̧ ma̧ȩ oa a̧ra̧ano̧pea̧ üdë ji̧dë u̧i̧ ba chiade tjaoë ma̧ȩ oa ni̧bäpea̧ pio ju̧i̧iä.
1Ado earea̧ üdë a̧dë chjäte ba chia tara, jabechji̧ järichji̧vä dibëa̧ pumȩ pio ji̧ri̧ tjamo̧ri̧ eapea̧ ji̧. Ado pio ju̧i̧ uëri dae ja̧bo dami̧ dari̧ jo̧rȩtachji̧vä Tjo tjamo̧ judi yürüchäa̧ pio ju̧i̧ goapea̧ oa. Tjamo̧ davä ca̧ oti̧, ja̧beparea̧ ba chia oa, Tjo tjamo̧ judi yürüchäa̧ ja̧beparea̧ pio ju̧i̧ goapea̧ oa dae ja̧bo dami̧ dari̧ jo̧rȩtachji̧vä. Ado ji̧dë u̧i̧ järitäreji̧ri̧nȩrȩ a̧dë chjäte ba chiamȩ ja̧beparea̧ pio ju̧i̧ goapea̧ ji̧. Tjamo̧ davä. Ütë tjamo̧ ja̧ ma̧ȩ oa ni̧bä chjaopea̧ pio ju̧i̧, Ütërë ea jana̧ chjadüa̧ oa ni̧bä chjaopea̧ pio ju̧i̧ goapea̧ ji̧ ji̧dë u̧i̧ järitäreji̧ri̧nȩrȩ ca̧ oti̧, ji̧dë u̧i̧ ba chiamȩ goapea̧ oa. 2Jabechji̧ eami̧ quëna̧mȩ judi ni̧bärä, jënȩ dabapadëa̧ ma̧ȩ oa Tjo tjamo̧ pio ju̧i̧iä ni̧bärä, cjäri̧ madejȩrȩ, tjamo̧ri̧ a̧dodë madejȩrȩ ta̧rë chaji̧ri̧ pio ji̧ri̧ bapë ta̧rërea̧mi̧dë tara. Jabechji̧ judi Ütë tjamo̧ pio ju̧i̧iäpȩmo̧ ma ni̧bä oaiä o judiro̧ bapë ta̧rëdë madiro̧jo̧ȩ, jabo Ütë tjamo̧ pio judimo̧rȩ bapë ta̧rëdejȩ. 3Jabo Ütërë ea jana̧ chjadüa̧ oa ni̧bämȩ pio judi ni̧bärä, jȩnȩ dabapea̧ ma̧ȩra̧ ni̧bämȩ pio judi ni̧bärä, jabechji̧ bapë ta̧rërea̧mi̧ dari̧ ni̧bä chjaode quëna̧ji̧ri̧ pio judiro̧ ju chiape järea̧mi̧ dari̧, pio judiro̧ järipe järea̧mi̧ dari̧. Tjamo̧ davä ca̧ oti̧, pumȩ judiro̧ bapë ta̧rërea̧mi̧ dari̧ ni̧bä chjaomȩ pio judi, jabechji̧ a̧ra̧ano̧de quëna̧ji̧ri̧ pio judiro̧ cjatäcjie jo̧rȩtape järea̧mi̧ dari̧, chjichjipami̧ dari̧ cjiadiäpe järea̧mi̧ dari̧. 4Jabo jënȩ dabapadëa̧ ma̧ȩ oa ni̧bämȩ pio judi ni̧bärä o judiro̧ ju chiape bagarea̧ dadëdirȩ. Ni̧bämȩ pio judi, dëdë, ju chiape bagarea̧ dade, jabo o judiro̧borë ju chiape bagatärea̧ ji̧, ju chiape järea̧ dadë madirȩ bapë ta̧rëdëa̧ oaiä. Jabo Ütërë ea jana̧ chjadüa̧ oa ni̧bämȩ pio judi a̧ra̧ano̧rä, dëdë, ju chiape bagarea̧ dadirȩ a̧dopaji̧ri̧ pio judiro̧ ütëborë judiro̧ bapë ta̧rë ma tara. 5Danȩrȩ ca̧ oti̧, mȩnȩro̧ ütëborë ni̧bärea̧ chia̧rä judi, mȩnȩro̧ ütëborë Tjo tjamo̧ pio ju̧i̧iä dabapadëa̧ ma̧ȩ oa ni̧bärea̧ chia̧rä judi chjadëtäremȩde. Jabo danȩrȩ, ji̧dë u̧i̧ chjadëtäremȩde mȩnȩro̧ ütëborë ni̧bä chjaorea̧ chia̧rä judi, Ütërë ea jana̧ chjadüa̧ ma̧ȩ pio ju̧i̧ ni̧bä chjaorea̧ chiarä judi. Danȩrȩ ca̧ oti̧, Ütë tjamo̧ ja̧ ma̧ȩ oa ni̧bä chjaoa̧ üdë ji̧dë u̧i̧ ba chiade. Tjamo̧ davä. Ütërë ea jana̧ chjadüa̧ oa ni̧bärea̧ üdë ji̧dë u̧i̧ ba chiade mȩnȩro̧ dabapadëa̧ ma̧ȩ oa ni̧bäpea̧ pio ju̧i̧iä. Jabechji̧ o judiro̧ bapë ta̧rërea̧mi̧ dari̧ ni̧bä chjaomȩ judi chjadëri̧ a̧dodejȩrȩ ta̧rë chaji̧ri̧ pio ji̧ri̧. Jabo cjäri̧ madejȩrȩ, jënȩ dabapadëa̧ ma̧ȩ oa ni̧bämȩ judi chjadëri̧ a̧dodëdejȩrȩ. Jabo dëdë, ado cja̧rȩmo̧rȩ goë ni̧bäa̧rämo̧ ta̧rërea̧ dapadirȩ a̧dopaji̧ri̧ judiro̧. Ado cja̧rȩmo̧rȩ goë ni̧bäa̧rämo̧ ju chiaparȩa̧ oa cjiapadirȩ. Ado pio ju̧i̧iä jabechji̧, o ji̧ri̧ tjamo̧ri̧ ju chiaparȩmȩ ja̧beparea̧ pio ju̧i̧ goapea̧ ji̧ dae ja̧bo dami̧ dari̧ jo̧rȩtachji̧vä.
6Danȩrȩ ca̧ oti̧, cüdë pio dibëiäpȩ go̧düdäräa̧rä bapë ta̧rërea̧mi̧dë ma̧ȩra̧ ni̧bä chjaorä judi, cüdë dabapadëa̧ ma̧ȩra̧ ni̧bä chjaorä judi, ¿yö̧ta dari̧ a̧doa̧ oa cjiatäreji̧ri̧nȩrȩ? Cjäri̧ manȩrȩ ca̧ oti̧, chjadëri̧ a̧doa̧ oa cjiadëtäreji̧ri̧nȩrȩ. Jabo cüdë dibë bapë ta̧rërea̧mi̧ dari̧ ni̧bä chjaorä judi, Ütë tjamo̧ judi coa na̧rȩa̧ pio ju̧i̧ chjiari ni̧bä chjaorä judi, dëdë, chjadëri̧ a̧doa̧ oa cjiatäreji̧ri̧nȩrȩ. Tjamo̧ davä. Cüdë, Ütë tjamo̧ judi pio coa daba tänȩa̧ pio ju̧i̧ chjadëri̧ a̧ra̧ano̧rä judi, Ütërë ea jana̧ chjadüa̧ oa ni̧bä chjaorä judi, cüdë Ütë tjamo̧ pio ju̧i̧ chjiari chjadëri̧ a̧ra̧ano̧rä judi, jabechji̧ chjadëri̧ a̧doa̧ oa cjiatäreji̧ri̧nȩrȩ mȩnȩro̧ chjadëri̧ bapë tarë ma tara.
7Ado peaja̧dimi̧ dari̧ cjiade carecareguarea̧ pio ju̧i̧iä, pjurarea̧ pio ju̧i̧iä. Jabechji̧ pjurarea̧ pio ju̧i̧ pjuramȩ pio judi chjadëri̧ pjuradërä judi, ütara̧mi̧ pjuradërä judi, cjäri̧ madiro̧jo̧ȩ, ta̧rë chaji̧ri̧ pio judiro̧ goaeri̧ ta̧rëtärea̧ ji̧, goaedëri̧ ta̧rë chapadiro̧jo̧ȩ. Jabechji̧ pjuramȩde judi ütara̧mi̧ pjuradëa̧ oaiä, ‘¿tjana̧ earea̧ oa pjuracjivadi, bapë ta̧rërea̧mi̧dëdida’ quëna̧ jo̧rȩtaji̧ri̧rȩ ta̧rë chapadiro̧jo̧ȩ chjadëri̧ bapë ta̧rëdëa̧ oaiä. Ado peaja̧dimi̧ dari̧ jo̧rȩtaji̧ri̧rȩ ta̧rë chapadiro̧jo̧ȩ carecareguamȩ pio ju̧i̧. Tjamo̧ davä. Judi ütarami̧ japadërä judi, jabomo̧ chjaocjiami̧ dari̧ japarä judi, cjäri̧ madiro̧jo̧ȩ, bapë ta̧rërea̧mi̧dëri̧ ta̧rë chapadiro̧jo̧ȩ, goaedëri̧ ta̧rë chaji̧ri̧rȩ. 8Ado danȩrȩ, guadia üdë, tjamo̧ pjuramȩ guadia pio judi, jabechji̧ pjurarea̧ pio ju̧i̧ ütarami̧ pjura̧ oaiä tjamo̧ri̧ dabadirȩ guadia judiro̧ jibë acji jana̧ji̧ri̧ pio ji̧ri̧ chjiari. Jabo danȩrȩ, judi ütarami̧ pjuradërä judi, cjäri̧ madiro̧jo̧ȩ, guadia pio judiro̧ bapë ta̧rëdëpadiro̧jo̧ȩ. Jabechji̧ judiro̧ ütëborë chjaodëri̧ jëdano̧tärea̧ ji̧, acji jana̧ji̧ri̧ pio ji̧ri̧ dëbëpe chjaopea̧ oa jabërä chjadëri̧ jëdano̧tärea̧ ji̧, jëdano̧rea̧ dadëpadirȩ pjurarea̧ pio ju̧i̧ bapë ta̧rërea̧ dadëa̧ oaiä. 9Ado peaja̧dide pio dibëiä ca̧ oti̧. Danȩrȩ, mȩnȩro̧ o ji̧ri̧iäpȩmo̧ bapë ta̧rërea̧mi̧dë ma̧ȩra̧ ni̧bä chjaorä judi, mȩnȩro̧ dabapadëa̧ ni̧bärea̧ ma̧ȩra̧ pio ji̧ri̧iäpȩmo̧ ni̧bä chjaorä judi, cjäri̧ madiro̧dibe, bapë ta̧rëdëpadiro̧dibe. Ado judiro̧ bapë ta̧rëdërä judi, jabechji̧ badëri̧ ni̧bänȩrȩ.
10Danȩrȩ, pumȩ judiro̧ ni̧bärea̧ ma̧ȩ üdë a̧dë chjäte ji̧ra̧ tjamo̧de. Jabechji̧ chiri oëra̧ti̧ oa cjo̧ro̧ji̧ri̧ pio judiro̧ cja̧rȩmȩ ma̧ȩ maea oa ni̧bädë madirȩ, jabo ado cja̧rȩmo̧ ma̧ȩ oa, ado cja̧rȩmo̧ ma̧ȩ oa ni̧bä maeadirȩ, ma̧ȩ ji̧ra̧ tjamo̧ oa. Ado judiro̧ ütëborë jibëa̧ ma̧ȩ oa ni̧bärä, jabechji̧ bapë ta̧rërea̧mi̧ dari̧ ni̧bä maeadirȩ. 11Jabo cüdë ni̧bämȩ pio ju̧i̧ bapë ta̧rëdërä judi, ‘jabechji̧ tjaoëdida, ado cja̧rȩmo̧ chiririmȩdida’ quëna̧ jo̧rȩtamȩrȩ ta̧rëpareconȩ. Ado peaja̧dimi̧ dari̧ jo̧rȩtamȩrȩ ta̧rëpadique ado cja̧rȩmo̧ ma̧ȩ ni̧bämȩ oa. Aja̧, 'tjaoërimȩdida, ado cja̧rȩmȩ chiririmȩdida’ quëna̧ jo̧rȩtamȩrȩ ta̧rëpadique peaja̧di. Aja̧ ca̧ oti̧, a̧ro̧rȩ yo̧a̧ri̧borë ‘tjaoërimȩdida’ quëna̧ jo̧rȩtaji̧ri̧rȩ ba dëbë daparea̧rȩ ibëa̧ dëbëti̧ra̧ chia. 12Ado peaja̧dimi̧ dari̧ jo̧rȩtaji̧ri̧rȩ ta̧rëpai̧ dadiro̧dibe dibëa̧ pumȩ pio judiro̧. Jabechji̧ mȩnȩro̧ dabapadëa̧ ma̧ȩra̧ ni̧bärä judi, peaja̧di bapë ta̧rëdëpadiro̧dibe. Ado pio ju̧i̧iä yo̧requededibe ca̧ oti̧. Danȩrȩ, mȩnȩro̧ järi tjamo̧ tara, jabechji̧ järi tjamo̧täreji̧ri̧nȩrȩ ja̧beparea̧ ba chiamȩ pio ju̧i̧ goapea̧ ji̧. Tjamo̧ davä. Tjo tjamo̧ judi pio dibëiä jibëa̧ ja̧beparea̧ra̧ pio ju̧ri̧ra̧ ana̧ri̧ ja̧bepatä ea tara, Tjo tjamo̧ judi pio dibëiä ana̧ri̧ na̧rȩa̧ oa cjiatä ea tara, jabechji̧ järi tjamo̧täreji̧ri̧nȩrȩ tjamo̧ri̧ a̧domȩ ja̧beparea̧ pio ju̧i̧ goapea̧ oa, quëna̧ji̧ri̧ judiro̧ bapë tärërea̧mi̧ dari̧ ta̧rëpea̧ oa, a̧doparea̧ codërë ju chiape jäpea̧ oa.
13Ja̧di tara eami̧ pumȩ üdë, jënȩ dabapadëa̧ ma̧ȩ oa ni̧bämȩ pio judi, jabechji̧ Ütë tjamo̧ pio ju̧i̧iä cjo̧dëtäremȩde pio jȩaiäpȩmo̧ goë ni̧bärea̧ yürütä, jënȩ ni̧bäa̧ pio ju̧i̧ chjiari chjadëri̧ dabarea̧ yürütä ta̧rë chaji̧ri̧ pio ji̧ri̧iäpȩmo̧. 14Danȩrȩ, cüdë dabapadëa̧ ma̧ȩ oa ni̧bärä judi, cüdë Ütë tjamo̧ pio ju̧i̧iäpȩmo̧ pio jiro ma̧ȩra̧ ni̧bärä judi, jabechji̧ pio cüdëborë bapë ta̧rërea̧ dadërequede cüdë yo̧a̧ pio ju̧i̧ chjiari. Tjamo̧ davä. Bapë ta̧rëdërequede ca̧ ya pio judi yo̧a̧ pio ju̧i̧. Ca̧ chji̧ra̧ tjamo̧ri̧ dabadërequede, jabo ca̧ tjo maeara̧ ni̧bämi̧ dari̧ ni̧bäreconȩ Ütë tjamo̧ ju̧i̧. 15Ado ja̧dirä judi ¿yö̧ta japatäremȩrequede ca̧ oti̧? Yö̧ta japadë, jabechji̧ yo̧a̧ri̧bora̧ ni̧bätäremȩrequede. Jabechji̧ cüdë Ütë tjamo̧ pio ju̧i̧ ni̧bärä, jabechji̧ cüdë dabapadëa̧ ma̧ȩra̧ pio ju̧ri̧ra̧ ni̧bäpareconȩ Tjo tjamo̧ pio ju̧i̧iä, ca̧ tjora̧ ni̧bämi̧ dari̧. Jabo danȩrȩ ca̧ oti̧, ca̧ chji̧ra̧ pio ju̧ri̧ra̧ jo̧rȩtamȩrȩ bapë ta̧rërea̧ ma̧ȩra̧ pio ju̧ri̧ra̧ ano̧ mire ni̧bäparequede peaja̧di. Jabechji̧ cüdë dabapadëa̧ ma̧ȩ oa ni̧bäe cjiadiäa̧rä, jabechji̧ bapë ta̧rërea̧ ma̧ȩra̧ ano̧ mire ni̧bäpareconȩ. Ado cüdë Ütë tjamo̧ ju̧i̧iäpȩmo̧ go̧a̧rä judi, cüdë dabapadëa̧ ma̧ȩra̧ go̧a̧rä judi, dëdë, ca̧ tjora̧ pio ju̧ri̧ra̧ ni̧bämi̧ dari̧ go̧a̧pareconȩ, jabo ja̧dëa ji̧ ca̧ chji̧ra̧ pio ju̧ri̧ra̧ jo̧rȩtamȩrȩ bapë ta̧rërea̧mi̧ dari̧ ano̧ mire go̧a̧pareconȩ peaja̧di. 16Jabechji̧ a̧ro̧rȩ Ütë tjamo̧ pio ju̧i̧ ni̧bärä, a̧ro̧rȩ dabapadëa̧ ma̧ȩ oa chjacjiamȩri̧ ni̧bärä, jabechji̧ ni̧bärea̧ro̧jo̧ȩ. Jabo pio ibë nö̧ta a̧dopaji̧ri̧ pio judiro̧, cjäri̧ madirȩ, pio judiro̧borë bapë ta̧rëtärea̧ ji̧, pio judiro̧borë cho̧rë jo̧rȩtatärea̧ ji̧, dairäpȩmo̧ tutia̧ oa cjiami̧ dari̧ cjiadirȩ bapë ta̧rërea̧ dadëa̧ oaiä. Jabechji̧ judiro̧ pio ibë nö̧ta Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtatärea̧ ji̧, judiro̧ pio ibë nö̧ta cja̧rȩmȩ chji̧ chiami̧ dari̧ jo̧rȩtatärea̧ ji̧, judiro̧ ma̧ȩ oa ta̧rë ëte, ‘A̧ja̧, Ütë tjamo̧ judi chjadëri̧ japea̧diibëda’ quëna̧ jo̧rȩtatärea̧ ji̧, cjäri̧ madirȩ, bapë ta̧rëdë madirȩ. Jabechji̧ judiro̧ “ja̧ditäde” a̧de yo̧tärea̧ ji̧, judiro̧ “Aja̧, tjamo̧de” a̧de yo̧tärea̧ ji̧, cjäri̧ madirȩ, tutia̧ oa cjiami̧ dari̧ cjiadirȩ. 17Dëdë, pio mȩnȩro̧ orë ma̧ chiadëri̧ cjiaji̧ri̧rȩ, chjacjiamȩri̧ jo̧rȩtaji̧ri̧rȩ ni̧bärenȩro̧jo̧ȩ Ütë tjamo̧ pio ju̧i̧iäpȩmo̧, jabo cjäri̧ madirȩ, chjadëri̧ a̧doa̧ oa cjiadë madirȩ o judiro̧, bapë ta̧rërea̧ dadëji̧ri̧ pio judiro̧.
18Danȩrȩ ca̧ oti̧, pumȩ judiro̧ dabapadëa̧ ma̧ȩ pio ju̧i̧ chjiari ji̧ra̧ri̧ go̧ȩpe chjadüa̧requededibe jabo danȩrȩ, pio ju̧i̧ chjiari oëra̧ jo̧rȩtatä eadërequededibe. Jabechji̧ pio jiro ma̧ȩ oa ni̧bäpea̧ üdë ba chiade. Ado pio cüdëborë pio jiro ma̧ȩra̧ ni̧bärequede peaja̧di, cüdë dabapadëa̧ ma̧ȩ pio ju̧i̧. Jabechji̧ pio dibëiä ji̧dë u̧i̧ ni̧bärequede pio jiro ma̧ȩ oa. Ado pio ju̧i̧iä ma̧ chiadëri̧ cjiamȩrȩ jo̧rȩtareconȩ Ütë tjamo̧ pio ju̧i̧iäpȩmo̧, ‘chjadëri̧ japea̧dicoada’ quëna̧ jo̧rȩtamȩrȩ. 19Jabo danȩrȩ, cüdë dabapadëa̧ ma̧ȩ oa pio dibëiä ji̧dë u̧i̧ ni̧bärea̧ chiamȩborë, pio dibë ütëbo oa ji̧dë u̧i̧ ni̧bärea̧ chiamȩborë, jabechji̧ ji̧dë u̧i̧ ba chiade bapë ta̧rërea̧ ma̧ȩra̧ pio ju̧ri̧ra̧ ni̧bä chjaopea̧ üdë. Ado pio ju̧i̧iä quëna̧ji̧ri̧ pio judiro̧ a̧dopea̧ oa cjiarä, jabechji̧ ji̧dë u̧i̧ ba chiade davä bapë ta̧rërea̧ ma̧ȩra̧ ni̧bä chjaopea̧ üdë. Tjamo̧ davä. Ma̧ȩ ji̧ra̧dai̧ oa ni̧bä chjaopea̧ üdë ji̧dë u̧i̧ ba chiade bapë ta̧rëdërea̧ ma̧ȩra̧ ni̧bäa̧ pio ju̧i̧iä. Tjamo̧ davä. Ma̧ȩ go̧a̧ti̧ tjamo̧dë oa a̧ra̧ano̧pea̧ üdë ji̧dë u̧i̧ ba chiade bapë ta̧rëdërea̧ ma̧ȩra̧ ni̧bäa̧ pio ju̧i̧iä. Ado pio ju̧i̧iä yo̧requededibe. Bapë ta̧rërea̧mi̧dë ma̧ȩra̧ do yoa ni̧bäpea̧ pio ju̧i̧iä ji̧dë u̧i̧ ba chiade japamitë boi̧chji̧ nö̧ta bapë ta̧rërea̧ ma̧ȩra̧ ni̧bäpea̧ üdë.
20Danȩrȩ ca̧ oti̧, bori̧ pio judiro̧mi̧ dari̧ jo̧rȩtadëchji̧vä cüdë dibë go̧ȩpe chjadüa̧ pio ju̧i̧ chjiari. Naedë cjo̧ro̧dë machji̧vä, jabo üi̧padärämi̧ dari̧ jo̧rȩtariä cjo̧ro̧chji̧vä. Jabo danȩrȩ, pea ara̧ oa cjiaji̧ri̧ pio judiro̧mi̧ dari̧ cjo̧ro̧täreji̧ri̧nȩrȩ jabo. Jabechji̧ chjai̧dë oa japapea̧ ji̧ jo̧rȩtadë madirȩ bori̧ judiro̧. Jabechji̧ ‘chjai̧deri̧ japatäquëda’ quëna̧ jo̧rȩtadë madirȩ. Ado peaja̧dimi̧ dari̧ cjo̧ro̧täreji̧ri̧nȩrȩ ca̧ oti̧. Pea ara̧ oa cjiaji̧ri̧ pio judiro̧mi̧ dari̧ jo̧rȩtatäreji̧ri̧nȩrȩ chjai̧dë oa japapea̧ pio ju̧i̧ chjiari, jabo üi̧padäräa̧mi̧ dari̧ jo̧rȩtatäreji̧ri̧nȩrȩ cüdë dibë go̧ȩpe chjadüa̧ pio ju̧i̧ chjiari. Tjamo̧ davä. Joechjape jämi̧ dari̧ jo̧rȩtatäreji̧ri̧nȩrȩ ja̧beparea̧ pio ju̧i̧ chjiari, Tjo tjamo̧ judi pio dibëiäpȩmo̧ jauëchja cjiari̧ yürüchäa̧ ja̧beparea̧ pio ju̧i̧ chjiari. 21Danȩrȩ, yabo yürüa̧ pënȩrä ja̧di ta̧rëri̧ go̧ȩparëremȩde Ichaia quȩmȩrea̧ judi Ütë tjamo̧ pio ju̧i̧ chjiari, judi icharaita pio ji̧ri̧iäpȩmo̧ ni̧bätarërea̧ pio ju̧i̧ chjiari. Ta̧rëchji̧vä:
"Ca̧ pumȩ pio judiro̧, cjäri̧ madiro̧coe, ji̧dë ma jiade ta̧rë chjaodiro̧coe. Jabechji̧ cüdë pio ji̧ri̧iäpȩmo̧ ni̧bäräbo, cüdë tjaoëriji̧ri̧ pio ji̧ri̧iä pio ji̧ri̧iäpȩmo̧ ma̧ȩ yürüräbo, tjaoëriji̧ri̧ pio ji̧ri̧ ja̧ ya pio oaiä ni̧bäräbo, cjäri̧ madiro̧coe, ji̧dë ma jiade ta̧rë chjaodiro̧coe."
Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. 22Ado pio ju̧i̧iä chjadëri̧ dabarea̧ darea̧rȩ pumȩrȩ dabapadëa̧ ma̧ȩ pio ju̧i̧ ni̧bäpea̧ pio ju̧i̧ chjiari. Jabechji̧ dabapadëa̧ ma̧ȩ oa ni̧bäpea̧ üdë na̧rȩrea̧de. Jabo quëna̧ji̧ri̧ pio ji̧ri̧ ja̧ na̧rȩdërea̧de, jabo quëna̧dëji̧ri̧ pio ji̧ri̧ ja̧ na̧rȩrea̧de. Jabechji̧ quëna̧dëji̧ri̧ pio judiro̧ pio jiro ma̧ȩ oa ta̧rërä, ‘Aja̧, pio judiro̧ Ütë ja̧ Tjo chiadiro̧da, jabo a̧ro̧rȩ Ütë tjamo̧ ja̧ pumȩdëa̧ro̧da, ado jibëa̧ jauëchja oaiä bape chjaoa̧ oa cjiapai̧ daa̧ro̧da’ quëna̧ jo̧rȩtapadirȩ. Aja̧, ja̧di dari̧ na̧rȩmi̧ dari̧ jo̧rȩta tänȩdejȩrȩ quëna̧dëji̧ri̧ pio ji̧ri̧. Jabo danȩrȩ, quëna̧ji̧ri̧ ja̧ na̧rȩrea̧ üdë, jabechji̧ Ütërë ea jana̧ chjadüa̧ oa ni̧bä chjaorea̧ pio judide. Tjamo̧ davä. Quëna̧dëji̧ri̧ pio ji̧ri̧ ja̧ na̧rȩdërea̧de, jabo quëna̧ji̧ri̧ pio ji̧ri̧ ja̧ na̧rȩrea̧de. Jabechji̧ Ütë tjamo̧ ja̧ ma̧ȩ oa a̧ra̧ano̧rea̧ üdë jo̧rȩta tänȩdejȩrȩ davä Ütë tjamo̧ ja̧ jauëchja pio ju̧i̧ chjiari. Ado pio ju̧i̧iä yo̧requededibe ca̧ oti̧. Quëna̧ji̧ri̧ pio ji̧ri̧ ja̧ na̧rȩrea̧de. Ado pio ju̧i̧iä iëno̧ë ta̧rërequededibe ca̧ oti̧. Ütërë ea jana̧ chjadüa̧ ma̧ȩ pio ju̧i̧ ni̧bä chjaopea̧ üdë quëna̧ji̧ri̧ ja̧rä judi, quëna̧ji̧ri̧ pio ji̧ri̧ ja̧ na̧rȩrea̧rä judi, ¿tjana̧ ju̧i̧iä ji̧dë ma ni̧bätämi̧ cjianȩrȩ dabapadëa̧ ma̧ȩ pio ju̧i̧? 23Ado mȩnȩro̧ bapë ta̧rërea̧mi̧dë ma̧ȩra̧ ji̧dë ma ni̧bärä judi, a̧doparea̧ codërë a̧dopea̧rä pio jiro ma̧ȩ ji̧ra̧ oa tjaoëpai̧ dari̧ ni̧bärä judi, cjäri̧ madiro̧dibe, quëna̧dëji̧ri̧ pio judiro̧ chjaodëri̧ yu̧a̧rä, pio ju̧i̧ chjiari jabë a̧ra̧ano̧a̧ oa cjiadëji̧ri̧ pio judiro̧ yu̧a̧rä, ä, cjarari̧ cjiarämi̧ cjiapai̧ dadiro̧dibe. Garë dapai̧ dadiro̧dibe ja̧di dari̧ ni̧bäpea̧ ji̧ dabadë ma tara. 24Jabo quëna̧dëji̧ri̧ pio judiro̧ ta̧rërä judi, jënȩro̧ yu̧a̧rä Ütë tjamo̧ ja̧ ma̧ȩ oa a̧ra̧ano̧ji̧ri̧ oa ta̧rërä judi, cjäri̧ madiro̧dibe, cjarari̧ cjiarämi̧ cjiaji̧ri̧rȩ dadëpadiro̧dibe, jabo ta̧rë ja̧bopai̧ dadiro̧dibe ca̧ oti̧. Tjamo̧ davä, judiro̧ yu̧a̧rä, quëna̧ji̧ri̧ pio judiro̧ ütëborë Ütërë ea jana̧ chjadüa̧ duri pio ju̧i̧ ni̧bä chjaoji̧ri̧ oa ta̧rërä judi, bapë ta̧rërea̧ ma̧ȩ maea oa ni̧bä chjaoji̧ri̧ oa ta̧rërä judi, cjäri̧ madirȩ ca̧ oti̧, jabë quëna̧dëji̧ri̧ pio judiro̧ ana̧ri̧ jo̧rȩtape bagapai̧ dadirȩ tjamo̧i̧ cjiari̧ baämȩ ma̧ȩ pio ju̧i̧ ta̧rëa̧ oaiä. Jabechji̧ ‘chjai̧dëri̧ japamȩrȩ dopaquëda’ quëna̧dërërea̧ ji̧, ‘aeno̧rea̧ pio ju̧i̧mo̧i̧ nö̧tamȩrȩ dopaquëda’ quëna̧dërërea̧ ji̧, jabechji̧ quëna̧ji̧ri̧pe bagapai̧ dadirȩ, ‘Ütë tjamo̧ judi chjaodëri̧ aeno̧pai̧ dadicoada’ quëna̧ jo̧rȩta̧ oaiä. Tjamo̧ davä. Ja̧di dari̧ jo̧rȩtape bagapai̧ dadirȩ judiro̧ bapë ta̧rërea̧ ma̧ȩ oa ta̧rëa̧ oaiä. 25Ado ja̧dëa ji̧ judiro̧ ja̧di dari̧ quëna̧ji̧ri̧pea̧ oaiä, ‘Aja̧, Ütë tjamo̧ judi pio yidida, ado ca̧ chji̧räpȩmo̧ cjacjarë damȩdida, goadirea̧ decjiaquëda' quëna̧ jo̧rȩtaji̧ri̧pea̧ oaiä, jabechji̧ ju chatura̧ cjiaji̧ri̧rȩ chjacjiamȩri̧ ni̧bäpai̧ dadiro̧jo̧ȩ Ütë tjamo̧ pio ju̧i̧iäpȩmo̧. Ado ja̧dëa ji̧ pio dibëiäpȩmo̧, “Aja̧, Ütë tjamo̧ pio judi jachi cjiadëde jabo dibëa̧ chjarerä tjamo̧ri̧ cjiamȩde” yo̧ji̧ri̧rȩ yo̧pai̧ dadiro̧dibe.
Quëna̧ji̧ri̧ judiro̧ ütara̧mi̧ a̧dopapea̧ maeade.
26Danȩrȩ ca̧ oti̧, cüdë dibë ni̧bä chjaoa̧ pio ju̧i̧ chjiari carupë ni̧bätämi̧ cjiarequededibe yaba̧. Danȩrȩ, ¿yö̧ta dari̧ a̧dopapea̧de? Mȩnȩro̧ a̧doparä, ¿yö̧ta dari̧ japapea̧de? Yö̧ta dari̧dë, jabechji̧ mȩnȩro̧ a̧doparä, ja̧di dari̧ japapea̧de. Danȩrȩ, o judiro̧, go̧a̧rea̧ taraji̧ri̧ pio judiro̧, jabechji̧ go̧a̧täreji̧ri̧dirȩ. Ado ja̧dëa ji̧ o judiro̧, a̧ra̧ano̧tämi̧ cjiaji̧ri̧ pio judiro̧, jabechji̧ a̧ra̧ano̧täreji̧ri̧dirȩ. Ado judiro̧ a̧ra̧ano̧a̧ duri oa o judiro̧ ni̧bä chjaotämi̧ cjiarä judi, Ütërë pio jibëiäpȩmo̧ pea areiami̧ dari̧ dabapa tänȩa̧ ma̧ȩ pio ju̧i̧ ni̧bä chjaotämi̧ cjiarä judi, peaja̧di ni̧bä chjaotäreji̧ri̧dirȩ. Ado ja̧dëa ji̧ o judiro̧, jënȩro̧ dabapadëa̧ ma̧ȩ oa ni̧bätämi̧ cjiarä judi, jabechji̧ ni̧bätäreji̧ri̧dirȩ. Jabo danȩrȩ, cja̧rȩmo̧rȩ chjadëri̧ goë ni̧bätäremȩde a̧dopaji̧ri̧ pio judiro̧ ütëborë chjadëri̧ bapë ta̧rërea̧mi̧ dari̧. Aja̧ ca̧ oti̧, ja̧di dari̧ a̧dopapea̧de. Ado danȩrȩ ca̧ oti̧, mȩnȩro̧ a̧dopea̧mi̧ nö̧ta, jabechji̧ mȩnȩro̧ ütëborë chjadëri̧ ju chiaparȩa̧ oa cjiatäreji̧ri̧nȩrȩ, ji̧dë u̧i̧ ju chiape bagarea̧mi̧ dari̧.
27Ado eami̧ pumȩ üdë, jënȩ dabapadëa̧ ma̧ȩ oa ni̧bätämi̧ cjiarä judi, jabechji̧ ni̧bätäde. Ado yo̧a̧ri̧rȩ, jabo tjarari̧rȩ ni̧bätämi̧ cjiarä judi, peaja̧di jabechji̧de. Ado judiri ado cja̧rȩmo̧rȩ a̧de ni̧bädëtäremȩde. Jabo danȩrȩ, judiro̧ ni̧bärä, jabechji̧ ji̧mo̧ ni̧bädëtäreji̧ri̧dirȩ jabo cja̧rȩmȩrȩ ni̧bätäreji̧ri̧dirȩ chjadëri̧. Bubaborë ni̧bädëtäreji̧ri̧dirȩ. Ado danȩrȩ, judiro̧ ni̧bärä, jabechji̧ goë ni̧bärea̧ chiamȩ pio judi chjadëri̧ goë ni̧bäe yürütäremȩde o judiro̧borë chjadëri̧ bapë ta̧rërea̧mi̧ dari̧. 28Jabo danȩrȩ, goë ni̧bämȩ decjiarä judi, jabechji̧ cjapiri̧ cjiadiä matäreji̧ri̧dirȩ jënȩro̧ dabapadëa̧ ma̧ȩ oa ni̧bätämi̧ cjiaji̧ri̧ judiro̧. Tjamo̧ davä. Quëna̧ji̧ri̧ pio judiro̧ a̧dopea̧ oa cjiarä, goë ni̧bämȩ decjiarä judi, cjapiri̧ cjiatädirȩ. Jabo dëdë, quëna̧ji̧ri̧ pio ji̧ri̧ nö̧ta a̧dopea̧ duri oa ni̧bätämi̧ cjiarä judi, jabechji̧ jibëa̧ma̧i̧ cjiaji̧ri̧rȩ ni̧bäpai̧ dadiro̧jo̧ȩ Ütë tjamo̧ pio ju̧i̧iäpȩmo̧, goë ni̧bämȩ decjiaräbo.
29Ado mȩnȩro̧ ütëborë a̧doparä, jabechji̧ pio ji̧ri̧bo chjadëri̧ ni̧bä chjaorea̧ yürütäreji̧ri̧renȩro̧jȩrȩ, Ütërë ea jana̧ chjadüa̧ oa ni̧bäji̧ri̧ pio ji̧ri̧bo. Jabechji̧ yo̧a̧ri̧ oa ni̧bä tänȩrä judi, jabo tjarari̧ oa ni̧bä tänȩrä judi, jabechji̧ chjadëde. Nö̧tade. Ado judiro̧ ano̧ mire ni̧bärä, jabechji̧ ta̧rë chaji̧ri̧ pio judiro̧ chjadëri̧ ütarë ta̧rëtäreji̧ri̧diro̧jȩrȩ, ‘Tjo tjamo̧ pio judiri ma̧na̧mȩ ma̧ȩ maea oa ni̧bädiro̧ibëda’ quëna̧rea̧mi̧ dari̧. 30Jabo danȩrȩ ca̧ oti̧, Ütë tjamo̧ judi ado cja̧rȩmo̧ oa chjaodëri̧ areiami̧ dari̧ daba tänȩrä judi, yabo ni̧bäremȩ pio judi a̧ra̧ano̧a̧ nö̧ta, ado cja̧rȩmo̧ oa chjaodëri̧ areiami̧ dari̧ daba tänȩrä judi, jabechji̧ yabo ni̧bäremȩ pio judi cjiadiätäremȩde ado cja̧rȩmo̧ pumȩ pio judi ano̧ mire ni̧bä chjaopea̧ oa, Ütërë pio jȩaiäpȩmo̧ pea daba tänȩa̧ pio ju̧i̧ ano̧ mire ni̧bä chjaopea̧ oa. 31Aja̧ ca̧ oti̧, mȩnȩro̧ ütëborë ja̧di dari̧ ano̧ mire ni̧bä chjaoa̧ oaiä, cja̧rȩmȩrȩ ano̧ mire ni̧bä chjaoa̧ oaiä, jabechji̧ chjadëri̧ ni̧bä chjaorea̧ dapanȩrȩ Ütë tjamo̧ ja̧ ma̧ȩ oa, Ütërë ea jana̧ chjadüa̧ pio ju̧i̧. Tjamo̧ davä. Ütëborë chjadëri̧ ta̧rërea̧mi̧ dari̧ ni̧bä chjaorea̧ dapanȩrȩ quëna̧ji̧ri̧ pio judiro̧ chjadëri̧ dabaparea̧ dapea̧ oa, ütëborë chjadëri̧ järipe bagarea̧ dapea̧ oa. 32Jabechji̧ Ütërë ea jana̧ chjadüa̧ oa ni̧bäji̧ri̧ pio judiro̧ teracabari̧ ja̧bepadë matäreji̧ri̧dirȩ jabo chjadëri̧ ütara̧mi̧ jo̧rȩtaji̧ri̧rȩ ja̧bepatäreji̧ri̧dirȩ Tjo tjamo̧ judi pio jibëiäpȩmo̧ yürüa̧ ja̧beparea̧ra̧ pio ju̧ri̧ra̧. Ado pio ju̧i̧iä yo̧requededibe. Jabechji̧ ji̧mo̧ ni̧bädë matäreji̧ri̧dirȩ, jabo chjadëri̧ ano̧ mire ni̧bä matäreji̧ri̧dirȩ tüdüa̧mi̧ darä japaji̧ri̧rȩ, ütara̧mi̧ japaji̧ri̧rȩ. Jabechji̧ cja̧rȩmȩrȩ cjiadiä ëte, ano̧ mire a̧ra̧ano̧täreji̧ri̧dire. 33Jabechji̧ oëra̧ japapea̧ üdë goaedëde Ütë tjamo̧ pio ju̧i̧iä, jabo ütara̧mi̧ japapea̧ üdë, chjadëri̧ ëba ja̧bepapea̧ üdë, goae tjamo̧dejȩ.
Ado yaba̧ ado cja̧rȩmo̧ ma̧ȩ oa ano̧ mire go̧ȩpe chjadütämi̧ cjiarequededibe ca̧ oti̧. Danȩrȩ, oëra̧ti̧ oa a̧dopaji̧ri̧ pio judiro̧ a̧dopamȩräpȩ ju̧ri̧ japami̧ dari̧ japatä earequededibe peaja̧di. Tjamo̧ davä. Tutia̧ oa cjiaji̧ri̧ pumȩ pio judiro̧ jibëa̧ a̧doparea̧räpȩ ju̧ri̧ japami̧ dari̧ japatä earequededibe peaja̧di. 34Jabechji̧ a̧doparea̧räpȩ ju̧ri̧ ni̧bärea̧ yürüdëtäreji̧ri̧renȩro̧jȩrȩ ivi pio ji̧ri̧ jabo cjapiri̧ ta̧rë cha matäreji̧ri̧ni̧rȩ. Tjamo̧ davä. Jibëa̧ üi̧ pio ju̧i̧ ja̧ chja̧oerä chjadëri̧ cjo̧ro̧täreji̧ri̧ni̧rȩ tüdüa̧mi̧ darä cjo̧ro̧pea̧ ma̧ȩ üdë go̧ȩpea̧ oa cjiarërea̧mi̧. 35Jabechji̧ ütëborë a̧dopea̧ oa cjiarä, jabechji̧dëde jini̧ro̧ babui̧ra̧ ni̧bä chjaopea̧ ji̧. Jabechji̧ tja̧reparȩmi̧ dari̧ japapai̧ dani̧ro̧jo̧ȩ a̧ra̧ano̧mȩ ju̧i̧. Ado pio ju̧i̧iä cjapiri̧ cjiadiätäreji̧ri̧ni̧rȩ. Ado jini̧ro̧ eami̧ oa tjamo̧ri̧ dabatämi̧ cjiarä judi, jabechji̧ jibëa̧ üi̧ pio ju̧i̧iä iëno̧ë ta̧rëtäreji̧ri̧ni̧ro̧jo̧ȩ jibëa̧ bëräpȩ ju̧ri̧. Jabechji̧ ütëborë a̧dopamȩräpȩ ju̧ri̧ iëno̧ë ta̧rëdëtäreji̧ri̧ni̧ro̧jo̧ȩ.
36Jaboti̧ri̧ japadëchji̧vä ca̧ oti̧. Dibëa̧ ma̧na̧ri̧ jo̧rȩtaji̧ri̧rȩ japadëchji̧vä. Jabechji̧ oëra̧ jo̧rȩtadëtäreji̧ri̧nȩrȩ pio dibë chjiari. ‘Jaeboa̧ro̧da, ma̧ȩ ano̧ji̧ri̧ pio judiro̧ tjamo̧a̧ro̧da’ quëna̧rea̧mi̧dënȩrȩ. Jabechji̧ Ütë tjamo̧ ja̧ ma̧ȩ üdë pio dibëiä tarupadërëremȩde. Pio mȩnȩro̧mo̧rȩ daba ma ja̧didë. Pio mȩnȩro̧mo̧rȩ a̧ra̧ano̧a̧ oa cjia ma ja̧didë. 37Jabo jabechji̧ coëma cjiari̧ jo̧rȩtatäreji̧ri̧nȩrȩ cüdë go̧ȩpe chjadüa̧ ma̧ȩ pio ju̧i̧ chjiari. Jabechji̧ eami̧ pumȩ üdë, pio dibë nö̧ta a̧dopamȩ pio judi, ‘Aja̧, Ütërë ea jana̧ chjadüa̧ oa ni̧bämȩ pio judiquëda’ quëna̧rä judi, ‘Tjo tjamo̧ ja̧ chja̧oerämȩrȩ dopaquëda’ quëna̧rä judi, jabechji̧ coëma cjiari̧ jo̧rȩtatäremȩde cüdë pio yoa ma̧ȩ oa go̧ȩpea̧ pio ju̧i̧ chjiari. ‘Aja̧, Pablo pio judi ibë go̧ȩpe chjadüa̧ ma̧ȩ üdë, jabechji̧ jibëa̧ ma̧na̧ri̧ jo̧rȩtamȩrȩ go̧ȩpe chjadüdëa̧diibëda jabo Ano̧mȩ pio judi yo̧a̧ duri maeadida’ quëna̧ jo̧rȩtatäremȩde. 38Ado eami̧ pumȩ üdë pio yoa ma̧ȩ oa ta̧rë ja̧bodërä judi, peaja̧di ta̧rë ja̧bodë machji̧jo̧ȩ ju̧i̧. 39Ja̧di tara ca̧ oti̧, ja̧di ta̧rëri̧ chi̧dëearequededibe. Danȩrȩ, Ütërë ea jana̧ chjadüa̧ ma̧ȩ pio ju̧i̧ ni̧bä chjaorea̧ pio ju̧i̧ goapea̧ ji̧ järi tjamo̧täreji̧ri̧nȩrȩ. Ado danȩrȩ, jënȩro̧ dabapadëa̧ ma̧ȩ oa ni̧bätämi̧ cjiaji̧ri̧ pio ji̧ri̧, jabechji̧ chjadëri̧ ni̧bärea̧ yürüchji̧jȩrȩ. Tjamo̧ davä. Tjo tjamo̧ pio ju̧i̧iä ado cja̧rȩmo̧ ma̧ȩ oa, jënȩro̧ dabapadëa̧ ma̧ȩ oa ni̧bätämi̧ cjiarä judi, jabechji̧ cjapiri̧ cjia tänȩdëtäreji̧ri̧renȩro̧jȩrȩ. 40Jabo danȩrȩ ca̧ oti̧, ütara̧mi̧ japa matäreji̧ri̧nȩrȩ cüdë dibëiäpȩmo̧ go̧ȩpe chjadürërea̧mi̧. Jabechji̧ mȩnȩro̧ a̧doparä, chjadëri̧ ütara̧mi̧ japapea̧ maeade boë cjaeä ni̧bärea̧ decjiari̧, tja̧reparȩrea̧ decjiari̧.
Currently Selected:
Cori̧tio Ma̧ȩ 1 14: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
