DOMAANO 16

Quedeiyente wwadäädäiñe ta’deujocoomo adoojo’jödö

1Määdhä cöjaadui’choncomo Jeewe wecamma äwwäiñe; quedeiyente Senquedea ñancomo i’wa’täneichomo töwö. 2Cajiichaana Jesuuquidiito jäcäinchädä aashicha tödöötäcä’de, quedeiyente weichö nönge deaane. I’wa’tätääcä’de tameedä iiñödö jäcä. Quedeiyente i’wa’täneichomo töwö; öwö mmaja ö’wa’tätä weneene dea.

3Ya’deujödö wadääja Pidiisiida wwadäädä, Aquiida wwadäädä mmaja, ñanno Quidiito tadaawaajui jäcä weetadaawa’cajoodö jimmä. 4Wäämadö jonno yeewanaacadö wetä tönwanno äämadö cöneiya’to; yääje yeijäcä öwö mmajöönö ta’cwaiñe chääjäcäiñe wa, tameedä quedeiyente judhíojöncomo mmajaane. 5Ya’deujödö wadääja dea Pidiisiida, Aquiida e’sacaiñe töweecanta’ñä weneenetoodö wwadäädäiñe mmaja, umjummadö Eepeneeto wwadäädä mmaja, ñäädä Acaaya ñano awa’deene Quidiito ecaanö’nei’jödö. 6Madía wwadäädä mmaja ya’deujödö wadääja dea, ñäädä äjääcäinchädäiñe jooje töweetadaawa’cajo weneenedö. 7Ya’deujödö ecammatääcä’de Antodoonico wwä, Juuniya wwä mmaja; jaatacoinchomo ñanno, jedeesoje weichö jaadoncomo’jödö. Täneejuca’como tönwanno anonta’como wwäiñe. Tönwanno yoowajoodä Quidiito cöneecamjöicho.

8Amjidiiya wwä mmaja ya’deujödö ecammatääcä’dede, ñäädä Cajiichaana jäcäinchädä weichacoono umjummadö. 9Ya’deujödö wadääja dea Uuduwaano wwadäädä, Quidiito tadaawaajui jäcä ñaa ’wa’tänei; Etaaqui wwadäädä mmaja, ñäädä umjummadö; 10Apeede wwadäädä mmaja, ñäädä chäänönge Quidiito ecaanö’nei tacaadato; Aaditóowudu wä’jimmä’tädö wwadäädäiñe mmaja. 11Ñäädä jaatacoiño Edoodiyón wwä mmaja ya’deujödö ecammatääcä’dede, Naadisiiso wä’jimmä’tädö wwäiñe mmaja, ñanno quedeiyentecoomo; 12Tidiijeena wwä mmaja, Tidiijoosa wwä mmaja, ñanno Cajiichaana tadaawaajui jäconcomo wetaadawa’cajoodö; Jeesida wwä mmaja, ñäädä Cajiichaana tadaawaajui jäcä töweetadaawa’cajo weneenedö. 13Duuju wwadäädä mmaja ya’deujödö wadääja dea, ñäädä quedeiyente täneejucaato; yeenö wwadäädä mmaja, ñäädä maama nönge mmaja öwwä naadö; 14Asinquidiito wwadäädä mmaja, Jedeeconte mmaja, Eedama mmaja, Paatodoowa mmaja, Eedeme mmaja, tameedä quedeiyentecoomo chääjadäiñe naatoodö wwadäädäiñe mmaja. 15Ya’deujödö ecammatääcä’dede Jidoodoco wwä, Juudiya wwä mmaja, Nedeeo wwä mmaja, ijaaduichö wwä mmaja, Odimja wwä mmaja.

16Ata’dejjatääcä töwä’jumma aweichöcoomo äwäänejancädäiñe. Tameedä quedeiyentecoomo, Quidiito ecaanö’nnamo, ta’deujocoomo nadääjaato äwwadäädäiñe.

17Edääje wä’dö’se wa äwwäiñe jimmä: Odhoowadäädäiñe tödöötäcä ñanno tönwannoje dea quedeiyente chu’de’tojonnamo, ñanno odhoowanooma’jocoomo juntaca asaadijannä’ca’sa’como. Ä’sancwatääcä ñanno jonnoiñe. 18Ñanno yääja’como Cädhaajotoncomo Jesuuquidiito anoonöje’da naato; tumjummadööcomo woije mma weneeneto. Tönwanno towoinchado’como tönencu’täiñe weneeneto aashichaato wa’coto ta’dedducoomo que, wäämu’nä’nä que mmaja. 19Chäänönge tönnöe aweichöcoomo tacaade na tameedä yeichö wa’cä; yääje yeijäcä ta’cwaiñe wa äjääcäiñe. Töweesomaajä’e aweichonse wa aashichaato tödöödö jäcä; conemjönö tödöödö jäcä mmaane odhoowoinchadäiñe aweichonse wa. 20Wanaadi ñäädä täncanoode’da weiñä edhaajä. Eduuwaiche mma töwö Caajuushawa odho’cäiñe nemajja’de. Cädhaajotoncomo Jesuuquidiito nutuudu aashichaato äwwäiñe yei’she wa.

21Tiimoteo, ñäädä weetadaawa’cajoodö weichacoono, ta’deujödö nadääja äwwadäädäiñe, Duusiyo mmaja, Jasón mmaja, Sosíipateede mmaja, ñanno öwö jaatacoinchomo.

22Öwö Teesiyo, Paudo necammadö woije edä jajeeda wimennäi; öwö ya’deujödö wadääja dea äwwadäädäiñe, Cajiichaana jäcäinchädä.

23Caayo mmaja ta’deujödö nadääja dea, ñäädä immai chaca öwö Paudo wä’döaajä waadö; tameedä quedeiyentecoomo wä’döto’comooje mmaja na dea edä Caayo mmai. Edaasato mmaja ta’deujödö nadääja dea äwwadäädäiñe, ñäädä jata jödaatai edhaajä; cöjimmotoncomo Cwaadoto mmaja.

24Cädhaajotoncomo Jesuuquidiito nutuudu aashichaato äwwäiñe na. Amén.

Yä’ca’jödö

25Aashicha wa’deutojooje Wanaadi ña; töwö äjäädu’täjaiñe na aashichaato wätunnä töneecammajä’e wääneneedö que, Jesuuquidiito ecammajäätödö que mmaja, yää edä nono tödö’jödö jonnoto’jödöödä owaanäcä’da cönä’ja’dö. 26Eduuwaane ñäädä Wanaadi yeichöödoto yää wätunnä cöneecadeeme’joi töwa’deuwödö ecammajä’nnamo nimenno’jocoomo ai. Yää cöneecadeeme’joi tameedä soto weichöcoomo wa’cä, tameedä ecamjöiyeto, Wanaadi woije eiyetoode yaawä.

27Ñäädä Wanaadi yäätonno ’jemjönö, töseedujä’nato, yeichöödäje aashicha wa’deutojooje na Jesuuquidiito jäcäinchädä. Amén.

Currently Selected:

DOMAANO 16: MCH

Highlight

Copy