DOSECHO 27

Dooma ña Paudo wataadojo’jödö

1Itaadiya ña ñaa adoojotoojo cu’nädö aca yä’döa’jäcä Paudo cuntuicho yaawä suddau wwä, anejjacoomo jedeeso mmaja cuntuicho dea. Juudiyu täätö cönä’jaacä ñäädä suddau. Töwö cönä’jaacä acu’shänä Awuutu sotoije, töweewänä’taamo jimmä. 2Ñaa cönä’täi yaawä Aadamiitiyo ñano jidaawa aca, Aasiya ñano wötäädö. Aaditaaducu mmaja ñaa jadä cönä’ja’dea, ñäädä Teesadoonica ñano, Maasedooniya ñano jataawono. 3Yää jenamma naadöje ñaa cönaajäi yaawä Sidhón ña. Ñäädä Juudiyu aashicha Paudo cönnöi. Töwö chäwwä cöneecammai ijimmä döiñaiñe iichotoojo, i’wa’tädö wetä chäwwäiñe. 4Yaawä Sidhón ñanno ñaa wääma’ta’jäcä Chiipede antadö ñaa cöneeja’dätäi ämu’demjönö dö’se, jooje jejeichä yeijäcä mänse. 5Dama ñaa cöni’yätäi yaawä Sidiisiya ñano je’taca cäcä, Pamjiidiya ñano je’taca cäcä mmaja. Yaawä ñaa cönä’döi Miida ña, Diisiya ñano jataaca.

6Yäätä suddau cöneedantäi jidaawa Aadejantidía ñano, Itaadiya ñano wötäädö. Töwö ñaa enö’täne yää aca, yää awä ñaa wötäädö wetä. 7Jo’wadä ñaa cöntämä yaawä, wanna tönnö’que. Jooje töwäntunamjödö’jo ñaa cönä’döi Niidho ña. Yaawä Quedeeta antadö ñaa cönaawodheemöi Saademón ñano je’taca cäcä, jooje dea jejeichä yeijäcä ñaa jäcä. 8Yeetunu eneeancädä ñaa cöntämä ije’wacääcä. Yää ’jeje ñaa cönä’döi jataaca, Wä’tä Aashichaato ñanooje chäätö; amoinche’da yää cönä’jaacä Daseea ñano jäcä.

9Äcuude deja cönä’jaacä yaawä, na’cwai wötooto’me’da, tu’que yeichö aca wä’dönääje yei’jödö weijäcä. Yääje yeijäcä Paudo 10cönä’döaacä chäwwäiñe:

—Täjai’cha caato eduuwa; tönoiñe na jooje. Jidaawa emaajai caato, dhacaano mmaja. Cönwanno mmaja ä’ja’jai caato dea; quee cönä’döaacä.

11Yääje Paudo wä’dö’jödö weichaame suddau edhaajotoncomo aneeta’da cöneiyacä dha’deddu. Töwö cöneetai jidaawa edhaajä a’deddu, jidaawa e’se’tänei a’deddu mmaja. 12Yää wä’tä cönä’jaacä cone’da tu’que yeichö ija’do’jotoojo; yääje yeijäcä ñanno jidaawa awoncomo töötä’se cönä’ja’to yäätonno, Jeniise ña töwä’dödööcomo wetä, yäätääne tu’que yeichö ija’do’jodö wetä. Yää Jeniise ñano cönä’jaacä Quedeeta ñano wä’täi, aacä waajoichojo; tooni cönä’jaacä shii weja’catoojo dö’se, yeichacoono ’quene shii womontojo dö’se.

Dama ’cwawä jejeichä joojato wä’dö’jödö

13Yaawä shii weja’catoojo suda’wawonno joojede’da’cä jejeichä wä’dödö weijäcä aashicha täjai cöntö’ta’to. Cönääma’toicho yaawä; Quedeeta ñano je’wacääcä cönta’to. 14Yääje mma yaawä jejeichä joojato cönaajäntäi, shii womontojo suda’wawonno daja, cadeemedu töjääcä. 15Yää cöna’jimmai jidaawa jäcä. Yaawä yää juntaca täjai’cha ñaa weijäcä ñaa cöneetömai e’se’tädö, jejeichä woije mma töwaatadoojodö wetä. 16Ñaa cöneeja’dätäi Cadauda antadö ncadheecäcä, jejeichä ’jemjönöiche ai. Töwäntunamjö’jödö cudiiyada’cä ñaa cöneenö’täi, yää ijämjäcä cönä’ja’dö. 17Yaawä yää cudiiyada’cä enö’ta’jäcä tönwanno jidaawa cömmöicho ato que, ijäädu’tädö wetä. Tönwanno cönnonta’to sa’dada de’cäi ñaa wäncudu, yää Siidete ñano; yääje yeijäcä camiisha cömmomjätöicho, yää jejeichä na’jimmadö que jidaawa adäänei. Ja’dätääme ñaa cöntaacä yaawä. 18Yää jenamma naadöje jejeichä edenna’da dea yeijäcä mösooma jidaawa acaano cömjajoicho yaawä na’cwaca. 19Yaawä aaduwaawä anooto yä’döa’jäcä jidaawa aca wetaadawa’cajootojo daja ñaa cömjajoi. 20Wanna anooto shii ääne’da ñaa wwä cönä’jaacä, shidiichä ääne’da mmaja. Jooje jejeichä weijäcä ñaa wä’ja’aatäi ñaa cöneecanö’acä.

21Jooje anooto ñaa cönä’jaacä ääwashinchä’da; yääje yeijäcä Paudo cönammöi dhantawäiñe; cönä’döaacä:

—Jimmä, ya’deddu maneetato’jo mmaane, Quedeeta ñanno ääma’tä’da queicho’jo, edä conemjönö aneene’da queichädö, mädä cäntunaanö’aatoodö. 22Yääje yeichaame cone’da’da eichäcä; ä’jajo’da caato’de; tameedä cääwanaacaato’de. Jidaawa mmaane nääma’de. 23Edä coijaichawä amoode näänejoi öwwä, Waanadiiyö anoonö, ñäädä shootoije waadö. 24Edääje ñäädä amoode nä’döaanä öwwä: “Määcatoncai Paudo. Amäädä mä’döa’de domaanocoomo acu’shänäi’chädööcomo döiña. Amäädä äjääcäinchädä Wanaadi newaanacaato’de tameedä ajaadoncomo, jidaawa awoncomo;” quee amoode nä’döaanä öwwä. 25Yääje yeijäcä ta’cwaiñe eichäcä; Wanaadi wecaanö’a. Yoowanääcä na amoode necamma’jödö nönge ä’döjai yeichö. 26Cönwanno cääwanaacaato’de dhantadö de’wä; quee cönä’döaacä Paudo jidaawa awoncomo wwä.

27Yaawä aacä semaana yä’döa’jäcä jejeichä wwä wataadojoonäje dea ñaa cönä’jaacä; Aadiya ’cwawä ñaa cönäädantäi yaawä. Yaawä yo’tawääne yeichö ñanno ijo’woncomo nono jäcä amoinche’da cönäädantoicho. 28Tönwanno cönoonejaicho sö’je yeichö; aacä soto meetudu cönä’jaacä. Yää ’jeje mänseedä’cä cönoonejaicho dea; yaawä tooni soto meetudu mma cönä’jaacä. 29Tönwanno cönnonta’to täju jona ñaa wä’dödö. Yääje yeijäcä aacäichea jidaawa edennanö’jotoojo cöneemaicho na’cwaca. Yaawä yaawaanadö cönwomo’ca’to, tösaadeiñe. 30Yaawä ñanno jidaawa jo’woncomo töwääneje’seiñe cönä’ja’to. Cudiiyada’cä cöneenö’toicho na’cwaca; cönä’töicho dhaca.

—Ijo’wono jidaawa edennanö’jotoojo ñaa nenö’ta; quee ñaa encu’ta’quento.

31Yaawä yä’tädaawäiñe Paudo cönä’döaacä suddau wwäiñe, chäädhajootoncomo wwäiñe mmaja:

Canno wöta’comjäcä änwanno ääwanaaca’da meichantäi’che; quee cönä’döaacä.

32Yaawä ñanno suddau cudiiyada nnedö’cä ’wadöötö cönaacätoicho, na’cwaca ye’duccadö wetä.

33Yaawä yaawaana’jäcä Paudo cönä’döaacä chäwwäiñe:

—Aacä semaana nä’döi ääwashinchä’da aweichöcoomo, öncö’da mmaja. 34Yääje yeijäcä ääwashinchätääcä, ämi awä mma mä’ja’to’no. Tameedä määwanaacaato’de; quee cönä’döaacä Paudo chäwwäiñe.

35Yääje töwa’deuwö’jeje Paudo uu cönannäjöi; Wanaadi wwä cöna’deuwöi chääjäcä tameedä ñeetadööcomooje. Yaawä i’yacaadö’jo cönaajäntäi töwääwashinchädö. 36Tameedä jidaawa awoncomo cöna’cwainchaicho yaawä; tönwanno mmaja cönääwashinchoicho dea. 37Jidaawa awoncomo ñaa cönä’jaacä wanna, amoojadä sotooto de’wä aacäichea soto. 38Yaawä tumjummadööcomo wa’cä töwääwashincha’comjäcä äiña ajooajä ewöötö’taajä cöneemaicho na’cwaca jidaawa tawaatadö wetä.

Jidaawa nnadö’jödö

39Yaawä yaawaana’jäcä ñanno jidaawa e’se’tännamo yää nono towaanäcäiñe’da cöneedantoicho. Tönwanno cöneenea’to cönnocoono, sa’dada ’je; cöna’deuwöicho yaawä yää wwadäädä jidaawa adäädö wetä. 40Yaawä jidaawa edennanö’jotoojo ’wadöötö cönaacätoicho na’cwacaadä. E’se’totoojo mmaja cönaajämjäcaajätöicho. Yaawä yää camiisha, jejeichä na’jimmadö que jidaawa adäänei, cawä cönaajujiiñaicho dea, ijo’wä. Sa’dada wwadäädä ñaa cöntaacä yaawä. 41Tuna woojodöödö aca ñaa cönä’döi yaawä. Yäätä ñaa cönäncui sa’dada de’cäi. Jidaawa jotöödö täije cönääwaacai; inwaju’jä mmaane cönä’cadaacaacä madaataca que. 42Yaawä ñanno suddau töja’jo’seiñe cönä’ja’to jedeesoja’como, “Na’cwaca mma ääneje’noto;” quee töucwadööcomooje. 43Chäädhajootoncomo mmaane, ñäädä Paudo edai’chäneije cönä’ja’dö, ñanno jedeesoja’como ämja’jo’daiñe cöneiya’to chäwwäiñe, Paudo emaajo’se’da töweijäcä. Töwö cönä’döaacä:

—Töjääna’como ne’duca’ña’to awa’de na’cwaca, nono ejoodöiyeto. 44Yää ’jeje ñanno töjäänemjöncomo daja ijäänömjai ñaato tauda de’wä, jidaawa datomjödö de’wä jeiñe mma; quee cönä’döaacä suddau edhaajotoncomo.

Mädääje tönwanno nono cöneejodöicho; ä’jajo’da cöneiya’to tameedäädä.

Currently Selected:

DOSECHO 27: MCH

Highlight

Copy