DOSECHO 25

Jeetu je’taca Paudo wei’jödö

1Yääje mma yaawä aaduwaawä anooto acu’shänääje töwääwaaca’jeje Jeetu Jeduusadén ña cöntämä Seesadeea ñanno. 2Yäätä Wanaadi wwä töwa’deuwaamo edhaajotoncomo, anejjacoomo judhío täneejuca’como mmaja, cöna’deuwöicho chäwwä Paudo jäcä. 3Tönwanno chäwwä cöne’catoicho Jeduusadén ña Paudo ene’jotoojo, ääma tai yeejödö ema’se töweichomjäcä. 4Töwö Jeetu cönä’döaacä chäwwäiñe:

—Paudo no’nomja yäätä Seesadeea ña; öwö dea wöta iiña äächädä anooto yä’döa’jäcä. 5Yääje yeijäcä adhantawäiñe cajiichaanaja’como jaadä täjai ñaato töwö ñeetadööje ecammaiyeto conemjönö liñö’jödö; quee cönä’döaacä Jeetu chäwwäiñe.

6Amoojadä mma Jeetu cönnöcöi Jeduusadén ña; Seesadeea ña cöntämä yaawä. Yääwä yää jenamma naadöje äcamma’jonei a’täi ye’wä töwaatajiimadö’jo töwö Jeedi Paudo cöna’dejjajoi yaawä. 7Paudo wä’döa’jäcä ñanno judhío Jeduusadén ñancomo wä’döa’como cönaawodhentoicho yaawä. Tönwanno jooje Paudo cöneementa’to conemjönö jäcä; chäänöngato jaiñoone a’que cönä’jaacä dha’dedducoomo. 8Paudo cöneemetaacamai yaawä ya’deuwödööcomo. Töwö cönä’döaacä:

—Cone’da a’deuwö’da töweiye wäänene judhío wätunnäichomo jäcä, Wanaadi weichojo jäcä mmaja, acu’shänä jäcä mmaja; quee cönä’döaacä.

9Ñäädä Jeetu judhío jadäiñe aashicha töwei’she töweijäcä cönä’döaacä Paudo wwä:

—¿Jeduusadén ña äätä’se manä, iiña maneecamma’joiye mädä jäcä? quee cönä’döaacä.

10Yaawä Paudo cönä’döaacä:

—Chäänönge dajaane eetä yeecamma’jojai ma, acu’shänä necamma’jotoojo tacaane. Amäädä odhoowanääcä na judhío jäcäiñe conemjönö ännö’da weichö. 11Conemjönö tönnöe wei’jo oowontä’da weichö wäämadö jäcä. Yää yeementaatoodö mmaane chäänönge’da na; yääje yeijäcä anejja yu’jai’cha na chäwwäiñe. Acu’shänä Awuutu wwadäädääne öötä’se wa, töwööne yeecamma’joiye; quee cönä’döaacä Paudo Jeetu wwä.

12Yaawä ta’deddu eccunnamo jadä töwa’deuwödö’jo Jeetu cönä’döaacä Paudo wwä:

—Ñäädä acu’shänä döiña manenno’ja’de, iiña äätä’se aweiyajä; quee cönä’döaacä.

Aaquidiipa je’taca Paudo wei’jödö

13Yääje mma yaawä äächädä anooto ’jeje Seesadeea ña cajiichaana Aaquidiipa cöneejä, töjiiñamo Weedeniise acä, Jeetu ene. 14Yäätä cönä’ja’to äächädä anooto mma. Yaawä chäwwäiñe Jeetu cöneecammajäätöi Paudo jäcä. Töwö cönä’döaacä:

—Eetä na dhanwa, jedeesoje, Jeedi niyäämä’jödö. 15Jeduusadén ña weiyaquennawä Wanaadi wwä töwa’deuwaamo edhaajotoncomo, judhío ntonta’como mmaja, jooje cone’da cöna’deuwöicho öwwä chääjäcä. 16Edääje wä’döaaquene yaawä chäwwäiñe: “Täcamma’jodö’jo’da mmädä soto aneema’da domaano weichö nai. Täcamma’joone awa’de ecamma’jodö töweiye nai ñäädä chu’de’tänei je’taca, emeetacaamadö wetä yaawä chäwwä, töwa’deuwö’se töweiya’jäcä;” quee wä’döaaquene chäwwäiñe. 17Yaawä tönwanno ye’a’comjäcä numa onwomoocö’da weiyaqueene. Yää jenamma naadöje mma ecamma’jotoojo taca waatajiima’jäcä Paudo wene’jone yaawä. 18Yaawä ñanno chääjäcä töwa’deuwaamo choone’nadiiyö ecammajai’cha cönä’ja’to; öwö tö’tajä’aquennö je’da cöna’deuwöicho. 19Töwäätunnäichomo jäcä mma cöna’deuwa’to, Jesuuquidiito täätö jäcä mmaja. Ñäädä töwääma cönä’jaacä; Paudo mmaane nudä yeichö töneecamma weneene. 20Yoowanääcä’da cönä’jaacä mädä nöngato choonecaadö; yääje yeijäcä Paudo wecamma’jone: “Jeduusadén ña äätä’se manä, iiña maneecamma’joiye mädä jäcä?” quee wä’döaaquene. 21Töwö cöne’catäi yaawä acu’shänä Awuutu wwadäädä töötotoojo. Yääje yeijäcä jedeesojeedä önnödö na acu’shänä wwadäädä enno’jadö wa’cä; quee cönä’döaacä Jeetu Aaquidiipa wwä.

22Yaawä cajiichaana Aaquidiipa cönä’döaacä Jeetu wwä:

—Öwö mmaja eta’se wa dea yäätunnäi; quee.

Yaawä Jeetu cönä’döaacä:

—Jenamma etaacä’de; quee.

23Yää jenamma naadöje Aaquidiipa cöneejä töjiiñamo Weedeniise jadä. Tönoiñe cöne’jummaicho ecamma’jotoojo taca, tameedä suddau edhaajotoncomo jadä, yää jataawoncomo täneejuca’como jadä mmaja. Jeetu cönaanontäi yaawä Paudo eneejödö wetä; 24yaawä cönä’döaacä:

—Amäädä cajiichaana Aaquidiipa, änwanno mmaja eetä ñaa jadä awe’jumma’como maatoodö: Määdhä ñäädä dhanwa judhío chääjäcä töwa’deuwe weneenetoodö, Jeduusadén ñancomo, Seesadeea ñancomo mmaja. Tönwanno yäämatoojo tuncu’nä’tä weneeneto. 25Öwö mmaane iiñödö aneedantä’da weiyaqueene yää ijo’tädööje emaatojo. Töwö dea cöne’catäi acu’shänä Awuutu döiña töötotoojo; yääje yeijäcä ñäädä wwadäädä wenno’ja’de. 26Yaawääne’, acu’shänä wwadäädä chääjäcä tömennäämö ’je’da na öwwä. Yääje yeijäcä weneejä äwwadäädäiñe, cajiichaana Aaquidiipa, amäädä jaiñoone mecamma’joiye; yää ’jeje tömennäämö töweiye yeichö wetä acu’shänä wwadäädä. 27Edääje mmädä adoojojai’cha tö’ta, töwö iiñö’jödö jäcä imennaajä ’je’da; quee cönä’döaacä Jeetu Aaquidiipa wwäiñe.

Currently Selected:

DOSECHO 25: MCH

Highlight

Copy