DOSECHO 11

Jeduusadén ñancomo Quidiito sotoi wwä Peedhodo necammajäätö’jödö

1Yääje mma yaawä ñanno anonta’como, anejjacoomo quedeiyentecoomo Judheea ñancomo mmaja, cöneeta’to judhíojöncomo wwä aashicha eta’jödö Wanaadi a’deddu ecammajäätödö. 2Yaawä Jeduusadén ña Peedhodo wennaca’jäcä iiñancomo quedeiyentecoomo cönincha’me’ca’to; 3cönä’döa’to chäwwä:

—¿Ane’que’nei judhíojöncomo mmädä ene meiyaqueene? Chääjadäiñe määwashinchäne dea; quee cönä’döa’to Peedhodo wwä.

4Yaawä Peedhodo chäwwäiñe cöneecammajäätöi yaajäntä’jödö jonnoto’jödöödä töjääcä yeeja’dätä’jödö. Töwö cönä’döaacä:

5—Joope ña weichö, Wanaadi wwä wa’deunäje weichawä, wäneetönaawoto nönge wä’jaaquene. Yaawä saawana nöngato weneeaqueene, ijootödö waadäi inchö’dajä’ajä. Öwwadäädä cöne’acä caju ñanno. 6Yaawä yäätäädä wene’maaquene; ye’wä weneeaqueene tameedä yeichö wa’cä odoocoja’como tääde’cwada’como, äcääyu mmaja, tadiiñaamo mmaja. 7Yaawä a’deu cönäätaacä öwwä: “Aanöncä Peedhodo, odhootö anaiju’cä, mänäiye;” quee cönäätaacä. 8Yääje wä’döaaquene yaawä: “Ng’jn, Cajiichaana; öwö weichö nossajaato änäänä’da, mäccö mmädä änäänä’da mmaja;” quee wä’döaaquene. 9Yää ’jeje cönäätai chea öwwä: “Ñäädä Wanaadi nichoonecaadö nossaje e’täjai’cha ma;” quee cönäätaacä. 10Yää aaduwaawäde yääje cöneiyacä. Yaawä yää saawana nöngato cöntännea caju ña. 11Yaawä dea mma aaduwaawä dhanwaacomo cönä’döicho ömmai yöiña, yuujiyööje. Seesadeea ñanno enno’ja’como cönä’ja’to. 12Epíiditu Santo yaanontäne yaawä wäämu’däjä’ancädä’da chääjadäiñe öötädö wetä. Tooni amoojato quedeiyente cöneiya’to jaadä, canno naatoodö. Tameedä ñaa cönoomomöi yaawä soto e’saca. 13Ñäädä tömmaichemö ñaa wwä cöneecammajäätöi Wanaadi amoodedö töneene’jödö tömmai chaca. Ñäädä amoode jiidi cönääneaacä; cönä’döaacä chäwwä: “Joope ña soto anenno’jacä, Simón a’dejja, ñäädä Peedhodooje mmaja chäätö naichö. 14Ñäädä Peedhodo äwwä necamma’de äwääwanaacatoojo, äwä’jimmä’tädö wääwanaacato’como mmaja;” quee cönä’döaacä amoode chäwwä. 15Yaawä chäwwäiñe ecammajäätödö waajänta’jäcä Epíiditu Santo cönä’täi chääjäcäiñe, awa’deene cöjääcäiñe cönä’täichöje mmaja. 16Yaawä tö’tane Cajiichaana Jesuuquidiito wa’deuwö’jödö jäcä: “Juan wautisaaje tönnöe cönä’ja’to tuna quee mma; änwanno mmaane Epíiditu Santo queene wautisaaje mä’döaato’de,” quee yä’dö’jödö jäcä tö’tane. 17Epíiditu Santo Wanaadi cuntui chäwwäiñe, ñanno judhíojöncomo wwäiñe, cöwwäiñe Cajiichaana Jesuuquidiito ecamjödaawä cuntuichöje mmaja. Edääje tö’tajä’aqueene yaawä: ¿Aaquene mmaja Wanaadi woijatooje yeichaame wanincha’mecöödö deeade’ ? quee tö’tajä’aqueene; quee cönä’döaacä Peedhodo chäwwäiñe.

18Yaawä yää eta’jäcä Jeduusadén ñancomo quedeiyentecoomo cöneeta’jöjäätöicho; aashicha cöna’deuwa’to yaawä Wanaadi jäcä. Tönwanno cönä’döa’to:

—Judhíojöncomo wwä mmaja Wanaadi cuntui chea chö’tajäätödööcomo sha’duminchatoojo, yääwanaacadööcomo wetä; quee cönä’döa’to.

Antiyooquía ñancomo Quidiito sotoi wei’jocoomo

19Yaawä soto wwäiñe Eteewa ema’jeje anejjacoomo quedeiyentecoomo maminchädööcomo mmaja cönaajäntoicho dea; yääje yeijäcä ñanno quedeiyentecoomo cönäänejeicho Jeniisiya ña, Chiipede ña mmaja, Antiyooquía ña mmaja. Iiña tönwanno Wanaadi a’deddu töneecammajä’e cönä’ja’to, tameedä soto wwäiñe’da, judhíocoomo wwä mma. 20Dhantawäiñe cönä’ja’to anejjacoomo Chiipede ñancomo, Sideene ñancomo mmaja. Ñanno Antiyooquía ña töwä’döa’comjäcä judhíojöncomo wwä mmaja cöneecammajäätöicho aashichaato wätunnä Cajiichaana Jesuuquidiito jäcoono. 21Tönwanno Cajiichaana jäduudu ’je cönä’ja’to; jooje soto töwäätunnäichomo jonno Cajiichaana Jesuuquidiito cöneecamjöicho.

22Yaawä chääcadööcomo eta’jäcä Jeduusadén ñancomo quedeiyentecoomo Waanawé cönaanontoicho Antiyooquía ña. 23Iiña ñäädä wä’döa’jäcä cöna’cwainchai yaawä chääjäcäiñe Wanaadi nödöödö aashichaato eneea’jäcä. Töwö cönwätuujaicho yaawä ejääduqueejö’da yeiyancädäiñe Cajiichaana woije yeichöcoomo wetä. 24Töwö Waanawé cönä’jaacä aashichaato, Epíiditu Santo jäduudu ’je, ecamjödö ’je mmaja. Jooje soto Cajiichaana Jesuuquidiito cöneecamjöicho.

25Yää ’jeje Waanawé cöntämä Taadoso ña, Saudo ujiiye. Yaawä edanta’jäcä Antiyooquía ña cönaadäi. 26Yäätä tönwanno cönä’ja’to tooni wedu Quidiito sotoi jadäiñe; jooje soto cönoowanoomaicho. Antiyooquía ña awa’deene soto quedeiyentecoomo quidiitiyaanoje cöne’toicho. Quidiito jadoonoje, quee töwä’dö’se yeichö.

27Yääje mma yaawä Jeduusadén ñanno anejjacoomo Wanaadi wa’deuwödö ecammannamo Antiyooquía ña cöntonto. 28Dhantawäiñe cönä’jaacä Aacawo täätö. Ñäädä cönammöi dhantawäiñe; Epíiditu Santo woije cöneecammai tameedä nono weichö wa’cä ämi weichojo. Yää ämi cöneeja’dätäi yaawä Cadaudiyo acu’shänääje yeichö. 29Yaawä quedeiyentecoomo Antiyooquía ñancomo cöna’deuwöicho töjimmotoncomo Judheea ñancomo wwadäädä jödaata adoojodö wetä, i’wa’toto’comooje yää ämi awä. Töwaadäiñe cuntuicho u’jai töweichöcoomo woije. 30Yää töni’jumma’jocoomo ansiyaano Judheea ñancomo wwadäädä cönaadojoicho yaawä Waanawé wwä, Saudo wwä mmaja.

Currently Selected:

DOSECHO 11: MCH

Highlight

Copy