Romanos 4
4
Ablaamö a lä
bejedimono wei tä a̦
1Judio bämacö nö badabö Ablaamö a lä cui, ¿wedinaja bäma a nofi nia yai tabou, ö̦jö lä? 2Ablaamö a lä dodijano wei tänö Yai Bada lija a dodijidawä dablamou fa cunoja, cama a wa̦fa dodijaö wäamobä tä nö cuobö wei. Yai Bada lija a wa̦ nö fabö ma mlai ma cui, yanowamö täbä lija a wa̦ fabä tä nö cuobö wei. 3Ö̦jö ma cui abenaja Yai Bada etä a̦ oni cuu.
Yai Bada a wa̦ fa ji̦limolunö, Ablaamönö a wa̦ bejedi bufia showadaalema. Cama Yai Bada a wa̦ bufiblamou fa damolalunö, jai a cadejewä waiquiwä bei a nofi Ablaamö tadaö showadalayoma.
Einaja tä a̦ oni cuu. 4¿Ö̦jö tawä? Bä lä ojodamou wei bä no ojode co̦amaöje ja, “No mlai ja wale dobäö”, bä nia cuimi. “Ya dobämou lä, ya malä ojodamono wei”, bä nia shi̦lo cuu. 5Ö̦jö ma cui Yai Bada lija bämacö nia lä bayeliblamou wei, inaja bämacö nia cuimi. Cama bä lä dodijaö wei tä ja bä mölaö lä mlai, Yai Bada tä nofi yai lä mölabou wejei bä lä cui, ö̦jö bä nia shi̦lo yai bayeliblamou ayao. Wa̦lidiwä talewä bä ma cui, Yai Bada lija bä mölaö cudeenö jai bä cadejewä waiquiwä bä nofi tabou. Ö̦jö a lä cuinö, jai bä dodijidawä waiquiwä bä nofi tabou.
6Bada tä David a ma cuinö, ö̦jö tä a̦fa wäyäö balöoma. Jai bä cadejewä waiquiwä, Yai Bada tänö bä nofi lä tabou wei bä lä cui, bä nia jo̦wa bayeliblamoma. Cama bä lä dodijaö wei tänö mlai. 7Abenaja tä a̦ oni cuu.
Bä doblou lä mlai, Yai Bada tänö etä nowa lä mladamaö wei bä lä cui, ö̦jö bä bufi yai doblalobä cäbä, etä nowa tabou lä mlai bä lä cui. 8Bada tänö etä nowa nia tabou lä mlai, bä bufi yai doblalobä cäbä.
Einaja tä a̦ cuu. 9Täbä a̦fa bayeliblamou lä wäyäno wei, ¿bämacö mosi sicö lä joyamou wei, bämacö nia shi̦lo judio bayeliblamou ayaoma daanö? Ma, judio bä lä mlai bä ma cui bä nia ca̦i bayeliblamou mö feduoma. Abenaja bämacö malä cuu wei. “Ablaamö a lä cuinö, Yai Bada tä nofi mölaboma yalo, jai a cadejewä waiquiwä Yai Bada tänö a nofi taboma.” Einaja bämacö cuu. 10¿Ö̦jö tawä? ¿Wedinaja tä yai cuoma, ö̦jö lä? Yai Bada tänö a nofi lä tabono wei, mosi sicö joyamou showao mlao däjä a nofi tabou showaoma. Mosi sicö joyamoa fa balölönö mlai.
11¿Ö̦jö tawä? Ablaamö mosi sicö joyamou showao mlao däjä Yai Bada a nofi mölaboma yalo, jai a cadejewä waiquiwä a nofi taboma. Ö̦jö däjä, Yai Bada tänö a nofi tabou lä waiquile a nö ö̦jöböamobä, mosi sicö li joyamaö bufima. ¿Ö̦jö tawä? Jai bä cadejewä waiquiwä Yai Bada tänö bä nofi tabou lä nodio wei bä lä cuinö, Ablaamö a nofi fö̦ömaö nodiobeje, inaja a li taamaö balöoma. Ö̦jö bä lä cui, bä mosi sicö joyamou ma mlai, Jesucristo a bejedi bufii cudeejenö bä nofi li tabou nomöjöa lä cule.
12Inaja showawä, bä mosi sicö lä joyamou wei bä ma cuinö, Ablaamö a bufi owäbouje yalo a nofi ca̦i fö̦ömaö nodio showaoje. Bä mosi sicö joyamou buomi. Bämacö nö badabö Ablaamö mosi sicö joyamou showao mlao däjä, Yai Bada a nofi mölabou lä showadaono weinaja, a nofi li mölabou cuo nodioje.
Yai Bada bäma a nofi
mölabou yalo bämacö
lä bayeliblamou wei tä a̦
13Ablaamö lija Yai Bada a wa̦ nö wäoma. Cama a ma cui, cama bä ijilubö ebä nodiwä ma cui, jödödöwä tä jamö ebä nia jo̦wa bälöo lofotooma. ¿Ö̦jö tawä? Moisesi etä a̦ nofi cadidiboma yalo, ¿Ablaamö lija a wa̦ nö wäoma daanö? Ma, a wa̦ nofi yai mölaboma yalo jai a cadejewä waiquiwä a nofi fa tadalönö, a wa̦ nö wäquema. 14Moisesi etä a̦ lä tabou wejei bä lä cui, ö̦jö bä nia shi̦lo dobämou ayao fa cunoja, bämacö nö ca̦i jole jole mölablalou buobö wei. Yai Bada tänö tä a̦ lä wäqueno wei tä nö ca̦i bejedi cublobö mlai. 15Moisesi bäma etä a̦ fuaimi ja, Yai Bada bäma a jushuo lulubou. Ö̦jö ma cui, tä a̦ läa lä mlai jamö tä a̦ waibeje tä cuami waiquiwä.
16Ö̦jö cudeenö, Yai Bada bäma a wa̦ nofi mölabou däjä bämacö li bayeliblamou. No mlai ja bämalecö nofi bluca fa ojodabonö, tä a̦fa bayeli lä wäqueno wei tä a̦ ja bämacö bluca bayeliblamobä tä malä cui. ¿Ö̦jö tawä? Judio bä ma mlai ma cui, Ablaamö bäma a bufi lä owäbou wei bämacö nia bluca bayeliblamou, Moisesi etä a̦ oni lä tabou wejei bä shi̦lo mlai. Ablaamö a lä cuinö, Yai Bada a wa̦ nofi lä mölabono weinaja, bäma a wa̦ nofi mölabou lä nomöjöo wei bämacö ma cuinö, Ablaamö bäma a nofi bluca malä fö̦ömaö wei. 17Tä a̦ oni lä cuu weinaja showawä. Yai Bada tänö abenaja Ablaamö a nowa tama.
Bluca bä bälöjou lä yaiblai bänö wa nofi fö̦ömabeje, cafä bä tablamalema.
Einaja Yai Bada tänö a nowa tama, Ablaamö lija a lä bufiblamono wei a lä cuinö. Ö̦jö a lä cuinö, nomawä bä ma cui bä demi jocädamaö co̦o. Täbä cua lä mlai täbä ma cui, cama a wa̦nö täbä cublou.
18¿Ö̦jö tawä? Ablaamö bä ijilubö ebä cublobä etä cuono ma mlai ma cui, Yai Bada tä a̦ bejedi bufibou fe yadioma. “Ijiluyä nodiwä bä lä cui bä fa blucablalunö, bä nia bälöjou yaiblamou”, a bufi cuu cadidio showaoma, Yai Bada tä lä cuno weinaja showawä. Abenaja Yai Bada tänö a nowa tama.
Inaja ijilufä bä nia bluca nodiwä cublou.
Einaja a nowa tama. 19¿Ö̦jö tawä? Ablaamö a ma wa̦lobadaono wei ma cui, a mölaö showaoma yalo a bufi lofotoo fe yadio showaoma. Bä ijilubö e taabä etä ca̦i cuonomi. Lasha 100 a jayumaö ajedeo waiquioma. Bä suwäbö Sara a ma cui, a shibönabödalou fa mlacunö a ijilubö cuonomi showawä. Ö̦jö ma cui, Yai Bada tä a̦ nofi mölabou cadidio showao fe yadioma. 20Yai Bada tänö tä a̦ lä wäqueno wei tä a̦ ja, “Shädayai”, moli ma cui a bufi ca̦i cunomi. A nofi lä mölabou wei tä ja, a bufi yai fa lofotoblalunö, Yai Bada tä nofi doablama. 21“Camiyä lija Yai Bada tänö tä a̦ lä wäqueno wei, tä taö dao lä”, a nofi tabou cadidioma.
22Ö̦jö cudeenö, a wa̦ nofi mölaboma yalo, jai a cadejewä waiquiwä Yai Bada tänö Ablaamö a nofi tabou showadaoma. Inaja tä a̦ oni malä cuu wei. 23¿Ö̦jö tawä? Ablaamö a nofi lä tabono wei tä a̦ lä cui, cama a wa̦fa wayoamou bädao mlai, 24camiyä bämacö ma cui bämalecö a̦fa ca̦i wayoaö mö feduo showaoma. Bada tä Jesús a demi jocädamaö lä co̦layono wei a lä cui, ö̦jö bäma a bejedi bufii yalo, bämalecö nofi ca̦i tabou mö feduo. 25¿Ö̦jö tawä? Camiyä bämacö doblou lä mlai tä nowa ja, a shämolayoma. Jai bämacö dodijidawä waiquiwä Yai Bada tänö bämalecö nofi tabobä, a demi ca̦i jocädou co̦oma.
Currently Selected:
Romanos 4: GUU
Highlight
Copy
Compare
Share
Want to have your highlights saved across all your devices? Sign up or sign in
©2012, All Rights Reserved