Romanos 2
2
Yai Bada tänö täbä
cadidiwä lä jimaö wei tä a̦
1Ai wama bä lä jimaö wei däjä, cafä wamacö ma cui wamacö ca̦i jimamou mö feduo. Ai wama bä nö bleaamaö lä bufio wei däjä, cafä wamacö ma cui wamacö ca̦i waimamou mö feduo. Wama bä ma jimaö wei ma cui, inaja showawä cafä wamacö ca̦i malä cuaaö wei. 2Inaja bä lä cuaaö wei bä lä cui, Yai Bada tänö bä nö bleaamabä bä li waiquiwä.
3¿Wedinaja wamacö bufi yai li cuu? Inaja showawä cafä wamacö cuaaö mö ma feduo wei ma cui, ¿ai bei wama bä nia li jimaö? Ö̦jö wama bä jimaö däjä, Yai Bada tänö cafä wamacö nö bleaamaö mlai ja, ¿ö̦jö bä nö nia li bleaamaö ayao daanö? 4Yai Bada tänö dodijidawä wamacö tabou yalo, ¿bei wamacö li waiteliblou da culanö? A bufi asimou yalo, a nö dao balöo yalo, ¿bei wama a nö quili taimi? Wamacö bufi nofi jaducäwämi yai. Dodijidawä Yai Bada tänö wamacö lä tabou wei tä ja, wamacö bufi jaducäblobä tä ma cui, wamacö bufi mö ca̦i yabajadobä tä ma cui, “Inaja yamalecö taamaö bufi doblao”, wama a nofi taboimi waiquiwä.
5Wamacö bufi jifua lä dicole tänö, wamacö bufi mö yabajadou fa mlacunö, cafä wamacö nö bleaamamou dicoquei. Yai Bada tä nö wa̦lowä lä jushudou wei etä wawäblou däjä, wamacö nö nia lä bleaaö wei wama tä balamaö dicoa lä cule. Täbä jimaö däjä a nia yai bejedimou. 6¿Ö̦jö tawä? Jödödöwä täbä nia malä jimaö wei. Wa̦lidiwä tä lä tamou wei tä ma cui, dodijidawä tä lä tamou wei tä ma cui, cama etä cadidiwä ja tä nowa nia bluca co̦amamou.
7Ai bä lä cuinö bä nia lä ba̦limiblou wei tä shi̦lo dayäaöje. Yai Bada tänö bä nia lä doblamabodayou wei tä ca̦i. Wawädowä bä nia lä tamabou wei tä ca̦i. Ö̦jö bä lä cui Yai Bada tänö bä nia ba̦limiblamaö. 8Ö̦jö ma cui bä a̦ shi̦lo lä lämou wei bä lä cuinö, tä a̦ lä bejedi wei tä a̦ ji̦liaimije. Wa̦lidiwä tä jamö bä luluamou. Yai Bada tä nö wa̦lowä lä jushuo wei etä wawäblou däjä, ö̦jö bä nö nia yai bleaaö fe balojoo.
9Wa̦lidiwä tä lä taö wejei bä lä cui, bä nö nia yai bleaaö nö quiliaö. Bä bufi nia yai jaluaö. Judio bä lä cui, inaja ö̦jö bä nia yai cuaaö. Judio bä lä mlai bä ma cui, inaja bä nia ca̦i cuaaö mö feduo. 10Ö̦jö ma cui dodijidawä tä lä taö wejei bä lä cui, Yai Bada tänö ö̦jö bä nia doblamabodayou. Wawädowä bä nia dodijidawä ca̦i tamabou. Bä bufi nia ca̦i yanöcömabou. Judio bä lä cui inaja bä nia yai taamaö. Judio bä lä mlai bä ma cui, inaja showawä cama bä nia ca̦i taamaö mö feduo. 11Judio bä ma cui, judio bä lä mlai bä ma cui, bä jimaö fe usucubou.
12¿Ö̦jö tawä? Judio bä lä mlai bänö Moisesi etä a̦ taboimije. Wa̦lidiwä tä taöje yalo, tä a̦ tabou mlalajenö bä nomaö shi wa̦lijio. Judio bä lä cuinö tä a̦ yai tabou ma cujei, wa̦lidiwä tä taö mö feduoje. Moisesi tä a̦ ja bä wasömamou fa mlacunö, Yai Bada tänö bä nia jimaö. 13Jai bä cadejewä waiquiwä, Yai Bada tänö bä nofi lä tabou wei bä lä cui, Moisesi etä a̦ ji̦liaö lä buo wejei tänö, bä nofi tabou malä mlai. Tä a̦ nofi yai lä cadidibou wejei bä lä cui, jai bä dodijidawä waiquiwä, ö̦jö bä nofi shi̦lo tabou ayao.
14Judio bä lä mlai bä lä cuinö, Moisesi etä a̦ tabou ma mlai ma cujei tä lä dodijidai tä nö ö̦jöböaöje. Bä bufi dao. Bä bufi dao ja lä, Moisesi etä a̦ tabou ma mlajei, ai däjä bä cadidou fe yadio. 15Moisesi etä a̦ ja bä cadidou fe lä yadio wei tänö, bei täbä bufi jamö tä a̦ cua lä ja̦tole tä dablamou. Bä bufi dao lä. Tä nö wa̦lidiwä ö̦jöböaöje yalo, ai däjä bä bufi quilijou. Tä nö dodijidawä ca̦i ö̦jöböaöje cudeenö, ai däjä dodijidawä bä cua. 16Ö̦jö cudeenö Yai Bada tänö bä nia lä jimaö wei tä cublou däjä, Jesucristonö bä a̦ nö nia bluca wäamaö. Bä bufi cuaablalou lä ja̦too wei tä fa wawäblamanö bä nia jimaö.
Judio bä nofi lä
mölamobou wei tä a̦
17Judio wamacö a̦fa jilou bufi doblao. Moisesi wama etä a̦ tabou yalo bei wamacö nia jo̦wa bayeliblamou. Yai Bada wama ecö a̦fa jilamou yalo wamacö nofi li doablamou. 18Yai Bada tänö tä tamaö lä bufii wei wama tä jo̦wa daö. Tä yai lä dodijidai wama tä nofi jo̦wa yaibou. Moisesi tä a̦ ja wamacö jo̦wa damamou. 19¿Ö̦jö tawä? Bä lä jubäbö wei wama bä shalilamabä wamacö a̦fa jole jilou. Mö didi tä jamö bä lä fuu wei wama bä ca̦i jo̦wa wacacamabou. 20Bä bufi jaduquemi lä waiquii wama bä cadidamabä wamacö ca̦i jo̦wa. Bä bufi jaducäwä lä mlai wama bä ca̦i jo̦wa damaö. Moisesi wama etä a̦ tabou yalo, “Yama tä jödödöwä daö waiquiwä”, wamacö bufi jole cuu. “Yamacö bejedimou waiquiwä”, wamacö bufi ca̦i cuu.
21Ja̦o. Ai wama bä jo̦wa lä damaö wei wamacö lä cui, ¿wedi tabä cafä wamacö yai li damamoimi, ö̦jö lä? “Wamacö nia tomömoimi”, wama bä nowa lä taö wei wamacö lä cui, ¿inaja cafä wamacö cuaaimi? 22“Wamacö nia joleblaloimi”, ai wama bä nowa ma taö wei ma cui, ¿cafä bei wamacö inaja cuaaimi, ö̦jö lä? Täbä nö ijidubö lä bufiblamou wei, wama täbä nofi jo̦wa ma wa̦libou wei ma cui, ¿ö̦jö lä täbä yafibö jamö, bei wamacö lucäö ja̦toomi daanö, wamacö tomömobä?
23Moisesi wama etä a̦ tabou yalo wamacö nofi doo ma cui, wama tä a̦ nofi cadidiboimi ja, Yai Bada wama a nö waiblamaö. 24Yai Bada tä a̦ oni lä cuu weinaja showawä. Abenaja tä a̦ cuu.
Cafä wamacö dobloimi tä nowa ja, judio bä lä mlai bänö Yai Bada bei tä nö waiblaö lä cudujei.
Einaja tä a̦ cuu. 25Yai Bada wama ecö jimamobä, judio wamacö mosi sicö joyamou. ¿Ö̦jö tawä? Moisesi wama etä a̦ nofi cadidibolanö, wamacö mosi sicö joyamou ja, wamacö bayeliblamou dao ma cui, wama tä a̦ nofi cadidiboimi ja, tä nowa cuami waiquiwä. Wama tä a̦ nofi cadidiboimi ja, jai wamacö mosi sicö joyamonomi, Yai Bada tänö wamacö nofi tabou.
26Inaja lä showawä, ai bä mosi sicö joyamou ma mlai ma cui, Moisesi etä a̦ nofi cadidibouje ja, jai bä mosi sicö joyamolayoma, Yai Bada tänö bä nofi nia tabou. 27Ö̦jö däjä bä mosi sicö joyamou mlalanö, tä a̦ nofi lä cadidibou wejei bä lä cuinö, Yai Bada lija judio wamacö nia waimaö bufiije. Wama tä a̦ oni ma tabou wei ma cui, wamacö mosi sicö ma joyamou wei ma cui, wama tä a̦ nofi cadidiboimi.
28Judio bä yai lä cui bä mosi sicö joyamou bädao mlai ja, bä bufi bejedimou. Bä bufi bejedilanö bä li taamamobä Yai Bada tänö tä nabä li shimöquema. 29Yai Bada lija bä bufi yai lä cuo wei bä lä cui, ö̦jö judio bei bä yai. Bä bufi cadidilanö bä mosi sicö lä joyamou wei bä lä cui, ö̦jö bä shi̦lo bejedimou. Bei bä taamamou buomi. Ö̦jö bä lä cui, yanowamö täbä lija bä nofi doablamou mlai ja, Yai Bada lija bä nofi yai doablamou.
Currently Selected:
Romanos 2: GUU
Highlight
Copy
Compare
Share
Want to have your highlights saved across all your devices? Sign up or sign in
©2012, All Rights Reserved