Marcos 3

Imicö lä cofeono wei

a lä jalomaleno wei tä a̦

1Judio bä yododabä yafi jamö Jesús a lucäa fa co̦lunö, imicö lä cofeono wei a cuoma. 2Täbä nia lä yanöcöono wei tä mö jalu sábado cuoma cudeenö, Jesús nijamö bä mamo bluca showajaoma. Imicö lä cofeono wei a jalomaö fe yadio ja, a wa̦fa nia dobloimi wäyämaje. 3Imicö lä cofeono wei abinaja Jesúsnö a nowa tama.

—Eja a da ajedeiquiyo —a nowa tama.

4Ö̦jö däjä, bä mamo lä showajaono wei bä nija abinaja Jesús a cuma.

—Täbä yanöcöobä tä mö jalu jamö bämacö dodijaö mlaobä, ¿tä a̦ läa daanö? Ma, wa̦lidiwä bäma tä taö mlaobä, tä a̦ shino läa. ¿Ö̦jö daanö? Täbä shäö mlaobeje tä a̦ läa ma cui, täbä jalomabeje tä a̦ läami —a cuma.

Inaja a cuma ma cui, bä a̦ juonomi. 5Ö̦jö däjä, bä bufi jifuwä yalo, a bufi jushuolanö Jesúsnö täbä möö shoqueaö cuaama. Imicö lä cofeono wei a nija abinaja e cuma.

—Boco da dodoiquiyo.

Boco fa dododalunö, imicö cushäshäblou showadalayoma. 6Ö̦jö däjä, faliseo bä bada faa fa co̦lufälönö, Elode ebä fa co̦cablamalöjenö, Jesús a nabä queobeje, lobe a nofi washuaö showadaomaje.

Modu u casö jamö bä lä

co̦camolayono wei tä a̦

7Ö̦jö däjä, modu u casö jamö, Jesúsnö bä lä nocamabono wei bä ca̦i aa fa majölönö, bluca dodijiwä bä yaulayofälöma. Calilea jamö bä lä bälöle bä ma cui, Judea jamö bä lä bälöle bä ma cui, 8Jelusaleteli bä ma cui, Idumea jamö bä lä bälöle bä ma cui, Jesús a lä cuaano wei tä a̦ fa ji̦liläjenö, ö̦jö bä sho bä bluca co̦camolayoyoluma. Jodana ai u mashi jamö bä lä bälöle bä ma cui, Dilo tä ulifi jamö bä lä bälöblai bä ma cui, Sidono jamö bä lä bälöblai bä ma cui, ö̦jö bä bluca waloqueyoluma. 9Täbä bluca shulilobä jamö a bacäjou mlaobä, bä lä nocamabono wei bä nija, modu u casö jamö canawä a ca̦amaö bufima, ö̦jamö culanö bä yömölabä.

10Bluca täbä jaloa waiquimalalema yalo, ai bä bluca jalili lä cuinö tä mashiquiblamaleyolumaje. Bä bayeliblamobä, a jubaö bufi doblaomaje. 11Fecula bänö Jesús a dablaöje ja, ö̦jö a cotä jamö bä fa wäcäblaoyonö, bä a̦ i̦cali fama. Abinaja bä cuma.

—¡Cafä Yai Bada wa tä Ijilubö! —bä cuma.

12Ö̦jö däjä, Jesúsnö i̦cali bä a̦ wasödaö showaoma, a nö ö̦jöböamaö mlaobeje.

Cama ebä 12 lä yaileno wei tä a̦

13Ö̦jö däjä, jefu a jamö Jesús a dolequea fa balöbofälönö, cama ebä lä bufino wei bä nacalema. Bä fa nacalänö, cama nija bä waloa jebejelayoma. 14Ö̦jö bä nijamö 12 bä yailema, bä ca̦i cuobä. Täbä yömölabeje, bä nia shömaö nomöjöoma. 15Fecula bä ca̦i yashubeje, bä nia ca̦i tablamama.

16Bä lä shömöleno wei, ei bä li cuoma. Simón a cuoma, Jesúsnö Pedro a wa̦fa ca̦i jilaa lä yädäqueno wei a lä cui. 17Sebedeo bä ijilubö ecöbö ca̦i cuoma, Santiago a wa̦fa lä cuono wei, ö̦jö bä fääshä Juan e ca̦i. Ö̦jö cäcöbö a̦ lojodoaö dodijioma yalo, Boaneje cäcöbö a̦fa ca̦i jilaquema. ¿Ö̦jö tawä? Boaneje tä a̦ lä cui, “Ya̦lu a ijilubö”, tä a̦ li cuu. 18Andrés a ca̦i cuoma, Felipe a ca̦i, Badolomei a ca̦i. Mateo a ca̦i cuoma, Tomás a ca̦i, Afeo bä ijilubö Santiago e ca̦i, Tadeo a ca̦i. Simón a ca̦i, cama bä ulifibö jamö täbä shomi lämabou nofi lä wa̦libono wei a Simón lä cui. 19Juda Icaliode a ca̦i, Jesús a nia lä nomojoliano wei a lä cui.

Jesús a wa̦fa feculabö

lä tano wejei tä a̦

Cama 12 eba yaia fa balöalalönö, bä ca̦i dömöa co̦baliyofälöma. 20A co̦a fa co̦lunö, bluca täbä co̦camou co̦oyoluma. Bä bluca mashicou dodijioma yalo, Jesúsnö cama ebä ca̦i iyabä tä ma cui ja, bä doblamanomije. 21Cama ebä mashinö, ö̦jö tä a̦ fa ji̦liläjenö, a co̦abeje ebä waloquema. A shi a̦fa wa̦lii malä wäyäno wejei.

22Jelusale jamö Moisesi etä a̦ ja täbä lä damaö wejei bä ma cui, ö̦jamö bä fa waloiquiyonö, abinaja bä ca̦i cuyoluma.

—Fecula bada Sadanasi a tabou lä cule. Fecula bada tä lojodenö bä li fecula yashuu buo —bä cuma.

23Ö̦jö bä nacaa fa showadaalalönö, bä bufi dayäamabä tä a̦ bluca wäyäö yacläablaloma. Abinaja bä nowa tama.

—Sadanasi cama a showawä lä cui, ¿wedinaja a nia joyamamou li cuaaö? 24Bä bälöa lä yaile bä nofi wa̦liayou däjä, bä nia bälöo lojodoo majöomi. 25Cama bä mashi ma cui, bä nofi wa̦liayou dicoo ja, bä bälöo lojodoo mlaicätä. 26Cama Sadanasi a nofi wa̦limamou ja, a nia bälöo lojodoomi. Ma, cama ebä nofi wa̦liayou ja, bä mö nia yai watäblamolayou.

27A lä waiteli wei a lä cuinö, cama madofi ebä nofi läbou däjä etäbä nia yabäcamaimi. Shomi täbä nia lucämaimi. Ö̦jö ma cui, a nö yai lä wa̦lojaö wei a lä cuinö a nabä fa waloicunö, a fa o̦cablalönö, ö̦jö däjä cama etäbä bluca lä tabole etäbä nia shino yai däalalei —cama a wa̦fa tao ja, a cuma—.

28¬Abinaja a cuu co̦oma.

—Cafä wamacö nija ei ya wa̦ lä cui, bejedi lä ya wa̦ —a cuma—. Yanowamö täbä nijamö tä nowa wa̦lidiwä bluca lä cule, etä nowa mladou dao. Yai Bada a nö waiblaöje ja, tä nowa ca̦i mladamaö dao. 29Ö̦jö ma cui, Yai Bada a Bufi nö lä waiblaö wejei bä lä cui, etä nia mladoimi waiquiwä. Obi ma cui, etä nowa nia cuo shi wa̦lii —a cuma.

30Yai Bada a Bufinö bä fecula ma yashublano wei ma cui, a wa̦fa feculabö tamaje yalo, einaja bä nowa li tama.

Jesús cama mashi ebä

lä waloqueno wei tä a̦

31Ö̦jö däjä, Jesús bä nöö, bä fääshä ebä walobeyoluma. Sibo jamö bä ublalanö, a nacamaö bufimaje. 32Jesús nija bä loo fe lä fa̦yoono wei bä lä cuinö a yömölamaje.

—Naafä a ma cui, fääshäfä bä ma cui, bä ublaa siboa lä cubiyedi. Wa wa̦liije —bä cuma.

33Jesús abinaja a cuma.

—¿Wedi nija bei ya yai li nöömou, ö̦jö lä? ¿Wedi jamö bä nija bei ya yai li fääshämou? —a cuma.

34Ö̦jö däjä, bä loo fe lä fa̦yoono wei bä möö shoqueaö fa cuaanö, abinaja a cuu nomöjöoma.

—Ei bä lä cui, iba nayä bä waiquiwä. Iba mashi, ö̦jö bä ca̦i li showawä. 35Yai Bada tänö tä tamaö lä bufii wei tä lä taö wejei bä lä cui, ö̦jö iba lä bä mashi waiquiwä. Ö̦jö nayä bä waiquiwä —a cuma.

Currently Selected:

Marcos 3: GUU

Highlight

Copy

Compare