Mateo 6

Ja̦towä täbä dodijamaö lä bufino wei tä a̦

1’Bä da moyaweicu —Jesús a cuma—. Yai Bada tänö tä tamaö lä bufii wei wama tä taö däjä, yanowamö täbä nija wamacö dodijidawä mömobä wama tä nia taimi. Inaja wamacö cuaaö dicoo ja, Faafä Yai Bada a lä culadi nija wamacö nia dobämamoimi.

2’¿Ö̦jö tawä? —a cuma—. Bä lä jo̦li wei wama bä dobäö däjä, wamacö jömöo mlalanö bä da bayeliblaje, bä jole jole lä dodijaö wei bä lä cuaaö weinaja mlai ja. Judio bä yododabä yafi bä jamö ma cui, sibo jamö bä bluca lä juaaö wei jamö ma cui, ö̦jö bä shi öjöde dablamou bufi doblao talei, yanowamö täbä nija bä nofi doablamobä. Inaja bä cuaaö lä dicoo wei bä lä cui, Yai Bada nija bä nia dobämoimi. Yanowamö täbä nija bä nofi doablamobä, ö̦jö cama etä li waiquiwä. 3Bä lä jo̦li wei wama bä dobäö däjä, ai wama bä mojodumabolanö bä yai da dobäje. 4Wama bä bayeliblaö ma ja̦too wei ma cui, Faafä a lä culadinö wamacö daö weicätä, wamacö dobäö mö feduodayobä —a cuma.

Yai Bada nija bä nö bayeli nia lä nacao wei tä a̦

5Abinaja Jesús a cuma.

—Wa nö bayeli nacao däjä, bä jole jole lä dodijaö wei bä lä cuaaö weinaja, a cuaa dijä. Judio bä yododabä yafi bä jamö ma cui, sibo jamö bä bluca lä juaaö wei jamö ma cui, ö̦jö bä lä cui, Yai Bada nija wawädowä bä a̦ shino faö bufi doblao talei, yanowamö täbä nija bä nia dodijaö fa dablamonö. Cafä nija ei ya wa̦ lä cui, bejedi lä ya wa̦. Inaja bä lä cuaaö wei bä lä cui, Yai Bada nija bä nia dobämoimi. Yanowamö täbä nija bä dodijaö dablamobä, ö̦jö cama etä li waiquiwä. 6Ma, Yai Bada nija wa nö bayeli nacao bufio ja, afä yano jamö wa fa lucälönö, wa yoca fa lacönö, Faafä nija a wa̦ faö da ja̦too. Wa wa̦ faö ma ja̦too wei ma cui, Faafä a lä culadinö wa wa̦ ji̦liaö fe yadio wä, wa dobäbä.

7’Abinaja ca̦i —Jesúsnö bä nowa tama—. Yai Bada nija wamacö nö bayeli nacao ja, Yai Bada a daö lä mlajei bä lä cuaaö weinaja, bä cuaa dijä. Ö̦jö bä lä cui, bä aca jayuaö buo talei. “Inaja ya wa̦ labaaö cuaaö ja, wale a̦ yai nia ji̦liadayou”, bä bufi jole cuu dicoo talei. 8Ö̦jö bä lä cuaaö weinaja, bä cuaa dijä. Wamacö lä jo̦li wei, Faafä a lä culadinö wamacö daö waiquiwä. Wamacö nö bayeli nacao showao mlao däjä ma cui, wamacö daö malä waiquile.

9’¿Ö̦jö tawä? —a cuma—. Yai Bada nija wamacö nö bayeli nacao ja, abinaja wamacö yai cubä. “Fabe, yamacö lä Fö̦ömou wei wa lä culadi, cafä wa wa̦fa shino doblao wäyämobä wa. Wa wa̦fa jole jole jayumamou buobä wami. 10Eja yamalecö ca̦i cua da dodijiiquiyo. Fedu jamö wa wa̦ juamou lä culadinaja, ei bita jamö ma cui, inaja showawä wa wa̦ ca̦i juamou cuo mö feduobä. 11Yamacö nia lä iyaö wei täbä ja, showadi yamalecö da dobä. 12Yamacö doblou lä mlai, tä nowa ca̦i da mladamalö, camiyä yamalecö lä yabäcaö wejei bä nija, yama tä nowa bluca mladamaö lä cuaaö weinaja showawä. 13Yamacö nö doblobö lä mlai jamö, yamalecö ca̦i da wasö. Tä lä wa̦lidii tä ja, yamalecö da nowamöbo.” Einaja Yai Bada nija wamacö cubä.

14’Ai täbä nija wamacö nowa lä cule wama tä nowa mladamalei ja, inaja showawä Faafä a lä culadinö wamacö nia taamaö mö feduo malä cui. 15Ö̦jö ma cui, täbä doblou lä mlai täbä nija wamacö nowa lä cuo wei, wama tä nowa mladamaimi dicowä ja, cafä wamacö ma cui nija, Faafänö tä nowa lä taboladi tä nia ca̦i mladamaö ayaomi.

Täbä iyaö lä wasöo wei tä a̦

16Abinaja Jesús a cuma.

—Yabäcou mlai ja, Yai Bada nija wamacö nö bayeli nia fa nacaodinö wamacö iyaö wasöo ja, dodijidawä bä mömou fe da yadio, bä jole jole lä dodijaö wei bä lä cuaaö weinaja mlai. Ö̦jö bä lä cui bä iyaö wasöo däjä, Yai Bada nija bä dobämobä bä li cuaaimi. Yanowamö täbä nija bä nö nia fa ö̦jöböamonö, bä li cuaaö buo. ¿Ö̦jö tawä? Bä nö nia fa ö̦jöböamonö, bä mö ya̦lömou mlai ja bä fe shaclacawä bufi ca̦i wa̦lidiwä juadalou. Cafä wamacö nija ei ya wa̦ lä cui, bejedi lä ya wa̦. Yai Bada nija ö̦jö bä lä cui bä nia dobämoimi. Yanowamö täbä nija bä nö ö̦jöböamobä, ö̦jö cama etä li waiquiwä.

17’Ma, cafä wamacö iyaö wasöo däjä, bä mö da ya̦lömolu —a cuma—. Bä feta u̦cu ca̦i da yacäcäblamolu, dodijidawä wamacö dablamou showao fe yadiobä. 18Wamacö nia iyaö lä wasöo wei wamacö lä cui, yanowamö täbä nija wamacö nö ö̦jöböamamobä wamacö nia cuaaimi. Ja̦towä täbä iyaö ma wasöo wei ma cui, Faafä a lä culadinö täbä malä daö wei. ¿Ö̦jö tawä? Wamacö iyaö wasöo ma ja̦too wei ma cui, Faafänö wamacö dablaö fe yadio wä, wamacö dobäbä.

Fedu jamö täbä shimomaö lä bufino wei tä a̦

19’¿Ö̦jö tawä? —Jesús a cuma—. Bita jamö täbä madofi shimoma dijejä. Wama täbä ma shimomaö wei ma cui, wamacö camishibö nia wädömamou. Wamacö madofibö nia ca̦i amu ushiböaö. Yanowamö täbä lucäö fa ja̦toonö, täbä nia ca̦i tomöablaöje. 20Ma, fedu jamö afä täbä nowa yai lä bluca wei täbä shino yai shimomaö da balöodu. Ö̦jamö lä camishifä bä nia wädömamoimi. Wamacö madofibö nia ca̦i amu ushiböaö buomi. Täbä nia ca̦i tomöaimije. 21¿Ö̦jö tawä? Afä wama täbä yai lä bufibou wei täbä lä cule jamö, ö̦jamö lä wamacö bufi nia malä cadididalou wei —a cuma.

Yai Bada tä shi̦inö bä bufi lä walalao wei tä a̦

22Abinaja Jesús a cuma.

—Cowa wacö lä culenaja bei wamacö mamocu cuwä, wawädowä wama täbä dablabä. Ö̦jö cudeenö, wamacö mamocu demi ja, wama täbä bluca wawädoablaö cuquei. 23Ö̦jö ma cui, wamacö mamocu wa̦lidiwä dicowä ja, wama täbä nia dablaimi. ¿Ö̦jö tawä? “Tä shi̦i lä cule jamö camiyä ya cua waiquia lä cule”, wamacö bufi jole cuu bädao ja, wamacö bufi mö didi fe balojowä —Jesús a cuma.

Bolacabö bäma cäcöbö a̦ nia juaö showadao lä mlai tä a̦

24Abinaja Jesús a cuu co̦oma.

—A lä ojodamou wei a lä cuinö, moli a nosie nia shino juaö cadidio. Ai a wa̦ ma fale ma cui, bolacabö cäcöbö nosie nö juamamou doblobimi waiquiwä. Ai a nosie juaö mlai ja, ai a nosie nia shino yai juaö ayao. Ai a wa̦ shino juaö bufi doblao waiquiwä cudeenö, ai a wa̦ nia waii. Inaja showawä, madofi wama bä nofi yaibou dicoo ja, Yai Bada wama tä nofi nö yaibobimi waiquiwä, wama a nosie juabä —Jesús a cuma.

Bämalecö bufi jalublalou lä wasöö wei tä a̦

25Abinaja Jesús e cuma.

—Ö̦jö cudeenö bämacö nowa taö lä cule. Eja dodijidawä wamacö nia lä bälöo wei tä ja, bä bufi jo̦lijo dijä. ¿Ö̦jö tawä? Nii bä ma cui jamö, camishi bä ma cui jamö, bä bufi cuaablalo dijä. Wamacö demi lä cuo wei tä nowa yai bluca, nii wama bä lä waö wei bä nowa lä culenaja mlai. ¿Ö̦jö tawä? Bei wamacö nowa ca̦i bluca, camishi bä nowa lä culenaja mlai.

26’Biyomö bä ja bä bufi da jaducublalu —a cuma—. Mobä döaö ma mlajei ma cui, bä iyaö. Nii bä taö ma mlajei ma cui, mobä shi̦liqui shimomaö ma mlajei ma cui, Faafä a lä culadinö bä malä iyamaö wei. Ö̦jö bä nowa ma tabole ma cui, ¡cafä wamacö nowa shino yai blucabou fe balojowä! 27Wamacö demi nia lä cuo wei, Yai Bada tänö tä daö fe wädöa waiquia. Wamacö bufi lä jalujublalou wei tänö, wiisibö ma cui wamacö nö nia dedejedou majöomi.

28’¿Wedi tabä camishi bä ja wamacö bufi nia li jalujublalou dicoo? —a cuma—. Jole jole bä bäwä ma cui ja, ö̦jö bä ja bä bufi da jaducublalu. Bä badaö. Bä ojodamou ma mlai ma cui, shinalu ubä juducaö ma mlajei ma cui, 29bä liyäjäwä. ¿Ö̦jö tawä? Bämacö nowa taö lä cule. Bada tä Salomo a nö ma madofiböono wei ma cui, camishi ebä ma dodijidaono wei ma cui, ei jole jole bä lä cui, ¡bä shino yai mömou liyäjäwä dodijiwä! 30Caje caje bä cudio ma mlai ma cui, bä ö̦shömaö ma nocamou wejei ma cui, bei bä jole fa fanö, bä mömou dodijidaobä, Yai Bada tänö bä bayeliblaö. Ö̦jö bä ma bayeliblaö wei ma cui, camishi bä ja ¿cafä bei wamacö nia shino bayeliblamou ayaomi daanö? Yai Bada wama a nofi bejedi mölaboimi showawä.

31’¿Ö̦jö tawä? —Jesús a cuma—. Ö̦jö cudeenö, wamacö nia lä iyaö wei tä ma cui ja, wama toubä nia lä coaö wei toubä ma cui ja, camishi bä ma cui ja, bä bufi cuaablalo dijä. Wamacö bufi jalujou dodijio mlai. 32Yai Bada a daö lä mlajei bä lä cui, inaja cama bä bufi li bluca cuaablalou. Ö̦jö ma cui, wamacö lä jo̦li wei, Faafä a lä culadinö wamacö li daö waiquia. 33Ö̦jö täbä ja wamacö bufi cuaablalou mlai ja, Yai Bada tänö cama ebä nia ca̦i lä cuo wei tä ja, bä bufi shino yai dayäo da shalilio. Ö̦jö wama a bufi nia lä doblamabou wei tä ca̦i ja. Inaja wamacö bufi shaliliwä cudio ja, ö̦jö täbä ca̦i bluca showawä ma cui ja, wamacö nia dobäö.

34’Ö̦jö cudeenö abinaja ya cuu —a cuma—. Fei däjä tä lä cuaale tä ja, bä bufi shino yai da dayäo, fena ja tä nia cublou lä majöo wei tä ja mlai. Fei däjä wamacö nia lä cuaaö wei tä cua ma waiquile ma cui, ¿wedi tabä fena ja wamacö nia lä cuaaö wei, wama tä a̦fa wayoaö li yädäablalou co̦a majöquei? Tä obi nia lä cublou wei tä ja, bä bufi jalujou dodijio dijä. Tä yai lä cublole däjä, ö̦jö däjä wamacö bufi shino yai dayäobä.

Currently Selected:

Mateo 6: GUU

Highlight

Copy

Compare