Mateo 12

Judio bada bänö Jesús

ebä lä bäyäblano wejei tä a̦

1Sábado däjä, ficali ca jamö Jesúsnö cama ebä ca̦i jayuafälöma, täbä yanöcöobä tä mö jalu lä cui däjä. Bä lä nocamabono wei bä ofälayofälöma yalo, mobä jucäa jayualalefälömaje, mobä owafälöbeje. 2Ö̦jö ma cui, faliseo bä bada lä cuinö, ö̦jö bä fa dalalöjenö abinaja Jesús nija bä cuma.

—Quiji afä wabä lä nocamabole, bä da mö. Täbä yanöcöobä tä mö jalu ja, inaja bä cuaaö mlaobä tä a̦ ma läle ma cui, bä cuaaö fe yadio —bä cuma.

3Jesúsnö abinaja bä nowa tama.

—David a bada lä cuaano wei, ¿bei wama tä a̦ oni daö mlaa cule? Cama a ma cui, cama ebä lä nocaono wei bä ma cui, bä ofäö yalo, 4Yai Bada etä yano jamö a lucäa fa jayulofälönö, Yai Bada ebä nii lä yaimabou wejei bä nii ja, a iyalayofälöma. ¿Ö̦jö tawä? Ö̦jö bä nii ja, nofi bäyäalewä bä iyabä bä nii yaioma. David a iyabä bä nii cuonomi. Cama ebä lä nocamabono wei bä ma cui, inaja showawä. Bä iyaö mlaobä, Moisesi etä a̦ läoma. Ö̦jö ma cui, inaja David a ma cuaano wei ma cui, a jömamonomi. ¿Ö̦jö tawä?

5’¿Moisesi bei wama etä a̦ oni ca̦i daö mlaa cule? —a cuma—. Täbä yanöcöobä tä mö jalu ja, täbä ojodamou mlaobä tä a̦ ma läle ma cui, Yai Bada etä yafi jamö nofi bäyäalewä showadi bä ojodamou fe malä yadio wei. Inaja bä ma cuaaö wei ma cui, bä jömamobä bämi. 6Yai Bada cama etä yafi li cudeenö, täbä yanöcöobä tä ma cui ja, bä li ojodamou fe yadio. ¿Ö̦jö tawä? Yai Bada etä nofi yafi tabobeje etä yafi malä cui. Ö̦jö ma cui, a nofi nia yai tabou lä dodijio wejei a lä cui, fei däjä a cua lä cule.

7’¿Ö̦jö tawä? —a cuma—. Iba wama bä jömabä bä ma mlai ma cui, Yai Bada ei wama etä a̦ ji̦liaö walalao dicoo fa mlacunö, wama bä li jömaö yacläoma. Ei tä a̦ ja wamacö bufi yai jaducuo fa cunoja, wamacö a̦ nö fabö mlai. Abinaja tä a̦ cuu.

Yalo wama bä ö̦shö lä dodobou wei, ö̦jö ya tä bufiboimi. Yanowamö wama täbä nofi nia lä ojodabou wei, ö̦jö ya tä shino yai bufii.

8’Einaja tä a̦ cuu —a cuma—. ¿Ö̦jö tawä? Täbä yanöcöobä tä mö jalu jamö täbä nia lä cuaaö wei tä ma cui ja, täbä nia cuaaö lä mlai tä ma cui ja, camiyä ya wa̦ fabä ei Bada ya waiquiwä, ya lä yanowamöblaleyoluno wei ya lä cui.

Imicö lä cofeono wei

a lä jalomaleno wei tä a̦

9Ö̦jamö Jesús a ca̦i fa jayuicunö, judio bä yododabä yafi jamö, a lucäa nomöjölayoma. 10Ö̦jamö lä imicö lä cofeono wei a cuoma. ¿Ö̦jö tawä? A nia dobloimi fa jömajenö, Jesús a wa̦limaje.

—Sábado däjä täbä nia lä jalomaö wejei, ¿bei tä a̦ läami daanö, täbä yanöcöobä tä mö jalu ja? —bä cuma.

11Abinaja Jesúsnö bä nowa tama.

—Ai wa lä cuinö, täca täca aca jamö moli wa oweja lä tabole a quequei ja, täbä yanöcöobä tä mö jalu ma cui ja, ¿wa nia yäbäaö co̦omi daanö? ¿Ö̦jö tawä? 12Oweja bä nowa ma cua wei ma cui, yanowamö täbä nowa shino yai bluca dodijiwä. Täbä yanöcöobä tä mö jalu jamö bämacö dodijaö mlaobä, tä a̦ läami.

13Inaja a fa culunö, imicö lä cofeono wei a nija abinaja e cuma.

—Boco da dodoiquiyo.

Boco fa dododalunö, imicö cushäshäblou showadalayoma. Ai imicö mashi dodijidawä lä culenaja, imicö cublou co̦layoma. 14Ö̦jö ma cui, faliseo bä bada faa fa co̦lufälönö, Jesús a nabä queobeje a nofi washuaö showadaomaje.

Isaianö Jesús a wa̦fa

wäyäö lä balöono wei tä a̦

15Jesús a nofi lä washuaö wejei tä daö fa waiquionö, shomi jamö a aa majölayofälöma. Cama nija bluca bä nocao fa showaofälönö, bä bluca jalomama. 16Bä fa jalomanö, bä a̦ wasödaö showaoma, a nö ö̦jöböamaö mlaobeje. 17Inaja a lä cuaano wei, Yai Bada a wa̦no wäyälewä Isaia a lä cuinö tä a̦ wäyäö showao balöoma. Ö̦jö etä a̦ bejedi wawäblobä, inaja Jesús a li cuaafälöma. Abinaja tä a̦ cuu.

18Bei. Ya wa̦ juamobä, ei ya yailema. Ya nofimaö fe balojowä. Cama nija ya bufi yai doblalou. Bei ya Bufi fa lucälönö, judio bä lä mlai bä nia bluca yömölaö cuaaö. Camiyä nija bä nia dodijidawä cuo fe lä yadio wei tä a̦ nia wäyäö. 19A wa̦ nia lafujoimi. Täbä lä juaaö wei jamö, bä a̦fa lä taö wei a wa̦ nia ji̦limamou bädaomi. 20Bä lä ujudi wei bä lä cui, bä nö nia bleaamaimi. Bä ujudiblou fe balojowä ma cui, dodijidawä bä nia ca̦i cuo fe yadio. Inaja a cuaaö showao däjä, camiyä nija bä dodijidawä cuo fe yadiobä, a nö yai nia wa̦lojaö ayao. 21Judio bä lä mlai bä lä cuinö a nia bufiblaöje.

Einaja tä a̦ cuu.

Sadanasi a wa̦fa

lä wayoano wei tä a̦

22Ö̦jö däjä, fecula anö aca lä bolebömabono wei a lä cui, Jesús nija a ca̦i walobeyolumaje. A ca̦i jubäböoma. Jesúsnö a fa jalomalönö, aca lä boleböono wei a wa̦ faö liyäjäblou co̦layoma. Täbä ca̦i möö co̦oma. 23Ö̦jö tä fa dalalöjenö, bä bufi bluca shädayaimoma.

—¡Jo yai! —bä cuma—. David nodiwä e nia jo̦wa lä waloono wei, ¿fei ö̦jö lä a waiquiwämi daanö?

24Ö̦jö ma cui, faliseo bä bada lä cuinö, ö̦jö bä a̦ fa ji̦liläjenö abinaja bä cuma.

—Ma. Fecula bada Sadanasi tä lojodenö bä li fecula yashuu buo, Yai Bada tä lojodenö mlai —bä cuma.

25Bä bufi lä cuno wei tä daö waiquioma yalo, abinaja Jesús a cuma.

—Bä bälöa lä yaile bä nofi wa̦liayou däjä, bä nia bälöo dobloimi majöo. Cama bä shabonobö jamö bä lä cule bä ma cui, cama bä mashi ma cui, inaja showawä. Bä nofi wa̦liayou däjä, bä nia bälöo lojodoo majöomi. 26Ma, Sadanasi nija ya cuo fa cunoja, iba ya bä nö yashublabö mlai. ¿Wedinaja cama Sadanasi a yashublamou li cuobä, ö̦jö lä? Ma, Sadanasi ebä lä cui, cama bä nofi wa̦liayou dicolayou ja, ¿wedi jamö tänö bei ebä ca̦i li lojodoa nomöjöquei?

27’“Sadanasi a lojodenö bä li fecula yashublaö”, wamale nofi tabou ja lä, ¿inaja showawä afä wama bä nofi ca̦i tabou da culanö, fecula bä lä yashuu wejei bä lä cui? Mlaicätä. Inaja wamacö cuu dicoo ja, afä bä showawä lä cuinö wamacö jolemou jömaö cuqueije —a cuma—. 28Ö̦jö ma cui, Yai Bada a Bufi lojodenö ö̦jö ya bä li yashuu, Yai Bada tänö cama ebä ca̦i lä cuo wei wama tä dablaö fe yadiobä.

29’A lä waiteli wei a lä cuinö, cama madofi ebä nofi läbou däjä etäbä nia yabäcamaimi —a cuma—. Shomi täbä nia lucämaimi. ¿Ö̦jö tawä? Ö̦jö ma cui, a nö yai lä wa̦lojaö wei a lä cuinö a nabä fa waloicunö, a fa o̦cablalönö, ö̦jö däjä cama etäbä bluca lä tabole etäbä nia shino yai däalalei —cama a wa̦fa tao ja, a cuma.

30—Camiyä wale bayeliblaö lä mlai a lä cuinö, Sadanasi a li bayeliblaö waiquiwä —Jesús a cuma—. Iba ya bä co̦abä jamö bä co̦aö mö feduo lä mlai a lä cuinö, bä yai sheleleblamaö. 31Ö̦jö cudeenö bämacö nowa taö lä cule. Yanowamö täbä nijamö tä nowa wa̦lidiwä bluca lä cule etä nowa mladou dao. Yai Bada a nö waiblaöje ja, tä nowa ca̦i mladamaö dao. Ö̦jö ma cui, Yai Bada a Bufi nö lä waiblaö wejei bä lä cui, etä nia mladoimi waiquiwä. 32¿Ö̦jö tawä? Camiyä ya lä yanowamöblaleyoluno wei, wale nö ma waiblaö wejei ma cui, tä nowa nia mladou. Ö̦jö ma cui, Yai Bada a Bufi nö waiblaöje ja bä a̦ wa̦lidiwä lä faö wei bä lä cui, ö̦jö etä nia mladoimi waiquiwä. Fei däjä ma cui, obi ma cui, etä nowa nia shino cudio shi wa̦lii showao.

Dodidjidawä defibä nö

lä ö̦jöböamou wei tä a̦

33’Bä bufi yai da shaliliblalu —Jesús a cuma—. Defi dodijidawä waiquiwä ja, ö̦jö defi jamö dodijidawä täcö nia dablamou. Defi wa̦lidiwä ja, wa̦lidiwä täcö nia ca̦i dablamou mö feduo. Täbä nii lä lalou wei täbä ja, defibä nö malä ö̦jöböamou wei.

34’Cafä ¡olu bä wayu lä culenaja, wamacö cuwä! —a cuma—. Wamacö jolemou. Wamacö wa̦lidiwä waiquiwä yalo, ¿wedinaja wamacö a̦ li dodijidawä faö cuo majöobä? Bei täbä bufi jamö tä lä didile etä a̦ shino malä wawäblou wei. 35A lä dodijaö wei a wa̦ faö däjä, bei bufi jamö tä dodijidawä lä didile etä a̦ nia wawäblou. Inaja showawä, wa̦lidiwä talewä a lä cui a wa̦ faö däjä, bei bufi jamö tä wa̦lidiwä lä didile etä a̦ nia ca̦i wa̦lidiwä wawäblou mö feduo.

36’Bämacö nowa taö lä cule —a cuma—. Yai Bada tänö täbä bluca jömaö däjä, yanowamö täbä a̦ faö lä bädao wei tä a̦ ma cui ja, bä a̦ nia wäamadayou. 37Bä a̦ dodijidawä lä fano wei bä lä cui, bä nia dodijidawä jömamou. Bä a̦ wa̦lidiwä lä fano wei bä lä cui, bä wa̦lidiwä fa jömamonö, bä nö bleaaö cuquei—a cuma.

Tä nö lä quilijii tä

wawämaö lä bufino wejei tä a̦

38Ö̦jö däjä, Moisesi tä a̦ ja täbä lä damaö wejei bä bada ma cui, faliseo bä ca̦i bada ma cui, abinaja Jesús nija bä cuma.

—Tä a̦ wäyäle. Yai Bada wa e nö ö̦jöböamobä, tä nö lä quilijii tä da wawämalö, yama tä möbä —bä cuma.

39Ö̦jö ma cui, abinaja Jesús e cuma.

—Wamacö fei däjä lä bälöblai, wamacö bluca dobloimi fe balojowä. Yai Bada wama a wa̦ juaimi dodijiwä. Yai Bada ya e nö ö̦jöböamobä, tä nö lä quilijii wama tä wawämaö bufi ma doblao wei ma cui, bämacö a̦ nia juaimi. Wama tä nia lä möö wei, Yai Bada a wa̦no wäyälewä Jonasi a lä taamano weinaja, inaja tä cuwä, wama tä nia shino möö. 40¿Ö̦jö tawä? Yuli busi jamö, Jonasi a didio däjä, bolacabö a fe didi lä cublaliyono weinaja, camiyä ya lä yanowamöblaleyoluno wei ya lä cui, inaja showawä ya fe nia didi cublou, mashita a cojomö jamö.

41’Wamacö fei däjä lä bälöblai wamacö jömadayobä jamö, Ninibeteli bä nia ca̦i ublao yädäo mö feduo —a cuma—. Ö̦jö bä ma cuinö wamacö nia ca̦i jömaöje. Wamacö ca̦i nia waimaö bufiije. Jonasi nija Yai Bada etä a̦ fa ji̦liläjenö, wa̦lidiwä tä ja bä bufi lädou malä showadalayono wei. ¿Ö̦jö tawä? Jonasi a bada ma cui, camiyä bei ya yai bada dodijiwä. Fei däjä, cafä wamacö nijamö camiyä ya yai cua ma cule, wamale a̦ ji̦liblaimi.

42’Wamacö fei däjä lä bälöblai wamacö jömadayobä jamö, Sabaateliyoma a bada bälöo lä dodijiono wei a suwä nia ca̦i ublao yädäo mö feduo —a cuma—. Ö̦jö a ma cuinö wamacö nia dobloimi jömaö. Wamacö nia waimaö bufii. ¿Ö̦jö tawä? Bada tä Salomo a wa̦ ji̦liabä, ö̦jö a li suwä blajawä waloa fe malä yadiqueno wei. Salomo a bada ma cui, camiyä bei ya yai bada dodijiwä. Fei däjä, cafä wamacö nijamö camiyä ya yai cua ma cule, wamale a̦ ji̦liblaimi —Jesús a cuma.

Fecula bä bälöo mö

yabao lä co̦o wei tä a̦

43Jesús a wa̦ faö co̦o ja, abinaja a cuma.

—Fecula a yashublamou däjä, a lä tabou wei a daquefälöö. Ö̦jö däjä, tä ulifi bloque lä wejedii jamö, a shoqueadii cuaaö bäa. A yanöcöobä, tä ma dayäö wei ma cui, tä dablaimi. 44Ö̦jö däjä, abinaja a fecula cuu. “Ya da dacöi nija ya yai nia bälöo co̦o”, a cuu. Ö̦jö däjä, a lä daquefälöno wei a lä cui nija a waloa fa co̦iquiyonö, yafi bloque a dalalei. A yafi wawädowä. A yafi dodijidablaö jälayoma. 45Ö̦jö däjä, ai bä co̦ablaö aa fa co̦lunö, 7 bä ca̦i fecula waloa co̦queyoluu. Cama a wa̦lidiwä ma waiquii ma cui, bä yai wa̦lidiwä fe lä balojoi bä ca̦i waloa majöqueyoluu. Ö̦jö nija bä fa lucälönö bä bälöaliyo. Bä lä tabou wei a lä cui, a nö jaba ma bleaano wei ma cui, ö̦jö lä däjä, a nö yai bleaaö dodijiquei. Inaja showawä wamacö fei däjä lä bälöle wamacö nia taamamou —a Jesús cuma.

Jesús cama mashi ebä

lä waloqueno wei tä a̦

46Täbä yömölaö showao däjä, Jesús bä nöö, bä fääshä ebä walobeyoluma. Sibo jamö bä ublalanö a nacamaö bufimaje. 47Jesús nija abinaja ai e cuma.

—Naafä a ma cui, fääshäfä bä ma cui, bä ublaa siboa lä cubiyedi. Wa wa̦ jo̦wa wayomaö bufi doblaoje —a cuma.

48Ö̦jö ma cui, a lä yömölano wei a lä cui nija abinaja Jesús e cuma.

—¿Wedi nija bei ya yai li nöömou, ö̦jö lä? ¿Wedi jamö bä nija bei ya yai li fääshämou? —a cuma.

49Ö̦jö däjä, cama nija bä lä nocaono wei bä jömaö fa cuaanö, abinaja a cuu nomöjöoma.

—Ei bä lä cui, iba nayä bä waiquiwä. Iba mashi ö̦jö bä ca̦i li showawä. 50Fayä Yai Bada a lä culadinö tä tamaö lä bufii wei tä lä taö wejei bä lä cui, ö̦jö iba lä bä mashi malä waiquii. Ö̦jö nayä bä waiquiwä —a cuma.

Currently Selected:

Mateo 12: GUU

Highlight

Copy

Compare