Jueces 4
4
Debola, Balaco sho cäcöbä
nö lä wa̦lojano wei tä a̦
1Aodo a fa nomalönö, Isaeli ebä doblonomi co̦wä. Jeobaanö tä tamaö nofi lä wa̦libou wei tä taö fa co̦ojenö, 2Canaanateli Jabini a bada lija bä noshi ö̦jödabou nomöjöoma. Asolo jamö, Jabini a bada bälöoma. Cama wayu ebä ca̦i fubä, Sisala a bada lämaboma. Ö̦jö Sisala a lä cui, Alosecoimi jamö a bada bälöo mö feduoma.
3Sisalanö Isaeli ebä nofi asibou mlai ja, bä nö yai bleaamaö dodijioma. Cama wayu ebä befi ca̦i läläabä, 900 täbä bada madofi fude taboma. Ö̦jö lija Isaeli ebä nö bleaamamou showalanö, lasha 20 a famalemaje. Ö̦jö cudeenö, Jeobaa lija bä bayeliblamobä, bä a̦ nacläaö co̦oma.
4Bei. Ö̦jö lä däjä, Isaeli ebä doblou lä mlai bä jimabä, Labido bä suwäbö Debola a bada läoma. Jeobaa a wa̦no wäyälewä bei a suwä cuoma. 5Eflaini ebä ulufibö lä jefubö wei jamö, Debola a fe waloblaamaje, Lamaateli bä lä bälöle jamö, Bedeleteli bä bälöa mö lä fedule tä möamo jamö. Debola lija bä a̦ ji̦liamobä, bä waloblaadima, bä nia fa cadidamamonö. Jai yei sibä cuwänö, tä si ajimabobä jamö a showadi loblaama cudeenö, Debola sibä ublabijeli tä a̦fa ulufi jilabomaje.
6Debola a lä cuinö, Abinoama bä ijilubö Balaco e nacamaö bufima. Nefitali ebä ulufibö jamö a bälöoma, Sedesiteli bä shabonobö jamö. Abenaja a nowa taö mö baoma.
—Isaeli bäma ecö lija Jeobaa a lä bufiblamou wei a lä cui, cafä lija a wa̦no wäyämamou bufi doblaa lä cule. ¿Ö̦jö tawä? Dabolo cäcö jamö wa nia shimaö, ö̦jamö afä 10.000 wa bä toujublamabä. Wa bä nia lä toujublamaö wei, Nefitali nodiwä wa ebä nia nacaö. Sabulono nodiwä ebä ca̦i.
7’Ö̦jö däjä, Jeobaanö Sisala a nia wawäblamaö, Jabini wayu ebä ca̦i lä fuu wei a lä cui —a cuma—. Sisono u jamö wamacö mö baamabeje, cama wayu ebä nia ca̦i fuu mö bao. Läläamodima ebä ca̦i bluca showawä. Cafä lija Jeobaanö a noshi nia ö̦jödabou —Debola a cuma.
8Abenaja Balaco a cuu mö feduoma, Debola lija.
—Cafänö wale nacabou ja, ya fuu wä. Ö̦jö ma cui, wale ca̦i nia fuimi ja, ya fuu mlaicätä —Balaco a cuma.
9—Ja̦o. Bä ca̦i fuu weicätä —Debola a cuma—. Ö̦jö ma cui, inaja cafä wa cuu dicoo ja, cafä wa nofi nia doablamoimi. Jeobaanö suwä a ma cui lija Sisala a nabä nia shimöaö —a cuma.
Ö̦jö däjä, Debola a shu̦lucua fa showadaalunö, Sedesi jamö Balaco a ca̦i aa showalayoma.
10Balaco a lä cuinö, Sabulono ebä nacamaö showadaoma. Nefitali ebä ca̦i. Sedesi jamö bä fa co̦camoliyonö, Balaco lija 10.000 bä yaua showalayofälöma. Debolanö Balaco a ca̦i dolequea majöa showabefälöma.
11Bei. Moisesi bä shö̦ö Obaba lija bä lä nodiblaliyono wei, Queniteli bei bä cuoma. Ö̦jö Queniteli bä lija Ebelo a fa sheleleblalunö, Sedesi tä ajede jamö e yano i̦tao nomöjöoma, Sanaimi jamö tefi bada lä ublaono wei jamö. 12Dabolo cäcö jamö, Abinoama bä ijilubö Balaco a lä cuinö cama ebä ca̦i lä dolequebefälöno wei, Sisala lija bä a̦ wäyäöje däjä, 13cama wayu ebä befi ca̦i läläabä täbä bada madofi fude blacämaö showadao bufima. Etäbä 900 cuoma. Bä nia befi ca̦i lä läläaö wei bä ca̦i wayu showawä. Alosecoimi jamö bä culanö, Sisono u ja bä wayu ca̦i aa showadaaliyofälöma.
14Ö̦jö däjä, abenaja Debola a cuma, Balaco lija.
—¡Bä ca̦i wayu da dimöbalu! Fei däjä, cafä lija Jeobaanö Sisala a noshi ö̦jödabou lä cule. ¡Bei, bei, bei! Cafä wamacö balö jamö, Jeobaa a fuu waiquia balöa lä cule —a cuma.
Einaja Debola a cuma yalo, Dabolo cäcö jamö culanö Balaconö 10.000 ebä ca̦i wayu dimöa showadabaliyofälöma. 15Sibala bänö Balaconö bä nabä yai queo däjä, Jeobaanö Sisala ebä ca̦i fa quilimalalönö, bä bufi wedinajamou nö bleaama. Sisala a ma cui, läläamodima täcö ja a fa itoblalunö, bei mamicö jamö a lälälayofälöma.
16Bä befi ca̦i lä läläano wei bä ma cui, bei mamicö jamö bä wayu lä funo wei bä ma cui, bä docuu co̦fälöbä jamö, Balaconö bä nosi däa fa showadaläfälönö, bä shäö showafälölajenö, Alosecoimi jamö bä wayu walomaquemaje. Sibala bänö Sisala ebä bluca shäalalefälömaje. Moli ma cui a feiblamanomije.
17Ö̦jö ma cui, bei mamicö jamö Sisala a fa doculunö, Jaele a wa̦fa suwä lä cule e yano jamö, a nofi yashulayoma. ¿Ö̦jö tawä? Queniteli Ebelo bä suwäbö e lä cui, e a̦fa Jaele cuoma. Cama Ebelo ebä sho, Asoloteli Jabini a bada sho, yanöcöwä bä bälöoma cudeenö, ö̦jamö a nofi bäyäoma. 18Sisala a yömölaö mö baobä, Jaele a faa mö balayoma. Abenaja e cuma.
—Camiyä lija a yai da cuiquiyo, bada tä. A quili dijä —a cuma.
A nacaa mö yabalema cudeenö, cama e yano jamö a falayoma. A lä blaono wei jamö, acadafu sicö badanö, a fe yojoquema. 19Ö̦jö däjä, a amishama yalo, suwä a lija mau wiisibö ubä nacama. Ö̦jö cudeenö, yalo si ja, baca sifu caubä besi feyaca fa ucäblalönö, a amishi co̦amalema. Ö̦jö däjä, a fe yojoa co̦quema.
20Abenaja a nowa suwä taö nomöjöoma.
—Bä lä joleblou wei jamö, a da ublaicu. Ai anö ai bä wa̦liyoluu ja, “Ma”, wa e cubä —e cuma.
21Ö̦jö ma cui, Ebelo bä suwäbö Jaele a lä cuinö, yano feyaca jamö sicö lä yojoono wei sicö casö lofotomabobä shi duo ca̦i däa fa showadalänö, a basuubä tä ca̦i däa fa showadalänö, modawä tänö Sisala a mio lä sublaono wei jamö, wamicai a blacäyoluma. Cama a lä blale jamö a fa loicunö, bei nacötäcö ja etä madofi fa basulunö, mashita jamö etä jayua showablamalema. Inaja etä fa tablamalönö, Sisala a nomalayoma.
22Bei. Balaconö Sisala a nosi bou showaobä jamö Jaelenö a yömölaö mö baobä, a falayoma. Abenaja e cuma.
—Jabo. Wa lä dayäale, cafä lija ya nia jimöaö —a cuma.
Ö̦jö cudeenö, Jaele e yano jamö a fa falönö, Sisala a nomawä blaa dalalema. Bei nacötäcö jamö etä madofi lä cuono wei, mashita a jamö etä jayua showai ja, a blaa dalalema.
23¿Ö̦jö tawä? Inaja Yai Bada tä fa cuaanö, Isaeli ebä yabäcaö mlaobä, Canaanateli Jabini a bada yanöcömaquema. 24Ö̦jö däjä, Isaeli ebä ishou balaö fa lofotoafälönö, ya̦cumö Canaanateli Jabini a bada waicaö showadaomaje.
Currently Selected:
Jueces 4: GUU
Highlight
Copy
Compare
Share
Want to have your highlights saved across all your devices? Sign up or sign in
©2012, All Rights Reserved