Génesis 44

Ji̦shima a shi wai de̦lelewä

lä didiqueno wei tä a̦

1Ö̦jö däjä, José e yafi jamö a lä lämabono wei a lä cui, Josénö a yömölama.

—Bei. Bä yefimabofälöbeje, nii bä ja wa bä dobäa fa co̦lalönö, cama bä yolofibö ja, bluca wa bä nii liyäyaö cuaabä. Cama bä lä cudalenaja, bä jödödöbou showadaobeje. Nii cäbä feyaca jamö, bä bladabö didia feyacaa da co̦abodu. 2Oshe a lä cui ebä ja, blada wa ebä didia feyaca fa balöcönö, ya amishi lä co̦o wei, ji̦shima shi de̦lelewä ya wai lä tabole, a ca̦i da didicö —a nowa tama—, blada a ja a ji̦shima lä tablaleno wejei a lä cui.

Inaja José a fa cunö, a nosie juaö cadidoma.

3Tä mö jaba jaluu däjä, cama bä yalobö ca̦i co̦fälöbeje, bä shömöa fenaa co̦lemaje. 4Shabono jamö bä bayäcäblodayou däjä, José a wa̦ faö juoma. Cama e yafi jamö a lä lämabono wei a bada nija, abinaja a cuma.

—Bei, bei. A läläa da yaulu. Wa bä nabä fa waloicunö, abinaja wa bä nowa tabä. “Bada a lä cuinö, dodijidawä wamacö ma bälömabono wei lä ma cui, ¿wedi tä tabä wama a nö li waiblaö dicoo? ¿Wedi tä tabä cama ji̦shima e shi lä de̦lelei, wama e ca̦i li däa dicoblalema, blada a ja a ji̦shima lä tablaleno wejei a lä cui? 5Ö̦jö tä ja, iba bada anö nashiwä toubä malä coaö wei. Tä nia lä cublou wei tä ja, a bufi jaducuo balöobä, a nofi ca̦i malä yaibou wei. Inaja wamacö cuaaö dicoo ja, wamacö dobloimi waiquiwä”, wa bä nowa taa —Josénö a nowa tama.

6A läläa fa jälöfälönö, bä nabä fa blacäicunö, inaja showawä bä nowa tama.

7Cama nija abinaja bä cuu mö feduoma.

—¡Ushu, bada tä! Inaja dicowä mlai. Camiyä yamacö nija, ¿wedi tabä inaja wa li cuu dicoo? Cafä bäfä nosie juabä yamacö. Inaja yamacö nö cuaabö mlai. 8¿Ö̦jö tawä? Jaba däjä, yama bä blada didia lä dalaleno wei, Canaana tä ulifi jamö yamacö ma cuono wei ma cui, yama bä ca̦i malä co̦maqueno wei. Afä bada a yafibö jamö, olo bä ma cui, blada bä ma cui, ö̦jö yama bä däaö nomöjöobä yamacö malä mlai —bä cuma.

9Abinaja bä cuu nomöjöoma.

—Ja̦o. Cafä bäfä nosie juabä yamacö nija, tä da dayäa, ö̦jö lä. Tä ca̦i lä cule a lä cui, a nomabä. Ai yamacö mö feduwä lä cui, cafä bada wa nosie juamobä, yamalecö tabou shi wa̦libä —bä cuma.

10—Inaja lä tä cuobä —a cuma—. Tä ca̦i lä cule a lä cui, ya nosie juamobä, iba ya nia tabou shi wa̦lii. Ai wamacö nija, tä nowa nia cuomi —a cuma.

11Ö̦jö däjä, cama bä bluca lä cuinö, lobe, nii bä talö fa itomalalöjenö, cama bä niibö talö cadidiwä cushämoa showadaolaliyoma. 12Täbä fa cushälalöjenö, etä dayäma.

José bei a̦iyobö bada ebä nii jamö tä jaba fa dayänö, ai bä talö jamö tä dayäö cuaaö fa nomöjöonö, a jödödobä, oshe bä nii jamö, tä dayäö nomöjöoma. Ö̦jamö lä, Bejamino ebä nii jamö, tä madofi wai daa dicolalema, blada a ja, a ji̦shima lä tablaleno wejei a lä cui.

13Ö̦jamö lä tä didia fa dalalönö, bä bufi nö bleaama. Bä bufi nö bleaama yalo, bä camishibö cacamolaliyoma. Bluca bänö, cama bulo ebä jamö, bä madofi yefia fa co̦amabodujenö, shabono jamö, bä mö yabaa co̦layofälöma.

14José e yafi jamö, Judawänö cama ebä mashi ca̦i waloa fa co̦icunö, ö̦jamö lä José a cuo showaoma. A dablaöje däjä, cama bä nofi nia ojode fa tablamonö, mashita jamö, jai bä wäcäblaquei bä möfe boblaa cuquema.

15Josénö bä wa̦lima.

—¿Wedi tä tabä inaja wamacö li cuaaö dicooma? Camiyä ya bufi lä moyawebe ya lä cuinö, tä taö ma ja̦too wejei ma cui, ya tä wawädoablabä ya malä cui —a cuma.

16Judawä a wa̦ juoma.

—Bada tä. ¿Wedinaja yamacö cubä? Cafä nija yamacö a̦ fabä tä cuami. Yamacö nofi nö bäyäobimi. Wa nosie juamobä yamacö lä cui, Yai Bada tänö yamalecö dobloimi dablaö waiquiwä. ¿Ö̦jö tawä? Bada tä. Cafä wa nosie juamobä, yamalecö tabobä yamacö waiquiwä. Madofi tä wai lä tabono wei sho, yamalecö bluca tabou shi wa̦libä —a cuma.

17Ö̦jö ma cui, abinaja José e cuma.

—Mlaicätä. Camiyä inaja ya cuaabä yami. Ya nosie juamobä, tä madofi lä tabono wei a lä cui, ö̦jö iba ya nia shino tabou juo. Ai wamacö lä cui, faafä nija, dodijidawä wamacö co̦o co̦fälöbä —a cuma.

Bejamino a nowamabä,

Judawä a wa̦ lä läono wei tä a̦

18Ö̦jö däjä, Judawä a icua fa blacäicunö, abinaja e cuma.

—Shädayai. Cafä bada wa nija ya wa̦ fabä ya mlai ma cui, cafä bäfä nosie juabä ya ma cui, ya wa̦ da wabäo, ¿ö̦jö tawä? Ya wa̦ ma faö wei ma cui, a jushuo dicoo dijä. Bada a yai lä cui a nö quili tamou lä culenaja, cafä inaja wa nö quili tamou cuo mö feduobä wa waiquiwä malä cui. 19Cafä bada wa lä cuinö, bäfä nosie juabä yamacö nija, abinaja wa cuma. “¿Faafä a cua? ¿Aifä a cua?”, wa cuma.

20’Ö̦jö däjä, cafä bada wa nija, abinaja yamacö cuma. “Fayä a cua, wa̦lobada a. Fääshäyä a ca̦i cua. A oshe lä cublaliyono wei däjä, bä fö̦ö e wa̦lobadao waiquioma. Bä nöö nijamö, cama ai a mashi lä cuono wei, a cuami waiquiwä ja, a yami feibou lä cule. Ö̦jö a lä cui, bä fö̦ö enö a nofimaö fe balojowä”, yamacö cuma. 21Ö̦jö däjä, bäfä nosie juabä yamacö lä cui nija, abinaja wa cuu nomöjöoma. “Camiyänö ya möbä, a ca̦i da cuaaimaje”, wa cuma. ¿Ö̦jö tawä?

22’Cafä bada wa nija, abinaja yamacö cuu nomöjöoma. “Ma, bä fö̦ö enö a ca̦i cua lä cule. A tabi feiaö fa cunoja, bä fö̦ö e nö nomalayobö wei”, yamacö cuma. 23Inaja yamacö fa cunö, bäfä nosie juabä yamacö lä cui nija, abinaja wa cuu nomöjöoma. “Fääshäfä wama a ca̦i dömöomi ja, wamale wäyäcu möö co̦daaö mlaicätä”, wa cuma. ¿Ö̦jö tawä?.

24’Ö̦jö däjä, fayä, wa nosie juabä a lä cui nija, yamacö co̦a co̦layoma —a cuu co̦oma—. Yamacö co̦a fa co̦lunö, cafä bada wa lä cuno weinaja, bäfä wa̦no wäyäö showaoma. 25Eja fayänö yamalecö shömaö co̦o lä bufiono wei däjä, “Bä juu da co̦fälö. Bämacö iyabä, nii wiisibö a lulua da co̦leje”, yamalecö nowa lä tano wei däjä, 26“Ma”, yamacö cuma.

’Abinaja yama a nowa tama. “Yamacö nö dömöö co̦daabimi. Camiyä yamacö nija, fääshäyä wa nocaamaö ja, ö̦jö däjä yamacö shino dömöa co̦baliyofälöö. Fääshäyä yama a luluboimi ja, bada a lä cui yama a nia wäyäcu möö malä mlai”, yama a nowa tama.

27’Abinaja fayänö yamalecö nowa taö nomöjöoma, cafä wa nosie juabä a lä cuinö. “Iba suwä nija, ijiluyä bolacabö cäcöbö cublaliyoma. Wama tä malä dale. 28Ai a cuami waiquiwä. Yalo a waitelimou fa ja̦toonö, ‘U̦asimi a shälema’, ya cuolanö, ya nomöa boma. Ya dablaö co̦daanomi. 29Ei a lä feiquiblaliyono wei, wama a ca̦i däaö dicoo ja, a ca̦i shominajaamaö bädaoje ja, wamale wa̦lobada nomaa dicomalei”, fayänö yamalecö nowa tama.

30’¿Ö̦jö tawä? —a cuu co̦oma—. Fayä, wa nosie juabä a lä cui nija, yamacö co̦a fa co̦bonö, camiyä yamacö nija u̦asimi a cuami ja, ¿wedinaja a li cuaaö majöobä? Cama nija a bufi cua fe balojowä. 31Camiyä yamacö nija, u̦asimi a dablaö co̦omi ja, cafä wa nosie juabä a lä cui, a bufi nia mlaquei. Wajä wajä bänö täbä malä wa̦lidiblou wei. Ö̦jö däjä, cafä bäfä nosie juabä yamacö lä cuinö, jai yama a shäa dicolema, tä nö cublaliyobö.

32’Abinaja ca̦i. Cafä bäfä nosie juabä ya lä cui, abinaja fayä nija ya cuu balöoma. “Cafä nija ya co̦amaimi ja, camiyä nija wa tä nowa tabou shi wa̦libä”, ya cuma. 33¿Ö̦jö tawä? Inaja tä cuoma yalo, abinaja ya bufi cuu lä cule. Fääshäyä a lä cui, bei a̦iyobö nija a nocaa fa showalöfälönö, cafä bäfä nosie juabä ya lä cui, cafä nija ya shino yai cuo juobä. Wa nosie juamobä, cafä bada wa lä cuinö, camiyä wale shino tabou juobä. 34Fääshäyä mlai ja, fayä nija ya co̦o dao malä mlai. Wajä wajä bänö a wa̦lidiaö ja, ya bufi nö bleaaö dicoquei.

Currently Selected:

Génesis 44: GUU

Highlight

Copy

Compare