Deuteronomio 18

Canaanateli bä owämaö

lä wasöno wei tä a̦

9Abinaja Moisesinö bä nowa tama.

—Jeobaa wama a lä bufiblaö wei a lä cuinö, cafä wamacö nija tä ulifi lä jöböaö wei jamö wamacö waloo däjä, ö̦jamö bä bälöjöwä lä yaiblai wama bä nia owämaimi. Ö̦jö bä lä cuaaö wei Yai Bada tänö tä a̦fa wa̦lidiwä taö.

10’Cama bänö bä ijilubö ebä ö̦shö lä dodobou wejeinaja bä cuaa dijä —a cuma—. Bä tää ebä ö̦shö lä dodobou wejeinaja bä ca̦i cuaa dijä. Tä nia lä cublou wei tä daö showadaobeje, fecula bä lä bufiblaö wejeinaja bä ca̦i cuaa dijä. Tä nia lä cublou wei tä a̦fa jole lä wäyäö wejeinaja ca̦i mlai. Yanowamö täbä fe̦ya ja bä lä mölaö weinaja ca̦i mlai. Fecula bä nija täbä nabä lä shömaö wejeinaja ca̦i mlai. Inaja bä lä cuaaö wei, cafä wamacö nijamö moli ma cui, a nia dablamou bädaomi.

11’Bä cuaa dijä —a cuma—. Täbä yaitawä lä cublai täbä lä wa̦lii wejeinaja, bä ca̦i cuaa dijä. Bä lä feculamou weinaja ca̦i mlai. Bolebole bä a̦ lä wayomaö wejeinaja ca̦i mlai. Ö̦jö tä lä cui tä bluca wa̦lidiwä. 12Inaja bä lä cuaaö wei bä lä cui, Jeobaanö bä nofi malä wa̦libou wei. Canaanateli bä lä cui, inaja bä li cuaaö yalo, Jeobaa wama a lä bufiblalenö bä malä yashublaö wei. Wamacö lä juimadi jamö, bä yashublaö cuaaö.

13’Jeobaa wama a lä bufiblaö wei a nija, wamacö bufi nia yai cadidio, wamacö jömaö mlaobä —a cuma—. 14Ei bä bälöjöwä lä yaiblai bä lä cui, wama bä ulifibö nia däaö lä läo wei bä lä cui, bä doblou malä mlai. Tä nia lä cublou wei tä a̦fa jole lä wäyäö wejei bä lä cui, ö̦jö bä a̦ ji̦liaö dicooje. Tä nia lä cublou wei tä daö showadaobeje, bä lä feculamou wei bä a̦ ca̦i ji̦liadiije. ¿Ö̦jö tawä? Ö̦jö ma cui, cafä inaja wamacö nia cuaaimi. Jeobaa wama a lä bufiblaö wei a lä cuinö, wamacö inaja taamaö bufiomi.

15’Jeobaa a wa̦no wäyäbä, camiyä wale shömaö lä cuaano weinaja, cafä Isaeli wama ecö nodiwä nija, ai a nia shömaö cuo nomöjöo —a cuma—. Ö̦jönö wamacö yömölaö däjä, wama a wa̦ shino yai ji̦liabä.

Currently Selected:

Deuteronomio 18: GUU

Highlight

Copy

Compare