Wihta Nani 1
1
Juda Simian wal Adonisédec alkan
1Jasua pruan ba ningkara, Israel luhpia nani bui Dawan ra makabi walan, witin nani walaia brin dauki kan, ai kiamka nani ba tila wina ya kiamka ba pas Kenan uplika nani ba mapara war aiklabaia waia ba. 2Dawan pana witin ra win Juda pas war aiklabaia waia sa, bara tasbaya ba Juda uplika nani mihta ra mangkbia. 3Bara Juda luhpia nani ba, ai muihni nani Simian luhpia nani ba sin paiwan bara win witin nani aikuki asla takaia, bara Kenan uplika nani mapara aiklabaia waia, baha tasbaya witin nani ra yabaia win ba tâwan, baha ningkara witin nani aikuki asla kli wabia Simian ra tasba yabaia win ba tâwan sin aiklabaia. Simian uplika nani ba âu takan, Juda uplika nani aikuki asla takaia, 4-5bara baku Juda uplika nani ba wan bara Kenan uplika nani bara ferezeo nani tasbaya ba kutbi alkan, uplika nani ba Dawan mita witin nani mihta ra mangkan kan. Bara baku, Bézec ra baha nani 10,000 pura luan, baha tilara Adonisédec sin bâra kan. 6Adonisédec ba swak taki plapan, sakuna witin nani ai nina bliki kutbi alkan, bara ai mihta sirpika nani wihta bara ai mina sirpika nani wihtka ba sin klaki dakban. 7Bara Adonisédec aisin: “Yang bui pat king nani 70 mihta bara mina wihtka nani ba klaki dakbri sa, bara yabri witin nani tibilki munhtara plun yuyaka nani wahbi pi kan. Sakuna nanara yang wala nani ra dîa munri ba baku, Dawan sin yang ra ai daukan.” Bara witin nani bui witin ba Jerusalem ra brih wan, bahara witin pruan.
Juda mita Jerusalem bara Hebrón pura luisa
8Juda kiamka nani mita Jerusalem uplika nani wal aiklabi pura lui Jerusalem ba dakbi brin, baha ningkara uplika nani ba sut sord ni iki tawanka ba sin pauta ni angkan. 9Baha wina Kenan uplika nani il nani tilara iwi kan nani ba tawanka nani ra wih, Négueb tasbaya bara twiya ra sin aiklaban.#Jas 10.40; 11.21. 10Bara Hebrón tawanka ra#Jas 10.36-37. Kenan uplika nani bâra kan ba wal sin aiklaban, blasi piua ra Hebrón nina ba Quiriat-arbá mâki kan, bahara Sesai, Ahimán bara Talmai ba pura luan.
Otoniel Debir tawanka pura lui, Acsa ai maya brin
(Jas 15.15-19)
11Baha wina buan bara Debir tawanka uplika nani ba wal aiklaban,#Jas 10.38; 11.21. blasi piua ra nina ba Quiriat-séfer mâki kan. 12Bara Caleb pramis munan, ya Debir tawanka mapara aiklabi pura lubia ba, witin ai luhpia mairin Acsa wal maya baikaia. 13Bara Caleb muihnika sirpika nina Quenaz, Otoniel luhpia, Debir tawanka ba aiklabi pura luan, bara Caleb ai luhpia mairin Acsa ba Otoniel wal maya baikan. 14Sakuna mairin ba wan bara Otoniel mita aisi kupia alki bara win: “Man papikam ra tasba pîs kum makas maikbia.” Caleb kaikan Acsa biriku ba pura wina iwi aula, bara witin Acsa ra makabi walan:
—¿Man dîa trabil brisma?
15Witin pana win:
—Brin ai daukisa man bui diara kum yang ra aikma. Man pat Négueb ra tasba aikram, bamna lî kârma nani sin aik.
Bara Caleb bui lî kârma nani klaura bara mâyara ba sin, witin ra yaban.
Juda bara Benjamín taika nani ba sin pura luan
16Hobab, Moses dapnika quenita ba, ai kiamka nani aikuki bal takan papta dusa nani pâwi ba tawanka wina, Juda kiamka nani aikuki prawi, bara witin nani Juda upla iwras tasbaya ra wan, Arad tawanka waupasa tani ra, bahara witin nani takaskan tasbaya uplika nani ba aikuki iwaia. 17Baha piua ra Juda kiamka nani ba Simian kiamka aikuki wan; witin nani wal aikuki pat lâ daukan ba baku, taki wih Kenan uplika nani Sefat ra iwi kan ba mapara aiklabi tawanka ba sut sauhkan. Baha mita tawanka nina ba sin Hormá mâkan.#Hormá: naha ba Hibru bîla kum sa, baha tânka ba: sut sauhkan ba. 18Ban sakuna, Gaza, Ascalón bara Ecrón tawanka nani lika sip dakbi briras kan, tasbaya nani ai lamara ba sin apia.#Wih 3.3. 19Dawan sin ban Juda uplika nani ba yula kahbi kan baha mita, sip kan il nani ra iwi uplika nani ba pura luaia. Sakuna tasba langni ra iwi kan nani ba sip kangbi sakras kan, baha nani ba ayan waginka nani bri aiklabi kan ba mita. 20Hebrón tawanka Caleb ra yaban, Moses bîla pramis win kan ba baku, bara Anac luhpia waitna nani yumhpa bâra iwi kan ba Caleb bui baha wina sakan.#Jas 15.13-14; Wih 1.10. 21Sakuna Jebús uplika nani pat bâra iwi kan ba lika Benjamín kiamka nani ba mita Jerusalem wina sip kangbi sakras kan. Baha mita, ban naiwa kat Jebús uplika nani ba Benjamín kiamka nani ba aikuki asla ban Jerusalem ra iwisa.#Jas 15.63; 2 Sa 5.6; 1 Kr 11.4.
Josep kiamka nani bui Betel pura lui brin
22-23Josep kiamka nani ba luki kaikan Betel tawanka tara ba mapara wih aiklabaia, baha tawanka tara nina blasi piua ra Luz mâki kan, bara biki kakaira nani blikan wan biki kaikaia. Dawan sin witin nani ra tâ baiki kan. 24Bara tawan tânka biki kakaira nani ba kaikan, waitna kum tawanka ba wina taki aula kan, bara witin ra wi banhwan: “Man yabal ba wan mairikma kaka, yang nani nahki tawan ra dimaia sna ba, man ra yang nani yamni mai munamna.” 25Waitna ba witin nani ra marikan nahki tawan ra dimaia sip ba yabalka; bara witin nani dimi tawan bilara iwi kan uplika nani ba sut sord ni sabi ikan. Sakuna baha waitnika witin nani ra yabal marikan ba lika watla bîla uplika sut aikuki ikras swin. 26Bara baha waitnika hitita nani tasbaya ra wan, bahara tawan raya kum paskan bara tawanka nina ba Luz mâkan, baha nina ba naiwa kat kau ban baku mâkisa.
Manasés Efraín wal tasbaya piarkika ba
27Manasés kiamka nani ba mita Bet-seán, Taanac, Dor, Ibleam bara Meguido uplika nani sip kangbi sakras kan, tawan sirpi nani uplika ai lamara iwi nani kan ba sin ban swin bâra kan, baha mita Kenan uplika nani ba sin ban bâra iwi kan. 28Israel luhpia nani ba ai karnika kau brin, bara sip kan Kenan uplika nani ba lâ ba ni taibi munaia witin nani ai warkka daukaia, sakuna tawanka ba wina lika kangbi sakaia sip apia kan.#Jas 17.11-13.
29Efraín kiamka nani sin Kenan uplika nani Guézer ra iwi kan ba sip kangbi sakras kan, baha mita Kenan uplika nani ba witin nani lilapas kat ban bâra iwi kan.#Jas 16.10.
Kiamka wala nani ra pura luan ba
30Zabulón kiamka nani bui sin Kenan uplika nani Quitrón ra bara Nahalal ra iwi kan ba, sip kangbi sakras kata, bamna lâ ni taibi munan baha nani witin nani ai warkka daukaia, sakuna Kenan uplika nani ban witin nani ai tilara iwi kan.
31-32Aser kiamka nani sin Kenan uplika nani Aco ra, Sidón, Ahlab, Aczib, Afec bara Rehob ra iwi kan nani ba, tawanka wina sip kangbi sakras kan, bamna Aser kiamka nani witin nani wal ai tilara ban iwan.
33Neftalí kiamka sin Kenan uplika nani Bet-semes ra bara Bet-anat ra iwi kan ba sip kangbi sakras kan, sakuna taibi munan lâ ba mita witin nani ai warkka daukan, bara witin nani wal ai tilara ban iwan.
34Amorreo nani lika Dan kiamka nani ba tawan ra bara tasba langnika ra swin sip bal dimras kata, bara munan il nani tilara wih iwan. 35Bamna amorreo nani ba witin nani Heres, Aialón bara Saalbim ra sin bâra iwi kan. Sakuna Josep kiamka nani ba kau karna takan, bara witin nani ra lâ ni taibi munan ai warkka daukaia.
36Edom uplika nani tasbaya piarkika ba Acrabim luaika ba wina ai klaura ulaia ba ban Selá kat wi kata, baha wina sin kau ban ai klaura uli auya sa.
Currently Selected:
Wihta Nani 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua