Eclesiástico TÂ BÎLA NANI
TÂ BÎLA NANI
Naha ulbanka wauhkataya ba ulban sa Hibru bîla ra, mani 200 bilka ra, Kraist balaia kainara, Jisas ba dukiara, Eleazar luhpia waitna bara Sira mulika (Sirac). Witin mulika ban mita ulbanka nani ba Grik bîla ra ulbi lakan, mani nani 132 luan ningkara, Kraist balaia kainara, Idsip tawanka ra wih ki diman taimka ba, witin yakan mita dîa sât dauki kan tânka nani ba ulbi saki kan. Baha mita naha ulbanka wauhkataya nina mâkan ba ‘‘Sirácida’’, apia kaka ‘‘Sira sinska’’ ba wina.
Aisinka tâ bîla ba laki kaiki smalkanka kumi luki kaiki mayuni aisi wiaia natka sa, natka almuk sinska lâka saitka ba wina laki kaikanka, apia kra sins lâka plamaika tara sinskira baku, wan marikisa sins lâka ra ulban wauhkataya nani ba watlika ra tâ aimakisa bara sin Baibil pliska wala nani dukiara sin. Aisi kaikanka lalka manis wina brih ki laki kaikan sa Ju nani sertska ba dukiara, bara sin kupia kraukanka kasak pali ba brisa trabilka nani sâtka sut ba hilpka dukiara. Âiulbra ba dukiara, sins lâka kasak aihwa pali ba Gâd bui Ju nani ra yaban sa bara baha sika Moses lâka ba wal prakan sa.
Ulbanka wauhkataya bakriki pura praiska ba (1.1—42.14) laki kaiki smalkanka sât sât ra kasak ai taimka bahara mangki brisa, mapla kum wal praki wibia kaka dîa daukaia ba, hilp munaia lâka nani, prias daukaia lâka, wark nani bara Gâd sinska lâka nani ba. Wan sinska lukra mununhta wina luki kaikan kaia ba Gâd ra mayunaia paskanka nani sut bâk (42.15—43.33) bara mayunra tara pali daukan pat luan nani ba ra (44.1—50.21). Teks prahni nani, tnata prakaia ra bara lukanka sirpi nani tnaya ra ulbi kupia kraukan kaia dukiara (50.22—51.30).
Hibru bîla ra pas pali ulban tekska ba wina naiwa kat kakaira ba baiki sakanka yumhpa ba wina wâl ba baman sa. Ban sakuna ulbanka wauhkataya ba ban aiska pali main kaiki brisa Grik ulbanka bîla ra, baku sin bîla wala ulbanka kau almuk pali ba ra sin. Naiwa ulbi lakan ba Hibru bîla ra pat ulbanka bâra ba wina daukan sa, F. Vattioni dîa daukan yaba kat, ban sakuna teks almuk nani ulbanka ba ra kasak pali ai sinska mangki brin, kau pali ba Grik bîla ba ra. Hibru bîla ra ulban tekska ba âpu sa piua ra, Grik bîla ra ulbanka ba wina lakisa. Ahkia piua ra Hibru bîla ra ulbanka ba pain main kaiki briras sa taim, Grik ulbanka bîla ba wina laki wapni daukisa. Ban kra piua kum ra teks wala wina tâ baikanka kum briaia plikisa taim teks kau almuk ba ra plikisa, baku sin Hibru bîla ra ulbanka wina brih ki sin paskisa, baku sin tânka marikan kaia dukiara ulbi takaskan ba mâya pali ra marikisa.
Grik bîla wina lakan uplika, tâura bîla nani ulban ba
[Lâ ba, prapit nani bara ningkara wauhtaya wala nani ulban ba, yawan ra smalkanka nani ailal bara tara pali wankan sa. Ba mita Israel luhpia nani ra tingki yabaia sa ai smalkanka bara sins lâka bri kan ba dukiara. Dawan Bîla aisi kaiki uplika nani ba witin nani baman sins lâka ailal briaia aitani apia sa, kuna sip kaia sa hilpka lâka yabaia, ai bîla aisanka bara wauhtaya ra ulbi sin, naha smalkanka briras uplika nani ra. Yang damiki Jisas ba baku daukata. Pas tâura lika Lâ bara prapit nani wauhkataya nani bara damiki nani wina wauhtaya nani wina brin ba aisi kaiki, baha nani wina sins lâka tara brin; bara ningkara witin silp wauhtaya kum ulbaia wilin takan smalkanka bara sins lâka brin ba dukiara, bara baku mika baha smalkanka nani ra dîa wi ba kat dauki, upla nani diara kau lan takan dauki ba sip kabia Lâ natka ba kat iwi ai rayaka ba kau yamni brih pakaia.
Baku bamna, upla nani sut ba paiwan sa naha wauhkataya na wilinkira bara ai kupia aiska wal aisi kaikaia. Wauhtaika na bîla wala wina lakri taim, dîa sip sna ba kat sinski aiska dingkri sa. Bamna, naku pali wilin kapri sakuna, bîla nani kum kum ba dîa tânka bri kan ba kat lukras kapri lukma kaka, yang ra padin ai muni banhs. Kan Hibru bîla ra aisan dukia nani ba bîla wala ra lakuya taim, diara nani tânka ba manis tiwisa. Bara naha tânka ra lika baman baku takras sa: Lâ bara prapit nani ra bara ulbanka wala nani ra sin, pas tâura ulban ba bîla wal aisi kaiki praki kaikuya taim latan kaikisa sâtka aihka ba tara pali sa.
Evergetes ba Idsip ra mani 38 king aimaki kan taim,#Aisanka pas nani ba Nahara wan mariki baku sa baha lika king Tolomeo VIII Evergetes II Idsip wina ba dukiara aisisa. Mani 38 king aimaki kan tânka ba lika mani 132 Kraist balaia kainara. bahara wih yang piu klutka kum takaskatna. Bamna bahara smalkanka tara nani bri wauhtaika kum sakatna, bara lukatna yang blestu kupi aiska wal bara taimki sin dingkaia sna bîla aisanka wala ra lakaia. Baha piua ra tihmia ailal yapan sauhkatna, bara sinski nani ba yus munri baha wauhtaika ba tnata alki kakaira daukaia, baha uplika nani kuntri tringsar ra iwi ba hilpka dukiara, bara ai iwanka natka nani ba yamni lâka ra brih ki Lâ dîa wi ba kat iwaia wilin banhwi kabia dukiara.]
Currently Selected:
Eclesiástico TÂ BÎLA NANI: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua