Rut 4
4
Booz Rut wal ai maya brin ba
1Kau naika, Booz tawan dimaika kat wih iwan, bara baha ai taika waitna dukiara witin aisi kata ba, pliska bâk lui auya kan. Bara waitnika ra win:
—Muihki, nâra bal iws.
Bara waitna ba bal iwan. 2Bara Booz blikan wan tawan tâ bri waitnika almuk nani matawalsip paiwaia. Baha nani balan, bara win:
—Nâra iwi banhs.
Bara witin nani bahara iwan. 3Bara Booz ai muihni ra win:
—Noemí ba Moab tasbaya wina kli balan, bara wan muihni Elimélec prahki tasbaya ba atkaia lukisa. 4Yang lika maisam pakisna baman, bara man bui baha ba atki briaia lukisma kaka, naha tawan almukka nani na witniskam kabia. Kan man ba taika waitna kau asla sma bamna, man aitani sma baha atki briaia. Atkan mai daukras kaka, yang ra ai wis bara daira walamna, kan yawan baman sip sa baha atki briaia, man atkras kama kaka, yang atkaia sip sna.
Bara taika waitna ba aisin:
—Yang atkamni.
5Bara Booz param aisin:
—Sakuna luki bas, man naha tasbaya na Noemí wina atkma kaka, piarkika Rut sin mayam briaia kama, baha tasbaya ba waitna pruan ba nina ra kau ban kulkan kaia ba mata.
6Taika waitna baha walan ba ra aisin:
—Baku kaka, yang sip atki brimna apia, bamna man mihtam ra swisna, kan sip sa yang prapatiki lâka na sauhkaia.
7Baha piua ra Israel luhpia nani tilara ai natka kum bri kan baku dauki kan, ani piua diara atki brih ba ra, ani piua sin lâ daukan lâka kum wapni dauki ba ra, baha sika tukin kum baku upla ai sûska maya kum daiki si âiatkra ba ra yabi kan. Baha ba Israel luhpia nani tilara witnis, witin ai natka baku dauki kan. 8Bamna Booz taika ai sûska maya kum daiki, Booz ra yaban bara aisin:
—Man atki bris.#Kli S 25.7-10.
9Bara Booz tawi almuk nani ra aisin, upla nani bâra wan ba sut sin walan:
—Man nani sut witnis sma yang naiwa Noemí wina Elimélec prahki tasbaya ba sut atki brisni, ai luhpia Quilión bara Mahlón wal tasbaya prapatika ba sin. 10Baku sin Moab mairka Rut ba mayi brisna, baha prapatika ba ban Mahlón prahki ba nina ra kulkan kaia. Baku bamna, Mahlón nina ba ai taya nani tila wina sin dikan kabia apia, lap sin tiwbia apia.#Kli S 25.5-6. Man nani baha lâka daukan ba witniska nani sma.
11Almuk nani ba bara upla wala nani ba sut sin aisin:
—Âu, witniskam nani sna. Sakuna Dawan sin Rut ra tâ baikbia Raquel bara Lea wal ra daukan ba baku, witin nani wina Israel luhpia nani bal takan.#Bla St 29.31. Bara man sin Efrata Betlehem wal tilara upla tara mai kulkan kabia. 12Man Rut wal luhpiam nani ailal brima, Tamar ai maya Juda wal luhpia Fares ai watla ra ai luhpia ailal bri kan ba baku.#Bla St 38.27-30.
13Baku sika Booz Rut wal brin, bara ai maya takan. Witin nani wal prawan bara Rut kwihra tiwan, bara Dawan bui witin nani ra ai luhpia waitna kum yan.
14Bara mairin nani ba Noemí ra win:
—¡Dawan nina tara mayunan kabia! ¡Kan nanara sika mulam kum maikuya, main mai kaikaia, ban kra sin Israel luhpia nani tilara tara kulkan kabia! 15Witin bui man kupiam lilia daukbia, bara almuk takma ba ra tâm baiki kabia, mulam yapti latwan pali mai kaiki ba luhpia bamna. Man mampa ra baha mairka sika luhpiam waitna 7 ba wal purkara kau hilpkam tara kabia.
16Bamna Noemí bui tukta waitna ba ai lamara brin bara ai luhpia baku brih pakan. 17Ai lamara iwi mairka nani ba baha kaiki, ai tilara aisin:
—¡Noemí luhpia waitna kum aisubi takan sa!
Bara tukta nina ba Obed mâkan, Obed luhpia ba Jesé, bara Jesé luhpia ba Debit.
Debit damika nani
18Naha nani sika Fares kiamka nani: Fares luhpia ba Hesrón, 19Hesrón luhpia ba Ram, Ram luhpia ba Aminadab, 20Aminadab luhpia ba Nahasón, Nahasón luhpia ba Salmón, 21Salmón luhpia ba Booz, Booz luhpia ba Obed, 22Obed sika Jesé aisika kan, bara Jesé sika Debit aisika kan.#1 Kr 2.10-14; Mt 1.3-6.
Currently Selected:
Rut 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua