Nihimaya 13
13
Nihimaya mita lâ nani ba kli raya daukisa
1Baha yua ra Moses lâka wauhkataya ba aisi kaikan tawan uplika nani wali kan ba ra. Bahara ulban kan, Amón uplika nani bara Moab uplika nani ba sip apia sa, Gâd uplika nani daknika ra kaia. 2(Kan witin nani ba Israel luhpia nani balan ba ra, plun bara diaia dukia brih mapa ra taki waras kan bamna, sakuna Balaam ra lalah yaban Israel uplika nani ra lahtubaia dukiara,#Kul K 22.1-6. sakuna Gâd mita baha lahtubanka saurka ba yamni ra lakan.)#Kli S 23.3-5. 3Baha lâka ba aisin upla nani walan ba ra, Israel luhpia nani ai tilara upla wala nani bâra kan ba sut sakan.
4Bara naha nani kainara Eliasib prîs tara ba, Gâd tempelka ra diara nani bâra ba wihtka aimaki kan. Tobías wal sin ai taya kan bamna, 5tempel bilara rum kum ra dus mâka kîa pain nani ba, dîa watla dikwa nani sâtka ba, plawar matawalsip mânka yabi nani ba, wain, batana laya, Libait nani ra, aiwani nani ra, tempel durka ra aihwaki nani ra yabaia dukia nani, baha rumka ra auhbi kan rumka ba witin ra yaban. 6Ban sakuna baha diara nani sut taki kan ba tilara, yang lika Jerusalem ra âpu kapri, kan Artajerjes 32 mani Babilon kingka aimaki kan ba ra witin ra yang wari; baha wina piua kum luan, yang lika king wina adar sakri, bara 7Jerusalem ra kli tawi balri. Bara yang tânka briri Eliasib saura daukan ba, Tobías kupia lâka daukaia dukiara, Gâd watla ba ra witin ra kutbanka kumi dauki yaban. 8Bara yang kasak pali kupi baiwan mita Tobías diara nani bri kan ba sut saki latara yakabri. 9Bara yang wîri utla bîla ba pahbi sunu daukbia, bara kli Gâd watla dukia nani ba, diara auhbaia watla nani ba, dus mâka kîa nani bara prisantka nani ba Gâd tempelka bilara bri si swiaia.
10Bara yang sin tânka briri, Libait nani ra pata yaras kan ba,#Kli S 12.19. bara Libait nani aiwawanra nani, tempel watla warkka dauki kan ba swi si, kumi bani ai tasbaya ra mahka wan. 11Bara wark tâ bri uplika nani ra lawi dauki wîri dîa muni Dawan watla na lulki swin sa ki. Bara yang mita prîs nani bara Libait nani ba kli paiwi warkka ra mangkri. 12Bara Juda uplika nani sut, diara auhbaia watla nani ra, plawar wina, wain bara batana laya wina matawalsip mânka ba saki bri balan.#Mal 3.10. 13Bara prîs Selemías, Sadoc wauhtaya âiulbra ba, Libait waitna Pedaías kat yumhpa ba, mangkri plun nani yabi ba pura kakaira kaia. Bara witin nani ra tâ baiki kaia mangkri Zacur luhpia waitna Hanán, Matanías mulika ba, witin nani ra kulkanka tara yabi aitani kaiki bamna, witin nani bui diara nani ba yabi kabia. 14¡Yang Dawanki: yang ra luki bas, naha dukia nani yang daukri na âmya tikpara, diara yamni nani wamtla ra daukri ba, bara man warkkam ra daukri ba sin!
15Bara baha yua nani ra Juda ra yang kaikri, tila upla nani wain mâ taibi laya saki kan, ris briaia yua ra wain daukaia. Baha purkara sin, plawar mâ nani sin twilki kan, bara muyul nani ba sin wain mâ wihta nani, kwah damni mâ nani bara diara sât sât nani karbanka sut pali twilki kan, ris briaia yua ra baha dukia nani ba Jerusalem ra brih wi kan.#Imp St 20.8-10; Kli S 5.12-14; Jir 17.21-22. Yang bui witin nani ra lawi daukri baha yua ra witin nani diara bri si atki ba tâwan. 16Bara Tiro uplika nani sin bâra kan, witin nani lika inska bara diara wala nani sin Jerusalem ra bri bal, Ju nani ra atki kan ris yua ra. 17Bamna yang bui Juda wihtka nani ra lawi daukri, bara wîri:
—¿Man nani dîa saurka daukisma ki, ris briaia yua ra kulkanka yabras sma ba? 18Man nani damikam nani baku daukan ba tâwan sika, wan Gâdka ba mita wan purara pât saura nani blikan naha tawanka purara. ¿Bara man nani kau Gâd kupia sauhkan mai daukisa ki Israel luhpia nani purara, ris briaia yua kulkanka ba yabras tâka mita?
19Baku bamna, yang wîri Jerusalem getka nani ba ris yua kaina tutnika ba prakbia, baku sin adar yabri bukutbia apia, ris yua lubia ba kat. Bara baku get nani ra albiki nani swiri bara wîri aihwaki kabia, ris briaia yua ra karban nani bri sal dingkbia apia tâwan. 20Bara baku sika diara âiatkra nani ba, aima ailal Jerusalem ra tihmia ra lata tani ra takaskan, 21sakuna yang bui witin nani aikuki karna aisi wîri dîa muni witin nani tawan kutbanka lamara takaskisa, bara kli aima wala daukbia kaka silak ra wabia. Baha wina witin nani kli balras kan ris briaia yua ra. 22Bara Libait nani ra wîri, witin nani sunu takbia bara baku bal get nani ba aihwakbia, sabat ba bâk sakan yua kulkan kaia ba mita. ¡Yang Gâdki: yang ra sin luki bas naha dukiara, bara man kupiam yamni lâka kat umpira ai kaiks!
23Baku sin yang kaikri baha yua nani ra, tila Ju nani ba Asdod, Amón bara Moab wina mairka nani ba, ai maya bri banhwan kan; 24bara ai luhpia nani wina bakriki ba Asdod bara nisan wala nani bîla aisi banhwi kan, sakuna Ju nani bîla lika aisaia nu apia kan. 25Baku yang bui witin nani aikuki aisi blauhri bara lahtubri. Witin nani tila nani ba lika prukri bara tâwa sin daikri, bara taibi munri Gâd nina ra swer taki aisaia, ai luhpia mairin bara ai luhpia waitna nani ba upla sât wala nani ba wal kli maya baikaia apia, mairka nani ba luhpia waitna nani maya baku bribiara, luhpia nani mita sin mairka nani ba ai maya bribiara.#Imp St 34.11-16; Kli S 7.1-5. 26“¡Naha pali saurka sika, Salaman, Israel kingka daukan ba! Bara witin yamni pali kan baku, tasba wala ra bara king wala witin wal baku ba âpu kan, bara Gâd bui witin ra latwan pali kaiki kan,#2 Sa 12.24-25. bara Gâd mita sin Israel luhpia nani aiska purara king mangkan kata. Baku kan sakuna, plis wala mairka nani bui yaban saurka daukan.#1 Ki 11.1-8. 27Baku bamna, naha saurka ba kau daukan kabia apia, bara man nani lika Dawan nakra ra naha saurka daukaia apia, mairin plis wala nani wina ba mayam brih muni.
28Bara prîs tara Eliasib luhpia waitna Joiadá luhpia waitna nani tila wina kumika ba Sambalat,#Nih 4.1. Horón wina kata ba dapnika kan, baha tâwan maiwan wina munri plapan. 29¡Yang Gâdki: man kupiam krauki bas baha nani prîs lâka tâski daukan ba, prîs kaia lâka ba bara Libait lâka sin!
30Bara baku, tasba wala uplika nani ba âpu daukri, bamna prîs bara Libait nani ai warkka daukaia piua ba mangkri, kumi bani ai warkka ba kat; 31bara pauta nani ai yua kat yabaia ba, dus wina mâ pas nani ba sin. ¡Yang Gâdki, yang ra luki bas bara yamnikam aik!
Currently Selected:
Nihimaya 13: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua