Matiu 3
3
Jan Tatahbra smalkisa upla iwras tasbaya ra
(Mk 1.1-8; Lk 3.1-9,15-17; Jn 1.19-28)
1Baha piua ra, Jan Tatahbra Judia ra upla iwras tasbaya ra balan bara upla ra smalki, 2ai smalkanka ra aisi kan: “¡Man nani kupiam laks, kan Gâd king aimaki lâka ba pat baila sa bamna!”#Mt 4.17; Mk 1.15.
3Naha sim Jan tânka sika prapit Aiseya naku ulban kan ba:
“Upla iwras tasbaya ra upla kum bîla baikra wini ba naku walisa:
‘Dawan yabalka ba ridi dauki banhs;
yabalka kum wapni dauks.’ ”#Ais 40.3.
4Jan prâka ba kiamil tâwa ni daukan kan, ai maisa wila ba lika daiwan taya ni paskan kan,#2 Ki 1.8. ai pata ba lika tristrisia nani bara unta wina nasma laya. 5Jerusalem tawanka uplika nani, Judia tasbaya wina bara Jordan awala lamara tawan nani ba sut wina ai smalkanka walaia aidrubi balan kan; 6bara ai saurka nani dahra saki banhwi kan nani ba, Jan mita Jordan awala ra tahbi dauki kan.
7Sakuna Jan kaikan parisi nani, sadiusi nani sin ailal tahbi daukbia wisi balan, bara witin bila: “¡Piuta kiamka nani!#Mt 12.34; 23.33. ¿Ya mita man nani ra maisam pakan pât tara wan lamara aula ba wina plapi swakwaia? 8Man nani daukankam ni mariks nahki saurkam nani wina kasak pali kupiam lakram ba, 9bamna pana pana aimayuni naku aisapara: ‘Yang nani na Ebraham kiamka’;#Jn 8.33. kan yang bui man nani ra mai wisna: Gâd sip sa naha walpaya nani na wina Ebraham kiamka daukaia. 10Asa ba dus nani klaki batakaia pat ridi sa, bara ani dusa mâ pain sakras ba, klaki pauta ra lulkka ambia.#Mt 7.19. 11Kasak pali mai wisna: yang lika lî ni baman tahbi mai daukisna, saurkam nani wina kupiam laki Gâd ra balaia; sakuna yang ninira wala kum aula ba lika Spirit Holikira ni bara pauta ni sin tahbi mai daukbia. Witin ba yang purkira kau karnika brisa, ban tara bamna, witin ai sûska nani twilkaia sin yang aitani apia sna. 12Witin ai mihta ra singbaia dukia pat ridi brisa, bamna plawar mâ ba klin dauki, taya ba sait ra sâkbia. Plawar mâ ba ai pata watla ra auhbia, sakuna taya ba pauta kum ban kaia ra dasras ba ra angkan kabia.”
Jisas ra tahbi daukan ba
(Mk 1.9-11; Lk 3.21-22)
13Bamna Jisas Galili tasbaya wina aula kan, bara Jordan awala ra Jan bâra kan ba kat wan, tahbi daukan kabia wisi. 14Jan witin ra tahbi daukan daukras kan, bara Jisas ra win:
—Yang lika brinki sa man mita tahbi ai daukaia, ¿bara man lika yang ra aulma ki?
15Sakuna Jisas bila:
—Nanara lika baku ban swis; kan dîa Gâd wi ba kat yawan daukaia sa.
Baku lika Jan aitani lukan. 16Jisas ra tahbi daukan ba ra, Jisas lî wina mahka takan. Tisku kan, kasbrika purara ba kwawan, bara Jisas kaikan Gâd Spiritka ba butku baku ai purara aula kan. 17Bara kasbrika purara ba wina bîla baikra kum walan, naku aisata: “Naha sika Luhpi laitwankira; witin sika bâk saki briri ba.”#Bla St 22.2; Law 2.7; Ais 42.1; Mt 12.18; 17.5; Mk 1.11; Lk 9.35.
Currently Selected:
Matiu 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua