Libait Lâka 21
21
Prîs nani lâka ba
1Gâd bui Moses ra aisin:
“Prîs nani Eran kiamka ba wal aisas, ai taya kum prubia kaka baha ra luki tâski takbia apia, 2sakuna yaptika ba, papika, luhpia waitna ba, luhpia mairin ba, muihnika, 3lakrika kau ai maya briras ai lamara ba witin mapara ban sunu ba. 4Sakuna taya kum pat ai maya brin tâski takan ba aikuki lika tâski takaia apia sa.
5“Tâwa ba klakan kaia apia sa, ai unamaya ba irban kaia apia sa, taya ra sin klakan âpu kaia sa,#Lib 19.27-28; Kli S 14.1. 6sakuna sunu pali Gâd lâka aiska ra sunu takaia sa, ai nina ba saura kulkaia apia, witin nani sika prisant nani ba, sakripais nani ba angki brit ba sin Gâd ra yabisa, bahamna witin nani sunu kaia sa.
7“Ur mairin kum wal sin marit takbia apia, baku sin waitna mita alki saura munan mairka bara ai maya wal swin mairka ba wal sin apia, kan bahmuna mairka nani ba Dawan lâka ra holi daukan sa. 8Prîs ba bahmuna saura ba wina tnaya ra kabia, witin nani sika Gâd kaiki ba mawanra bal brit prisantka ba yabisa. Bamna sunu kaia sa, Gâd ba sunu sa bamna. Kan yang, Dawankam sunu sna, bara sunu mai daukisna.
9“Prîs luhpia kum ai aisa lâka lulkbia bara tiara rugkira takbia kaka, raya angkan kabia.
10“Prîs tara ba lal ra batana laikan ba mita, sunu daukan ai prâka ba dimaia, baha ba mita ai tâwa ba auban ban kabia, ai prâka ba sin kalkan kabia apia, sari tukinka ba bri kabia apia; 11upla kum pruan ba watla ra dimaia apia sa, aisika, yaptika kra kabia, bâra dimi tâski takbia apia. 12Pura sunaia Gâd watla ba wina takaia apia sa, baha watla nina sauhkaia apia. Baha dukiara, witin ai lal ra batana laiki Gâd lâka ra sunu daukan, Gâd lamara kaia. Yang sika Dawan.
13“Baha mita mairin kum waitna tânka briras ba baman, witin ai maya briaia sip sa. 14Witin sip piarka kum, maya mita swin mairka kum, waitna mita alki saura munan mairka ba, apia kaka rug mairin kum ai maya bribia apia. Ai maya ba waitna tânka briras tiara aihwa ai masraka nani ba tila wina bribia, 15ai kiamka nani kulkanka ba batakaia apia dukiara ai uplika tilara. Kan yang, Dawankam, yang mita sunu daukri bamna.”
Prîs lâka ba
16Dawan ba Moses ra aisi, naku win:
17“Eran ra wis nanara wina ai kainara kaiki kabia, kiamkam nani tilara prîs kum skahwa sa kaka, witin brit prisantka nani ba Dawan ra bri balbia apia. 18Prîs kum ai wîna ra nahmuna watawanka brisa kaka, blain, mihta dakwan, kakma warha, kiama skahwa, 19mina nani bara mihta nani ba kriwan, 20pahpaya prumhni, prahni luhpia, nakra sikniska bri kaka, âikama puskan kaka. 21Eran kiamka kum, apia kaka Eran luhpia kra kabia ai wîna ra watawan kum brisa kaka, plun angki prisantka yabaia Dawan mawanra bri balbia apia; baha mita brit prisantka ba sin bri balbia apia. 22Sip sa baha britka ba piaia, plun wala nani holi pali bara sunu daukan ba sin piaia, 23sakuna kwala ni kutban ba ra lubia apia, altar lamara waia apia, yamni sunu pliska ba ra baha watawanka ba wal dimbia apia. Yang sika ai Dawanka, witin nani ra holikira sakri ba.”
24Baha pali yua Moses bûi mahka wan, bamna Eran ra, luhpia nani ra bara Israel luhpia nani sut ra naha sturka na win kata.
Currently Selected:
Libait Lâka 21: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
