Aiseya 59
59
Israel saura ba mita, klala brin
1Dawan karnika ba, kau sirpi takras sa,
swaki sakaia kat praiska baku,
witin sin kiama prawra takras bara wan walras kaia prais kat sa.
2Sakuna man nani, watawikam lâka nani ba mita
Gâdkam wal aihka dakbi mai sakan,
saurkam nani ba mita,
witin ai mawan ba man nani wina yukukan
mai walaia apia lukan.
3Man nani mihtam nani ba
tala ni tâski takan sa,
bara mihtam sirpika nani ba
upla ikram tasbaika alkan;
unam nani ba kunin man aisisa,
twisam nani ba watawika lâka man aisisa.
4Kasakka lâka dukiara wini ba
kumi sin âpu,
wapni lâka dauki lâ ba sin âpu sa;
bahki lâka ra baman kupiam mangki brisatma,
bara kunin lâka ra kau lukisma
bara sturi bahki nani ra sin;
watawika lâka nani ra, kwihra tiwisma
bara saurka lâka luhpia baikisma.
5Piuta kau puisinkira mahbra ba brih,
bawi luhpa baikisma,
bara anansi kiwka nani mamisma;
ya baha mahbra wina pi ba pruisa
bara upla baha mahbra nani ai mina ra taibia kaka,
piuta puisinkira nani takbia.
6Ai anansika kiwka nani ba wal kwala paski dimbia kaka,
hilpka daukras kabia;
witin nani baha ni kwala diman kabia apia.
Ai warkka nani ba saurka lâka warkka nani sa:
ai mihta warkka nani ba saura baman daukisa,
7ai mina nani ba saura ra plapisa,
aihni taukisa tala pâtkas ba laikaia dukiara.
Ai lukanka ba upla ikaia baman lukisa,
bara yabal ra lui auya ba, sauhki tikaia,
bara kriki tikaia lâka nani man sa.#S L 1.16.
8Kupia kumi yabalka witin nani kaikras,
ai yabalka nani ra sin kasakka ba âpu sa.#Ro 3.15-17.
Ai yabalka sirpi nani ba, warha man sa;
ya ya kabia sin baha nani bâk auya ba
kupia kumi lâka ba kaikbia apia.
9Baha mita sika swak takan lâka ba yawan wina kitwi takan ba,
bara pri lâka ba wan lamara balras sa;
yawan ingni briaia bîla kaiki kan,
sakuna kaiks tihmia tara baman sa;
ingni briaia wisi bîla kaiki kan,
bara yawan tihmia ra wataukisa.
10Yawan utla tnaya ra sapi tauki banhwisa blain baku;
bara kapi kaiki watauki banhwisna wan nakra âpu kan baku;
yu wan lal kat ra, yang nani mini prukisna tihmu ra kan baku;
yang nani tihmia tasbaya nani ra sna upla pruan nani baku.
11Yang nani wingku tara nani ini ba baku inisna,
bara yang nani maimna lulkisna
butku nani sarkira pali ai mamna lulki ba baku;
swaki wan sakaia bîla kaiki banhwisna, sakuna balras;
swaki sakan lâka baha sin yawan wina laihura taki wan.
12Yang nani mampara buri diara ailal saura dauki;
bara baha saurka nani ba maipara witnis sa;
kan yang nani watawiki lâka nani ba
yang nani wal sa,
bara yang nani sin saurki nani ba kaikisna.
13Yawan mapara babura takma,
Dawan wal sin kasak apia kan.
Yawan wan Gâdka ninara waia brin wan daukras kan,
yawan aisin lâ nani ba krikaia,
upla nani pât ra dingkaia,
yawan upla nani ra kunin munaia lâka daukan.
14Baha mita wapni lâka ba tnaya ra tawan,
kasakka lâka ba sin laihura taki wan,
yawan wan kasakka lâka bri wal pulaia pliska ra mina prukan,
bara nanara wapni lâka ba sip balras.
15Bara kasakka lâka briaia ba lap tiwan,
bara ani uplika saura wina
tnaya ra tawan nani dîa bri ba implikisa.
Dawan ba ai kupia baikan,
kaikan piua ra kasak tânka âpu kan.
16Dawan witin baha kaiki tâ iwan,
bara aihka lukan upla kumi sin âpu kan,
witin tâwan aimakaia ba;
bara Dawan ai karnika ba ni wark daukan,
ai kasakka lâka ba dauki pura luan.#Ais 63.5.
17Dawan ai kasakka lâka ba ni
ai lama prakaika kum baku diman.
Ai lal ra sin swaki sakan sumurka ba bapan;#Epe 6.17; 1 Tes 5.8.
pana munaia kwalka ba brih bara ai prâka baku diman.
Bara ai kupia baiwaia lâka ni
ai pura prâka tara baku diman.
18Dawan mita upla kumi bani ra
dîa daukan ba praiska kat mana aibapbia;
ai waihla nani ra klala yabia;
witin ra misbara kaiki nani ba
mana dîa briaia ba kat yabia;
kabu un ra iwi kuntrika nani ba ra sin.
19Tasba aiska ra,
lalma wina muna kat,
Dawan ra kulkanka yabia,
ai kingka tara kaikbia ba ra,
kan witin balbia
sim lî aubra kum lisamra dingkan baku
pâsa karnikira kum mita plis wala ra lakan kabia.
20Saion atki sasakra baku balbia,
Jekob kiamka nani ai saurka wina ai kupia lakan nani ba sin sasakrika baku.#Ro 11.26.
Dawan, baha kasak aisisa.
21Bara Dawan aisisa:
“Yang lâika daukisa man nani wal
yang karniki bara smalkanki,
man nani bîlam ra mangkri ba,
man bîlam wina taki wabia apia;
man luhpiam nani bîla wina sin apia,
man luhpiam nani bara luhpia nani bîla wina sin apia ban kaia ra.”
Currently Selected:
Aiseya 59: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
