Aiseya 57
57
1Kasakkira nani ba pruisa,
bara upla âpu sa witin nani dukiara luki ba;
waitna pain nani ba lap tiwisa,
bara upla kumi tânka briras
prubia bara saurka ba wina pri taki auya
2bara kupia kumi lâka ra dimbia.
Yabal wapni kum nina bliki auya kan
bara nanara ai raitika ra ris brisa.
Aidul nani ra kulki ba mapara
3Man nani nâra bal,
sukia mairin nani,
marit lâka sasauhkra rug mairin kiamka:
4¿Ya dukiara man nani lawaska kikisma?
¿Ya mapara mamwan aihka dauki misbara lâka dauki kapram?
¿Ya mapara twisam daiki mariki kapram?
¡Man nani saura dadaukra nani, upla kuninkira nani!
5Usupum dusa munhtara,
bara dus tara nani sut mununhtara,
saurka lâka lihki banhwisma,#Lib 18.21; Jir 7.31; 19.5.
bara tuktan nani ra sin sakripais daukisa lî warbra nani ra
bara walpa tara nani klukia ra.
6“Israel, walpa lalalni painkira nani ba ra puram sunaia wilin sma,
bahara man hilpkam kulkisma.
Baha nani ra wain diaia sakripaiska ba laikram,
bara prisantkam nani sin yaram.
¿Baha sut daukram bara man wal âiyapah kamna ki?
7Il kum purara wiria driwi kan ra,
man krikrikam mangkram,
bara bahara sin sakripais daukaia uli waram.
8Bara wamtla durka ninara
aidulkam saura ba mangkram.
Man âmya ai tikram, man kwala luha takram
bara krikrikam bîla tara ra ulram;
man lâ kum daukram waitna nani aikuki
ya wal prawaia lukram ba,
bara aidulka ra kaiki kan.
9Gâd Mélec#57.9 Hibru ra ulban sa Mélec baha tânka king, idan gâdka nani manis ba Mélec mâki kan. ra plapi waram
batana laya brih muni
bara isint kîa pain ba sin ailal;
bîla twatwilkra nani ba laihura blikram,
witin nani ba, pruan nani kingka tasbaya kat brih waram.
10Yabalkam ailal pali ba tilara taukram swapram pali,
sakuna bahki lâka baman baha tânka briras.
Man mihtam ra karnikam alki brisatma lukram,
baha mita swapras kapram.
11“¿Baha gâdka nani ba ya sa,
bahara man sibrinkira mayuni kapram ba,
bara man bui yang maipara kasak apia ba
bara aiska pali âmya ai tikram ba?
Man sin yang ra pain ai kulkras katma ba ra,
yang âpu baku sâp katna.
12Sakuna man daukankam nani aisaisna,
dîa man lukisma, kasak wapni sma.
13Man hilp want winma aidulkam nani ba mita swaki mai sakaia apia,
sakuna witin nani sut ba
pâsa mita bri wabia,
wingka puhbanka kumi ba mita
witin nani ba lap tikbia.
Ban sakuna, witin nani
yang ra ai lukanka mangki bri ba
tasba na ai dukia bribia,
bara yang ilki holikira Saion ba alki bribia.”
Klala bribia ba ningkara rakbia
14Baha ningkara aisanka kum walma:
“Man nani yabal ba langni dauks,
langni dauks;
pahbi sâks wan mina prukaika nani ba,
yang upliki nani ba yabalka bâk lubia.”
15Kan witin Laih Purara iwi ba,
ban kaia ra raya ba,
witin ai nina ba holi,
witin aisisa:
“Yang lika waitla laih purara holikira ba ra iwisna,
upla kupia kriwan ai spiritka umpira luki ba baha wal,
bawikira nani spiritka ba,
ban raya kaia daukisna,
kupia kriwan nani spiritka ba,
lukanka raya daukisna.
16Upliki nani wal yang ban blahwi dahra aisi kamna apia,
piu sut sin kupi baiki ban kamna apia;
kan yang maiwanra spiritka nani sut ba dringwaia daukamna,
bara lukanka sut swapni takbia.
17Israel saurka tâwan,
piua kum yang kupi baikri,
bara witin ra klala yabri
bara yang lika witin nani tila wina tnaya ra takri;
sakuna witin maipara babura taki,
ai kupia prautka ra kau tniwbia.
18Ai yabalka nani ba yang kaikri;
sakuna witin ba rakamni,
bara ris sin yabamna
bara aiska ai âuyapah kaia,
witin ra maisa nihkra yabamni,
ai uplika nani sari bri nani ba ra maisa nihkamni.
19Bara baha upla sut ra wimni:
‘Kupi kumi lâka laihura nani ba ra,
laimara nani ba sut ra sin kupia kumi lâka.#Epe 2.17.
¡Bara yang upliki nani ra rakamni!’
20Sakuna saurakira nani ba sin,
kabu praut taki ba baku sa,
sip sâp takras,
buhutni drapapa laya manis saki ba baku kabia.”
21Gâd aisan sa:
“Kupia kumi lâka ba âpu sa,#Ais 48.22.
saurakira nani ba dukiara.”
Currently Selected:
Aiseya 57: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
