Aiseya 32
32
King lâka kasakkira ba
1Kaiks king kum aimakbia kasak lâka ra
ai kingka ba tâ bribia
wihta tara nani ba sin lâ wapni kat tâ bribia.
2Witin nani kumi bani ba,
pâsa krawi ba mapara
wan yukuki watla baku kabia,
lî auhi ba mapara,
wan yukuwaika watla baku,
tasba lâwan ra lî kârma nani baku kabia,
lapta bitni pali piua ra walpa tara distika wanki ba baku upla iwras tasbaya ra.
3Ai nakra nani ba param pali kaiki kabia,
aman walaia ridi pali kabia;
4witin nani ai sringka kira diara daukbia apia,
sakuna sins lâka ra aisi daukbia,
aisi ba twisa ba param ingni aisabia.
5Upla kupia saura takan nani ba ra
upla kupia painkira sa wibia apia,
kunin mamunra ba, upla yamni sa wibia apia.
6Kan upla kupia saura nani ba kupia saura lâka aisisa,
ai lukanka ba watawi daukaia lâka baman dukiara lukisa,
lâ krikaia daukaia dukia baman plikisa Dawan mapara aisisa,
plun dauki nani ba mihta ra diara yabras
swin auya diran dauki nani ba diranka yabras.
7Kunin mamunra kunin wal ai tâ baikisa,
alkaia kiwka nani mangkisa umpira kaikras lâka ra;
umpira nani ba kunin ni blakaia,
diara luha umpira nani,
kasakka lâka ra makabi nani ba mapara.
8Sakuna kasakkira kunin aisaras ba,
kunin âpu lâka baman luki kaikbia,
bara kunin âpu lâka ba mita purara bukan kabia.
Jerusalem mairka nani daukanka mapara
9Bara mairin nani, man nani
trabil taki lukras sma ba,
yang bui man nani ra aisisna ba wals.
Mairin nani briaia baman bîla kaikisma ba,
man nani bui yang bîli nani na wals.
10Nanara sâp sma,
sakuna kau piua wiria, mani kum ningkara,
man nani sirang tara iwma.
Kan man nani mâ nani wahbaia âpu kama,
mâ nani dakban sin âpu kama.
11Man nani sâp sma ba tatatwi bas,
sari takras mairka nani,
man nani trabil taki luks;
man nani âmyapah mairka nani,
man nani prâmka daiks,
sari prâka dims,
kwala sukra ni man nani maisam wilks.
12Man nani lamam pruki inma
insla painkira nani kan ba,
wain dusa mâirira kan sauhkan ba sarka.
13Yang upliki nani tasbaya purara,
kiaya bara rahra nani pâwbia,
tawan tara ra, utla nani kau liliakira nani kan ba purara sin.
14Lâ watla tara nani ba sut,
upla iwras tasbaya baku takaskbia,
tawan tara ra upla kwâra ba âpu takbia;
utla karnakira nani ba sin batakan kabia;
bahara biriku wail nani ba takaski kabia,
bîp wakabi piaia watla bribia.
15Sakuna yawan wan purara
Dawan papaskra karnika ba kli balbia,
bara upla iwras tasbaya ba kli tasba disang takbia,
bara tasba disang ba unta tara tasba mâirira pali kabia.#Ais 29.17.
16Tasbaya aiska ra kasak lâka, wapni lâka baman dauki kabia.
17Kasak lâka daukanka nani ba wina kupia kumi lâka takbia;
kasak lâka warkka nani ba wina
ris briaia, wan kupia kumi lâka ban kaia ra briaia bal takbia.
18Bara upliki nani ba kupia kumi pliska ra iwbia,
kli pât munras watla nani ra iwbia,
ris bri lilia kabia,
19âu, unta tara pâwan nani ba sut klakbia,
tawan ba sin sauhkan kabia sakuna,
20man nani lika lilia pali iwi kama,
lî nani lamara saumuk mangki kama,
bara bîp wainhka nani, biriku nani sin,
pata nani sin manis kabia.
Currently Selected:
Aiseya 32: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
