Aiseya 2
2
Dawan bui nisan nani tilara kupia kumi lâka dingkbia
(Miq 4.1-3)
1Naha sika dahra aisaia bîla nani Aiseya, Emus luhpia ra param marikan kaikan ba, Juda Jerusalem wal dukiara:
2Mani nani kau lui wabia ba ningkara,
Dawan ra pura sunaia watla ilka ba lika, tara pali kabia.
Il wala nani sut wal kau purara kabia,
bara upla sâtka nani sut bahara aidrubi banhwi kabia;
3upla sâtka nani ailal ba aisabia:
“Bal, man nani, kaisa Dawan ilka ra uli waia,
Jekob Gâdka ra pura sunaia watla ba kat;
witin sin ai yabalka nani natka dukiara wan smalkbia,
bara yawan, witin ai yabalka nani ra wapbia.”#Ais 56.6-7; Sak 8.20-22.
Kan Saion wina sika,
Dawan lâka smalkanka nani ba bal takbia,
Jerusalem wina ai bîla balbia.
4Dawan mita nisan bani tilara lâ daukbia,
upla ailal aiklabanka ba wapni daukbia.
Aiklabaia sordka ba tasba tukbaika daukbia,
ai langsika nani ba,
plawar mâ klakaia sord buhla daukbia.#Jl 3.10.
Nisan kum, nisan wala mapara
kli war aiklabaia lukbia apia,
war aiklabaia lâka nani sin kli smalkbia apia.
5¡Jekob watla uplika, man nani bal,
bara Dawan yabalka ingnika ra yawan wapi kap!
Prautkira nani klala bribia
6Dawan, man bui Jekob watla uplika nani ba
lulki swiram;
tasbaya ba sukia nani banhwan,#Lib 20.27; Kli S 18.10-11.
lalma tasbaya wina balan,
filisteo nani tilara
bâra ba baku,
kiamka wala nani aikuki pain kaia lâka ba daukisa.
7Kuntrika gul bara silbar banhwan sa,
yuyaka tara ba;
kuntrika ba aras ni banhwan sa
bara war waginka ba kulki sip sakras kama.
8¡Sakuna aidul nani sin banhwan sa!
Upla ai mihta ni paskan gâdka nani ra mayunisa,
ai mihta sirpika nani ni paskan ba.
9Witin nani paskan bara bawan, maya kat iwan.
¡Baha mita witin na pâtka ban swih tikpara!
10Upla nani ba, walpa nani tilara dimbia,#Par M 6.15.
tasba untika nani ra sin;
sibrinkira Dawan mawan wina yukuwi kabia,
mawan ingnika ba wina sin.#2 Tes 1.9.
11Witin nani baman sa praut luki,
ai walka ra kaiki ba; mâyara batakan kabia;
prautka lâka bri nani ba mâyara bawan kabia.
Baha yua ra Dawan baman purara bukan kabia,
12baha yua karnika sut bri Dawanka ba,
diara daukbia
witin nani baman sa luki,
tara takan nani ba mapara,
purara uli nani ba sut,
mâyara batakaia;
13witin nani ba Líbano yalamka nani baku sa
ai dara wali ba sut mapara sin,
laih purara nani ba,
apia kaka Basán usupumka nani ba sin;
14witin nani ba il tara purara nani ba baku, ai dara walisa,
kiuhsi nani purara bukan baku;
15aihwakaia watla purara mâkan ba baku ai dara wali ba,
tawan kutbanka karna pali baku;
16Tarsis durka tara nani baku sa,
apia kaka duri tara painkira nani baku.
17Witin nani baman sa luki purara uli wan nani ba
mâya pali kat batakan kabia.
Baha yua ra Dawan mita,
witin baman purara ba tânka marikbia,
18bara aidulka nani ba sut âpu daukbia.
19Dawan bal tasba aiska na sirang ikbia,
bara walpa tara baiwanka nani ra upla nani ba dimbia,
tasba untika nani ra sin;
sibrinkira Dawan mawan wina yukuwbia,
ai mawan ingnika ba wina sin.
20Upla nani gul ni bara silbar ni
bahara mayuni kaia paskan ba,
aidulka nani ba, baha yua ra,
matis nani ra bara sakangki nani ra lulki yaban kabia.
21Witin nani walpa tara baiwanka nani ra dimbia,
walpa tara klukia ra,
sibrin tara ba mita, Dawan mawan wina yukuwbia,
ai mawan ingnika ba wina sin,
witin bal tasba na sirang ikbia ba ra.
22Man nani upla ra kasak lukpara,
upla ba praprura sa.
Rayaka ba wan wingka puhbra kumi baman sa.
Currently Selected:
Aiseya 2: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
