Ester 2
2
Ester ba kwin mairin kaia sakan
1Naha diara nani luan ningkara, king Asuero ba ai kupia baiwanka ba pat alahwan kan, bâra mika Vasti dukiara ai kupia krawan, naha mairka daukanka ba dukiara bara witin ba sin pat pâtkira kulkan ba dukiara. 2Bara king warkka uplika nani naku win:
—Yamni kabia king maya mairin kaia ba kau waitna kaikras bara wîna daukra painkira, pranakira ba sin sakaia. 3Bara king mita upla nani tawan bani ra mangkbia, bara mairin wîna daukra painkira nani ba brih balbia. Mairin nani watla, Susa kan kahbaika pliska bri ba ra king bri bara ningkara Hegai, king bui kulkanka bri waitnika ba mihta ra mangkbia, witin sika mairin nani pura kakaira ba. Bara Hegai mita mairka nani ba ra aiskahkaia dukia nani yabia, 4bara ani tiarika king nakra ra aitani pali kaikbia ba sika, kwin mairin Vasti watlika ra aimakbia.
Bara naha aisinka ba king mita aitani kulkan, bara baku daukan.
5Susa kan kahbaika pliska ra Ju waitna kumi bâra kan, ai nina ba Mardoqueo mâki kan; witin ba Jaír luhpia kan, Simí bara Quis wal kiamka kan, Benjamín kiamka tila wina. 6Naha waitnika na sika, Nabucodonosor, Babilon kingka ba mita Jeconías, Juda kingka ba wal alki brih wan ba, Jerusalem tasbaika ba wina.#2 Ki 24.10-16; 2 Kr 36.10. 7Mardoqueo ba ai lakra kumi bri kan, ai rapika luhpia; mairka ba rau, ai yaptika bara ai aisika wâlsut ba pruan; bara witin mita tuktika mairin ba ai luhpia mairin baku pakan. Ai nina ba Hadasá mâki kan, wibia kaka lika Ester. Witin ba tukta mairin wîna daukra painkira pali kan. 8Bara king adarka ba tasba aiska ra plapi tawan; ningkara mairin tiara ailal pali king watla Susa kan kahbaika pliska bri ba ra brih balan, Hegai mihta ra. Baha tilara Ester ba sin king watla ra brih wan kan, bara witin sin mairin nani pura kakaira Hegai mihta ra swin. 9Bara Hegai ba, naha tiarika Ester ba, ai nakra ra pain pali prana kaiki kan; baha mita aihni pali skahkan bara plun sin kau auhni daukan ba dakaki kan, ningkara bâk sakan mairka nani 7 kan ba watla ra brih wan, utla kau pranakira ba ra.
10Baku sin Ester ba ani wina kan sapa lika param takras kan, ai taya nani dukiara sin aisaras kata, kan Mardoqueo mita param takbia wiras kan ba tâwan. 11Bara Mardoqueo ba, yu bani mairin nani watla ba mawanra kirhbi watauki kan, Ester ba nahki auya sapa kaikaia wisi, bara dîa witin ra muni sapa kaikaia dukiara sin.
12Bara naha tiarika nani ba, kati 12 skahki prana dauki kan. Kati 6 ba lika, ai wîna aiska ba kîa pain batanka laya wal yuki kan; kati 6 wala ba lika, isint bara taya swapni daukaia dukia nani ba yuki kan. Bara baku natka ra tiarika nani ba, yua alkan ba ra, king Asuero mawanra brih wan. 13Bara baku natka ra, tiarika nani ba mairin nani watla wina king watla ra brih wan; bara naha tiarika nani ba, king mita brih wabia wisa piua ra, dîa makabi ba kat yabi kan. 14Bara naha mairka tiara nani ba tutni bani, king watla ra blikan, wih bâra yapi kan; bara yapi lalawan titan ra, baha wina taki mairin nani watla wala ra wih takaski kan, king uplika kulkanka bri waitnika Saasgaz mihta ra, witin sika king lilika mairin nani aihwaki kaiki kan, bara ani tiarika king wal prawi taki wi kan nani ba, kli king watla ra tawi waras kan, sakuna king mita winbia kaka lika sip kan kli tawi balaia.
15Bara Ester, Mardoqueo rapika, Abihail luhpia mairin ba, witin mita ai luhpia baku pakata ba, witin ba king mawanra balaia yua aimakan ba ra, diara kumi sin brih waia lukras kan. Sakuna dîa Hegai win kan ba kat brih wan; bara baha nani Ester ra kaikan nani ba sut, witin ra pain pali lukan. 16Bamna Ester ba brih wan king Asuero watla ra, kati 10 Tébet katka ra; baha yua ra king ba pat mani 7 king aimaki kan. 17Bara Asuero ba, mairin nani aiska tilara ai rayaka aiska ra, Ester ra kau pain kaikan; baha mita Ester ba pain pali kulkan, witin ai mawanra mairin tiara nani wala kan ba wal. Baku king kraunka ba lal ra mangkan, bara kwin mairin mangkan, Vasti ba watlika ra. 18Bara naha ningkara king pata tara daukan, Ester ra kulkanka yaia dukiara, ai warkka uplika sut bara ai kingka lâka ra wark dadaukra nani sut ba paiwi muni. Ai tawanka ra lal mana nani ba sin alahban king ai tasbaya nani aiska ra, bara sin diara nani ba mana luha yabi kan, ai kupia brinka ba kat.
Mardoqueo mita pura baikan king ikaia dauki kan ba
19Bara mairin tiara nani king watla pîska wala ra laki swi kan yua ra, Mardoqueo ba king watla dimaika kat iwi kan. 20Baku sin, Ester ba dîa Mardoqueo mita win kan ba kat bîla wali dauki kan; ba mita sin witin ani pliska wina bara ya kiamka kan ba sin upla ra wiras kan, dîa Mardoqueo win ba kat dauki kan, witin wal kan piua ra smalkan ba baku. 21Baha yua nani ra Mardoqueo ba king watla dimaika kat iwi kan, bara wihtka tara Bigtán bara Teres wal king ba ikaia wisi aisi kan walan, bara naha waitnika wâl na, ai kupia sauhki lawi aisi kan king ba ikaia dukiara. 22Bara Mardoqueo wali, kwin mairin Ester ra win, bara Ester bui king ra win, Mardoqueo win dahra ba. 23Bara naha dukiara tânka plikan kasak aisi sapa kaikaia dukiara, bara baha ba kasak kan; bamna naha waitnika wâlsut dus ra pami langki ikan. Bara naha daukanka ba sturka king wauhkataya ra ulban sa.
Currently Selected:
Ester 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua