2 Korint 1
1
Lakula bîla
1Yang Pal, Gâd kupia lâka ba mita Jisas Kraist apastilka kum sna, wan muihni Timoti wal, Gâd sertska Korint#Ap St 18.1. tawanka tara ra banhwi ba sut ra bara Acaya tasbaya aiska ra, Gâd uplika nani bâra ba sut ra sin ulbisna. 2Gâd yawan wan Aisa wina bara Dawan Jisas Kraist wina sin ai kupia yamni lâka ba, ai kupia kumi lâka ba man nani puramra laikbia.
Pal pât wahwanka nani ba
3Wan Dawan Jisas Kraist Aisika Gâd ra mayunpi, kan witin sika Aisa kumi latwankira ba bara piua bani wan maisa nanihkra Gâdka sa. 4Pât nani sut yawan wahwi ba tilara witin yawan wan maisa nihkisa, bara baku yawan sin sip kabia wala nani pât wahwi ba sin maisa nihkaia, witin wina baha maisa nihkra yawan ra wanki ba, baha nani ra yabaia. 5Kraist pât tara wahwan ba baku yawan sin pât nani wahwisa, bahamna Kraist ba mita sin yawan maisa nihkra tara kum brisa. 6Baha mita, yang nani pât wahwisna kaka, baha lika man nani maisa nihkra lâka bara swaki sakan lâka brima ba dukiara sa; bamna Gâd mita yang nani maisi nihkisa kaka, baha lika man nani sin maisa nihkra bara swaki sakan lâka brima ba dukiara sa, bara baku lika man nani sip kama ban bapi bûi kaia, bara yang nani wahwisna pâtka nani ba wahwaia. 7Yang nani bapi bûi man nani ra bîla kaikanka kum brisna, baku man nani pât wahwisma ba mita yang nani kaikisna, maisa nihkra Gâd wina yang nani ra aiki ba man nani ra sin maikan sa.
8Muihki nani, brinki sa man nani kaiki kama, nahki pât nani Asia ra yang wauhri ba.#2 Ko 15.32. Baha lika trabil tara pali kan, wan karnika âpu praiska wan daukan kan, bara ban sin yang nani lukri, yang nani ba raya kamna apia. 9Daira sin wali banhri, prura mihta ra yang nani na ai mangkan sa. Sakuna naha diara nani hilp wan munan, kau Gâd ra lukaia lâka briaia, baha mita yang nani wîni kat lukaia apia, kuna Gâd ra mika, witinka mita pruan nani kli buki ba. 10Gâd bui yang nani ra swaki ai sakan bara kau ban sin swaki ai sakisa, prura pâtka tara ba wina. Yang nani kainira lukaia lâka ba witin kat mangki swiri sa, piua bani ban swaki ai saki kabia, 11man nani sin puram sunra bâk hilp wan muni kama kaka. Bara upla manis pura sunra bâk hilp wan munbia kaka, Gâd ai kupia yamni lâka wanki ba dukiara upla manis tingki wibia.
Dîa kan Pal Korint ra waia kan ba sip waras kan ba
12Diara kum bâra sa wan kupia âuyapah daukisa, bara baha sika: wan kupia lukanka ba mita wan wisa, yang nani lika naha tasba ra holikira lâka ra bara kunin tânka âpu kira watauki banhri sa; bara kau pali lika man nani tilamra. Baku kaia tânka ba lika, yang nani sinski ba mita lika apia, sakuna Gâd ai kupia latwanka lâka tara ba mita sika. 13Bamna diara nani wan wauhkataya nani ra ulbisna ba lika, diara wala âpu sa, man nani aisi kaikma ba ra, tânka brima dukia nani baman sa. Bamna brinki sa man nani tânka sut pali brima, 14pat tânka wiria kaikisma ba baku; bamna wan Dawan Jisas balbia yua ra, yang nani dukira âmyapah kama, sim yang nani bui man nani dukiamra âiyapah kamna ba baku.
15Bamna yang pali naku luki kapri, man nani ra pas wih mai kaikaia, bara kli aima wala man nani ra yamni mai munaia; 16Macedonia ra lui wamna ba ra man nani mai kaikamna luki kapri,#Ap St 19.21. bara baha wina kli balamna taim sin kli mai kaikamna. Baku lika man nani sip kaia kapram hilp ai muni Judia ra ai blikrika waia. 17¿Baku daukaia lukri ba, pulan lâka ra lukatna ki? ¿Man nani lukisma, yang dîa daukaia luki kaikisna bara namhpa namhpa sna, “daukamna” bara “daukamna apia”? 18Bamna Gâd lika witnis sa, yang nani bui man nani ra mai wiras sna “daukamni” bara “daukamna apia.” 19Kan Kraist Jisas Gâd Luhpia ba tânka yang, Silvano bara Timoti#Ap St 18.5. kira man nani tilamra smalki banhwisna ba, apia sika “âu” ba “apia” ba, sakuna Kraist sika “âu” ba Gâd wina; 20kan Gâd pramiska sut ba Kraist ra aimakisa. Baha mita, yawan bui Gâd ra mayuni ba ra, Jisas Kraist nina bâk “Baku kabia” wisa. 21Bamna Gâd mita sika yang nani ra, bara man nani ra sin Kraist wal karna wan daukan ba, bara bâk wan saki wan brin. 22Bara witin ai sîlka ba ni mark wan mangkan sa, bara Spirit Holikira ba wan kupia ra mangkan, naika yawan diara briaia ba tukinka baku.#Epe 1.14.
23Sakuna yang luki kapri ba kat sip Korint ra waras katna, Gâd ba witniski sa, yang bui man nani ra uya lukisna ba; ridi sna rayaki pali ba yaia. 24Luki kapara yang nani bui man nani dîa kasak lukaia sma ba taibi mai munamna, kasak lukan lâka ra man nani aitani kat sma; bamna kau lilia lâka bri banhma dukiara hilp mai munaia want banhwisna.
Currently Selected:
2 Korint 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua