Iruruputo 17

Tesalonaika peuru kale

1Ni Paula ni Sailasi ta qo olake Amipipolosi ni Apolonia kude ni qo baroake Tesalonaika, sai kala Jiu amu vo ilusato ko pade o evakoi. 2Voko kalo sole Paula ta o olake ilusato ko pade kale. Ni zouke Sabati ṉaniu kale vota okai pesipesitake ko Tabu ama Riki, 3ni vota o rupasikake ko kikolani ni omai uria bazuekake koko tuveano vo Baṉara o soroevo ala va kioveni Pakio ko tolailo ni voko mata saevo voukale azo ta ko pidokiovi seko Tabu ama Buka kale. Vota eri kiolake, “Nea Jisu vo aṉa a qasevani mekasi, vo inio vo Baṉara o soroeveni Pakio,” kiolake vo Paula. 4Ni kake sea maba poso ta ke tuvevo putake ni ke kati zomanake Paula ni Sailasi, ni kubo seko raura kama rekoreko poso ni matuma poqala Quriki amu melai se lula ke liliziovini Jiu amu vo Baṉara kasi ta ke tuvevo puevake vo Jisu.

5Melai seke konoivani Jiu amu ta ke padoemake seke utu taliani ruqe ama maba poso ni seta ke vakimuake ni ke ṉiṉoreake koa pado ama peuru kale. Ni kiadamu ta ke olake ni kekai kasakeake Jesoni va kikelani maba ko pade, tu seta ke vailiko Paula ni Sailasi sai tu ke saqoriko nioqa sai kazo maba poso kasi. 6Melai so keru se pui ke kea keru nioqa, seta ke rajaevake vo Jesoni ni so jari mata kake ke tuvevo putani koa peuru kale ama titizato ko maba poso ko tanama kale ni ke upaupatake ni eri kikelake, “Nioqia omuqa maba kidi nio tapata qo erekani nioqa kiadama zae poso kale! Ni nioqata qo kueva animeko peuru kale 7ni Jesoni nio o kati vailani nioqa voko pade kale. Ni sea kiadamu inio ke bikoirikani ko Romu ama bazu poso, ni ke kasevani kala edolola aikovakova, voko ṉi ta Jisu,” kikelake. 8Nio so keru ke viqa keru koa pesio sea matuma vaki ni se koa peuru kale ama titizato ko maba poso ta keta matu korakoraivake ni keta taiqaraoke. 9Ni sea titizato ko maba poso ta keta ma koake ko takula vo Jesoni ni vokale amu ko tu leveleveo kekai ereko seko ibu, ni koko tova seta ke rupasimake se.

Berea peuru kale

10Nio koa ipu inio seke tuvevo putani ta ke soroekake Paula ni Sailasi Berea peuru kale, ni so keru nioqa qo baroa keru sai, nioqata qo amaqeake se Jiu amu ko ilusato ko pade kale. 11Ni saizama maba poso ta uri ama kerukeru samu pui se Tesalonaika mu jaria ruqe amu. So inio seta ke matu uria didiekake ko bazubazu, ni kiadama ṉaniu seta ke tiromikake ko Tabu ama Riki tu keta ka kelo vo Paula ni Sailasi kiqolani koko tuveano kikelake sole. 12Ni kubo madu ta ke tuvevo putake, ni kubo Quriki ama raura kama rekoreko ni lasive poso melai ke tuvevo putake. 13Ni so keru se Tesalonaika ke evani Jiu amu ke viqa keru Paula kai bazubazuto vo Baṉara ko bazubazu Berea peuru kale, seta ke olake sai ni ke taniekake ṉavaṉavato ni lilomato. 14So sole seke tuvevo putani ta ke soroevake vo Paula taukavole seko siqo kale ama peuru kale azo ketale, melai Sailasi ni Timoti ta qopeta evake sai Berea peuru kale. 15Ni sea maba poso seke odievani vo ta ke vati baroake Atenisi peuru kale. Sai kazo inio seta keta vaitake Berea peuru kale ke kati vaitake Paula ko bazu Sailasi ni Timoti oka soroekema tu nioqata taukavole qo zomano vo sase kikolako.

Atenisi peuru kale

16Ni so keru Paula obe tareka keru Sailasi ni Timoti Atenisi peuru kale, vota matu upotuqu ota evake so keru vo o keve keru koa peuru ta beku poso kokai sukatako. 17So sole vota Jiu amu ko ilusato ko pade kale o mati pesipesitake se Jiu amu ni se pui Jiu amu Baṉara ke ilusivani, ni so jari kiadama ṉaniu maketi pade kasi o mati pesipesitake se sai ke alokatani maba poso. 18Ni kake nianiioma pesio sama maba poso Ipikiuriani ni Sitoiki nianiiekato ko poqala kale amu melai kekai zomanake vati aivekinio vo. Nio kake ta eri kikelake, “Nonia kirikirimato inio o evani nea maba?” Ni mata kake ta ke opatake ni eri kikelake, “Vota okai bazubazuta jari avo kama edoloma baṉara poso.” Seta so kikelake ako Paula ta okai bazubazutake vo Jisu ko mata saevo voukale azo sole. 19So sole seta ke odievake vo Paula ni ke vati olake Kauniseli ko zaekale Areopaqasi#17:19 Areopaqasi: Koa Kauniseli ta lotu ni uri ama kalo ko kuimanao poso ke vatoekeni se Quriki amu kasi. ka kikelako, ni ke kuimaevake vo, “Eṉeta ṉeqa zaria paqumuko komia vaini ama nianiiekato ṉo ṉoqai bazubazutako. 20Ka ma ṉoṉo qasekako quli ta vairua viqoma quli eṉe kasi, so sole eṉeta ṉeqai zaria takai nianiio koko kio ni kalo,” kikelake. 21(Ako kiadama se ṉisa Atenisi amu ni pakepakeo maba madu sai ke evani ta keka zariake ṉamuko seko pado ama taku kaseko kale ni viqo kale ko vairu ama bazu.)

22Nio Paula ta o lojoake se Kauniseli madu ko tanama kale ni eri kiolake, “Aṉata a mela lea kiadakoi Atenisi amu mela ta matu lotu maba mela. 23Ako aṉata a dalia meko peuru kale ni lula a qea koa zae poso meme ilusikakoi azaazama baṉara poso, ni lula a qea ko sara ko eria rikizio ko evema, ‘Vo puliala ovai nianiiani baṉara kasi’. So sole vo me pui paqumuvole melai mebe ilusivani, vo inio aṉa a melai bazuevani me. 24Voa Baṉara vo o erekeni ko peuru ma peuru ni kiadama quli sai ko evako ta au ni miduku vo Lekasa pui o loivani maba madu ke erekako jelepade poso kale. 25Ni vota pui oka zariani nio tu animeta me dauvevo animeko ṉase kale ama tauvezato kale, ako kiadama quli ta voko sole, melai vo inio o katimelani ko saevo ni kiadama quli animea kiada mela. 26Omadeu maba kale inio vota o tanieke kiadama toutou poso tu seta ke loilou pado ama peuru ma peuru kale. O ṉavi inio o korotikake kuleto ko korokoroti ama taku ni o podetikake koa zae poso se kekai elo ama. 27Vota so o ikake ko tu seta ke vailivou vo, ni seta ke velou vo esa seko sarusaruto kale. Ako vo Baṉara ta pui vaṉa kala animea kiada mela kasi azo; 28omadeuvo kala mevo rikito maba kiovevo jari, ko eri,

‘Vokale inio animeta me jaeva ni me vatuta ni me eva.’

Omadeuvo kama pado meko kera kikolani jari,

‘Anime melai voko meqora poso mela.’

29Animeta vo Baṉara ko meqora poso mela so sole voko Baṉara puilo ta pui qolo ni siliva ni lado beku jaria kerukerueko me elou, ko maba madu ke erekako seko ṉase kale ama iruruputo ni kerukeru kale. 30Baṉara ta okai azopike voko vilu koa taku so keru se maba poso pui kepa vai nianiiovi keru vo, melai erisaṉa vota o bazuema se kiadama zae poso kale tu seta ke lilizio seko ruqe ama keve kale azo sidopu ama keve tona. 31Vota lula o takumuke koa ṉaniu vo o sidopua titizikou keru ko pado ama peuru ma peuru, ni vota lula o pitoeve voa maba vo o ereko ala koa titizato. Ni Baṉara ta lula kasa o ike voko pitoevo vo kiadama maba poso kasi voa maba ko mata saevivo kale voukale azo!” kiolake.

32Ni so keru seke viqe keru koa mata saevo voukale azo inio kake ta kevai balebaleitake vo, melai kake ta eri kikelake, “Eṉeta ṉeqa zaria taṉa viqo mata ko ṉo ṉoqai bazutako quli,” kikelake. 33Sai nio Paula ta o vaekake koa Kauniseli ko zae. 34Ni kake ta kevai zomanake vo ni ke tuvevo putake, kala pado ta Dionisiasi, vota kala pado Kauniseli kale ala, ni kama pado rekoreko Damarisi ka kikelako, ni mata kake maba poso.

Currently Selected:

Iruruputo 17: BLBNT

Highlight

Copy