Roma Kitab ini pe keterangan
Kitab ini pe keterangan
Orang yang tulis kitab ini: Kitab Roma ini, satu surat yang Paulus tulis. Paulus itu orang Yahudi dari aliran Farisi, yang pegang kuat aturan-aturan di lima kitab Musa (Flp. 3:5-6). Dulu, dia yang jaga siksa pa orang-orang percaya pa Yesus Kristus karna dia kira kata, dorang iko ajaran sesat. Tapi, satu kali dia dapa penglihatan dari Yesus Kristus, kong Yesus pangge pa Paulus untuk iko pa Dia. Yesus me utus pa Paulus untuk kase tau Kabar Bae tentang Yesus Kristus pa orang-orang yang bukang Yahudi (Kis. 9:1-19). Lia lagi keterangan tentang ‘Paulus’ di kamus.
Kitab ini untuk sapa: Kitab Roma ini ada tulis untuk jemaat di kota Roma. Roma itu kota yang paling terkenal, barang kota itu jadi pusat dari pemerinta Roma yang jaja banya bangsa di dunia. Orang-orang di jemaat Roma ini ada dari agama Yahudi, deng ada dari yang bukang agama Yahudi. Paulus bolong perna pigi di Roma, tapi so lama dia ingin ka sana (Rm. 1:13-15).
Ajaran-ajaran di kitab ini: Di kitab Roma ini, Paulus kase ajar ajaran-ajaran yang penting untuk orang-orang yang percaya pa Yesus Kristus. Paulus tulis tentang samua manusia berdosa, kong manusia bole jadi orang yang tara sala pa Tuhan Allah pe muka, bukang karna dia ada biking aturan-aturan di lima kitab Musa (Rm. 1–3), tapi karna dia percaya pa Yesus Kristus saja. Jadi kalu torang percaya pa Yesus Kristus, Tuhan Allah kase bebas pa torang dari dosa-dosa (Rm. 3:22, 26, 4:24-25, 5:1). Biar dulu torang so sala, tapi skarang Tuhan Allah so tara hukum lagi pa torang, karna torang so satu hati deng Yesus Kristus (Rm. 8:1).
Paulus me tulis ini supaya orang-orang Yahudi tau tentang Tuhan Allah pe rencana pa dorang (Rm. 9–11). Barang, banya orang Yahudi tara percaya pa Yesus, deng dorang kira kata, Tuhan Allah so tarima pa dorang karna dorang itu Abraham pe turunan. Tapi karna orang Yahudi banya tara percaya, ada banya orang bukang Yahudi yang so jadi percaya. Paulus bilang, Tuhan Allah tetap sayang pa orang Yahudi, kong satu waktu nanti, banya orang Yahudi akan bertobat kong percaya pa Yesus Kristus.
Turus, Paulus kase tau lagi ajaran yang penting tentang bagimana percaya pa Yesus Kristus, deng bagimana orang-orang percaya itu mo hidup di dunia ini (Rm. 12–15).
Currently Selected:
Roma Kitab ini pe keterangan: PB MMU
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Melayu Maluku Utara @ Lembaga Alkitab Indonesia 2020