Ruti 3
3
Chenjezgu Laku Naomi Kwaku Ruti
1Viyo Naomi mpongozi wake wanguti kwaku iyo, “Wa mwana wangu si nditenere kukupenje nyumba alinga kukuŵiyenge umampha? 2Kumbi Boazi si ndi mbali widu, mweniyo ŵamwali ŵake ŵenga nawe pamoza? Awona wapepeta barile ndi usiku pa mubuli. 3Usambe ndi ujipake mafuta ndipo uvwali vivwalo vyako vyamampha ndi uruti ku mbuli; kweni kwachijiziŵiska kwaku yo cha; mpaka penipo wamara kurgha ndi kumwa. 4Kweni asani wala pasi, ughateske malo gho walapo, pavuli ukarute ndi kuvunuwa marundi ghake ndi ukagone pasi, ndipo wamkukunene cho wamuchita.” 5Ndipo wangwamuka, “Vyose vyo mukamba ndikachitanga.”
6Viyo wanguruta ku mbuli, ndi wanguchita uli ndimo mpongozi wake wangumpangizgiya. 7Ndipo penipo Boazi wangurgha ndi wangumwa, ndi mtima wake ungusangaruka, wanguruta kwa chila pa umari wa ndundu ya barile. Sono Ruti wanguza kwakunyanyata ndi wanguvunuwa marundi ghake ndi wangula pasi. 8Ndi usiku pakati Boazi wanguchuruka ndi wangung'anamuka, ndi wanguwona kuti munthukazi wangula pa marundi ghake! 9Iyo wanguti, “Ndiwe yani?” Ndipo munthukazi wangwamuka kuti, “Ndine Ruti, mteŵeti munthukazi wako; vwikha chiketi chako pa mteŵeti munthukazi wako pakuti we muhari.” 10Wanguti, “Ambuya akutumbike mwana wangu; wezi wakumariya uwu wachita ngukuru kuruska wakudanga mwakuti wapenja ŵanyamata cha, manyi mbasauchi manyi mbasambasi. 11Ndipo sono, wa mwana wanguungopanga cha ndikakuchitiyanga chose cho upempha, pakuti ŵanyangu wose ŵamu msumba ŵaziŵa kuti we munthukazi wakuzirwa. 12Ndipo mbuneneska kuti ine nde muhari; kweni walipo munyake muhari ukongwa kuruska ine. 13Uje panu usiku uno asani ndi mlenji wakakuharanga kuŵa muwoli wake, nchamampha mureke wakuhari kweni asani kuti wakakhumbanga cha kukuhara, po ndipo uli ndimo Ambuya ajaliya amoyo, ine ndikakuchitiyanga cho muhari watenere kuchita. Ugone pasi mpaka ndi mlenji.”
14Viyo wangula pa marundi ghake mpaka mlenji; kweni wanguyuka ndi chivivivi penipo ŵanthu kuti ŵanguziŵana cha yumoza ndi munyake. Ndipo Boazi wanguti, “Kureke kuziŵika kuti munthukazi wanguza ku mbuli.” 15Ndipo wanguti, “Iza nayo saru yo wavwala ndi uyidandawuwe.” Viyo Ruti wanguyidandawuwa, ndi Boazi wangupima mweso yinkhonde ndi umoza ya barile wangumupingizga; pavuli Ruti wanguruta mu msumba. 16Ndipo wanguti waza ku mpongozi wake wanguti, “Wachenda uli wa mwana wangu?” Sono wangumunene vyose vyo munthu yuwa wangumuchitiya, 17kuti, “Myeso iyi yinkhonde ndi umoza ya barile wangundipaska ndiyo, pakuti wanguti, ‘Ungawere ku mpongozi wako ndi manja ghawaka cha.’ ” 18Iyo wangwamuka, “Ulindizge, wa mwana wangu mpaka penipo waziŵa mo ghaŵiyenge makani pakuti yo munthu wakapumuwanga cha, kweni wakaghamalizganga makani gho msana wale.”
Bible Society of Malawi