Ruti 1
1
Naomi ndi Ruti
1Mu mazuŵa mwaku gho ŵeruzgi ŵayeruzgiyanga mwenga chilala mu charu, ndipo munthu yumoza wamu Betelehemu waku Yuda wanguruta mu charu cha Moabu, iyo ndimuwoli wake ndi ŵana ŵake ŵaŵi ŵanthurumi. 2Zina la munthu yo lenga Elimeleke, ndipo zina la muwoli wake lenga Naomi mazina gha ŵana ŵake wo ŵaŵi ghenga Maloni ndi Chilioni. Ŵenga ŵaEfrata ŵakutuliya mu Betelehemu waku Yuda, ŵanguruta mu charu cha Moabu ndi ŵanguja mwenimuwa. 3Kweni Elimeleke, murumi waku Naomi wangufwa, ndipo Naomi wangusiyaka ndi ŵana ŵake ŵaŵi ŵanthurumi. 4Yaŵa ŵanguto ŵawoli ŵaMoabu: zina la yumoza lenga Oropa ndi zina la munyake lenga Ruti. Ŵanguja muwa akhumba virimika chumi; 5ndipo ŵaŵi viyo Maloni ndi Chilioni ŵangufwa viyo Naomi kuti wenga ndi ŵana ŵaŵi wo ndi murumi wake cha.
6Sono wangusoka pamoza ndi ŵakumwana ŵake, kuweko ku charu cha Moabu pakuti ŵeche mu charu cha Moabu ŵanguvwa kuti Ambuya anguchitiya lisungu ŵanthu ŵawo ndi anguŵapaska kurgha. 7Viyo wangusoka kutuwa pa malo penipo wenga pamoza ndi ŵakumwana ŵake ŵaŵi; ndipo ŵanguruta pa ulendo wowo kuwere ku charu chaku Yuda. 8Kweni Naomi wanguti ku ŵakumwana ŵake ŵaŵi wo, “Rutani wereni we yose waku imwe ku nyumba ya anyina. Ambuya akuchitiyeni uli ndimo imwe munguchitiya ndi ŵakufwa ndiso ine. 9Ambuya apereke kuti mukasaniye pakuja we yose waku imwe mu nyumba ya murumi wake.” Sono wanguŵafyofyontha, ndipo iwo ŵanguliya ndi kudiska mazozi. 10Ndipo ŵanguti kwaku iyo, “Awa, tikawerenga pamoza nawe ku ŵanthu ŵako.” 11Kweni Naomi wanguti, “Wereni vuli mwa ŵana ŵangu, chifukwa nchine chakurutiya ndi ine? Kumbi ndeche ndi ŵana ŵanthurumi mu chibali changu wo ŵangaŵa ŵarumi ŵinu? 12Wereni vuli mwa ŵana ŵangu, rutaninga pakuti ndakota ukongwa kuŵa ndi munthurumi. Chingana ndingati nde ndi chigomezgu, chingana ndingaŵa ndi murumi usiku uno ndi ndingabala ŵana ŵanthurumi. 13Kumbi imwe mungaŵalindizga mpaka ŵakuwe? Kumbi mungajikanizga kuŵirwa? Awa mwa ŵana ŵangu nde wakupwetekeka limu mu mtima chifukwa chaku imwe, kuti janja la Ambuya la tambarukiya paku ine kundisuzga.” 14Viyo ŵangusoska so mazu ghawo ndi ŵanguliya so; ndipo Oropa wangufyofyontha mpongozi wake, kweni Ruti wangukaniliya kwaku iyo.
15Ndipo Naomi wanguti, “Wona muwoli munyako wawere ku ŵanthu ŵake, ndi ku ŵachiuta ŵake: uweko nawe rondo muwoli munyako.” 16Kweni Ruti wanguti, “Leka kundipempha kusiya iwe, pamwenga kuti ndiweko kurondo iwe, pakuti kweniko ukayanga nane ndikayanga kweniko, ndi penipo ukagonanga, nane ndikagonanga penipo, ŵanthu ŵako ŵakaŵanga ŵanthu ŵangu, ndi Chiuta wako wakaŵanga Chiuta wangu; 17penipo ukafwiyanga, nane ndikafwiyanga penipo, ndipo ndikaŵikikanga penipo, mphanyi Ambuya andichitiya viyo ine ndi ukongwako so, chingana nyifwa yikandipatuwanga kwaku.” 18Ndipo penipo Naomi wanguti wawona kuti wangukhumbiska kuruta nayo, wengavi kukamba so kanthu kanyake.
Naomi wadanika Mara
19Viyo ŵaŵi wo ŵangukiyakiya mpaka ŵanguza ku Betelehemu, ndipo msumba wose ungiyaghayika chifukwa chawo, ndipo ŵanthukazi ŵanguti, “Kumbi ndi Naomi uyu?” 20Iyo wanguti kwaku wo, “Rekani kundidana kuti Naomi kweni mundidanenge kuti Mara, pakuti Wanthazizose wachita nane kwakuŵaŵa ukongwa. 21Ndichiruta ndenga wakuzaza, ndipo wandiwezga wambura kanthu. Mutindidaniyanji Naomi penipo Ambuya andisuzga, ndipo Wanthazizose watole soka likuru paku ine?” 22Viyo Naomi wanguwe ndi Ruti mu Moabu, mukumwana wake pamoza nayo, yo wanguweko ku charu cha Moabu. Ndipo wanguza ku Betelehemu pa nyengo yakwamba kuvuna barile.
Bible Society of Malawi