Chivumbuzi 9

1Ndipo wangukuŵa mbata yakemungelo wachinkhonde ndipo ndinguwona nyenyezi kutuwa kuchanya yakumbotoka pa charu: ndipo ungupaskika kwaku iyo mjuriru wa chizenje chakuti nyo! 2Ndipo wangubanuwa chizenje cho chakuti nyo, ndipo kutuwa ku chizenje cho ungukwera usi, ulaka ndi usi wa ng'anjo yikuru; ndipo vingufipiskika dazi ndi mude chifukwa cha usi wa chizenje cho. 3Ndipo mu usi mo ŵangutuliya ŵazombe pa charu; ndipo ŵangupaskika nthazi, uli ndimo vipiriri vyacharu viriri ndi nthazi. 4Ndipo kunguneneke iwo, kuti ŵareke kutekeska uteka wa charu, pamwenga chiŵisi chose pamwenga chimuti chose, kweni ŵanthu pe ndiwo; ŵeniwo ŵalive chizighiri chaku Chiuta pa mphumi zawo. 5Ndipo kungupaskika kwaku wo kuti ŵareke kuŵabaya, kweni kuti ŵaŵarwirwitiske myezi yinkhonde: ndipo urwirwi wawo wenga uli mburwirwi wa chipiriri, po charuma munthu. 6Ndipo mu mazuŵa gha ŵanthu ŵampenja nyifwa, kweni kuti ŵamkuyisaniya cha; ndipo ŵamkhumba kufwa, kweni nyifwa yamkuŵathaŵa.

7Vikozgu vya ŵazombe wo vyenga vyakukozgana ndi ŵakavalo ŵakurongosoleke ku nkhondo: ndipo pa mitu yawo penga nge ndi ndumbu zakulingana ndi golide visku vyawo nge ndi visku vya ŵanthu. 8Ndipo ŵenga ndi sisi ulaka ndi sisi la ŵanthukazi, minyu ghawo ghenga nge ndi minyu gha zinkharamu. 9Nganga zawo zingujarika ndi vyo vinguwoneka ulaka vyapachifuŵa vyachisulo; chiwawa cha mapapa ghawo chenga nge nchiwawa cha magareta gha ŵakavalo ŵanandi ŵachichome ku nkhondo. 10Ndipo ŵenga ndi michiya ulaka ndivipiriri, ndi maliwozga; ndipo mu michiya yo ndimu mwenga nthazi yawo yakupweteke ŵanthu myezi yinkhonde. 11We nayo karonga wakuŵawusa, mungelo iyo wa chizenje cho: zina lake mu chiHebere ndi Abadoni, ndipo mu chiGriki we nalo zina Apoleyono.

12Soka lakwamba larutapo; awonani, ghatuza masoka so ghaŵi pavuli.

13Wangukuŵa mungelo wachinkhonde ndi chimoza, ndipo ndinguvwa mazu kutuwa ku sengwi zinayi za jochero la golide lole paurongo paku Chiuta, 14ghakunena ndi mungelo wachinkhonde ndi chimoza, yo wenga ndi mbata, “Uŵafwatuwe ŵangelo wo ŵanayi, wo ŵamangika pa msinjiwo ukuru, Efrate.” 15Ndipo ŵangufwatulika ŵangelo wo ŵanayi, wo ŵangurongosoleke limu za ora lo, ndi zuŵa, ndi mwezi, ndi chirimika, kuti ŵabaye chigaŵa chachitatu cha ŵanthu. 16Ndipo unandi wa maŵanja gha ŵapa ŵakavalo wenga vikwi chumi vyakupindika vikwi machumi ghaŵi: (200,000,000), ndinguvwa unandi wawo. 17Viyo ndimo ndinguwone mu chiwona changu cha ŵakavalo ndi wo ŵangugara paku wo, wo ŵenga ndi vyapachifuŵa viyera nge ndimoto, vyabulu nge ndi mwa wasangarawe, ndipo mitu ya ŵakavalo yenga nge ndi mitu ya zinkharamu; ndipo mu milimo yawo mungutuwa moto ndi usi ndi fukunyira. 18Chigaŵa chachitatu cha ŵanthu chingubayika ndi videru vitatu vya moto ndi usi ndi fukunyira, vyo vyatuwanga mu milomo ya ŵakavalo. 19Chifukwa nthazi ya ŵakavalo wo ye mu milomo yawo ndi mu michiya yawo; michiya yawo njakukozgana ndi zinjoka, yakuŵa ndi mitu; ndipo yeniyo ndiyo ŵapweteke.

20Ndipo ŵakujapo ŵa ŵanthu, wo ŵengavi kubayika ndi videru ivi ŵengavi kunyongokako ku nchitu za manja ghawo, kuti ŵareke, kulambiya ŵademone, ndi vyangoza vyo vya golide ndi vya siliva, ndi vya mkuŵa, ndi vya mwa, ndi vya muti; vyenivyo virive kuziŵa kulereska, chingana nkhuvwa, chingana nkhwenda; 21ndipo kuti ŵangubezga cha ku maumbanda chingana nkhu vyanusi, chingana nkhu ureŵi, chingana nkhu maunkhungu ghawo.

Currently Selected:

Chivumbuzi 9: TongaMw

Highlight

Copy

Compare