Chivumbuzi 8

Chizighiriyu cha chinkhonde ndi chiŵi (7) chingubanuka

1Ndipo penipo wangubanuwa chizighiri chachinkhonde ndi chiŵi, kunguti yi! Kuchanya, chenga chisisi akhumba cha nusu wa ora. 2Ndipo ndinguwona ŵangelo ŵankhonde ndi ŵaŵi, wo ŵatuma paurongo paku Chiuta; ndipo kungupaskika kwaku wo mbata nkhonde ndi ziŵi. 3Ndipo wanguza mungelo munyake, yo wanguma pa jochero, wakuŵa ndi supa ya chema ya golide; ndipo kungupaskika kwaku iyo vyema vinandi, alinga wavisazge pamoza ndi marombu gha ŵakupaturika wose pachanya pa jochero la golide paurongo pa chitengu-chaufumu cho; 4ndipo usi wa vyema, pamoza ndi marombu gha ŵakupaturika, ungukwera paurongo paku Chiuta, kutuwa ku janja la mungelo yo. 5Ndipo mungelo yo wanguto supa yo ya chema, wanguyizaza ndi moto wa pa jochero lo, ndipo wanguyipong'a pa charu: ndipo vinguŵapo vidiririzi, ndi chibumuzi, ndi malimphezi, ndi chiyeuyeu.

Mbata

6Ndipo ŵangelo ŵankhonde ndi ŵaŵi, wo ŵenga ndi mbata nkhonde ndi ziŵi, ŵangujirongoso kuti ŵambepo. 7Ndipo mungelo wachimoza wangukuŵa mbata yake, ndipo penga matarara ndi moto, vyakusazgikana ndi ndopa, vyo vinguwa pa charu: ndipo chigaŵa chachitatu cha charu chingocheka ndi chigaŵa chachitatu cha miti chingocheka ndi uteka wose uŵisi ungocheka.

8Ndipo mungelo wachiŵi wangukuŵa, ndipo chakukozgana ndi phiri likuru, lakukole moto, chingupong'eka mu nyanja: 9ndipo chigaŵa chachitatu cha nyanja chingusanduka ndopa: ndipo chingufwa chigaŵa chachitatu cha vyakulengeka vyamu nyanja, ndi chigaŵa chachitatu cha zingaraŵa chingwanangika.

10Ndipo wangukuŵa mungelo wachitatu, ndipo kutuwa kuchanya yinguwa nyenyezi yikuru, yakukole nge ndi limbuni, ndipo yinguwa pa chigaŵa chachitatu cha misinji, ndi pa visima vya maji. 11Ndipo zina la nyenyezi yo linguzumbulika Muŵaŵa: ndipo chigaŵa chachitatu cha maji chinguŵa chakuŵaŵa; ndipo ŵangufwa ŵanthu ŵanandi chifukwa cha maji gho, pakuti ghanguŵaŵiskika.

12Mungelo wachinayi wangukuŵa, ndipo chigaŵa chachitatu cha dazi chingukosoreka, ndi chachitatu cha mwezi, ndi chachitatu cha zinyenyezi; mwakuti chigaŵa chachitatu cha ukweru chingufipiskika, ndi chigaŵa chachitatu cha msana kuti chingupereka kuŵala kwake cha, ndipo chigaŵa chachitatu cha usiku nacho so kuti chingupereka ukweru cha.

13Ndingulereska, ndipo ndinguvwa nombo yakuwuluka mude mukati, yakuliya ndi mazu ghakuru, “Owe! Owe! Owe kwaku wo mbakuja pa charu, chifukwa cha mazu gha mbata zakujapo za ŵangelo ŵatatu wo ŵakhumbanga kukuŵa.”

Currently Selected:

Chivumbuzi 8: TongaMw

Highlight

Copy

Compare