Chivumbuzi 22

Kweni ŵeniwo pe mbakulembeka mu buku la umoyo la Mwana-mberere

1Ndipo wangundirongo msinji wa maji gha umoyo, wakulangaliya ulaka ndi galase, langa-langa, wo utuliya ku chitengu-chaufumu chaku Chiuta ndi cha Mwana-mberere, 2ndi mukati mu mseu wa msumba. Ndipo sirgha lino ndi sirgha liya la msinji penga muti wa umoyo, wo upasa vipasi vya mitundu chumi ndiyiŵi, ndi upasapasa mwezi ndi mwezi: mane ghake nagho ngakuchizgiya mitundu. 3Ndipo kuti chikaŵangapo so cha chakutembeka chose: kweni chitengu-chaufumu chaku Chiuta ndi cha Mwana-mberere chiŵenge mwenimo; ndipo ŵaŵanda ŵake ŵamteŵetiyenge; 4ndipo ŵawonenge chisku chake: zina lake liŵenge pa mphumi zawo. 5Ndipo usiku kuti ukaŵangapo so cha; ndipo ŵalivi kukavuka ukweru wa limbuni, chingana ngwa dazi; pakuti Mbuya Chiuta waŵaŵaliyenge; ndipo ŵausenge muyaya ndi muyaya.

Kuza kwaku Yesu

6Ndipo wangunena nane, “Mazu yagha ngamagomekezgeka ndi ghakuneneska; ndipo Mbuya Chiuta wa mizimu ya ŵamchimi watuma mungelo wake kuŵarongo ŵaŵanda ŵake vyenivyo vitenere kuŵapo ruŵi. 7Ndipo onani, ndituza ruŵi.”

Ngwakutumbikika yo wasungirizga mazu gha umchimi wa buku lenili.

8Ndipo ine nda Yohane ndinguvwa ndi ndinguwona vyenivi; ndipo ndati ndavwa ndi kuwona, ndinguwa pasi kulambiya paurongo pa marundi gha mungelo yo wangukamba vyenivi. 9Ndipo wali kwaku ine, “Awa, na! Ndine muŵanda munyako ndi so wa ŵabali ŵako ŵamchimi wo, ndi waku wo Wasungirizga mazu gha buku lenili. Mlambiye Chiuta.”

10Ndipo wangunena nane, “Ungazighiriyapo cha mazu gha umchimi wa buku lenili, pakuti nyengo yo ye pafupi. 11Mzira-urunji yo wachite so uzira-urunji: wawiyu yo waŵe so wawiyu: murunji yo wachitenge urunji: ndipo wakupaturika wajaririyenge so wakupaturika.”

12“Awonani, nthuza ruŵi; ndipo mphotu yangu nde nayo pamoza nane, kumpaska yose uli ndimo yiriri nchitu yake. 13Ine ndine Alfa ndi Omega, wakudanga ndi wakumariya yo, chandu ndi umari.”

14Mbakutumbikika wo ŵasuka minjirira yawo, viyo kuti ŵaŵenge ndi mtufu pa muti wo wa umoyo, ndi kuti pamalikomo ŵaserenge kuya mu msumba wo. 15Kubwaro kwe ŵagaru, ndi vyanusi, ndi ŵareŵi, ndi ŵambanda, ndi ŵakusopa-ngoza, ndi yose wakwanja ndi wakuchita utesi.

16“Ine nda Yesu ndatuma kwinu mungelo wangu kumsimikizgiyani vinthu ivi mu mipingu. Ine ndine nkhorozu ndi mbumba yaku Davidi, ndi thondu lakuŵara la mlenji.”

17Mzimu ndi Mwali wa nthengwa ŵatiti, “Zanga!” Ndipo mweniyo watuvwa wanene, “Zanga!” Ndipo mweniyo ngwanyota waze: yo ngwakukhumba waronde kwawezi maji gha umoyo.

Mazu ghakumariya

18Ine nda Yohane ndisimikizgiya kwaku yose yo watuvwa mazu gha umchimi wa buku lenili, asani munthu wakuskiyengeko ku mazu yagha, Chiuta wakuskiyengeko kwaku iyo videru vyo vyalembeka mu buku lenili, 19ndipo asani munthu watuzgengeko ku mazu gha buku la umchimi wenuwu, Chiuta watuzgengeko chigaŵa chake chaku muti wo wa umoyo, ndi chamu msumba wo wakupaturika, vinthu vyo vyalembeka mu buku lenili.

20Mweniyo wasimikizga vyenivi watiti, “Inya nthuza ruŵi.” Ameni. Zaninge, Ambuya Yesu.

21Wezi wo wa Ambuya Yesu eŵa ŵiye Wakupaturika wo. Ameni.

Currently Selected:

Chivumbuzi 22: TongaMw

Highlight

Copy

Compare