Maŵerengedu 34
34
Mphaka ya charu cha Kanani
1Ambuya angunena ndi Mosese, 2“Uŵalanguliye ŵaYisraele, kuti, Muchisere mu charu cha Kanani (ichi ncharu cho chikaŵiyanga imwe chihara, charu cha Kanani mo chilili chose), 3kuchiri ku malaŵi kutuwa ku bozwa la Zini mumphepete mwa Edomu, mphaka yinu kuchiri ku malaŵi yikaŵanga kutuliya ku umari wa Nyanja ya Mche#34.3 Nyanja ya Mche: ndi Dedi Si. ku vuma; 4mphaka yikazunguliyanga kukwere ku malaŵi kwa Akrabini, kwambukiya ku Zini, yamugota ku malaŵi kwa Kadeshe-barnea; yikarutiliyanga ku Hazaradara, mpaka ku Azamono; 5mphaka yikanyongokanga kutuwa ku Azamono mpaka ku msinji waku Egipiti, umari wake yamugota ku nyanja.
6“Kuchiri ku zambwe, mukaŵanga ndi Nyanja Yikuru#34.6 Nyanja Yikuru: ndiyo Nyanja ya Meditereniyani. ndi likumba lake; iyi ndiyu yikaŵanga mphaka yinu ku zambwe.
7“Mphaka yinu kuchiri ku nkhonde yikaŵanga iyi: kutuwa ku Nyanja Yikuru mukalembanga mzere mpaka ku phiri la Horo; 8kutuwa ku phiri Eloro mukalembanga mzere mpaka pa kusere pa likomo laku Hamati, mphaka yamugota pa Zabada; 9yikarutiliyanga mpaka ku Zifironi, umari wake yamugota pa Hazarenana; iyi yikaŵanga mphaka yinu ku nkhonde.
10“Mukalembanga mphaka yinu ku vuma kutuwa ku Hazarenana mpaka ku Shefama; 11mphaka yikasikanga kutuliya ku Shefuma mpaka ku Ribila kuchiri ku vuma kwa Aini; yikasikanga, kwachifika mumphepete mwa nyanja ya Kineroti ku vuma; 12mphaka yikasikiyanga ku Yordane, umari wake yamugota ku Nyanja ya Mche, ichi ndichu chikaŵanga charu chinu ndi mphaka zake zose zingirizge.”
13Mosese wangulanguliya ŵaYisraele, wanguti “Ichi ncharu cho mukaharanga ndi mphenduzga, cho Ambuya akhozga kuti chipaskike ku mafuku ghankhonde ndi ghanayi pamoza ndi fuku la nusu; 14chifukwa fuku la ŵina Rubene pa nyumba za auskeu ndi fuku la ŵina Gadi pa nyumba za auskeu pamoza ndi fuku la nusu laku Manase; ŵakuronde chihara; chawo; 15mafuku ghaŵi ndi fuku la nusu ŵakuronde chihara chawo kusirgha ku Yordane ku Yeriko kuchiri ku vuma, kumaturi gha lumwi.”
16Ambuya angunena ndi Mosese, 17“Yagha ndi mazina gha ŵanthu wo ŵakamugaŵiyaninga charu kuŵa chihara chinu: Eleazara mzukuru ndi Yoswa mwana waku Nuni. 18Ukatonga yumoza pa fuku le lose, kugaŵa charu kuŵa chihara. 19Mazina gha ŵanthu ndi yagha: Wa fuku laku Yuda, Kalebe mwana waku Yefune. 20Wa fuku la ŵina Simeoni, Sheumele mwana waku Amihudu. 21Wa ŵina Benjamini, Elidada mwana waku Chisilono. 22Ŵa ŵina Dani mura, ndi Buki mwana waku Jogoli. 23Wa ŵina Yosefe: fuku la ŵina Manase mura, ndi Hemele mwana waku Efodo. 24Ndipo wa fuku la ŵina Efraimu, ndi Kemele mwana waku Shifitana. 25Ŵa ŵina Zebuluni, Elizafana mwana waku Parnaka. 26Ŵa ŵina Isakara, ndi Palatiele mwana waku Azana. 27Ŵa ŵina Ashere, ndi Ahihudu mwana waku Shelomi. 28Ŵa ŵina Naftali, ndi Pedahele mwana waku Amihudu. 29Yaŵa ndiwo ŵanthu wo Ambuya angulangula kugaŵiya charu ŵaYisraele mu Kanani.”
Currently Selected:
Maŵerengedu 34: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
