Maŵerengedu 3
3
Nchitu ya ŵaLevi
1Iyi ndi migonezi yaku Aroni ndi Mosese penipo Ambuya angurongoro ndi Mosese mu phiri la Sinai. 2Yagha ndi mazina gha ŵana ŵanthurumi ŵaku Aroni: Nadabu waumwali, Abihu, Eliazara ndi Itamara. 3Yagha ndi mazina gha ŵana ŵanthurumi ŵaku Aroni, ŵazukuku ŵakupakika, wo wanguŵapatuliya kuchita milimu ya uzukuru. 4Kweni Nadabu ndi Abihu ŵangufwa paurongo pa Ambuya penipo ŵangupereka moto ŵambura kulangulika paurongo pa Ambuya mu bozwa la Sinai, ndipo iwo ŵengavi ŵana. Sono Eleazara ndi Itamara ŵanguchita milimu ya uzukuru mu mazaŵa ghaku Aroni uskeu.
5Ambuya angurongoro ndi Mosese, kuti, 6“Uzi nalo pafupi fuko laku Levi, ndipo ŵarongo kwaku Aroni mzukuru, alinga kuti ŵamutataliyenge. 7Wachitenge mwalangulu lake ndi kuteŵete mpingu wose paurongo pa hema lakuwunganamo, mo ŵateŵete mu chihema chakupaturika; 8ndipo ŵakasunganga viyaŵi vyose vya hema lakuwunganamo, ndi vyakulangulikiya ŵaYisraele pakutataliya chihema chakupaturika. 9Ndipo ukaperekanga ŵaLevi kwaku Aroni ndiku ŵana ŵake; mbakuperekeka mu manja ghawo kutuliya mu ŵaYisraele. 10Mika, Aroni ndi ŵana ŵake, kuti ŵasungenge uteŵeti wawo wa uzukuru, kweni asani munthu wamwenga wandere kufupi, wakabayikanga.”
11Ambuya angunena ndi Mosese, 12“Awonani, ndaŵatuzgamo ŵaLevi mukati mu ŵaYisraele mu malo gha mwana yose yo wabanuwa chibali mu ŵaYisraele. ŴaLevi ŵakaŵanga ŵangu, 13pakuti wose ŵa umwali mbangu; pa zuŵa lo ndingukosole ŵa umwali mu charu cha Egipiti, ndingujipatuliya, kuŵa ŵangu wose ŵa umwali mu Yisraele, wose ŵa ŵanthu ndi ŵa vinyama; ŵakaŵanga ŵangu; ine ndine Ambuya.”
14Ndipo Ambuya angunena ndi Mosese mu bozwa la Sinai, 15“Ŵerenga ŵina Levi pa nyumba za uskeu mu mbumba zawo; uŵaŵerenge munthurumi yose kwamba wa mwezi umoza kurata pachanya.” 16Viyo Mosese wanguŵaŵerenga pakuvwiya mazu gha Ambuya, mo angulanguliya. 17Yagha ghenga mazina gha ŵana ŵanthurumi ŵaku Levi: Gershoni, Kahati ndi Merari. 18Ndipo yagha ndi mazina gha ŵana ŵaku Gershoni, mu mbumba zawo: lebini ndi Shumeyi. 19Ŵana ŵaku Kohati mu mbumba zawo: Amramu, Izihara, Hebroni ndi Uziele. 20Ndipo ŵana ŵaku Merari mu mbumba zawo: Mahili ndi Mushi. Izi ndi mbumba za ŵina Levi, Mu nyumba za ŵa uskeu.
21Mwaku Gershoni mwenga mbumba yaku Libini ndi mbumba yaku Shimei, izi zenga mbumba za ŵina Gershoni. 22Wo ŵanguŵerengeka ŵaku wo ŵanthurumi wose kwamba ŵa mwezi umoza kurata pachanya ŵenga vikwi vinkhonde ndi viŵi pachanya machumi pe chumi ghankhonde (7,500). 23Mbumba za ŵina Gershoni zikagoŵanga ku msana kwa chihema chakupaturika kuchiri kuzambwe, 24pamoza ndi Eliasafa, mwana waku Laele nge ndi mura wa nyumba ya uskeu wa ŵina Gershoni. 25Ndipo mlimu wa ŵina Gershoni mu Hema lakuwanganamo ukaŵanga wa chihema chakupaturika, hema ndi chivwinkhu chake ndi saru yakuchinga pa khomo la hema lakuwunganamo, 26saru zakuchinga za luluwa ndi yakuchinga pa khomo la luluwa lo lizingilizga chihema chakuwungamamo ndi jochero la sembe, ndi vingwe vyake; ndi nchitu zose sakusungiya ivi.
27Mwa ŵina Kohati mwenga mbumba ya ŵina Amramu, mbumba ya ŵina Izihara, mbumba ya ŵina Hebroni ndi mbumba ya ŵina Uziele; izi ndi mbumba za ŵina Kohati. 28Kwakuyana ndi unandi wa ŵanthurumi wose, kwamba ŵa msinkhu wa mwezi umoza ndi kuruska po, ŵenga vikwi vinkhonde ndi vitatu pachanya machumi pe chumi ndi limoza (8,600) ŵakutufuliya mlimu yamu malo ghakupaturika. 29Mbumba za ŵina Kohati zikagoŵanga kuchiriku malaŵi kwa chihema chakuwunganamo, 30mura wa nyumba ya auskeu wa mbumba za ŵina Kohati ndi Elizafani mwana waku Uziele. 31Ndipo mlimu wawo ukaŵanga wakutufuliya bokosi la phanganu, gome, chikole-nyali, majochero gha sembe, ndi viyaŵi vyamu malo ghakupaturika vyenivyo ŵazukuru ŵatakataka navyo ndi saru yakuchinga; ndi nchitu zose zakusungiya iri. 32Ndipo Eleazara mwana waku Aroni mzukuru ndiyo wakaŵanga mura kutufuliya ŵarongozgi ŵa ŵina Levi, kuŵalereska wo ŵatakataka milimu yamu malo ghakupaturika.
33Mwa ŵina Merari mwenga mbumba ya ŵina Mali ndi mbumba ya ŵina Mushi: izi ndi mbumba za ku Merari. 34Unandi wa ŵanthurumi wose kwamba wa msinkhu wa mwezi umoza kurazga pachanya ŵenga vikwi vinkhonde ndi chimoza pachanya machumi pe chumi ghaŵi (6,200). 35Ndipo mura wa nyumba ya auskeu ya mbumba za ŵina Merari wenga Zeruele mwana waku Abinaele, yaŵa ŵakagoŵanga kuchiri ku khonde kwa chihema chakuwunganamo. 36Ndipo ŵana ŵaku Merari ŵakatufuliyanga ndi kutakataka mlimu wa mizati ya chihema chakuwunganamo, migolo yake, mizati ya pade, ndi vyakujinthapo mizati, ndi vyakuteŵete vyake vyose; mlimu yose ya pakuvyo. 37Ndipo so mizati ya bwalo lakuzingilizga vyakumikapo vyake ndi vichili ndi vingwe vyake. 38Ndipo wo ŵakagoŵanga ku maso kwa chihema kuchiri ku vuma pa maso pa hema lakuwunganamo kumatuli gha dazi, ndi Mosese ndi Aroni ndi ŵana ŵake, kutufuliya chisopa mu malo ghakupaturika chose chakukhumbikwa kwachichitikiya mu ŵaYisraele; ndipo munthu yose wanderenge kufupi wabayike. 39Unandi wa ŵaLevi wo Mosese ndi Aroni ŵanguŵerenga mwa langulu la Ambuya; mbumba ndi mbumba, ŵanthurumi wose kwamba pa mwezi umoza kurata pachanya ŵenga vikwi machumi ghaŵi ndi viŵi (22,000).
40Ndipo Ambuya anguti kwaku Mosese, “Uŵerenge ŵanthurumi wose ŵa umwali wa ŵaYisraele, kwamba wa mwezi umoza kurata pachanya, uziŵe zina laku we yose. 41Ndine Ambuya, ndipo nditore ŵina Levi kuŵa mu malo gha ŵaumwali wose wa ŵaYisraele, unditore ng'ombe za ŵina Levi kuŵa mu malo gha ng'ombe zose za umwali mu miskambu ya ŵaYisraele.” 42Viyo Mosese wanguŵerenga ŵaumwali wose mu Yisraele, nge ndimo Ambuya angumulanguliya. 43Ndipo ŵanthurumi wose ŵaumwali ŵakuziŵika mazina ghawo, kwamba wa mwezi umoza kurazga pachanya ŵenga vikwi machumi ghaŵi ndi viŵi pachanya machumi pe chumi ghaŵi ndi machumi nkhonde ndi ghaŵi ndi ŵatatu (22,273). 44Ambuya angukamba ndi Mosese, 45“Uto ŵina Levi mu malo gha ŵana wose ŵaumwali mu ŵaYisraele, ng'ombe za ŵina Levi mu malo mwa ng'ombe zawo; ndipo ŵina Levi ŵakaŵanga ŵangu: Ndine Ambuya. 46Ndipo pakuwomboleka kwa ŵaumwali ŵa ŵaYisraele wo machumi pe chumi ghaŵi pachanya machumi ghankhonde ndi ghaŵi ndi ŵatatu (273) wo ŵajumpha unandi wa ŵaLevi 47ukarondanga mashekelo ghankhonde pa munthu yumoza; gho ndi mashekelo ghamu malo ghakupaturika, shekelo limoza ndi magera machumi ghaŵi, 48ndipo uperekenge ndrama kwaku Aroni ndi ŵana ŵake zo ŵaumwali ŵakujumpha ŵakawombolekiyanga nazo.” 49Ndipo Mosese wanguto ndrama za chiwombo chaku wo ŵanguruskako unandi kwaku wo ŵanguwomboleka ndi ŵaLevi; 50wanguronda ku ŵana ŵaumwali ŵa ŵaYisraele mashekelo chikwi chimoza pachanya machumi pe chumi ghatatu ndi machumi ghankhonde ndi limoza ndi ghankhonde (1,365), mashekelo ghamu malo ghakupaturika; 51Mosese wangupereka ndrama za chiwombo kwaku Aroni ndi ŵana ŵake, kwakuyana ndi mazu gha Ambuya, nge ndimo Ambuya angumulanguliya.
Currently Selected:
Maŵerengedu 3: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
