Maŵerengedu 12

Miriamu ndi Aroni wayukiya Mosese

1Ndipo Miriamu ndi Aroni ŵangurongoro kumikana ndi Mosese chifukwa cha muwoli wake, pakuti wanguto munthukazi mu Etiopia. 2Ŵanguti, “Kumbi nadi Ambuya arongorore mwaku Mosese pe? Kuti arongorore so ndi mwaku ifwe cha?” Ambuya anguvwa ichi. 3Mosese wenga wakuzika kwakuruska ŵanthu wose mu charu chapasi. 4Ndipo mwa mabuchibuchi Ambuya angurongoro kwaku Mosese, Aroni ndi Miriamu, anguti, “Imwe mwa ŵatatu, mutuwe, muze ku hema lakuwunganamo.” Ndipo wose ŵatatu ŵangutuliyako. 5Ndipo Ambuya angusikiya mu chimtambo, anguma pa khomo la hema, ndipo angudana Aroni ndi Miriamu ndipo wo ŵaŵi ŵangutuliyako. 6Ambuya anguti, “Tegherezgani mazu ghangu: Asani mwe mchimi mukati mwinu, ine Ambuya nditumuziŵiska kuti ndiripo mu chiwona, ndirongoro nayo mu loto. 7Kweni mteŵeti wangu Mosese kuti we viyo cha; vyose vyangu vyemu manja ghake. 8Ndirongoro nayo maso ndi maso, ndi mazu ghakuvwika, ghambura kubisika; iyo wawonanga kawonekedu ka Ambuya. Sono chifukwa nchine mwengavi chofyu kumikana ndi mteŵeti wangu Mosese?”

9Viyo ukari wa Ambuya ungukole paku iwo, ndipo Ambuya angutuwapo; 10po chimtambo chingukungunukapo pa hema, ŵanguwona, Miriamu wanguŵa wa makhati, tu; nge ndi nyankhuŵinda. Ndipo Aroni pakulereska Miriamu, wanguwona, kuti ngwa makhati. 11Sono Aroni wanguti kwaku Mosese, “Owe, mbuyangu, mureke kutilanga chifukwa chakuti tachita ubereŵeza ndi tananga. 12Wareke kuŵa ulaka ngwa kufwa, mweniyo kuchiri kunyake kwa luŵavu kwarghika wachituwa mu chibali cha nyina.” 13Sono Mosese wanguriya ku Ambuya kuti, “Muchizgeni, Chiuta mwe, nditukuŵeyereni.” 14Kweni Ambuya anguti kwaku Mosese, “Asani wiske wangumufunyiya mata pa maso, kumbi kuti wangaŵa ndi soni mazuŵa ghankhonde ndi ghaŵi cha? Watuzgike ndi kuja kubwalo kwa ugoŵi mazuŵa ghankhonde ndi ghaŵi, pavuli paku gho walondereke so.” 15Viyo Miriamu wangujaririkiya kubwalo kwa ugoŵi mazuŵa ghankhonde ndi ghaŵi; ndipo ŵanthu kuti ŵangwenda so lwendo cha mpaka penipo Miriamu wangulondereka so. 16Ndipo pavuli pake ŵanthu ŵangusoka pa Hazaroto, ŵangugoŵa mu bozwa la parana.

Currently Selected:

Maŵerengedu 12: TongaMw

Highlight

Copy

Compare