Maŵerengedu 11

Dandawulu la ŵaYisraele

1Ndipo Ambuya anguvwa po ŵanthu ŵadinginikanga gha soka lawo; ndipo pakuvwa, ukari wawo ungukole, moto wa Ambuya ungunyeka mu ugoŵi wawo, kupirizga wo ŵenga mu mphepete mwa ugoŵi. 2Sono ŵanthu ŵanguliriya Mosese; ndipo Mosese wanguromba ku Ambuya, moto unguzimwa. 3Viyo ŵangudana zina la malo gho Tabera, chifukwa moto wa Ambuya ungunyeka mukati mwawo. 4Ndipo mzinda wa ŵanthu ŵanyake ŵanguchita chirghoko; ndipo ŵaYisraele nawo ŵanguliya, ŵanguti, “Kumbi njani wakatipaskanga nyama kuti tirghe! 5Tikumbuka somba zo targhanga mu Egipiti, ndi vimweru, ndi vinkhaka, ndi sabola, ndi Hanyezi, ndi garalikikwa wanangwa; 6kweni sono nthazi zidu zamara, palivi so kanyake pa maso pidu kweni Mana pe.” 7Yo Mana wenga ulaka ndi mbuto ya maŵe, kawonekedu kake ulaka nkhamwa ka mikanda. 8Ŵanthu ŵangwenda uku ndi uku kughayora ndi kughapera pa mphe pamwenga kughapuwa mu thuli, ndi kughabika mu mimphika nge ndi sima, ndipo kawonekedu kake kenga nge nkhachiŵande ka mafuta. 9Lichiŵapo dungwi pa ugoŵi ndi usiku, Mana nayo wanguwapo. 10Ndipo Mosese wanguvwa ŵanthu ŵachiliya kosekose mu mbumba zawo, munthu yose pa khomo pa hema lake; penipo ukari wa Ambuya ugukole ukongwa, ndipo Mosese nayo wangukala. 11Sono Mosese wangunena ndi Ambuya, “Nchifukwa uli mwamusuzga muŵanda winu? Ndarekiyanji kusaniya wezi mu maso ghinu, kuti mwayilika katundu wa ŵanthu wose yaŵa paku ine? 12Kumbi ndikuŵabala ndine ŵanthu wose yaŵa? Kumbi wose mbangu pakuti mukambe kwaku ine kuti, Uŵabape nge ndimo mlezi wabapiya litema lakonkha, kuti ndirute nawo ku charu cho mungurapiya auskeu? 13Kumbi nyama ndiyitonge pani yakupaska ŵanthu wose yaŵa? Pakuti ŵaliriya ine kuti, ‘Tipaske nyama tirghenge?’ 14Ine ndija kuti ndiziŵa kuŵanyamuwa ŵanthu wose yaŵa cha, katundu uyo wandizitiska ukongwa. 15Ndipo asani muchitenge nani viyo, iku ndibayeni ŵaka, asani mutindanja, kuti ndireke kuwona soka langu.” 16Ndipo Ambuya anguti kwaku Mosese, “Undidaniye ŵanthurumi machumi ghankhonde ndi ghaŵi (70) kutuwa mu ŵara ŵaYisraele, wo utiŵaziŵa kuti mbarongozgi ŵa mafuko; uze nawo ku hema lakuwunganamo, kuti ŵame pamoza nawe. 17Nkhasikanga kwazirongoro nawe penipo; ndipo nkhatongako mzimu wo we mwako ndi kuwuŵika mwaku iwo; ndipo ŵakanyamuwanga uzitu wa ŵanthu pamoza nawe, alinga kuti ureke kuwunyamuwa wija. 18Ndipo uŵanene ŵanthu kuti, ‘Mujipatuwe chifukwa cha mawa, ndipo mukarghanga nyama, pakuti Ambuya avwa kuliya kwinu kuti, “Kumbi njani wakatipaskanga nyama kuti tirghe? Pakuti kwenga kwamampha kwaku ifwe mu Egipiti.” Chifukwa ichi Ambuya akupaskeninge nyama, ndipo mukarghanga. 19Kuti mukarghanga zuŵa limoza pe cha, pamwenga mazuŵa ghaŵi, pamwenga ghankhonde, nanga ndi mazuŵa chumi, nanga ndi mazuŵa machumi ghaŵi pe cha. 20Kweni mwezi uzirima mpaka po yatuliya mu phunu zinu ndi yamutinkhani, chifukwa mwayeya Ambuya wo ŵe mukati mwinu, ndipo mwaliya pa maso pawo, kuti, “Chifukwa cho tingutuliya mu Egipiti nchine?” ’ ” 21Kweni Mosese wanguti, “Ŵanthu wo ine ndija nawo vikwi machumi pe chumi ghankhonde ndi limoza (600,000) ŵakwenda pasi; ndipo imwe mwenena kuti, ‘Ndikaŵapaskanga nyama mwezi uzirima!’ 22Kumbi miskambu ya ng'ombe ndi ya mberere uiŵabayikiyenge kuŵagutiska? Pamwenga kuti somba zose zamu nyanja ziŵawunjikiyenge pamoza, kuti ŵakwane nazo?” 23Ndipo Ambuya anguti kwaku Mosese, “Kumbi janja la Ambuya ndakufupiskika? Ukawonanga sono vinu mazu ghangu ghakakufiskikiyanga pamwenga awa.” 24Viyo Mosese wangutuwa ndi kuŵakambiya ŵanthu mazu gha Ambuya; wangudana ŵanthurumi machumi ghankhonde ndi ghaŵi ŵana ŵa ŵanthu, wanguŵamika kuzingirizga hema. 25Ndipo Ambuya angusikiya mu mtambo kurongoro nayo, ndipo angutoko mzimu wo wenga mukati mwake ndi kuwupaska ku ŵara wo machumi ghankhonde ndi ghaŵi (70) penipo mzimu unguja paku iwo, ŵanguchima. Kweni pavuli kuti ŵanguchima so cha.

26Sono mu ugoŵi munguja ŵanthu ŵaŵi, yumoza wenga Eledada, munyake wenga Medada, ndipo mzimu unguja paku wo; iwo nawo ŵenga ŵamoza ndi wo ŵangulembeka kweni kuti ŵangutuliyako cha kuruta ku hema, ŵanguchima mu ugoŵi. 27Ndipo jaha linyake linguchimbiya linguchinene Mosese kuti, “Eledada ndi Medada ŵachima muugoŵi.” 28Ndipo Yoswa mwana waku Nuni, mteŵeti yo Mosese wangumusankha wangwamuka wanguti, “Mbuyangu Mosese, uŵakanizge.” 29Kweni Mosese wanguti kwaku iyo, “Kumbi wendi sanji chifukwa chaku ine? Khumbu ndakuti mphanyi ŵanthu ŵa Ambuya wose ŵenga ŵamchimi, ndi kuti Ambuya mphanyi anguŵapaska mzimu wawo.” 30Ndipo Mosese wanguruta ku ugoŵi, iyo ndi ŵara ŵa ŵaYisraele. 31Ndipo kungutuwa mphepo ku Ambuya, yo yinguza ndi tumbuŵi kutuliya ku nyanja, ndi kutuwiska pa ugoŵi, pa ulendo wa zuŵa limoza kuchiri kuno ndi ulendo wa zuŵa limoza kuchiri kunyake, kwakuzunguliya ugoŵi, ito tunguwa ndi kuwunjikika mu mulu ya mikono yiŵi ku vunikiriya charu. 32Ndipo ŵanthu ŵangwenda zuŵa liya lose, ndi usiku uwa wose, ndi zuŵa lose la pavuli pake, kuti ŵayore tumbuŵi; yo wanguyora tumanavi wanguyora masokora chumi; ndipo ŵangutunika kuzunguliaya ugoŵi wose. 33Penipo nyama yenga yeche mu milomo yawo, ŵenga ŵandayitafunye, ukari wa Ambuya ungukole pa ŵanthu, ndipo anguŵapuma ndi nthenda yakofya ukongwa. 34Chifukwa cho ŵangudana zina la malo gha kuti ndi Kibiroto-hatava, chifukwa penipa ŵanguwundiyapo ŵanthu wo ŵenga ndi mbunu. 35Pavuli ŵanthu ŵangusoka pa Kibiroto-hatava ŵangufika pa Hazaroto, ndipo ŵanguja pa Hazaroto.

Currently Selected:

Maŵerengedu 11: TongaMw

Highlight

Copy

Compare