ŴaLevi 4
4
Mipasku yapa ulakwi wa mzukuru
1Ndipo Ambuya anguti kwaku Mosese, 2“Ukambe ku ŵa Yisraele kuti asani munthu wachita chinthu che chose cho Ambuya alangula kuti chireke kuchitika, kweni watichichita kwadara cha, 3asani ndi mzukuru wakupakika mafuta, mweniyo walakwa pakuti watole vyo vyakususkika pa ŵanthu, iku wapereke ku Ambuya kankhuzi kampupuka kambura kalema chifukwa chakulakwa kwake kuŵa mpasku wapa ulakwi. 4Wakazanga ndi kankhuzi ku khomo la hema lakuwunganamo paurongo pa Ambuya, ndi kuŵika janja lake pa mutu wa kankhuzi ko, ndi kukabaya paurongo pa Ambuya. 5Ndipo mzukuru wakupakika wakatongapo ndopa zinyake za kankhuzi kuza nazo ku hema lakuwunganamo; 6ndipo mzukuru wakabizganga munwi mu ndopa ndi kuwazgiya ndopa zinyake kankhonde ndi kaŵi paurongo pa Ambuya kunthazi kwachivwinkhu cha chipinda chakupaturika. 7Ndipo mzukuru wakaŵikanga ndopa zinyake pa masengwe gha jochero la vyachema vyakusunkhizga paurongo pa Ambuya lo le mu hema lakuwunganamo, ndipo ndopa zakujapo za kankhuzi zo, wakadiranga pasina pa jochero la sembe yakocha lo le pa khomo la hema lakuwunganamo. 8Ndipo wakatuzgangamo mafuta ghose mu kankhuzi kakupereka pa chifukwa cha ulakwi, mafuta gho ghavimba matumbo ndi mafuta gho ghe pa matumbo, 9ndi sana ziŵi pamoza ndi mafuta gho ghe paku zo mu chiunu ndi pa khumano la mphafwa lo, wakatuzgangamo pamoza ndi sana zo 10(watuzge viyo nge ndi mu ng'ombe ya sembe ya mpasku wa chimangu), mzukuru wakawochanga vyo pa jochero la sembe yakocha. 11Kweni chikopa cha nkhuzi ndi nyama yake yose pamoza ndi mutu wake, marundi ghake, matumbo ghake, ndi mavi ghake, 12nkhuzi yose wakapinganga kiyituzgiya kubwaro kwa ugoŵi, kuya nayo pa malo ghakutowa, penipo padirika choto, yikawochekanga pa moto wa nkhuni po wadira choto ndipo yochekenge penipo.
Mipasku yapa ulakwi wa ŵaYisraele
13“Asani mpingu wose wa ŵaYisraele ulakwa kwambura kuchitiya dara ndipo chilakwa cho chabisika ku maso gha ungano, kuti ŵachitapo chose cho Ambuya akulangula kuti ŵareke kuchichita, ndipo kwaziŵakwa kuti ŵachichita. 14Po chilakwa cho ŵachita chaziŵikwa, ungano ukaperekanga kankhuzi kampupuka kuŵa sembe yapa ulakwi. Ndi kuza nayo paurongo pa hema lakuwunganamo; 15ndipo ŵara ŵa mpingu ŵakaŵikanga manja ghawo pa mutu wa kankhuzi ko paurongo pa Ambuya. 16Sono mzukuru wakupakika wakazanga ndi ndopa zinyake za kankhuzi ku hema lakuwunganamo. 17Ndipo mzukuru wakabizganga munwi wake mu ndopa ndi kuziwazga kankhonde ndi kaŵi paurongo pa Ambuya kunthazi kwa chisaru chakuchinga. 18Ndipo wakaŵikanga ndopa zo zinyake pa masengwe gha jochero lo le mu hema lakuwunganamo paurongo pa Ambuya, ndipo ndopa zakujapo wakadiranga pasi pasina la jochero la mpasku wakocha lo le pa khomo la hema lakuwunganamo. 19Ndipo mafuta ghake ghose gho wakatonga kwaku yo wakaghawochanga pa jochero. 20Viyo ndimu wakachitiyanga ndi nkhuzi; nge ndimo wanguchitiya ndi nkhuzi ya mpasku wapa ulakwi, viyo ndimu wakachitiyanga ndi uwu, ndipo mzukuru wakapepeskiyanga iwo, ndipo ŵakagowokelekiyanga. 21Wakatoliyanga kankhuzi kubwaro kwa ugoŵi ndi kukawocha uli ndimo wanguwoche nkhuzi yakudanga, ndi mpasku wapa ulakwi wa mpingu.
22“Po mweruzgi walakwa, kuchita kwambura kuziŵa che chose cha vinthu vyo Ambuya Chiuta wake wangulangula, kuti wareke kuchita ndipo wachichita; 23asani ulakwi weniwo wachita waziŵikwa ndi iyo wakazanga ndi mbuzi yinthurumi yambura kalema kuŵa mpasku wake wapa ulakwi. 24Wakaŵikanga janja lake pa mutu wa mbuzi, ndi kuyibaya mu malo ghenigho ŵabayiya mpasku wakocha paurongo pa Ambuya, ndi mpasku wapa ulakwi. 25Sono mzukuru wakatonga ndopa zinyake za mpasku wapa ulakwi ndi munwi wake ndi kuziŵika pa masengwe gha jochero la mpasku wakocha. 26Ndipo mafuta ghake ghose wakawochanga pa jochero uli ndi mafuta gha mpasku wa chimangu; Viyo mzukuru wakamupepeskiyanga ulakwi wake, ndipo wakagowokelekiyanga.
27“Asani yumoza wa ŵanthu bweka walakwa kwambura kuziŵa pakuchita che chose cho Ambuya angulangula kuchita cha, ndipo iyo wachichita, 28penipo ulakwi wo wachita waziŵikwa kwaku iyo, wakazanga ndi mbuzi yinthukazi yambura kalema chifukwa cha ulakwi wake wo wachita. 29Ndipo wakaŵikanga janja lake pa mutu paku yo, ndi kuyibaya kuŵa mpasku wapa ulakwi mu malo gha mpasku wakocha. 30Ndipo mzukuru wakatonga ndopa zinyake za mbuzi ndi munwi wake ndi kuziŵika pa masengwe gha jochero la mpasku wakocha, ndi kudira ndopa zose zakujapo pasina pa jochero. 31Mafuta ghake wakatuzgangamo uli ndimo mafuta ghatuzgikiyamo mu mpasku wa vyachimangu ndipo mzukuru wakawochanga gho pa jochero, kuŵa fungu lakukondweska Ambuya. Mzukuru wakaŵeyeriyanga iyo ndipo wakagowokelekiyanga.
32“Asani wakazanga ndi mwana wa mberere kuŵa mpasku wake, wakazanga ndi kanthukazi, kambura kalema. 33Ndi kuŵika janja lake pa mutu pa kamberere ka mpasku wapa ulakwi, ndi kukabayiya mu malo ghenigho ŵabayiyapo mpasku wakocha. 34Sono mzukuru wakatonga ndopa zinyake za mpasku wapa ulakwi ndi munwi wake ndi kuziŵika pa masengwe gha jochero la mpasku wakocha, ndi kudira ndopa zake zakumapo pasina pa jochero. 35Ndipo mafuta ghake watuzgengemo uli ndimo mafuta gha mwana mberere ghatuzgikiyamo mu mpasku wa chimangu. Ndipo mzukuru wakawochanga gho pa jochero pachanya pa mpasku wapa moto ku Ambuya. Viyo mzukuru wakamuŵeyeriyanga iyo chifukwa cha ulakwi wo wachita, ndipo wakagowokelekiyanga.”
Currently Selected:
ŴaLevi 4: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
