Chitenje 2
2
Yerusalemu wazingizgika ndi nkhondo nja yituŵasuzga, muzi upasuka
1Ambuya mu ukari wawo ŵapong'a ŵanthu ŵaku Zioni mu mdima!
Apong'a, kutuwa kuchanyakuza pa charu chapasi,
kunozga kwaku Yisraele;
akumbuka cha chitengo cha phazi lawo
mu zuŵa la ukari wawo.
2Ambuya abwanganduwa kwambura lisungu
mizi yose yaku Yakobe;
mu ukari wawo abwanganduliya pasi
malinga gha misumba, yaku Yuda;
asiskiya pasi mu muyuyu ufumu ndi weruzgi wake.
3Adumuliya pasi mu kukara kwawo kwakofya
nthazi zose za ŵaYisraele;
awezgako kwaku wo janja lawo lamarghe
mu maso gha ŵakupindikana nawo;
awocha uli ndi moto wakukole mwaku Yakobe,
kocha kuzunguliya kose.
4Atweŵa uta wawo uli ngwamawongo,
ndi janja lawo lamarghe nge ndi murwani;
ndi abaya ŵanthu wose wo tithamiya
mu ŵankhondo ŵamu Zioni;
apunguwa ukari wawo uli ndi moto.
5Ambuya asanduka nge mbakupindikana,
abwanganduwa Yisraele;
abwanganduwa nyumba zake zose za ufumu,
malinga ghake ghose apasuwa,
ndi andaniska kutenje ndi kuliya
mu charu chaku Yuda.
6Abwanganduliya pasi msasa wakenge ngwa mu munda,
abwanganduwa malo gha madghera gha kutemeka;
Ambuya akanizga madghera ghakutemeka ndi sabata mu Zioni,
ndipo mu kukara kwawo kwakofya ayuyuwa karonga ndi mzukuru.
7Ambuya ayeya chigaŵa chawo cha sembe,
apata malo ghawo ghakupaturika;
apereka vimati vya nyumba zake za ufumu mu janja la wakupindikana;
kuliya kukuru kunguchitika mu nyumba ya Ambuya,
nge mpha zuŵa la dghera lakutemeka.
8Ambuya angukhozga kubwanganduwa linga la msumba waku Zioni;
angulipima ndi chingwe,
ŵengavi kuwezga janja lawo kukubwangandu wa;
anguliriska chimbumila ndi chimati,
kusuzgikiya pamoza.
9Malikomo ghake ghawa pasi,
abwanganduwa ndi kuswa mipingirizgu yake;
karonga wake ndi ŵana ŵa karonga ŵemu mitundu yinyake,
dangu likumara,
ndipo ŵamchimi ŵake kuti ŵaronde
chakuwona cha ku Ambuya.
10Ŵaraŵara ŵamu msumba waku Zioni,
ŵateka pasi chisisi;
ŵajidiriya fuvu pa mitu yawo ndi ŵavwara chigudulu;
ŵamwali ŵaku Yerusalemu ŵakotamiya pasi mitu yawo.
11Maso ghangu ghajaliya kuliya pe;
mzimu wangu usuzgika;
mtima wangu upungulikiya mu chitima
chifukwa cha kubwangandulika kwa ŵanthu ŵangu,
chifukwa malitema ndi ŵana ŵalakatuka, mu miseu ya msumba wo.
12Ŵaliriya ku anyinawo,
“Chiŵande ndi vinyo vye pani?”
Ŵachilakatuka uli mbanthu ŵakulasika mu miseu ya msumba,
penipo umoyo wawo udikiya
pa chifuŵa cha anyinawo.
13Ndingakukambiya kane,
ndikweruzgiye pa kanthu uli,
mwa ŵanthu ŵaku Yerusalemu?
Ndikakulinganizganga ku kanthu uli,
alinga kuti ndikusangaruske, ŵanthu ŵangu ŵamu Zioni?
Chifukwa usani wakubwangandika kwako wenge ndi nyanja;
njani wangaziŵa kukuwerezgamo?
14Ŵamachimi ŵako ŵakuwone iwe
vyakuwona vyakupusika ndi vitesi;
ŵalivi kuvumbuwa uheni wako,
alinga kuti ŵawezge umampha wako,
kweni ŵakuwone iwe vyakuwona vyakupusika
ndi vyakukurandizga.
15Wose ŵakwenda mu nthowa
ŵatumba manja paku iwe;
ŵajuma ndi kupukung'a mitu yawo,
pa msumba wa Yerusalemu;
“Kumbi uwu ndi msumba weniwo wadanikanga
kutowa kwakufikapo,
kukondwa kwa charu chose chapasi?”
16Ŵakupindikana ŵako wose ŵakuyukiya,
ŵajuma ŵake kechuwa minyu ghawo,
ŵabangula: “Tamubwanganduwa!
Oho, zuŵa ili ndilo tanwekanga;
sono te nalo; titiliwona!”
17Ambuya achita cho angulongoso,
afiska kufinga kwawo,
uli ndimo anguteme kale ukongwa,
abwanganduliya pasi kwambura lisungu;
aŵakondweska ŵakupindikana ŵako,
ndipo akuzga nthazi ya ŵarwani ŵinu.
18Bongo ukongwa ku Ambuya!
Msumba waku Zioni!
Masozi ghajirimiye pasi nge ndi mweza
msana ndi usiku!
Ungajipumuzganga cha,
maso ghako ghangalekezganga cha!
19Yuka bongonga ndi usiku,
pakwamba kwa chitulu!
Dira mtima wako uli ndi maji
paurongo pa Ambuya!
Soske kwawo manja ghako
chifukwa cha maumoyo gha ŵana ŵako
ŵeniwo ŵalakatuka chifukwa cha nja
pa kwamba kwa gurwi yose.
20Awonani Ambuya ndipo alereskani!
Ndiyani yo mwachitiya ichi?
Kumbi nkhwamampha kuti ŵanthukazi ŵarghenge ŵana ŵawo,
ŵana ŵeniwo ŵanguŵaphwere?
Kumbi nkhwamampha kuti mzukuru ndi mchimi ŵabayikenge viyo,
mu malo ghakupaturika gha Ambuya?
21Mu fuvu la mu ŵagurwi
mwagona ŵaŵisi ndi ŵakukota;
ŵamwali ŵangu ndi ŵanyamata ŵangu
ŵabayika ndi lipanga;
mu zuŵa la ukari winu mwaŵabaya,
kubaya kwambura lisungu.
22Mungudana ulaka mpha zuŵa ladghera lakutemeka,
ŵakundofya zingirizgi;
ndipo pa zuŵa la ukari la Ambuya
pengavi wakuthaŵa pamwenga wakujapo wamoyo;
ŵeniwo ndingupakata ndi kuŵalera
ŵakupindikana ŵangu ŵaŵamara wose.
Currently Selected:
Chitenje 2: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
