Yoswa 5

Ŵanthu ŵachinjika ndi ŵachita phaska

1Ŵanguti ŵavwa ŵakaronga ŵa Amori wo ŵenga kusirgha la Yordane ku zambwe, ndi ŵakaronga wose ŵaKanani wo ŵenga kufupi ndi nyanja, kuti Ambuya angukamuska maji ghamu Yordane chifukwa cha ŵaYisraele mpaka po ŵanthu ŵangwambuka, mitima yawo yingusongonoka, ndipo kuti mwawo mwenga umoyo so cha, chifukwa cha ŵaYisraele.

2Pa nyengo yiya Ambuya angunena ndi Yoswa. “Uchite vimayi vya mya ndipo uŵachinje so ŵaYisraele kachiŵi.” 3Yoswa wanguchita vimayi vya mya wanguchinja ŵaYisraele pa Gibeyate-haraloti. 4Chifukwa chakuti Yoswa waŵachinjiye chenga ichi: ŵanthurumi wose wo ŵangutuwa mu Egipiti, wose ŵakurwa nkhondo, ŵangufwiya mu nthowa mu bozwa ŵanguti ŵatuwa mu Egipiti. 5Nanga wose wo ŵangutuwa ŵanguchinjika, kweni ŵanthu wose wo ŵangupapikiya mu nthowa mu bozwa ŵati ŵatuwa mu Egipiti ŵengavi kuchinjika. 6Pakuti ŵangwenda virimika machumi ghanayi (40) mu bozwa, mpaka penipo mtundu wose, ŵanthurumi ŵankhondo wo ŵangutuwa mu Egipiti, ŵangumara chifukwa ŵengavi kuvwiya mazu gha Ambuya; Ambuya angurapa kwaku wo kuti akaŵazomerezganga cha kuwona charu cho Ambuya angurapiya ku auskeu kutipaska, charu chakutaŵara mukaka ndi uchi. 7Viyo ŵenga ŵana ŵawo, wo ŵanguyuskiya mu malo ghawo, ndiwo Yoswa wanguŵachinja; pakuti ŵengavi kuchinjika pa ulendo wawo.

8Khamu lose linguti lachinjika, ŵangutandara mu malo ghawo mu ugoŵi mpaka penipo ŵanguchila. 9Ndipo Ambuya angunena ndi Yoswa, “Msana wale ndatuzgapo kuwere kwa ŵaEgipiti paku imwe.” Viyo malo ghadanika Gilgala#5.9 Gilgala: ndiko kuti kutuzgako. mpaka zuŵa lino.

10Po ŵaYisraele ŵenga ŵeche mu ugoŵi ku Gilgala ŵangusunga phaska pa zuŵa la chumi ndi chinayi la mwezi, ndi mazulo mu madambo gha Yeriko. 11Ndipo ndi mlenji pavuli pa phaska, pa zuŵa leniliya ipo, ŵangurgha vipasi vya charu chiya, makeki ghambura mtupu ndi trigu wakukazinga. 12Mana ghangureka ndi mlenji, penipo ŵangurgha vipasi vya charu cho; ndipo ŵaYisraele kuti ŵanguŵa so ndi mana cha, kweni mu chirimika chiya ŵangurgha vipasi vya charu cha Kanani.

13Penipo Yoswa wenga pafupi pa Yeriko, wangusoska maso ghake wangulereska, wanguwona, munthu wanguma paurongo pake, ndi lipanga lakuwewepuwa mu janja lake; ndipo Yoswa wanguruta kwaku iyo wangunena nayo, “Kumbi iwe wendi ifwe, pamwenga weku ŵakupindikana ŵidu?” 14Iyo wanguti, “Awa, kweni nde wakulamula wankhondo wa Ambuya ndimu ndaziya.” Ndipo Yoswa wanguwa pasi kavunama, wangusopa, ndipo wangunena nayo, “Nchine cho mbuya walanguliya mteŵeti wake?” 15Ŵakulamula wa ŵankhondo wa Ambuya wanguti kwaku Yoswe, “Tuzgako viyato vyako ku marundi ghako; pakuti malo gho wamapo ngakupaturika.” Ndipo Yoswa wanguchita viyo.

Currently Selected:

Yoswa 5: TongaMw

Highlight

Copy

Compare