Yoswa 21

Misumba yakujamo ŵaLevi

(1 Mikoka 6.54-81)

1Sono ŵaraŵara ŵa nyumba za auskeu ŵa ŵaLevi ŵanguza kwaku Eleazara mzukuru ndi Yoswa mwana waku Nuni ndi ku ŵara ŵa nyumba za auskeu ŵa fuku la ŵaYisraele; 2ndipo ŵanguti kwaku wo pa Shilo mu charu cha Kanani, “Ambuya angulanguliya mwaku Mosese kuti ifwe tipaskike misumba yakujamo, pamoza ndi charu cha mauliska gha ng'ombe zidu.” 3Viyo mwa langulu la Ambuya ŵaYisraele wangupaska ŵaLevi misumba iyi ndi charu cha mauliska mu vihara vyawo. 4Ndipo mphenduzga yingutuliya ŵa mbumba yaku Kohati. Viyo ŵaLevi wo ŵenga ŵa mphapu yaku Aroni mzukuru ŵanguronde mu mphenduzga kutuwa ku mafuku ghaku Yuda, Simeoni, ndi Benjamini, misumba chumi ndi yitatu.

5ŴaKohati wo ŵangujapo ŵanguronde misumba chumi, mu mphenduzga kutuwa ku fuku laku Efraimu, fuku laku Dani ndi fuku la nusu laku Manase.

6Ŵagereshoni ŵanguronde misumba chumi ndi yitatu, mu mphenduzga kutuwa ku fuku laku Isakara, fuku laku Ashere, fuku laku Naftali ndi fuku la nusu Jaku Manase mu Bashani.

7Ŵina Merari kwakuyana ndi mbumba zawo ŵanguronde misumba chumi ndi yiŵi kutuwa ku fuku laku Rubene, Gadi ndi fuku laku Zebuluni.

8ŴaYisraele ŵangupaska misumba iyi ndi mauliska ghake mu mphenduzga ku ŵaLevi, nge ndimo Ambuya angulanguliya mwaku Mosese.

9Kutuwa ku fuku laku Yuda ndi kutuwa ku fuku laku Simeoni wangupaska misumba iyi yizumbulika zina, 10yo yingupaskika ku mphapu yaku Aroni, yumoza wa mbumba za ŵina Kohati wo ŵenga ŵaLevi; pakuti mphenduzga yingudanga chawa paku iwo. 11Ŵanguŵapaska Kiriati-arba, Arba wenga wiske waku Anaki (yo ndi Hebroni), mu charu cha mtunthu chaku Yuda, pamoza ndi mauliska ghakuzunguliya ko. 12Kweni minda ya msumba ndi mizi yake yingupaskika kwaku Kalebe mwana waku Yefuni kuŵa yake. 13Ndipo ku mphapu yaku Aroni mzukuru, wangupaska Hebroni, msumba wakupozomokiyako wakubaya, ndi mauliska ghake, Libna ndi mauliska ghake, 14Yatiri, pamoza ndi mauliska ghake, Eshitemo ndi mauliska ghake, 15Holoni ndi mauliska ghake, Debiri ndi mauliska ghake, 16Aini ndi mauliska ghake, Juta ndi mauliska ghake, Beteshemashe ndi mauliska ghake, misumba nkhonde ndi yinayi kutuwa mu mafuku yagha ghaŵi; 17kutuwa ku fuku laku Benjamini Gibeoni ndi mauliska ghake, Gaba ndi mauliska ghake, 18Anatoti ndi mauliska ghake, ndi Almoni ndi mauliska ghake, misumba yinayi. 19Misumba ya mphapu yaku Aroni, ŵazukuru, yose pamoza yenga misumba chumi ndi yitatu pamoza ndi mauliska ghawo.

20Nge nkhuŵakujapo ŵa ŵaKohati wo ŵenga ŵaKohati mbumba za ŵaLevi, misumba yakupaskika kwaku wo yingutuliya ku fuku laku Efraimu. 21Kungupaskika kwaku wo Shekemu, msumba wakupozomokiyako mubaya munthu, ndi mauliska ghake mu charu cha mtunthu chaku Efraimu, Gezere ndi mauliska ghake, 22Kubzaimi ndi mauliska ghake, Bete-horoni ndi mauliska ghake, misumba yinayi; 23kutuliya ku fuku laku Dani, Elteke ndi mauliska ghake, Gibetoni ndi mauliska ghake, 24Aijaloni ndi mauliska ghake, Gatrimoni ndi mauliska ghake misumba yinayi; 25ndipo kutuliya ku fuku la nusu laku Manase, Tanaka ndi mauliska ghake, ndi Gatrimoni ndi mauliska ghake, misumba yiŵi. 26Misumba ya mbumba za ŵina Kohati wo ŵangujapo yenga chumi ndi mauliska ghawo. 27Ndipo ŵina Gereshoni, yumoza wa mbumba za ŵaLevi, kungupaskika kutuliya ku nusu wa fuku laku Manase, Golani mu Bashani ndi mauliska ghake, msumba wakupozomokiyako yo ndi mubaya-munthu, ndi Beshetera ndi mauliska ghake, misumba yiŵi; 28kutuwa mu fuku laku Isakara Kishoni ndi mauliska ghake, Daberata ndi mauliska ghake, 29Jarmutu ndi mauliska ghake, Eneganimi ndi mauliska ghake, misumba yinayi; 30ndipo kutuwa mu fuku laku Ashere, Mishala ndi mauliska ghake, Abadoni ndi mauliska ghake, 31Helkata ndi mauliska ghake, ndi Rehobo ndi mauliska ghake, misumba yinayi; 32kutuwa mu fuku laku Naftali, Kedeshi mu Galile ndi mauliska ghake, msumba wakupozomokiyako mubayamunthu, Hamotidoro ndi maliska ghake, ndi Kartani ndi mauliska ghake, misumba yitatu. 33Misumba ya mbumba za ŵina Gereshoni yenga chumi ndi yitatu pamoza ndi mauliska ghawo.

34Ndipo kuŵakujapo ŵa ŵaLevi, mbumba yaku Merari, wangupaskika kutuwa ku fuku laku Zebuluni, Joknema ndi mauliska ghake; Karta ndi mauliska ghake. 35Dimna ndi mauliska ghake, Nahalala ndi mauliska ghake, misumba yinayi; 36kutuwa ku fuku laku Rubene, Bezere ndi mauliska ghake, Jahazi ndi mauliska ghake, 37Kedemoti ndi mauliska ghake, Mefata ndi mauliska ghake, misumba yinayi; 38kutuwa ku fuku laku Gadi, Ramoti mu Gileada ndi mauliska ghake, msumba wakupozomokiyako mubaya-munthu, Mahanaimi ndi mauliska ghake, 39Heshiboni ndi mauliska ghake, Jezere ndi mauliska ghake, misumba yinayi. 40Misumba ya mbumba yaku Merari, ŵeniwo ndi mbumba zakujapo za ŵina Levi, yenga misumba chumi ndi yiŵi.

41Misumba ya ŵaLevi mukati mu charu cha ŵaYisraele yenga machumi ghanayi pachanya yinkhonde ndi yitatu (48) pamoza ndi charu cha mauliska ghawo. 42Misumba iyi we wose wenga ndi vyaru vyake vya mauliska kwakuwuzunguliya; viyo so ndimo yinguŵiya misumba yose.

43Viyo ndimu Ambuya angupaskiya Yisraele charu cho angurapiya auskeu, ndipo ŵanguti ŵachipoka, ŵangujamo. 44Ndipo Ambuya anguŵapumuzga kosekose nge ndimo angurapiya ku auskeu; pengavi nanga njumoza wa ŵarwani ŵawo yo wangumikana nawo, pakuti Ambuya angupereka ŵakupindikana ŵawo wose mu manja ghawo. 45Pengavi limoza la mapanganu ghose ghamampha gho Ambuya anguchita ku nyumba yaku Yisraele lingutondeka; ghose ghangufiskika.

Currently Selected:

Yoswa 21: TongaMw

Highlight

Copy

Compare