Yoswa 16

Mphaka yaku Efraimu

1Charu chakupaskika ku mphapo yaku Yosefe chingwamba ku Yordane pafupi ndi Yeriko, kuvuma kwa maji gha Yeriko, mu bozwa lo, kutuwa ku Yeriko mpaka ku charu cha mitunthu ku Betele; 2kutuwa ku Betele mpaka ku Luzi, yijumpha mpaka ku Ataroti, charu cha ŵa Araka; 3yisikiya kuchiri ku zambwe ku charu cha ŵaYafaleti, mpaka ku charu cha Bete-horoni wakusika, ndi kulazga ku Gezere, yigota pa nyanja.

4Ŵanthu ŵaku Yosefe, Manase ndi Efraimu, ŵanguronde chihara chawo, 5charu cha ŵaEfraimu ndi mbumba zawo chenga viyo: mphaka ya chihara chawo ku vuma yenga Ataroto-dara mpaka ku Bete-horoni wa nena, 6ndipo mphaka yingurutiliya ku nyanja; ku nkhonde ndi Mikimetate; sono ku vuma mphaka yizunguliya kulazga ku Tanata-solo, yijumpha ndi kulutiliya ku vuma ku Yanoa, 7kutuwa ku Yanoa yisikiya ku Ataroto mpaka ku Nara, yikwaska ku Yeriko, ndi kugota pa Yerdane, 8Kutuwa ku Tapua, mphaka yilazga kuchiri ku zambwe ku msinji Kana, ndi kugota ku nyanja. Ichi ndicho chihara cha fuku la ŵaEfraimu ndi mbumba zawo, 9pamoza ndi misumba yo yinguŵapatulikiya pade ŵaEfraimu mukati mu chihara cha ŵina Manase, misumba yose yiya pamoza ndi mizi yake. 10Ndipuuli kuti ŵanguŵadikiskamo ŵaKanani ŵakuja mu Gezere cha; viyo ŵaKanani ŵakuja mukati mu ŵaEfraimu mpaka ku zuŵa line, kweni ŵaŵa ŵaŵanda ŵakuchita nchitu yakuchichizgika.

Currently Selected:

Yoswa 16: TongaMw

Highlight

Copy

Compare