Yoswa 11

Yoswa wapunda ŵakaronga ŵaku nkhonde

1Ndipo wanguti wavwa ichi Yabini karonga waku Hazoro, wangutuma kwaku Yobabu karonga waku Madoni, ndi karonga waku Shimroni, ndi karonga waku Akishafa, 2ndi ku ŵakaronga wo ŵenga mu mitunthu ya charu chaku nkhonde, ndi mu Araba ku malaŵi kwa Kineroti ndi mu charu cha chidika, ndi mu Nafotodoro ku zambwe, 3ku ŵaKanani ku vuma ndi ku zambwe, Amori, ŵaHiti, ŵaPerese, ndi ŵaYebusi mu charu cha mitunthu ndi ŵaHivi ŵa pasi paku Hermoni mu charu cha Mizpa. 4Ndipo ŵangutuwa, pamoza ndi maŵanja ghawo gha nkhondo, chimzinda chikuru, ŵanthu ŵanandi nge ndi mchenga wapa likumba la nyanja, pamoza ndi ŵakavalo ŵanandi ndi magareta. 5Ndipo ŵakaronga wose yaŵa ŵangusere pa maliŵanja ghawo, ŵanguza ndi kugoŵa pamoza pa maji ghaku Meromo, kurwana ndi ŵaYisraele.

6Ambuya angunena ndi Yoswa, “Ungaŵawopanga wo cha, chifukwa la mawa pa nyengo nge ndi iyi ndikaŵaperekanga wose, ŵakubayika, kwaku Yisraele; mukadengenduwanga ŵakavalo ŵawo, mukawochanga magareta ghawo ndi moto.” 7Kwamabuchibuchi Yoswa wanguŵaziya pamoza ndi nkhondo yake yose, pa maji ghaku Meromo, ndipo wangurwana nawo. 8Ndipo Ambuya anguŵapereka mu janja laku Yisraele, yo wanguŵakoso ndi kuŵadikiska mpaka kwachifika ku Sidoni mukuru ndi Misirefoto-maimi, ndi kuchiri ku vuma mpaka ku dambo la Mizpa; wanguŵabaya, mpaka po wengavi kusiyako nanga njumoza. 9Ndipo Yoswa wanguŵachitiya nge ndimo Ambuya angumupangizgiya; wangudengenduwa ŵakavalo ŵawo, wangocha ndi moto magareta ghawo.

10Yoswa wanguwere kuvuli pa nyengo yeniyiya, wangupoka Hazoro, wangukoso karonga wake ndi lipanga; pakuti kali Hazoro ndiyo wenga mutu wa maufumu ghenigha ghose. 11Ndipo wose ŵakujamo wanguŵaŵika kuwuyi wa lipanga, kuŵamariya limu wose; pengavi wakututa yo wangusiyika wamoyo, Hazoro wangocha ndi moto. 12Ndipo ndi misumba yose ya wakaronga ŵa, ndi ŵakaronga ŵawo wose, Yoswa wanguto ndipo wanguŵakoso ndi lipanga, kuŵamariya limu, nge ndimo Mosese mteŵeti wa Ambuya wangulanguliya. 13Kweni pengavi msumba nanga ngumoza wo unguzengeka pa vimbumila wo ŵaYisraele ŵangocha ndi moto, kupatuwako Hazoro pe; wo Yoswa wangocha. 14Ndipo ŵaYisraele wanguto usambasi wose wa misumba iyi ndi ng'ombe kuŵa muskowo wawo; kweni munthu yose ŵangubaya ndi lipanga, mpaka wanguŵamara, ndipo ŵengavi kusiyako wakututa nanga njumoza. 15Nge ndimo Ambuya angulanguliya Mosese, ndimo Mosese wangulanguliya Yoswa, ndipo Yoswa wanguchitadi viyo; wengavi kusiyako kanthu kaku vyose vyo Ambuya angulanguliya Mosese.

16Yoswa wanguronda charu chose chiya, cha mitunthu ndi chaku mwera ndi charu chose cha Gosheni ndi cha chidika ndi Araba, ndi charu cha mitunthu cha Yisraele ndi chidika chake. 17Kutuwa ku phiri la Halaka, lo litunthumukiya ku Seiri, mpaka ku Balgada mu dambo la Lebanoni musina mwa phiri la Hermoni. Ndipo ŵanguto ŵakaronga ŵawo wose, ŵanguŵapuma ndi kuŵabaya, 18Yoswa wanguchita nkhondo ndi ŵakaronga ŵa, kwanyengo yitali. 19Pengavi msumba wo unguchita chimangu ndi ŵaYisraele, kweni ŵaHivi pe, ŵakuja mu Gibeoni; ŵangutore misumba yose mu nkhondo. 20Pakuti yenga nchitu ya Ambuya kunonopeska mitima yawo kuti ŵazichirwanga ndi ŵaYisraele mu nkhondo, mwakuti ŵaparghanikiye limu tetete, kuti ŵaronde lisungu cha kweni kuti ŵadumulikiye limu, nge ndimo Ambuya angulanguliya Mosese.

21Ndipo Yoswa wanguza pa nyengo yeniyiya, wangupasuwa ŵaAnaki mu charu cha mitunthu, mu Hebroni mu Debiri, mu Anaba, ndi mu charu chose cha mitunthu yaku Yuda, ndi mitunthu yaku Yisraele; Yoswa wanguparghang'a wose pamoza ndi misumba yawo. 22Pengavi wakujapo wa ŵaAnakimu mu charu cha ŵaYisraele; kweni mu Gaza, mu Gata, ndi mu Ashidodi, ndimu ŵanyake ŵangujamo. 23Viyo Yoswa wanguronda charu chose, kwakuyana ndi vyose vyo Ambuya angukamba ndi Mosese; Yoswa wanguchipereka kuŵa chihara ku ŵaYisraele ku fuku ndi fuku ndipo charu chingupumuwa ku nkhondo.

Currently Selected:

Yoswa 11: TongaMw

Highlight

Copy

Compare