Ŵeruzgi 8
8
Kuthera kwa ŵaMidiyani
1Ŵanthu ŵaku Efraimu ŵanguti kwaku iyo, “Nchine ichi wachita kwaku ifwe, pakureka kutidana po ungamurwana ndi ŵaMidiyani?” Ndipo ŵangumuchenya ukongwa. 2Gideoni wanguti kwaku wo, “Nchine cho ine ndachita pa kuyaniskana ndi imwe? Asi kuwunjika vipasi vyaku Efraimu nkhwamampha kwakuruska kuvuna vipasi vyaku Abiezere? 3Chiuta wapereka mu manja ghinu mafumu gha ŵaMidiyani, Orebu ndi Zebe; iko mphanyi ndachitanji ine kweruzgiya paku imwe?” Sono ukari wawo wa paku iyo ungugowoka, wati wakamba ichi. 4Ndipo Gideoni wanguza ndi wangwambuka Yordane, iyo ndi ŵanthu machumi pe chumi ghatatu (300) wo ŵenga nayo pamoza, ŵangulakatuka kweni ŵandondoloskanga mbwenu. 5Viyo ŵanguti ku ŵanthu ŵaku Sukoto, “Chondi ŵapaskeni kurgha ŵanthu wo ŵatindilondo; pakuti ŵalakatuka, pakuti ndindondoloska Zeba ndi Zalmuna, ŵakaronga ŵa ŵaMidiyani.” 6Ndipo ŵaraŵara ŵaku Sukoto ŵanguti, “Kumbi Zeba ndi Zalmuna ŵemu janja lako kale, kuti tipereke kurgha ku liŵanja lako la nkhondo?” 7Gideoni wanguti, “Chamampha, kweni asani Ambuya apereka Zeba ndi Zalmuna mu janja langu, ndazamuthibuska nyama yinu ndi minga ya mu bozwa pamoza ndi mkwakwazu.” 8Kutuwa apa wangukwere ku Penuele, ndipo wanguti wakamba kwaku wo kwakukozgana; waku Penuele ŵangumwamuka uli ndimo ŵangwamukiya ŵaku Sukoto. 9Ndipo ŵanguti ku ŵanthu ŵaku Penuele, “Penipo ndikazanga so mu chimangu, ndikabwanganduliyanga pasi chitanthali ichi.” 10Sono Zeba ndi Zalmuna ŵenga mu Karkoro pamoza ndi liŵanja lawo la nkhondo, akhumba ŵanthu vikwi chumi ndi vinkhonde (15,000), ŵeniwo pe ndi wo ŵangujapo ŵaliŵanja la nkhondo la ŵanthu ŵakuvuma; pakuti vikwi machumi pe chumi ndi machumi ghaŵi (120,000) wo ŵenga ŵakuko malipanga ŵangubayika 11Gideoni wangukwere ku vuma kwa Noba ndi Yogbeha, mu nthowa ya ŵamalonda, ndi wangukoso liŵanja la nkhondo, pakuti liŵanja lo lingutuwako ku ulonda wake. 12Zeba ndi Zalmuna ŵanguthaŵa, ŵanguŵandondoloska ndi ŵanguŵako ŵakaronga ŵaŵi ŵaMidiyani, Zeba ndi Zalmuna, ndipo ŵangumbininiska liŵanja lose la nkhondo. 13Sono Gideoni mwana waku Joashi wanguweko ku nkhondo pakusikiya ku nthowa yaku Herese. 14Ndipo wanguko munyamata waku Sukoto ndi wangumufumba; ndipo wangumulembe ŵaraŵara ndi zinduna zaku Sukoto ŵanthu machumi ghankhonde ndi ghaŵi pachanya ŵankhonde ndi ŵaŵi (77). 15Ndipo wanguza ku ŵaku Sukoto, wangunena nawo, “Ehe, Zeba ndi Zalmuna, paku ŵeniwo imwe mungunditukiyapo kuti, ‘Kumbi Zeba ndi Zalmuna ŵemu janja lako kale, kuti tipaske chiŵande ku ŵanthu ŵako wo ŵalakatuka?’ ” 16Sono wanguto nduna za msumba wo, ndi wanguto minga ya mu bozwa ndi mkakwazu wangukwechuwa ŵanthu ŵaku Sukoto. 17Wangubwanganduliya pasi chitanthali chaku Penuele ndi kubaya ŵanthu ŵa msumba wo.
18Sono wanguti kwaku Zeba ndi Zalmuna, “Ŵepani ŵanthu wo mungubaya pa Taboro?” Iwo ŵangwamuka, “Mwenimo uliri iwe, nawo ŵenga viyo, we yose waku wo; wangukozgana ndi ŵana ŵa karonga.” 19Gideoni wanguti, “Ŵenga ŵana ŵanyangu, ŵana ŵa ama; mo aliri amoyo Ambuya, asani imwe munguŵareka ŵamoyo, mphanyi kuti ndakubayani cha.” 20Ndipo wangunena ndi Yetire mwana wake wa umwali, “Soka uŵabaye.” Kweni munyamata yo kuti wangusoro lipanga lake cha; pakuti wenga ndi mantha, chifukwa wenga muhurwa. 21Sono Zeba ndi Zalmuna wanguti, “Soka wamwene utikoso, pakuti mwenimo waliri munthu, ndimo yiliri nthazi yake.” Ndipo Gideoni wangusoka wangubaya Zeba ndi Zalmuna: ndipo wanguto mapheska gho ghenga mu makhosi gha ŵagamila ŵawo.
Ambuya akawusanga
22Pavuli ŵaYisraele ŵangunena ndi Gideoni, “Utiwuse, iwe, ndi mwana wako pamoza ndi mzuku wako; pakuti watipozomoska ku janja laku Midiyani.” 23Gideoni wanguti, “Ine ndi mwana wangu kuti tikakuwusaninga cha; Ambuya akakuwusaninga.” 24Ndipo Gideoni wanguti kwaku wo, “Ndirekeni ndikupempheni; munthu we yose wandipaske ndeŵeleŵi zakuskoŵeka.” (Pakuti ŵenga ndi ndeŵeleŵi za golide, chifukwa ŵenga ŵaIshimaele.) 25Ndipo ŵangwamuka, “Tikakupaskanga izi ndi mtima wose.” Ndipo wangutandika saru, munthu yose wangupong'apo ndeŵeleŵi zo zakuskoŵeka. 26Ndipo uzitu wa ndeŵeleŵi za golide zo wangupempha wenga mashekelo chikwi chimoza ndi machumi pe chumi ghankhonde ndi ghaŵi (1,700) gha golide; pamoza ndi mapheska ndi vyakupayika ndi vivwaru viyera vyo ŵavwaranga ŵakaronga ŵa ŵaMidiyani, pamoza ndi maunyolo gho ghenga mu makhosi gha ŵagamila ŵawo. 27Ndi vyenivyo Gideoni wangupanga raya la uzukuru wanguliŵika mu msumba wake mu Ofra; ndipo ŵaYisraele wose ŵanguchita uheni paku lo mwenimuwa, mwakuti lingusanduka chiŵana kwaku Gideoni ndi ku mbumba yake. 28Viyo Midiyani wanguthereskeka ndi ŵaYisraele, ndipo kuti ŵanguwerezgapo matukutuku so cha. Ndipo charu chingupumuwa virimika machumi ghanayi (40) mu mazuŵa ghaku Gideoni. 29Yerubala mwana waku Joashi wanguruta kwachija mu nyumba yake yapa mtima wake. 30Sono Gideoni wenga ndi ŵana machumi ghankhonde ndi ghaŵi (70) wa mphapu yake, pakuti wenga ndi ŵanthukazi ŵanandi. 31Ndipo mbiligha yake yo yenga mu Shekemu yingumupapiya mwana yumoza, wangumudana zina lake Abimeleke. 32Ndipo Gideoni mwana waku Joashi wangufwa mu ukhongwe wamampha, ndipo wanguŵikika mu muunda waku Joashi awiske, pa Ofra wa ŵina Abiezere.
33Wati wafwa Gideoni, ŵaYisraele ŵangung'anamuka so ŵanguchita uheni wakundondoloska ŵaBala, ndipo ŵanguchita Bala-beriti#8.33 Bala-beriti: ndiku kuti chiuta wa phanganu. kuŵa chiuta wawo. 34Ndipo ŵaYisraele kuti ŵangukumbuka Ambuya Chiuta wawo cha, yo wanguŵapozomoska ku janja la ŵakupindikana ŵawo wose kosekose; 35ndipo ŵengavi kurongo wezi ku mbumba yaku Yerubala (yo ndi Gideoni) kumuwonga chifukwa cha umampha wose wo wanguchitiya Yisraele.
Currently Selected:
Ŵeruzgi 8: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
