Ŵeruzgi 1
1
Yuda wepa nkhondo
1Pavuli pa nyifwa yaku Yoswa ŵanthu ŵangufumba ku Ambuya, “Ndiyani yo wakadanganga kutikwere ifwe kwachimikana ndi ŵaKanani kurwana nawo?” 2Ambuya anguti, “Yuda wakakweranga, ehe, ndapaska charu cho mu janja lake.” 3Ndipo Yuda wanguti kwaku Simeoni mbali wake, “Uzi nani ku charu chakupaskika kwaku ine, mwakuti tirwani ndi ŵaKanani; ndipo ine nani nkharutanga nawe ku charu chakupaskika kwaku iwe.” Viyo Simeoni wanguruta nayo. 4Sono Yuda wangukwera ndipo Ambuya angupereka ŵaKanani ndi ŵaPerezi mu manja ghawo; ndipo ŵanguthereska vikwi chumi vyaku wo pa Bezeki (10,000). 5Ŵanguza paku Adonibezeki pa Bezeki, ŵangurwana nayo, ŵanguthereska ŵaKanani ndi ŵaPerezi. 6Adonibezeki wanguthaŵa, kweni ŵangumudondoloska, ndi ŵangumuko, ŵangudumuwa vikumbu vyake vikuru vya ku manja ndi vikumbu vikuru vyaku marundi. 7Ndipo Adonibezeki wanguti, “Ŵakaronga machumi ghankhonde ndi ghaŵi (70) ŵakudumulika vikumbu vyawo vikuru vyaku manja ndi ku marundi ŵatondonga livivu kusi ku gome langu; nge ndimo ndinguchitiya, viyo Chiuta wanditayiya thayu.” Ndipo ŵanguza nayo ku Yerusalemu, wangufwiya kwenikuwa.
8Ŵanthu ŵaku Yuda ŵangurwana ndi Yerusalemu, ndipo ŵanguwukwamphuwa, ŵanguwukoso ndi lipanga, ŵangocha msumba wo. 9Ndipo pavuli ŵaku Yuda ŵangusika kwachirwana ndi ŵaKanani wo ŵajanga mu charu cha mitunthu, mu Negebe, ndi mu charu cha chidika. 10Ndipo yuda wanguruta kwachimikana ndi ŵaKanani wo ŵajanga mu Hebroni zina la Hebroni kale lenga Kiriata-arba, ndipo wanguthereska Sheshai, Ahimani ndi Talmai. 11Kutuwa kuwa wanguruta kumikana ndi ŵakuja mu Debiri, zina la Debiri lenga Kiriata-seferi. 12Ndipo Kalebe wanguti, “Yo warwanenge ndi Kiriata-seferi ndi kuwuto, ndikampaskanga Akisa mwana wangu munthukazi kuŵa muwoli.” 13Ndipo Otniele mwana waku Kenazi, mhurwa waku Kalebe, wanguwuto; viyo wangumpaska Akisa mwana wake munthukazi kuŵa muwoli wake. 14Wanguti waza kwaku iyo wangumuchichizga kuti wapemphe munda ku awiske; ndipo iyo wangusika pa mbunda yake, Kalebu wanguti kwaku iyo, “Nchine cho unkhumba?” 15Iyo wanguti, “Mundipaske chawezi; pakuti mwandiŵika mu charu cha Negebu mundipaske so visima vya maji.” Ndipo Kalebu wangumpaska visima vyakunena ndi vyakusika.
16Ndipo ŵamphapu yaku Keni, msimbweni waku Mosese, ŵangukwera pamoza ndi ŵanthu ŵaku Yuda kutuwa ku msumba wa migwalangwa mu bozwa laku Yuda, wo we mu Negebe pafupi ndi Arada; ndipo ŵanguruta ndi ŵanguzenga pamoza ndi ŵanthu. 17Ndipo Yuda wanguruta kwaku Simeoni mwana munyake, ndipo ŵanguthereska ŵaKanani wo ŵajanga mu Zefa, ŵanguŵaphwanya kuŵamara. Viyo zina la msumba lingudanika Horma. 18Yuda wangupoka so Gaza ndi charu chake, Ashikeloni ndi charu chake, ndi Ekroni ndi charu chake. 19Ambuya ŵenga ndi Yuda, ndipo wanguto charu cha mtunthu, kweni wangutondeka kudikiska ŵakuja mu charu chachidika chifukwa ŵenga ndi magareta gha visulo. 20Ndipo Hebroni wanguperekeka kwaku Kalebu, uli ndimo Mosese wangukambiya; ndipo wangudikiskamo ŵana ŵanthurumi ŵatatu ŵaku Anaki. 21Kweni ŵanthu ŵaku Benjamini kuti ŵanguŵadikiskamo cha ŵaYebusi wo ŵajanga mu Yerusalemu; viyo ŵaYebusi ŵanguja pamoza ndi ŵanthu ŵaku Benjamini mu Yerusalemu mpaka zuŵa lino.
22Nyumba yaku Yosefe nayo yingukwera kwachimikana ndi Betele; ndipo Ambuya ŵenga nawo. 23Ndipo nyumba yaku Yosefe yingutuma kwachipachiya Betele (zina la msumba wo kale lenga Luzi). 24Ndipo skoli zo zinguwona munthu wachituwa mu msumba, ndipo ŵanguti kwaku iyo, “Tiromba, utirongo nthowa yo yisere mu msumba, ndipo iwe tikakuchitiyanga wezi.” 25Ndipo wanguŵalongo nthowa yakuserere mu msumba; sono iwo ŵangukoso msumba wo ndi lipanga, kweni munthu yuwa ŵangumureka, iyo ndi ŵanyumba yake kuti ŵarutenge. 26Ndipo munthu yo wanguya ku ŵaHiti ndi wanguzenga msumba wanguwudana zina lake Luzi, ili ndilo zina lake mpaka zuŵa lino. 27Manase kuti wangudikiska ŵakuja mu Betesheani cha ndi mizi yake, pamwenga Tanaka ndi mizi yake, pamwenga ŵakuja mu Doro ndi mizi yake, pamwenga ŵakuja mu Iblamu ndi mizi yake, pamwenga ŵakuja mu Megido ndi mizi yake, kweni ŵaKanani ŵangukaniriya kuja mu charu chiya. 28Penipo ŵaYisraele ŵangukuwa munthazi ŵanguŵika ŵaKanani ku nchitu yakuchichizgika, kweni kuti ŵanguŵadikiskamo wose cha.
29Ndipo Efraimu kuti wanguŵadikiskamo cha ŵaKanani wo ŵajanga mu Gezere, ŵanguja mu Gezere mukati mwawo.
30Zebuluni kuti wangudikiskamo cha ŵakuja mu Kitroni, pamwenga ŵakuja mu Nahalolu; kweni ŵaKanani ŵajanga mukati mwawo, ndipo ŵanguŵeteke ku nchitu yakuchichizgika.
31Ashere kuti wangudikiskamo cha ŵakuja mu Ako, pamwenga ŵakuja mu Sidoni, pamwenga ŵamu Ahlaba, pamwenga ŵamu Akizibi, pamwenga ŵamu Helba, pamwenga ŵamu Afiki, pamwenga ŵamu Rehobo. 32Kweni ŵina Asheri ŵajanga mukati mu ŵaKanani, ŵakuja mu charu cho; pakuti ŵengavi kuŵadikiskamo.
33Naftali kuti wangudikiskamo cha ŵakuja mu Beteshemeshe, pamwenga ŵakuja mu Beteana, kweni ŵajanga mukati mu ŵaKanani, ŵakuja mu charu cho; ndipuuli ŵakuja mu Beteshemeshe ndi ŵamu Beteana ŵanguŵeteke kuchita nchitu yakuchichizgika yaku wo.
34Amori ŵangututuzgiya ŵina Dani kuvuli mu charu cha mitunthu, kuti ŵanguŵazomerezga cha kusikiya mu charu cha chidika, 35Amori ŵangujaririya mu Har-heresi, mu Aijaloni, ndi mu Shalbimu, kweni janja la nyumba yaku Yosefe linguŵazitiska iwo weniukongwa, ndipo ŵanguŵeteke ku nchitu ya kuchichizgika. 36Mphaka ya Amori yingwamba pasendemula Akrabimu, kutuwa pa Sela ndi kukwera.
Currently Selected:
Ŵeruzgi 1: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
