Yesaya 65
65
Wambura kuvwiya wakalangikanga
1Ndenga wakurongosoleka kupenjeka ndi wo ŵengavi kundifumbiriya; ndenga wakurongosoleka kusanirika ndi wo ŵengavi kundipenja.
Ine ndinguti, “Ndine pano, ndine pano,”
ku mtundu weniwo wengavi kudana pa zina langu.
2Ndingutambaruwa manja ghangu
zuŵa lose ku ŵanthu ŵakugaruka, wo ŵatenda mu nthowa yo kuti njamampha cha, ŵakurondo fundu zaŵeneko ŵija;
3ŵanthu wo ŵatindisosomo
ku maso ghangu kwamkiyakiya, ŵakusaska chisopo mu minda ŵakocha vyachema pa nchelwa;
4wo ŵaja mu miunda,
ndipo ŵacherezga usiku wose mu malo gha kuwubende, wo ŵaturgha nyama ya nkhumba, ndipo kusazga kwa vinthu vya ukazuzi kwe mu viyaŵi vyawo;
5ŵeniwo ŵatiti, “Ujiwone wamweni, reka kuza kufupi kwangu, pakuti
ndi kuŵikika pakundija kwaku iwe.”
Yaŵa ndi usi mu mphunu zangu, moto wo unyeka zuŵa lose.
6Ehe, chikulembeka paurongo pangu;
“Kuti ndikachetamanga cha ndikawerezgiyangapo, inya, ndikawerezgiyangapo mu chifuŵa chawo,
7maulakwi ghawo ndi maulakwi gha auskewo pamoza nawo, atiti Ambuya;
chifukwa ŵangocha vyachema pa mapiri
ndi kundituka pa mapiri pachanya, mu chifukwa cha machitidu ghawo ghakudanga ndikaŵapimiyanga mphoto yapa chifuŵa chawo.”
8Viyo atiti Ambuya:
“Uli ndimo vinyo wasanirikiya mu khoroza, ndipo watiti, ‘Mungalinanga cha, pakuti mwe chitumbiku mukati mwake,’
viyo so ndikachitanga chifukwa cha mteŵeti wangu kuti ndi kaŵamaranga wose cha.
9Ndikatuzganga mphapu mwaku Yakobe;
ndi mwaku Yuda wakuhara mapiri ghangu;
ŵakusankhika ŵangu ŵakaharanga, ŵateŵeti ŵangu ŵakajanga mwenimuwa.
10Sharoni wakasandukanga uliska wa miskambo,
ndi chinkhwau cha Akoro#65.10 Akoro: ndiku kuti dambo la suzgu. malo gha kugonamo miskambo ya ŵanthu ŵangu wo ŵatindipenja.
11Kweni imwe mupata Ambuya, imwe mwaruwa phiri langu lakupaturika, imwe mumika gome chifukwa cha Mwaŵi
muzaza vyandi vya vinyo wakusazga kuzaziya Nyifwa;
12ine ndikakurongosoliyaninga ku lipanga,
ndipo imwe mose mukakotamiyanga pasi kubayika; chifukwa, penipo ndingudana, kuti mungwamuka cha, po ndingurongoro, kuti mungutegherezga cha, kweni mukuchita cho chenga uheni mu maso ghangu, mungusankha cho ine ndengavi kukondwa nacho.”
13Chifukwa chenichi atiti viyo Ambuya Chiuta:
“Ehe, ŵateŵeti ŵangu ŵakarghanga, kweni imwe mukaŵanga ŵanja;
ehe, ŵateŵeti ŵangu ŵakamwanga, kweni imwe mukaŵanga ŵanyota;
ehe, ŵateŵeti ŵangu ŵakakondwanga,
kweni imwe mukalengeskekanga;
14ehe, ŵateŵeti ŵangu ŵakambanga
mu chimwemwe cha mtima
kweni imwe mukaliyanga chifukwa cha kuŵaŵa kwa mtima,
ndipo mukatenjenga chifukwa cha suzgu ya mzimu.
15Mukajowolenga zina linu kuti
litembeke ndi ŵakusankhika ŵangu, ndipo Ambuya Chiuta akuperekaninga ku nyifwa;
kweni ŵateŵeti ŵake wakaŵadananga zina linyake.
16Viyo kuti yo watijitumbika mu charu
wakajitumbikanga mwaku Chiuta wa uneneska,
ndipo yo wachita rapu mu charu wakarapiyanga mwaku Chiuta wa uneneska;
chifukwa masuzgu ghakudanga gharuwika ghabisika kwangu ku maso.
Kuchanya kufya ndi charu chapasi chifya
17“Pakuti ehe, ndilenga machanya
ghafya ndi charu chapasi chifya; ndipo vinthu vyakudanga kuti vikakumbukikanga cha, pamwenga kuvighanaghana.
18Kweni mukasekerenga ndi
kukondwere muyaya mwaku cho ndilenga; pakuti ehe,
ndilenga Yerusalemu kuŵa likondwa, ndi ŵanthu ŵake kuŵa ndi chimwemwe.
19Ndikakondwanga mu Yerusalemu ndikasekerenga mu ŵanthu ŵangu; chiwawa cha kuliya kuti
chikavwikanga so cha mwaku iyo ndi kuliya kwa masuzgu.
20Kuti mukawonekanga so litema lakuja lamoyo mazuŵa ghamanavi cha muwa,
pamwenga khongwe lambura kufiska mazuŵa ghake,
pakuti mwana wakafwanga wachiŵa mura wa virimika machumi pe chumi,
ndipo muheni wa ura wa virimika machumi pe chumi wakaŵanga wakutembeka.
21Ŵakazenganga zinyumba ŵakajanga mwaku zo;
ŵakapandanga minda ya mphereska ndi kurgha vipasi vyake.
22Kuti ŵakazenganga ndi kujamo munyake cha;
kuti ŵakapandanga kuti warghenge ndi munyake cha;
pakuti nge ndi mo ghaliri mazuŵa gha muti ndimu ghakaŵiyanga mazuŵa gha ŵanthu ŵangu,
ndipo ŵakusankhika ŵangu ŵakakondwanga nyengo yitali ndi nchitu ya manja ghawo.
23Kuti ŵakatakatakanga kwa ŵakacha,
pamwenga ŵana ŵakupapiya chisungu cha;
chifukwa ŵakaŵanga ŵana ŵakutumbikika ŵa Ambuya ndi ŵana ŵawo pamoza nawo.
24Ŵenga ŵandadane, ine ndamukenge,
penipo ŵeche kurongoro, ine ndikavwanga.
25Mphumphi ndi mwana wa mberere vikarghiyanga pamoza, nkharamu yikarghanga uteka nge ndi ng'ombe;
fuvu likaŵanga kurgha kwa njoka. Kuti vikapwetekanga pamwenga kwananga cha,
mu phiri langu lose lakupaturika, atiti Ambuya.”
Bible Society of Malawi