Yesaya 6
6
Chiwona chaku Yesaya ndi kudanika kwake
1Mu chirimika cho karonga Uziya wangufwiya ndinguwona Ambuya akuja ndeku pa chitengo cha ukaronga, pachanya ndi akukwezgeka, ndipo vivwalo vyawo vinguzaza kasopi. 2Pachanya paku iwo panguma ŵaserafi, yumoza ndi yumoza wenga ndi mapapa ghankhonde ndi limoza, ndi mapapa ghaŵi wanguvimba chisku chake, ndi ghaŵi wanguvimba marundi ghake, ndipo ndi ghaŵi wanguphururuka. 3Ndipo yumoza wangudanirizga ku munyake wanguti:
“Mtuŵa, mtuŵa, mtuŵa ndi Ambuya ŵa maŵanja,
charu chose chapasi chazara unkhankhu wake.”
4Ndipo viŵanja vyapa khomo vingusukunika pa mazu ghaku yo wangudanirizga, ndipo nyumba yinguzazika ndi usi. 5Ndipo ine ndinguti, “Wasoka ndine! Pakuti ndasoŵa, pakuti nde munthu wa milomo yambura ku photoka, ndipo ndija mukati mu ŵanthu ŵa milomo yambura kuphotoka, pakuti maso ghangu ghawona karonga Ambuya ŵa maŵanja!” 6Sono yumoza wa ŵaserafi wanguphururukiya kwangu, wakuŵa ndi ga lakukole mu janja lake lenilo wanguto ndi mbanu pa chiguŵa cha sembe. 7Ndipo wangukwaska mlomo wangu, ndi wanguti, “Awona, ichi chakwaska milomo yako, kulakwa kwako kwatuzgikapo, ndipo uheni wako wagowokeleka.” 8Ndipo ndinguvwa mazu gha Ambuya ghakuti, “Ndikatumanga yani, ndipo ndiyani wakatirutiyanga?” Sono ine ndinguti, “Ndine pano! Nditumeni.” 9Ndipo iwo anguti, “Ruta, ukakambe ku ŵanthu yaŵa:
‘Kuvwa mutuvwa, kweni kuti muwamo cha;
kulereska mulereska, kweni kuti muziŵa cha.’
10Utuluvye mitima ya ŵanthu yaŵa,
makutu ghawo ghaŵe ghazituzitu,
ndi ujare maso ghawo;
vinu ŵangawona ndi maso ghawo,
ŵangavwa ndi makutu ghawo,
ndi ŵangawomo ndi mitima yawo,
ŵangang'anamuka ndi ŵangachizgika.”
11Sono ine ndinguti, “Mpaka zuŵanje, Ambuya?” Ndipo iwo anguti:
“Mpaka penipo mizi yaŵa mapopa
mwambura ŵakujamo,
ndi zinyumba zambura ŵanthu,
ndipo charu chaŵiya limu uyiku.
12Ambuya atuzgiya ŵanthu kutali ukongwa,
ndipo malo ghakulekeka ghaŵa ghanandi mukati mu charu cho.
13Ndipo chingana mungaja chigaŵa chimoza pe cha vigaŵa chumi,
nacho chikafyanga so,
uli ndi muti wa muŵanga pamwenga wa nthunthu,
wo chipandu chake chijaririya kuma
asani wadumulika.”
Mbutu yakupaturika ndiyo chipandu chake.
Bible Society of Malawi