Yesaya 44
44
Ŵangoza vya waka
1“Kweni sono ayivwa, Yakobe we muŵanda wangu,
Yisraele mweniyo ndasankha!
2Viyo atiti Ambuya wo angukupanga,
wo angukuumba kutuwa ku chibali ndipo akakovyanga:
Ungopanga cha Yakobe, mteŵeti wangu,
Yeshuruni#44.2 Yeshuruni: ndi zina linyake laku Yisraele. yo ndasankha.
3Pakuti ndikadiranga maji pa charu
cha chiparamba, ndi tumisinji pa charu chiyumu;
ndikapunguliyanga Mzimu wangu, pa mphapu zinu,
ndi chitumbiku changu pa, wakupakika ŵinu.
4Ŵakamenga uli mbuteka mukati mu maji,
uli ndi sungwi mu timisinji twakwenda.
5Uyu wakambanga, ‘Nde wa Ambuya,’
munyake wakajidananga ndi zina laku Yakobe,
ndi munyake wakalembanga pa janja lake, ‘Wa Ambuya,’
ndi kujipaska chiwongo cha zina laku Yisraele.”
6Viyo atiti Ambuya, Karonga waku Yisraele
ndi Muwombozi wake, Ambuya ŵa maŵanja:
“Ndine wakudanga ndipo ndine wakumariya;
pade paku ine palivi chiuta.
7Njani wakukozgana nane? Rekani wamemeze ichi,
rekani wataule ndi wachirulike paurongo pangu.
Njani yo wataula kutuwa ku mwaka vinthu vyo vikazanga?
Rekani watinene vyenivyo vikawangako.
8Mungopanga cha, chingana nkhufipa mtima;
kumbi ndilivi kumuneniyani kutuwa ku vya mwaka ndi kuvitaula?
Imwe mwe ŵakaboni ŵangu!
Kumbi pe chiuta munyake pade paku ine?
Palivi Jarawe, ine ndindaliziŵe nanga ndimoza.”
9Wose wo ŵachita ŵangoza ŵe kanthu cha, ndipo vinthu vyo ŵakondweremo vitanduwa kanthu cha; ŵakaboni ŵawo kuti ŵawona nanga nkhuziŵa cha, kuti ŵangalengeskeka. 10Mbayani wo ŵatata chiuta pamwenga ŵatenguwa ngoza yo kuti watanduwa kanthu cha? 11Ehe, ŵanyake wose ŵakalengeskekanga, ndipo ŵamisili mbanthu ŵaka, ŵalekeni ŵawungane wose, ŵalekeni ŵazichima pakweru ŵakatenthemeskekanga ŵakalengeskekiyanga pamoza.
12Wakusula visulo wavichita mtundu ndipo wativichita pa maka; wativijarika ndi zinyundu ndi janja lake la nthazi; watufwa msala ndipo nthazi yake yigongowa, watumwa maji cha ndi watufwa chiparantha. 13Ng'ombwa ya miti yatambaluwa chingwe, yitichilembe; ndi chakulembe, watichilongoso kawidu kake ndi chakupaliya, ndipo watichilongoso mu kaŵidu ka munthu, ndi unozgi wa munthu, kuja mu nyumba. 14Wateme pasi masidara, pamwenga wasankha muti wa mbawa pamwenga wa nthunthu ndipo watiuleka kuti ukuwe ndi nthazi mukati mu miti ya mu dondo, wapanda muti wa mulanji ndipo vuwa yitiulera. 15Pavuli utumuŵiya munthu nkhuni, watopo maka ghanyake watotha, wapemba moto ndi watocha chiŵande, ndipo so wapanga chiuta ndi watimusopa, watichichita kuŵa changoza ndi watichilambiya. 16Chigaŵa chimoza watocha pa moto, chigaŵa chinyake waturgha nyama, watocha nyama ndi waguta; ndipo so watotha ndi watiti, “Oho, ndafunda, ndauwona moto!” 17Ndipo chakujako watichipanga chiuta, ngoza wake, ndipo watichijikamiya ndi kuchisopa, waromba kwaku cho ndi watiti, “Ndipo zomoske pakuti ndiwe chiuta wangu!”
18Kuti waziŵa cha, chingana nkhuti wateska cha, pakuti wajara maso ghawo, alinga waleke kuwona, ndi zeru yawo, alinga ŵaleke kuwamo. 19Palivi yumoza wakughanaghana, chingana nkhuti pe zeru pamwenga kuteska kunena kuti, “Chigaŵa chimoza ndinguwocha pa moto, ndipo ndinguwocha chiŵande pa maka ghake, ndinguwocha nyama ndipo ndargha ndipo kumbi ndichitenge vyakujapo vyake kuŵa ukazuzi? Kumbi ndikajikamiyanga paurongo pa muti?” 20Waturgha chakurgha cha choto mtima wakujipusika wamurongozge kwawaka, ndipo kuti waziŵa kujipozomoska cha pamwenga kunena, “Kumbi kuti mwe utesi cha mu janja langu la marghe?”
Ambuya ndi mtaski waku Yisraele
21Kumbuka ivi vinthu, Yakobe we,
ndi Yisraele pakuti we muŵanda wangu;
ndingukuumba, we muŵanda wangu;
Yisraele we, kuti ndikakuruwanga cha ine!
22Ndapeya mautimbanizi ghako uli ndi mtambo,
ndi uheni wako uli ndi munkhorwe;
were kwaku ine, pakuti ndakuwombo.
23Mbani mwa machanya, pakuti Ambuya achichita,
kamburani, mwa ndimba za charu chapasi;
sereni mukumba, mwa mapiri mwe,
wa lisuwa we, ndi muti wose wa mwake!
Pakuti Ambuya awombo Yakobe,
ndipo akakakhuskikanga mwaku Yisraele.
24Viyo ndimu atiti Ambuya, Muwombozi winu,
yo wangumuumbani kutuwa ku chibali:
“Ndine Ambuya, mweniyo wangulenga vinthu vyose,
yo yija pe wangutambaruwa machanya,
yo wangutandika charu chapasi
yo wenga nani pamoza njani?
25Yo wasuska vyakuloska vya ŵatesi,
ŵakombezi wati ŵasanduska ŵabeleŵeza;
mweniyo wawezge vuli ŵanthu ŵazeru,
ndipo zeru yawo yisanduka kupusa;
26mweniyo wakhozga mazu gha ŵateŵeti ŵake,
ndipo wafiska fundu za mathenga ghake,
mweniyo watiti gha paku Yerusalemu,
‘Wakajangamo ŵanthu,’ ndi gha mizi yaku Yuda,
‘Yikazengekanga; ndipo ndikasoskanga so malo ghawo gha mapopa’;
27mweniyo watiti ku ndimba,
‘Ukamuke, ndikakamuskanga misinji yako’;
28mweniyo watiti gha paku Sirusi.
‘Ndi mliska wangu,
ndipo wakafiskanga chose cho ndikhumba’;
watiti gha paku Yerusalemu, ‘Wakazengekanga,’
ndi gha nyumba yakupaturika,
‘Chiŵanji chako chikamikikanga.’ ”
Bible Society of Malawi